EXPLAINERS

Pihadong malaking celebration ang inihahanda ng pamilya na ito sa Ohio, USA taun-taon.

Paano ba naman kasi, ang buong mag-anak, iisa lang ng birthday.

Ang buong detalye ng nakatutuwang kwento, eto.

Unang beses na nag-date ang magkasintahang sina Scierra Blair at José Ervin ilang araw makalipas ang August 18, 2022 na siya palang birthday ng dalawa.

Noong una ay inakala pa ni José na nagbibiro si Scierra nang sabihin nito na magkapareho sila ng birthday.

Nagplano pa raw ang dalawa kung paano nila isi-celebrate ang birthday nila nang magkasama sa unang pagkakataon at naisip na manood ng basketball game, magpunta sa aquarium, o kaya naman ay mag-brunch o dinner date.

Pero pagkalipas ng isang taon, madaling araw ng August 18, natagpuan na lang ng dalawa ang mga sarili nila sa isang ospital dahil isinilang ni scierra ang kanilang kambal na anak na sina José Ervin III na naunang lumabas noong 12:35 A.M. at pagkatapos ng isang minuto ay sumunod naman si Ar’ria Lannette Ervin, kung kaya’t literal na magkakapareho ang petsa ng kanilang kapanganakan at birthday.

Bukod sa magkaparehong birthday, kapwa raw nananalaytay sa dugo ng pamilya nila Scierra at José ang pagkakaroon ng kambal.

Samantala, para kay José, ang mga anak nila ni Scierra ang itinuturing niyang mga regalo na natanggap niya noong taon na ‘yon.

Ikaw, gusto mo rin ba ng malaking family birthday celebration taun-taon?

Sa halip na ginhawa ang maramdaman ng lalaki sa kaniyang inorder na hot drink, naging disgrasya pa at nauwi sa pagkakaospital niya at pagkakalapnos ng kaniyang balat!

Kung paano nauwi sa ganitong sitwasyon ang lalaki, eto.

Sa isang Starbucks branch sa Los Angeles, California, dumaan sa drive-thru ang noo’y nagtatrabaho bilang delivery driver ng logistics company na Postmates si Michael Garcia at um-order ng tatlong venti-sized medicine ball tea.

Makikita sa isang CCTV footage na ilang sandali matapos iabot ng barista kay Garcia ang kaniyang orders, tumapon ang laman ng isa sa mga baso.

Ayon sa abogado ni Garcia na si Nick Rowley, nagtamo ang lalaki ng third-degree burn sa maselang bahagi ng kaniyang katawan at nagkaroon ng disfigurement sa kaniyang balat.

Isang reklamo ang isinampa kung saan sinasabing pumalya ang barista na selyahan ang isa sa mga baso at nilabag nito ang duty of care kung kaya ito tumapon sa bandang hita ni Garcia.

Inawardan ng jury ng Los Angeles County ang lalaki ng 50 million U.S. dollars na may katumbas na 2.9 billion pesos na siya namang pinaniniwalaan ng Starbucks na masyado raw mataas.

Bagama’t nakikisimpatya ang starbucks sa nangyari sa kanilang customer, umapela ito at sinabing committed sila sa kanilang safety standards at hindi sila sumasangayon sa desisyon ng jury na sila ang may kasalanan sa nangyari.

Samantala, hindi na bago ang ganitong insidente dahil nangyari rin pala ito noong 1994 sa isang babaeng customer ng isang kilalang fastfood chain kung saan nagtamo rin ito ng third-degree burn habang sinusubukang buksan ang isang kape na binili rin nito sa drive-thru.
Ang babae ay makatatanggap sana ng award na nagkakahalaga ng tumataginting na 3 million U.S. dollars ngunit binabaan ito ng judge at ginawa na lang 600,000 U.S. dollars.

Ikaw, ano ang una mong gagawin kung sa’yo mangyari ang kaparehong insidente.

Mga baryang piso, hindi raw dapat iniismol dahil pwede ka nitong gawing milyonaryo? Ilang coin sellers mula sa probinsya, dumayo pa sa maynila para lang ibenta ang kanilang mga antigong barya dahil sa pag-asa na kikita sila ng malaking pera.

Ikayayaman mo nga ba nila ito o ikakasakit lang ng ulo? Ang kwento, eto.

Nagtipon sa isang apartment sa Loyola Heights, Quezon City ang mga taong nagmamay-ari at nakapagtabi pa ng mga lumang one peso coins mula noong 1971, 1972, at 1974 para ibenta sana sa isang grupo ng coin buyers sa halagang 25,000 pesos kada piraso.

Dahil sa malaking offer, mayroong mga coin sellers na talagang lumuwas pa mula sa kani-kanilang mga probinsya katulad ng magkaibigang itinago sa pangalang Simon at Gero mula sa Quezon Province.

Ayon kay Gero, mayroong dumating na suki na may kakilalang ahente na bumibili ng mga piso mula sa mga nasabing taon. Sa laki ng bentahan, aabutin sana ng 12 million pesos ang kikitain nila ni Simon.

Bukod sa magkaibigan, nagbenta rin ng mga barya ang tanod na si Manuel at kikita sana ng halos 200k pesos.

Ngunit natagalan bago sila binayaran ng mga ahente at nangatwiran na nasa loob daw ng isang vault ang perang pambayad sa kanila at mabubuksan lang daw kung makukuha ng mga ahente ang isa sa mga hinahanap nilang rare na 1971 one peso coin kung saan makikita sa harapan nito si Dr. Jose Rizal at sa likuran naman ay ang nakabuklat na libro ng Noli Me Tangere.

Dahil sa pagdagsa ng mga coin sellers na nagdedemand na ng bayad mula sa mga ahente, ipinatawag ng Brgy. Captain ang owner ng apartment at dumating ang dalawang lalaki at isang babae.

Pero ang sinasabing rare na 1971 one peso coin, hindi naman daw pala talaga nag-eexist dahil ayon sa isang numismatist o coin collector o expert, wala raw ginawang ganoong barya noong 1971.

Pero nabuhayan ang mga selers nang nagpadala ng text ang isa sa mga ahente at sinabing mababayaran na nila ang mga ito, ngunit sa kasamaang palad, nang bumalik ang mga seller sa apartment ay nakasibat na ang mga ahente at nag-message pa na inilipat daw ang mga barya dahil sa takot ng mga ito na ma-holdap.

Samantala, dahil sa pandarayang sinapit, ang iba sa mga na-scam ay magsasampa raw ng reklamo.

Ikaw, na-scam ka na rin ba noon?

Paalala sa mga magulang! Mas higpitan ang pagbabantay sa mga anak, lalo na sa mga toddler na wala pang ka-muwang muwang, kung ayaw niyong gulatin kayo ng mga anak niyo sa mga napupulot ng mga ito na inaakala nilang laruan!

Ang buong detalye, eto.

Sa isang CCTV footage na nakuhanan sa loob ng isang bahay, makikita ang isang bata na lumapit sa kaniyang nanay na kasalukuyang nagpapahinga noong mga oras na ‘yon.

Ang bata, mayroong binitbit na maliit na kulay itim na bagay mula sa kusina at ipinatong pa ito sa ibabaw ng kama, at nang makita ito ni Daniela, hindi niya naiwasang mapasigaw dahil sa sobrang gulat.

Sa isang panayam, sinabi ni Daniela na nagulantang na lang siya nang makita na ang hawak pala ng kaniyang anak ay isang patay na daga!

Agad na itinapon ni Daniela ang bubwit at hinugasan ang kamay ng kaniyang anak dahil may katagalan ang naging exposure nito sa dumi na dala ng daga dahil nakita niya pa raw na pinaglalaruan ito ng bata.

Ang ikinababahala pa ni Daniela ay hindi raw siya sigurado kung naisubo nga ba talaga ng kaniyang anak ang patay na bubwit.

Suspetsa ni Daniela, may posibilidad na nanggaling ang daga sa kanal na nasa gilid ng kanilang bahay at lumusot sa mga butas kung kaya ito nakapasok sa kusina.

Samantala, nang obserbahan ni daniela ang kaniyang anak ay wala naman daw siyang nakitang negatibong reaksyon sa katawan nito matapos ang exposure sa daga at wala rin daw palatandaan na naisubo nga nito ang bubwit kaya hindi na ito ipina-checkup ni Daniela.

Dahil sa sobrang takot sa nangyari, mas naghigpit si Daniela sa pagbabantay sa kaniyang anak at nilinisan ang kanilang kusina para hindi na maulit pa ang nakaka-traumang insidente.

Ikaw, sa paanong paraan mo sinisiguro na palaging malinis ang environment na kagigisnan ng anak mo?

Kapag na-miss mo ang flight mo, wala ka ng choice kundi i-rebook na lang ito. Pero ang lalaking ito sa Chile na naiwanan ng kaniyang flight, hinabol ang eroplano at pinigilan pa itong umalis para makasakay.

Kung ano ang kinahinatnan ng lalaki, eto.

Sa El Tepual International Airport na matatagpuan sa siyudad ng Puerto Montt, Chile, nakuhanan ng video ang isang hindi pinangalanang 29-anyos na lalaki na makikitang tumatakbo sa airport runway, o ‘yung dinadaanan ng mga eroplano kapag magla-landing o magte-take off na ito.

Ang lalaki, na-late pala sa kaniyang flight kung kaya hindi ito nakapag-board sa eroplano.

Sa pagbabakasakali na makahabol pa sa kaniyang isang oras na byahe papunta sa Concepción City, tinakbo ng lalaki ang runway at huminto hindi kalayuan sa eroplano ng Latam Airlines at kumaway-kaway pa para mapansin siya ng mga piloto.

Hindi nagtagal ay nilapitan ang lalaki ng isang airport staff at sunod namang dumating ang security na nag-escort sa lalaki palabas ng runway.

Dahil sa insidente, na-kwestyon ng alkalde ng Puerto Montt na si Rodrigo Wainraihgt ang policies ng nasabing airport dahil kataka-taka nga naman na napunta ang lalaki sa ganoong sistwasyon.

Samantala, inaresto ang lalaki at humarap sa korte noong March 11 at ayon sa local media, naaresto na rin daw ito noon dahil naman sa threats at thefts.

Ikaw, maghahabol ka rin ba ng eroplano o magbabayad na lang ng extra para ma-rebook ang flight mo?

Kasal ang isa sa pinakamalaking milestone sa pagsasama ng isang couple dahil ito ang magbubukas ng panibagong yugto sa kanilang buhay. Pero ang mga tao sa ginanap na kasalang bayan sa Peru, too stunned to speak nang bigla na lang tumakbo papalabas ng venue ang isang bride habang umiiyak katulad sa mga pelikula.

Ang buong kwento, eto.

Sa katatapos lamang na araw ng mga puso, ginanap sa Bagua, Peru ang isang mass wedding o kasalang bayan kung tawagin dito sa Pilipinas kung saan maraming couples ang ikinakasal.

Isa sa mga ito ang 20 taon nang nagsasama na sina Claver Romero at Elena Barrantes. Pero sa haba man ng prosisyon, hindi sa simbahan natuloy ang dalawa.

Si Elena kasi, umiiyak na agad nang humarap sila ni Claver sa altar at nang oras na ng sumpaan, sa halip na mag “I do’, sorry ang isinagot ni elena sabay sabi ng, “I don’t.”

Pagkatapos noon ay umiiyak na tumakbo papalabas ng venue si Elena na siya namang nagpatahimik sa mga dumalo sa mass wedding.

Pipigilan pa sana ni Claver ang kaniyang runaway bride pero nanatili na lang ito sa kaniyang pwesto habang bakas ang gulat at hindi malaman kung ano ang sunod na gagawin.

Ang kasalang bayan, naka livestream pa man din sa social media page ng local government na madalas ay nagsasagawa ng mga mass wedding para sa mga couple na gustong magpakasal pero hindi afford ang kailangan bayaran para sa license fees.

Isiniwalat naman ni Elena sa isang interview ang tunay na dahilan kung bakit niya iniwanan ang lalaki sa altar. Sinabi ni Elena na isang araw bago ang kasal ay nalaman niya sa pamamagitan ng isang ebidensya mula sa kaniyang kaibigan na niloko pala siya ni Claver.

Ang ebidensya, pinapakita na mayroong kahalikang ibang babae si claver. Kaya naisipan ni Elena na iwan ito sa altar para turuan ito ng leksyon at ipaintindi rito ang ginawang pagkakamali.

Samantala, humingi ng tawad si Claver kay Elena on live television at umaasa na matutuloy ang kanilang kasal balang araw. Habang si Elena naman, aminado na nagbago na ang nararamdaman para sa lalaki pero pinatawad niya ito at ipinagpatuloy pa rin ang kanilang relasyon.

Ikaw, handa ka bang magbigay ng second chance kung sa’yo ito mangyari?

Sa digital age, konting scroll mo lang, malilibang ka na dahil sa samu’t saring contents na makikita mo. Pero ano nga ba talaga ang definition ng isang magandang content para makahatak ng viewers? Ang isang lalaki kasi sa iloilo, nasobragan sa efforts sa paggawa ng content at nauwi pa sa pagkaka-confine niya sa ospital.

Kung ano ang kinahinatnan ng lalaki, eto.

Sa panahon ngayon, kahit sino ay pwede nang maging content creator, katulad ng dating tricycle driver na si Isagani Canja na pinasok na rin ang mundo ng entertainment.

Nawalan na raw ito ng gana sa pamamasada at content creation naman ang pinagtuonan ng pansin.

Dahil sa goal ni Isagani na magparami ng followers at makakuha ng mas mataas na views, iisipin mo na naghahanap ito ng thrill sa buhay dahil sa naisip niyang content na buwis buhay!

Si Isagani kasi, uminom lang naman ng gasolina! Hindi lang yan, binuhusan niya rin ng gasolina ang kaniyang katawan, at para gawin pa itong mas thrilling, sinilaban niya rin ang kaniyang katawan.

Dahil dito ay nagtamo si Isagani ng 2nd degree burn at kinailangang manatili sa ospital para magpagaling.

Samantala, ayon sa Iloilo Provincial Health Office Head na si Dr. Maria Socorro Quiñon, maaaring mauwi sa pagka-comatose, pagkakaroon ng cancer, o di naman kaya ay pagkamatay ang mahabang exposure sa petroleum gas.

Habang ayon naman sa Sociologist na si Maria Elisa Baliao, ang pagmomonetize ng contents ang maaaring nag-uudyok sa ilan para mag-effort nang sobra para gawing patok sa viewers ang kanilang posts.

Gayunpaman, nagbigay ng paalala si Isagani, lalo na sa mga baguhang content creator, na huwag tutularan ang stunt na ginawa niya dahil sa panganib na dala nito.

Sa mundo ng social media, ano ang kaya mong gawin para sa ngalan ng content creation?

Sinong mag-aakala na ang powerbank na kadalasan nating dinadala for our own convenience ay nagdulot ng perwisyo? Ang powerbank kasi, sumabog habang ginagamit!

Ang buong kwento, eto.

Sa isang CCTV footage na nakuhanan sa loob ng isang opisina sa Taoyuan City, Taiwan, makikita ang isang babaeng tahimik na nagtatrabaho sa kaniyang laptop.

Ang tila isang normal na araw ng babae, biglang nagbago nang bigla na lamang may sumabog at nagliyab sa ibabaw ng kaniyang office desk.

Ang sanhi ng aksidente, isa palang powerbank kung saan naka-connect ang cellphone ng babae.

Sa kasamaang palad, dumeretso ang apoy sa mukha ng biktima at nasunog ang kaniyang pilik mata, pisngi, buhok, at leeg.

Agad namang sumaklolo ang lalaking kasama ng biktima sa opisina. Gayunpaman, tinutukoy pa ang dahilan ng pagsabog ng nasabing powerbank.

Samantala, hindi na bago ang mga ganitong uri ng aksidente dulot ng mga powerbank dahil nito lamang January ay nagkaroon ng sunog sa isang eroplano ng Air Busan sa Gimhae International Airport habang naghahandang lumipad patungong hong kong at ang tinuturong salarin ay isang powerbank.

Matapos nito ay nag-ingat na ang ibang airlines at nagpatupad ng power bank ban sa flights dahil sa posibleng panganib na dala ng lithium ion battery ng mga powerbank na may posibilidad na sumabog kapag uminit ito o na-overcharge.

Ikaw, mag-iingat ka na rin ba sa paggamit mo ng powerbank matapos marinig ang kwento na ito?

Walang duda na masarap nga naman talaga ang kumita ng malaking pera, pero mas fulfilling ito kung pinaghirapan, hindi katulad ng ginawa ng isang chinese employee na nag-effort nang matindi para makapagnakaw sa pinagtrabahuhan niyang kumpanya.

Ang buong kwento, alamin natin.

Isang HR manager ng tech company sa Shanghai, China ang kumita ng napakalaking halaga ng pera, hindi dahil sa kaniyang hardwork kundi dahil sa pandurugas.

Pumasok sa nasabing kumpanya ang HR manager na si Yang noong 2014 at isa sa duties niya sa trabaho ay ang pag-ha-hire ng mga empleyado at nasa mga kamay niya rin ang desisyon para aprubahan ang resignation ng mga trabahador.

‘Yon ang nakitang paraan ni Yang para isagawa ang kaniyang plano at sinimulan ito sa pamamagitan ng pag-iimbento ng 22 mga bagong empleyado sa kumpanya at kabilang na roon ang mga pangalan na Xiao Sun at Xiao Li.

Kinukuha ni Yang ang mga sinasahod ng mga peke o non-existent employees at nakakulimbat ng mahigit 16 million Yuan o 2.2 million U.S. Dollars.

Nagtagal ang masamang gawain ni yang sa kumpanya sa loob ng walong taon ngunit bago natapos ang 2022, nagsimula ang pagdududa ng mga empleyado nang isang member ng finance department ang nakapansin na masyadong perfect ang attendance ni Xiao Sun sa loob ng anim na buwan na pagtatrabaho nito sa kumpanya at ni minsan ay hindi pa raw ito nakita sa kanilang opisina.

Pinaimbestigahan ang insidente at inamin ni Yang na nagnakaw nga siya sa kumpanya at umabot ito ng 16 million Yuan o 2.2 million U.S. dollars.

Samantala, matapos mabuking ay ibinalik ni Yang katulong ang kaniyang pamilya ang 2.3 million Yuan sa mga ninakaw niya ngunit napatawan pa rin ito ng 10 years and 2 months na pagkakabilanggo.

Ikaw, hanggang saan ang kaya mong gawin para kumita ng malaking pera?

Isa na namang kwento ang magpapatunay na sa kabila ng mabibigat na hamon ng buhay, mas nananaig pa rin sa karamihan ang kabutihan at pagtulong kahit sa mga taong hindi natin kilala. Katulad na lang ng isang traffic enforcer na walang pag-aatubili na panandaliang iniwanan ang kaniyang trabaho para tumugon sa isang emergency sa gitna ng kalsada.

Ang buong kwento ng kabayanihan ng traffic enforcer, eto.

Sa magkakaibang anggulo ng CCTV footages na nakuhanan sa kalsada sa Wuhan, China, makikita ang isang uniformed personnel na mayroong karga-kargang maliit na bata at nagmamadaling tumatakbo at tila hindi nito alintana ang bigat at hingal.

Ayon sa local media, lumapit sa officer ang hindi mapakaling mga magulang ng bata para humingi ng tulong.

Ang bata kasi, nanginginig at kinukumbulsyon na pala dahil sa taas ng lagnat at isusugod na dapat ng kaniyang mga magulang sa ospital ngunit naipit ang mga ito sa traffic.

Dahil dito, walang pag-aatubiling itinakbo ng traffic enforcer ang bata patungo sa ospital na ilang daang metro ang layo at idineretso sa emergency room kung saan agaran itong nabigyan ng kinakailangan nitong medical attention.

Samantala, hindi na pala bago sa nasabing uniformed personnel ang mabilisang pagsaklolo sa emergencies dahil noong 2023, walang takot itong tumalon upang iligtas ang isang nalulunod na babae.

Gayunpaman, labis na nagpasalamat ang mga magulang ng bata sa traffic enforcer dahil sa tulong nito, naagapan ang nararamdamang sakit ng bata at kalaunan at bumuti rin ang pakiramdam.

Ikaw, tutularan mo ba ang ginawa ng traffic enforcer kung ikaw ang maipit sa kaparehong sitwasyon?