EXPLAINERS

Isa na namang kilalang personalidad ang ginamit sa modus ng mga scammer para makakulimbat ng easy money. Ang biktima? Isang senior citizen na dalawang dekada nang fan ng Spanish singer na si Enrique Iglesias.

Ang buong kwento, eto.

Mahigit dalawang taon na ang nakakaraan nang mag-message raw sa 63-anyos na si Guadalupe Cepeda mula Los Angeles ang Spanish singer na si Enrique Iglesias matapos siyang makita nito sa isang online fan group.

Kahit na suntok sa buwan na makausap ang singer, hindi ito pinagdudahan ni Guadalupe at nagtuluy-tuloy ang pag-uusap ng dalawa kahit na mayroon nang asawa ang babae. Sa katunayan ay sumagi na nga sa isip niya na hiwalayan ito upang makasama na si Enrique.

Pero ang love story ni Guadalupe at ng singer, tila isang concert na kailangan munang pagkagastusan bago ito matuloy.

Ang ka-chat kasi ng babae, hiningan siya ng pera at walang pag-aatubili niyang pinadalhan ito na umabot ng libong dolyar dahil sa pang-aakala na nangangailangan ang lalaki.

Makailang beses pa itong naulit pero nang wala nang maipdala si Guadalupe sa lalaki, kinumbinsi pa siya nito na gumawa ng paraan katulad ng pagnanakaw ng pera sa kaniyang mister.

Nadiskubre ng mister ni Guadalupe ang pakikipag-usap niya sa iba ngunit sa halip na magalit ay pinairal nito ang kaniyang pagmamahal at pag-intindi sa asawa at ito pa mismo ang gumawa ng paraan para maigising ang kaniyang misis sa katotohanan na hindi ang tunay na Enrique Iglesias ang nakakausap niya at na-goyo lang siya ng isang scammer.

Dinala si Guadalupe ng kaniyang mister sa Spanish magazine show na Primer Impacto para ikwento ang kaniyang online romance sa singer na siya namang nag-viral, ngunit pagkatapos ng lahat ay hindi pa rin natinag si Guadalupe.

Umabot na sa punto na nanawagan pa ang mister niya kay Enrique para magsalita ito tungkol sa isyu ngunit nagbabala lamang ang singer sa kaniyang fans na maging maingat sa lumalaganap na scamming.

Ikaw, hanggang saan ang kaya mong gawin para lang mapalapit sa iniidolo mo?

Sinong mag-aakala na nakatulong ang isang hamak na jacket para makasurvive ang isang babaeng naaksidente at na-trap sa loob ng kaniyang sasakyan sa loob ng anim na araw?

Kung ano ang naging kontribusyon ng jacket sa insidente, eto.

Nito lamang March 6 nang nakatulog ang 41-anyos na si Brieonna Cassell habang nagmamaneho isang milya ang layo mula sa Newton County Landfill.

Dahil dito, bumangga ang sasakyan niya sa isang ditch na maihahalintulad sa isang drainage sa gilid ng kalsada.

Nagtagal si Cassell ng anim na araw sa loob ng kaniyang sasakyan dahil ang ditch ay hindi natatanaw mula sa kalsada, kung kaya gumawa ito ng paraan para makasurvive habang naghihintay ng saklolo.

Ang diskarte ni Cassell? Ibinabato niya ang kaniyang jacket o hoodie sa malapit na creek at pagkatapos ay sinisipsip ito para makainom siya ng tubig.

Sa ganoong paraan, nairaos naman ng babae ang anim na araw na pagkaka-trap ngunit nagtamo ito ng severe leg injuries pati na rin sa kaniyang ribs at wrist.

Samantala, nasa maayos na kondisyon na si Cassell at nakatakdang sumailalim sa isang surgery.

Ikaw, ano ang magiging diskarte mo kung sakaling malagay ka sa kaparehas na sitwasyon?

Isang empleyado sa spain ang bibigyan na sana ng award pero naging bato pa. Paano ba naman kasi, ang lalaki, hindi na pala talaga pumapasok sa trabaho.

Kung bakit palagiang absent ang lalaki, eto.

Sa isang planta para sa Wastewater Treatment sa Cádiz, Spain, nagtrabaho si Joaquin Garcia bilang isang engineer sa loob ng 20 taon.

Dahil sa haba ng kaniyang serbisyo sa kumpanya, na-nominate si Joaquin para mabigyan ng diligence award noong 20th anniversary niya rito.

Pero dahil din sa mismong achievement na ito kaya nabuking na anim na taon na palang hindi pumapasok sa kumpanya ang lalaki.

Sinabi ni Joaquin na wala na raw siyang kailangang trabahuhin at pakiramdam din daw niya ay nabu-bully siya sa trabaho dahil sa kanilang family politics kung kaya hindi na siya pumasok pang muli pero, sumusweldo pa rin ito.

Ngunit isang empleyado ang nagsabi na ilang taon na raw niyang hindi nakikita si Joaquin sa opisina, kung kaya tinawagan na ito ng Deputy Mayor na nag-hire sa kaniya na si Jorge Blas Fernandez at tinanong kung ano ang mga ginawa nito noong mga nakaraang buwan at hindi raw nakasagot ang lalaki.

Ang anim na taon na hindi pagpasok ni Joaquin sa trabaho ay nauwi sa korte at naatasan siya na bayaran ang lahat ng sinahod niya sa mga nagdaang taon na absent siya.

Ang depensa naman ng lalaki, pumapasok naman daw siya pero hindi nga lang daw sa regular na oras ng trabaho at idinahilan niya rin ang bullying.

Samantala, napatunayan ng korte na hindi nga pumasok sa trabaho ang lalaki sa loob ng anim na taon at naikumpara pa ng mga tao ang ginawa ni Joaquin sa iba’t ibang mga kwento.

Gayunpaman, retired na ngayon ang lalaki at 69-anyos na.

Ikaw, naisipan mo na rin ba na biglang mag-disappear mula sa trabaho o mag-reresign ka na lang?

Carnapping gone wrong! Ang mga tumangay kasi ng isang mamahaling sasakyan, na-stuck sa traffic at agad ring nahuli!

Ang buong detalye ng nakakatawang kwento, eto.

Isang araw, magpapa-car wash sana ang may-ari ng isang SUV o Land Cruiser kaya bumaba siya mula rito.

Pero laking gulat na lang ng owner nang makita niya ang kaniyang sasakyan na umaatras na. ‘yon pala, mayroon na itong ibang sakay at mga carnapper pa.

Sinubukan pang habulin ng may-ari ang kaniyang SUV ngunit tinutukan naman ito ng baril ng mga kawatan.

Tuluyang umeskapo ang mga suspek at nawala na nga sa paningin ng owner ang mamahalin niyang sasakyan. Pero habang nasa byahe ay naipit naman sa traffic sa Jose Abad Santos Avenue, Brgy. Dolores ang mga magnanakaw.

Ayon sa mga pulis, sinabi raw ng mga lalaki na parte sila ng isang financing group at nautusan na kuhanin ang nasabing sasakyan dahil hindi naman daw ito nababayaran.

Pero ang mga suspek, wala naman daw naipakitang katibayan na member nga sila ng isang grupo. Bukod pa riyan, nakumpiska rin sa mga ito ang isang baril at nahaharap sa mga kaso na carnapping at paglabag sa election gun ban, at iba pang mga reklamo.

Ikaw, hahabulin mo rin ba ang sasakyan mo kung milyon-milyon ang halaga nito?

Maniniwala ka ba na-ospital at nagtamo ng sugat ang isang lalaki matapos itong hindi sinasadya na mabaril ng alaga niyang aso?

Kung paano ito nangyari, eto.

Madaling araw noong March 10 nang rumespunde ang Memphis Police department sa bahay ng isang lalaki sa Whitney, Avenue Memphis, Tennessee kung saan nangyari ang isang pambihirang shooting incident.

Paano ba naman kasi, ang isang lalaki, nabaril ng kaniyang alagang aso sa hita.

Ayon sa lalaki, nakahiga raw siya sa kama habang katabi ang isa niyang kaibigan nang bigla na lang tumalon sa kama ang kaniyang one-year-old pit bull na si Oreo at na-stuck ang paw nito sa trigger guard ng baril at sa huli ay aksidente nga nitong nakalabit trigger.

Matapos ang insidente, nilisan ng kaibigan ng lalaki ang kaniyang bahay bitbit ang hindi tukoy na uri ng baril at ayon sa mga pulis, natagpuan ang isang gamit na bala ng baril sa sahig ng kwarto kung saan nangyari ang inisdnete.

Samantala, agad na dinala sa ospital ang hindi pinangalanang lalaki dahil sa tinamo nitong tama ng bala ng baril sa kaniyang hita at sa kabutihang palad ay hindi naman naging kritikal ang kondisyon.

Hinihikayat din ang Memphis Police Department ang mga gun owners upang hindi na maulit ang kaparehas na insidente.

Ikaw, mas pag-iingatan mo na ba ang mga gamit mo para hindi ito mangyari sa inyo ng fur baby mo?

Kung diskarte at tyaga lang din naman ang pag-uusapan, mahirap talunin ang lalaking ito mula sa Japan dahil talagang hinamak niya ang lahat, mapasagot lang ang babaeng mahal niya.

Kung ano ang ginawa ng lalaki, eto.

Sa Japanese program na Newlyweds Welcome!, ibinahagi ng 32-anyos na lalaki na si Isamu Tamioka ang kaniyang nag-viral na pambihirang love story.

Si Isamu kasi, na-in love sa nanay ng dati niyang kaklase! Unang beses niya raw nakita ang 53-anyos na si Midori sa isang parent-teacher meeting sa dati niyang school kung saan naging kaklase niya ang anak nito na babae.

Makalipas ang sampung taon, muling nakita ni Isamu si Midori at agad na kinontak ang dati niyang kaklase para yayain si Midori sa isang date na sinangayunan naman ng babae dahil sa pag-aakala na isa lang itong casual meal.

Ganon na lang ang pagkawindang ni Midori nang aminin sa kaniya ni Isamu ang nararamdaman nito para sa kaniya at binasted ito.

Pero hindi nagpatinag si isamu at tila mas lalo pang na-motivate dahil sa loob ng isang buwan, araw-araw nitong niyaya si Midori na mag-date.

Ngunit ni-reject na naman ni Midori ang lalaki dahil para sa kaniya ay hindi magandang tingnan na nakikipag-date siya sa lalaking kaedad lang ng kaniyang anak at inaalala niya rin kung ano na lang ang sasabihin nito at ng kaniyang pamilya.

Pero napawi ang lahat ng pag-aalinlangan ni Midori nang mag-text sa kaniya ang anak at sinabi na i-prioritize niya ang kaniyang kaligayahan at huwag mag-aalala.

Hindi naman nagkaroon ng problema ang relasyon ng dalawa sa pamilya ni Isamu, pero ang nanay ni Midori, pinayuhan siya na mag-isip muna nang mabuti lalo na at kagagaling niya lang sa divorce.

Ngunit sa huli, nanaig pa rin ang pagmamahalan ng dalawa at ang persistence ni Isamu. Sa katunayan, nitong nakaraang taon lang ay ikinasal na ang dalawa nang may basbas ng kani-kanilang mga pamilya.

Ikaw, hanggang saan ang kaya mong gawin para mapa-oo ang nililigawan mo?

Kahit sino naman sa atin ay gugustuhin na magkaroon ng smooth and safe flight, lalo na at pinaglalaanan ito ng budget. Pero ang mga pasahero ng Air India, napurnada ang pagbyahe dahil sa mga hindi magamit na banyo sa eroplano dahil sa mga baradong inidoro.

Kung ano ang sanhi ng pagkakabara ng mga ito, alamin.

A-singko ngayong marso nang maantala ang flight 126 ng Air India na nanggaling sa America at patungo sana sa New Delhi.

Ang sampung oras na pagbibyahe ng mga pasahero, nauwi sa wala dahil kinailangang bumalik sa Chicago ng eroplano matapos magbara ang walong inidoro sa labindalawang banyo nito.

Halos dalawang oras nang nasa ere ang eroplano nang madiskubre ng mga crew na hindi gumagana ang ilan sa mga toilet na siyang nagdulot ng perwisyo sa mga pasahero.

Dahil dito, napagdesisyunan ng mga piloto na ibalik ang eroplano sa Chicago para sa kaligtasan at comfort ng mga pasahero at dahil na rin sa restrictions ng European airports sa mga nightly operations.

Sa imbestigasyon na isinagawa ng Air India, napag-alaman na mayroong mga natagpuang polythene bags o plastic, basahan, at mga damit na bumara sa tubo ng mga inidoro matapos itong i-flush.

Samantala, hindi pala ito ang unang beses na nangyari ang insidente sa isa sa mga aircraft ng Air India dahil nagbara na rin noon ang mga inidoro sa kanilang mga eroplano dahil sa mga finlush na kumot, underwear, at diaper.

Gayunpaman, nag-provide naman ang airline ng hotel accommodation at alternative flight routes sa mga pasahero nang makabalik sila sa Chicago.

Kung ikaw ang nasa kaparehas na sitwasyon, pipiliin mo bang mapurnada ang sampung oras na byahe mo o titiisin mo na lang ang perwisyo?

Sa mga mahilig uminom ng alak diyan, drink responsibly. Kapag lasing na, umuwi na ng bahay. Hindi ‘yong pupunta pa kung saan-saan at mamemerwisyo ng ibang tao. Katulad na lang ng ginawa ng dalawang lasing na teenagers sa isang restaurant sa China na umihi sa…hotpot.

Kung paano ito nangyari, eto.

Itinuturing ang Haidilao bilang pinakamalaking hotpot restaurant sa china na mayroon ng mahigit isang libong branches sa buong mundo.

Sa kabila ng kasikatan, hindi ito nakaligtas sa mga issue, partikular na ang branch nito sa Shanghai na nito lamang February 24 ay nagkaroon ng dalawang customer na parehong menor de edad at lasing pa.

Pero ang nakagigimbal na ginawa ng mga lalaki ay ang pag-ihi ng mga ito sa sabaw habang nasa loob ng isa sa private dining rooms ng nasabing kainan.

Aminado naman ang restaurant na hindi naabutan ng mga staff ang ginawang kalokohan ng dalawang lalaki kung kaya hindi nila ito napigilan at nadiskubre na lang ang insidente makalipas ang apat na araw.

Inireport ng Haidilao ang nangyari sa mga otoridad at ayon sa mga pulis ay naka-detain na ang mga lalaking sangkot.

Samantala, hindi pa rin malinaw kung mayroong nakakain sa naihiang sabaw.

Gayunpaman, magbibigay ng refund ang Haidilao sa mga naging customer nila mula February 24 hanggang March 8 at siniguro na pinalitan at disinfected na ang lahat ng mga hotpot equipment at iba pang utensils.

Ikaw, dumederetso ka ba ng uwi mula sa inuman para makaiwas sa mga nakakahiyang gawain?

Kung second chance at life lang din naman ang pag-uusapan, walang tatalo sa naging karanasan ng lalaking ito na sakay ng kayak habang pumapalaot sa dagat nang bigla itong tabihan at isubo ng isang balyena.

Kung ano ang kinahinatnan ng lalaki, eto.

Sa isang video na kinuhanan sa Strait of Magellan na matatagpuan sa Southern Chile, makikita ang 24-anyos na Venezluan man na si Adrian Samancas na nagka-kayak sa gitna ng maalong dagat.

Hindi nagtagal ay bigla na lang sumulpot sa tabi ni Adrian ang isang humpback whale at walang anu-anong isinubo siya nito.

Ang uri ng dambuhalang balyena na nagpakita sa lalaki ay isang humpback whale na may populasyon 84,000 sa buong mundo at maaaring umabot ang sukat sa laki ng isang bus.

Inabot ng tatlong segundo ang pagkaka-trap ni Adrian sa loob ng bibig ng balyena. Bagama’t maigsi ang tatlong segundo, sumagi na sa isip ng lalaki na ‘yon na ang magiging huling sandali ng kaniyang buhay.

Dahil sino ba naman ang hindi kakabahan kung ikaw ang nakulong sa loob ng bibig ng isang higanteng hayop sa kalagitnaan ng dagat at walang kasiguraduhan kung makakalabas pa.

Ngunit sa isang pambihirang pagkakataon, ilang sandali matapos lumubog ng balyena sa tubig ay iniluwa nito si adrian.

Ligtas at buo namang nakalabas ang lalaki at hindi nagtamo ng anumang injury.

Ikaw, ano ang una mong gagawin kung sakaling malagay ka sa kaparehong sitwasyon?

Ika nga nila, ang lahat ng sobra ay masama. Halimbawa na lang ang naging trend noon na mukbang o ang sobrang pagkonsumo ng pagkain na ginawa pang online content na maaaring magdala ng kapahamakan sa kalusugan. Ganyan ang sinapit ng isang lalaking content creator na nagkasakit at binawian ng buhay dahil sa kaniyang unhealthy eating habits.

Ang buong kwento, eto.

Oktubre nitong nakaraang taon nang mapagdesisyonan at inanunsyo ng 24-anyos na mukbang streamer na si Efecan Kultur na susubukan na niyang magbawas ng timbang sa pamamagitan ng pagda-diet at pagbabawas sa pagkonsumo ng maaalat na pagkain.

Si Kultur kasi, isa lang naman sa mga sikat na mukbang streamer sa Turkey at patunay niyan ang kaniyang videos na umani na ng million views at mayroon din siyang 156,000 Tiktok followers at 12,000 followers naman sa Instagram.

Bilang epekto ng paggawa ni Kultur ng mukbang videos, lumobo ang kaniyang katawan at nag-develop ng iba’t ibang komplikasyon sa kalusugan kabilang na ang heart disease.

Huling beses na nag-upload si Kultur ng mukbang videos noong oktubre kung kailan niya rin ipinaalam sa kaniyang followers ang plano niya na magbago na ng eating habits para makapagabawas siya ng timbang.

Na-diagnose rin ng sakit sa puso ang lalaki at una raw nakaranas ng hirap sa paghinga at nag-post pa nito lamang january habang nagpapagaling sa ospital.

Ngunit sa kasamaang palad, makalipas ang tatlong buwan na pagpapagaling at paglaban ni Kultur sa kaniyang mga sakit na may kinalaman sa obesity sa ospital ay binawian ito ng buhay.

Samantala, dahil sa pagkamatay ni Kultur ay muling nabuhay ang usapin tungkol sa mukbang at sa maaaring idulot nito sa pangangatawan ng isang tao lalo na at hindi healthy ang kalimitang makikitang pagkain sa mukbang videos at kapag nasobrahan, sa halip na mabusog ay nagiging peligro.

Ikaw, isa ka rin ba sa mga natakam sa mga mukbang videos sa social media?