EXPLAINERS

Iba nga naman talaga ang nagagawa ng inggit sa isang tao at maaari pa itong magtulak na gumawa ng hindi maganda. Pero ang isa sanang masayang promotion sa isang kumpanya sa Brazil, muntik pang mauwi sa pagkamatay ng promoted employee dahil sa inggit ng kaniyang co-worker?

Kung ano ang buong kwento, eto.

Sa isang CCTV footage na nakuhanan sa isang textile factory sa munisipalidad ng Abadia De Goias sa Brazil, makikita ang 38-anyos na female employee na mayroong inihalong kemikal sa water bottle ng kaniyang katrabaho.

Nang inumin ito ng may-ari ng water bottle na isa palang newly-promoted employee, agad nitong napansin na mayroong kakaiba sa ininom niyang tubig dahil nakaramdam ito ng init sa kaniyang lalamunan.

Ayon sa local police, February 14 nang inanusyo ng kanilang boss na promoted na pala ang biktima na labis namang ikinagalit ng suspek.

Bukod pa riyan, pumasok din daw ang suspek sa isang eksklusibong management area sa kumpanya at doon marahil nakuha ang ginamit nitong kemikal.

Ang mismong biktima pa ang tumawag ng rescue para sa kaniyang sarili at agad naman itong naisugod sa ospital at nailigtas mula sa posibleng pagkalason.

Samantala, nahaharap ngayon ang suspek sa kasong attempted murder at maaaring makulong sa loob ng 6 hanggang 20 taon.

Sa mga naghihintay ng promotion, konting hintay lang at darating din ang para sa’yo. Pero habang wala pa ito, mas pag-igihan na lang ang pagtatrabaho at wag pagdiskitahan ang mga na-promote na kapwa empleyado.

Ikaw, hanggang saan aabot ang kaya mong gawin para ma-promote sa trabaho?

Kung masyado kang tutok sa mga nilalaro mong games online, malamang ay isinakripisyo mo na rin ang pagkain at pagtulog. Pero hinay-hinay dahil baka sa kakasubok mo na ipanalo ang bawat laro, paunti-unti mo na palang pinapatay ang iyong katawan. Ganyan ang nangyari sa isang lalaki na binawian ng buhay dahil daw sa kaka-cellphone?

Totoo ba ito? Alamin natin ang buong istorya!

Ang lalaking si Anthony, ilang araw daw na hindi nakatulog dahil sa pagiging abala sa nilalaro niyang online game.

Ayon sa kaniyang nanay na si Angelita at pinsan na si Odeza, bukambibig daw ni Anthony ang nilalaro niyang game at hindi rin daw nito mabitawan ang kaniyang cellphone.

Lagi raw pinagsasabihan ni Odeza ang kaniyang pinsan pagdating sa sobrang pagkahilig nito sa paglalaro pero hindi naman daw ito maawat.

Ngunit isang araw, bigla na lamang itong nagsusuka at namilipit sa sakit ng tiyan at ulo, dahilan para pagapang na ito kung lumakad.

Dahil dito kung kaya’t agad itong itinakbo sa ospital, pero iniuwi rin dahil sa kakulangan sa pera at ipinahilot na lang kagaya ng suggestion ng kanilang mga kapitbahay.

Ang buhay ni Anthony, hindi na rin nagtagal.

Cellphone ang itinuturong dahilan ni Angelita kung bakit siya nawalan ng anak ngunit ayon sa death certificate nito, nakasaad na Acute Coronary Syndrome o ACS ang cause of death ni Anthony.

Ayon naman sa adult cardiologist na si Dr. Paul John Ablaza,
Ang ACS ay ang hindi pagkakaroon ng sapat na daloy ng dugo papunta sa muscles ng puso dahil ang mga ugat nito ay maaaring makaranas ng panandalian o di naman kaya ay kabuohang pagbabara.
Samantala, hindi naman daw ang pagbababad sa cellphone ang mismong dahilan kung bakit maagang binawian ng buhay si Anthony, ngunit isa raw sa pinaka common na presentation ng ACS ay ang sudden cardiac death at 50% sa mga pasyenteng mayroong acs ay maaari ring makaranas nito.

Ikaw, aayusin mo na rin ba ang sleeping habits mo matapos marinig ang kwento na ito?

Mahirap ang mawalan ng mahal sa buhay, lalo na ng magulang. Pero ang isang baby girl na ito na wala pang muwang sa mga nangyayari sa kaniyang paligid, tila buhay na buhay para sa kaniya ang kaniyang nanay na pumanaw tatlong buwan na ang nakakaraan.

Kung ano ang buong kwento, eto.

Sa isang video mula kay Sherly Sabugo, makikita ang isang taong gulang niyang pamangkin na si thalia na paulit-ulit na tinatawag ang kaniyang “mama” habang tila mayroong tinitignan mula sa malayo.

Ayon kay Sherly, pinapakain niya raw ng hapunan si Thalia nang bigla na lang nitong tawagin ang kaniyang nanay habang nakatanaw sa itaas.

Ang nakakapagtaka pa, wala naman daw silang ibang kasama at wala ring nakikitang picture ng kaniyang nanay si Thalia nang mga oras na ‘yon.

Pero bago pa ang gabing ‘yon ay ibinahagi ni Sherly na tinatawag na ni Thalia ang salitang “mama” sa tuwing dumarating daw siya sa kanilang bahay at mayroon pa itong itinuturo ngunit hindi naman daw nakikita ni Sherly.

Ang nanay ni thalia na si Charlene, nitong disyembre lang pala pumanaw. Nang magbuntis si Charlene ay saka lang din nito nadiskubre ang kaniyang sakit na thyroid, at nang umatake raw ito noong December ay agad na binawian ng buhay si Charlene.

Sinabi ng Behavioral Specialist na si Dr. Raul S. Gaña na ang mga bata sa edad ni thalia ay wala pa raw konsepto ng death ngunit marunong na itong makaramdam ng kalungkutan.

Para naman malibang at ma-divert sa iba ang atensyon ng bata, suhestyon ng doktor na bigyan ito ng bagong konsepto na papalit sa presensya ng kaniyang nanay katulad ng pagbibigay ng bagong laruan.

Samantala, hindi man si Sheryl ang nagbuntis at nagsilang kay Thalia, ipinangako niya na aalagaan at ibibigay niya ang mga pangangailangan nito at ipaparamdam sa kaniyang pamangkin ang pagmamahal.

Ikaw, anong masasabi mo sa nakakaantig na kwento na ito?

Faith in humanity was restored. ‘Yan ang pinatunayan ng mga marine students dahil agad na tinulungan ng mga ito ang isang matandang nagtitinda ng taho na natapon ang paninda sa mismong harapan nila.

Ang buong kwento, eto.

Sa isang video na in-upload ni Dan Dais II sa social media, makikita ang isang marine cadet na nangongolekta ng pera sa gitna ng kumpulan ng iba pang mga kadete.

Ang mga lalaki, naka-liberty leave pala kaya mayroong dalang maleta ang mga ito.

Nagkataon pa na natalisod sa labas ng kanilang barracks ang isang matanda kung kaya tumapon at nagkalat ang paninda nitong taho.

Ang mga good samaritan students, walang pag-aatubili na nag-ambagan para kahit paano ay mayroon pa ring mauwi sa kaniyang pamilya ang magtataho kahit natapon ang paninda nito.

Nang makapagbigay ang lahat ng mga estudyante, agad nilang ibinigay ang nakalap nilang pera sa matanda sabay sabing pwede na itong umuwi at binilinan pa ito na mag-ingat.

Last year pa raw nangyari ang insidente pero ngayong buwan lang in-upload ni Dan, at hangad niya na magsilbi itong magandang halimbawa sa maraming tao.

Umani na ng 5 million views ang video at 12.1k comments na punong-puno ng papuri sa mga estudyante. Mayroong mga natuwa sa ginawa ng mga lalaki dahil patunay daw ito na nag-eexist pa rin ang humanity.

Isa namang anak ng taho vendor ang nagpasalamat sa kabutihang ipinakita ng mga kadete at katulad ng iba, hiniling nito na maging successful ang mga lalaki at bumalik sa mga ito ang good karma.
Ikaw, tutularan mo ba ang ginawa ng mga estudyante kung ikaw ang nakasaksi sa nangyari sa matanda?

Kung akala mo mga tao lang ang tumatakas para gumala, very wrong ka diyan dahil ang aso na ito sa Batangas, nakakapuslit din. Hindi dahil sa naiwanang nakabukas na gate, kundi dahil siya mismo ang nagbubukas nito.

Ang kwento ng kakatuwang aso, eto.

Sa pagsapit ng dilim sa Batangas, nawiwindang na lang daw ang isang mag-anak dahil mayroon silang naririnig na kumakalampag sa gate nila.

Ang inakalang masasamang loob na nagbabalak sa kanilang bahay, ang alaga lang pala nilang aspin na si Paui na binubuksan ang gate para makalabas sa gabi!

Katulad ng ginawa nito sa video na in-uplaod ni Grace Millares kung saan makikita si Paui na nakatayo gamit ang dalawa niyang mga paa habang mag-isang binubuksan ang lock ng gate at tila isang batang nasaraduhan ng pinto matapos lumagpas sa kaniyang curfew.

Ayon kay grace, nagtaka pa raw siya noong una kung ano ang ginagawa ni Paui at nang tanungin ang kaniyang kapatid, napabilib na lang siya nang sabihin nito na binubuksan daw pala ng alaga nila ang gate dahil hindi ito normal na gawain ng mga aso.

Ang pamilya ni Grace, alagang-alaga raw ang aspin at proud pa rito dahil kahit anong hilig nito na pumuslit para makapaggala, marunong naman daw itong umuwi nang kusa.

Ikaw, matutuwa ka ba kung ang aso mo ay marunong umuwi mag-isa pero marunong din magbukas ng gate para maglakwatsa?

Dahil sa talamak sa scamming at delivery pranks sa panahon ngayon, sino ba naman ang hindi kakabahan kung bigla na lang may dumating na parcels sa inyong bahay kahit na wala ka namang binibili?

Tulad na lang ng isang misis na nagulantang dahil sa sunud-sunod na parcels na ibinaba ng delivery man sa kanilang pintuan kahit wala naman siyang chineck out.

Kung ano ang sumunod na pangyayari, eto.

Sa isang video, makikitang magka-video call ang mag-asawa na sina Che, isang housewife, at Ryan na isang MC taxi driver, na nag-uusap tungkol sa mga nagdatingan na parcels sa kanilang bahay.

Wala namang idineliver na parcel na hindi pa bayad. Sadyang nagtaka lang si che kung bakit mayroong dumating na marami at naglalakihang parcels sa bahay nila samantalang wala naman daw siyang chineck out sa mga online shopping applications at ganoon din ang kaniyang mister.

Sinabi ni che na wala siyang maipambabayad sa mga deliveries. At nang tanungin ang delivery man kung magkano ang total, sinabi nito na bayad na raw ang lahat ng parcels.

Gayunpaman, desidido na si Che na ibalik na lang ang mga parcel ngunit agad siyang pinigilan ng kaniyang mister at inamin na binili niya ang mga iyon dahil alam nito na isa ‘yon sa mga magpapasaya sa kaniya.

Ang mga parcel pala, ang nilalaman ay ang mga in-add to cart noon ni Che, na binili ni ryan dahil nakatanggap daw siya ng bonus.

Ayon sa couple, love language raw talaga nila ang paggawa ng suprises para sa isa’t isa. Sa katunayan, matapos ang isang buong araw ng pagtatrabaho ay nag-uuwi si Ryan ng pagkain o di naman kaya ay groceries. Inako rin daw nito noon ang paglalaba nang magkaroon ng sugat sa kamay ang kaniyang misis.

Para kay Ryan, ito ang paraan niya para magpakita ng appreciation sa kaniyang house wife dahil kung tutuusin ay mas mahirap pa raw ang ginagawa ng mga ito kahit na nasa loob lang ng bahay.

Ikaw, sa paanong paraan niyo ine-express ang pagmamahalan niyo ng partner mo?

Ang mga sumasailalim sa dialysis, pabata na nang pabata sa panahon ngayon dahil sa Chronic Kidney Disease o CKD o ang pagkasira ng kidney. Ang dalagita na ito sa Camarines Norte, napabilang din sa mga kaso ng maaagang na-diagnose ng CKD dahil sa maling pamamaraan ng pagkain.

Ang kaniyang kwento, eto.

Sa Camarines Norte, isang estudyante ang nahilig sa pag-kain ng mga tsitsirya, hotdog, at de lata. Sinabi mismo ng 15-anyos na dalagita na si Vanessa na ‘iyan ang mga kinakain niya sa school at hindi rin daw siya mahilig uminom ng tubig.

Marahil dahil sa kaniyang eating habits, sa murang edad ay na-diagnose ng stage 5 Chronic Kidney Disease si Vanessa at siya rin daw ang pinakabatang pasyente sa dialysis center.

Ayon sa nanay ng dalagita na si Gemalyn, June nitong nakaraang taon nang magsimulang makaramdam ng pagkahilo, walang gana kumain, at namumutla ang kaniyang anak.

Matapos ang mga pinagdaanang lab tests ni Vanessa, lumabas na halos hindi na nagfa-function ang pareho niyang kidneys at halos hindi na gumagana.

Sumailalim si Vanessa sa hemodialysis kung saan dinadala ang dugo ng pasyente sa isang machine at nililinis sa pamamagitan ng pagsasala at pagtatanggal ng sobrang tubig at dumi rito, at ibinabalik din sa pasyente.

Samantala, libre naman daw na nakakapagpa-dialysis si Vanessa dahil sa health insurance na siya namang malaking tulong para sa kanilang pamilya, lalo na at 150 lang ang kinikita ng kaniyang tatay na mag-uuling sa kada sako nito.

Sa kasamaang palad, pabalik-balik daw sa ospital si Vanessa, dahilan para mag-alala ito kung makakapagmartsa ba siya sa darating na Abril o hindi para makapagtapos ng grade 10.

Nagbigay naman ng paalala ang mga eksperto na ang pagkonsumo ng mga pagkaing mayroong preservatives, high cholesterol, maalat, mataba, at matamis ay hindi naman ipinagbabawal ngunit dapat ay bawasan ito at moderate lang ang pag kain.

Ikaw, aayusin mo na rin ba ang eating habits mo?

Talaga nga namang masakit ang mawalan ng minamahal sa buhay, lalo na kung hindi mo ito inaasahan. Pero ang isang mag-anak sa thailand, ipinagdalamhati na ang pagkawala ng kanilang lola. Pero umatras ang lungkot at napalitan ng gulat ang naramdaman ng mga ito nang biglang bumalik ang buhay ng matanda.

Kung ano ang nangyari sa lola, eto.

Sa probinsya ng Buriram sa Thailand, natagpuan ang lola na si Pua Sriphueng na tila wala na raw buhay.

Sa loob ng halos isang oras, hindi raw ito nagising kahit na ano pang gawin ng kaniyang apo na si Sommai Dee-la-at kaya tinanggap na lang ng pamilya na wala na ang kanilang lola at hindi na muli pang makakasama.

Ipinatawag ang mga kamag-anak nila Dee-la-at upang magbigay galang at mamaalam sa matanda at nagpatawag na rin ng rescue team na tutulong upang mailipat ang mga labi ni Sriphueng sa isang malapit na temple.

Pero makalipas ang 40 minuto, himalang nanumbalik ang katawang lupa ng matanda at tila nag-iba ng katauhan dahil ibang-iba ang mga ikinikilos nito.

Ang lola raw kasi, tila isang bata na palaging iritable at naghahanap ng matatamis na pagkain.

Sa isang pahayag, sinabi ni Sriphueng na habang wala siyang malay ay mayroon siyang nakitang monk na kaniya pa raw nakausap at inihatid pa raw siya.

Niniwala naman ang kaniyang pamilya na ang mga magagandang ginawa niya ang dahilan kung bakit siya muling nabuhay at nag-imbita pa ng mga monk sa kanilang bahay upang pasalamatan.

Samantala, sinabi ni Dee-la-at na nasa magandang kondisyon daw ang kalusugan ng kaniyang lola.
Ikaw, naniniwala ka ba na posible ang karanasang ito ng nasabing lola?

Sa superhero movies nga lang ba talaga makakakita ng mga taong bulletproof ang katawan o posible rin ito sa totoong buhay? Ang isang lalaki kasi sa Davao, sinabi na bulletproof daw ang kaniyang katawan.

Kung totoo nga ba ito, alamin.

Madaling araw nitong Lunes nang mag-inuman ang 50-anyos na laborer na si Victor Hernale at ang lalaking itinago sa pangalang roland kasama ang ilan pa nilang katrabaho sa Brgy. Acacia sa Davao City.

Base sa report ng pusliya, nag-inuman daw ang mga ito nang maghamon si Victor na barilin siya at sinabing bullet proof daw ang katawan niya.

Kinuha ni roland ang kaniyang airgun at dalawang beses na pinaputukan sa tuhod si Victor.

Ang sinasabi ng biktima na bullet proof ang katawan niya? Hindi naman pala totoo dahil napuruhan ito at isinugod sa Southern Philippines Medical Center, habang ang suspek naman ay agad na sumibat mula sa pinangyarihan ng insidente.

Samantala, ang airgun ay ginagamit din pala ng suspek sa pamamaril ng mga ibon at ayon sa record ng mga otoridad, napatawan na pala noon ang lalaki ng mga kasong frustrated homicide, illegal possession of firearms, at paglabag sa comelec gun ban.

Ikaw, naging lesson ba sa’yo ang kwento na ito na mag-ingat sa mga makakainuman?

Kung sipag at tyaga lang din ang pag-uusapan, walang tatalo sa kontesera na ito, dahil kahit ni minsan ay hindi pa niya naiuwi ang korona, mayroon siyang nanay na nagbibigay sa kaniya ng inspirasyon para magpatuloy sa bawat hamon ng buhay.

Ang kaniyang kwento, eto.

Sa isang video na in-upload ni Jean Paolo Martin De Guzman sa social media, makikita ang kontesera na si Rizalino Nano o Zoraida Ek-Ek Sanchez na mag-isang inaayusan ang kaniyang sarili sa backstage habang ang mga kapwa niya candidates ay mayroong mga kasamang assistant na nag-aasikaso sa mga buhok, makeup, at damit ng mga ito.

Ang 56-anyos na si Zoraida, hindi tumitigil sa pagrampa sa mga pageant kahit na sa dami raw ng mga nasalihan niya ay hindi pa siya nanalo kahit isang beses.

Ang nagsisilbing inspirasyon para kay Zoraida na patuloy na tumuntong sa entablado ay ang kaniyang nanay na mayroong alzheimer’s disease.

Ayon kay Zoraida, pati raw ang contest na “Mr. Pogi” ay nasalihan na rin niya, at ang mga consolation prizes mula sa mga pageant na lang naiisip niyang diskarte para kahit paano ay kumita siya ng pera.

Ang dedikadong kontesera, bukod sa pagsali sa mga beaucon ay nangangalakal daw para maitawid ang pang kain araw-araw.

Kaya naman agarang inilalaan ni Zoraida ang kaniyang pera sa pagpapagamot sa kaniyang ina at ipinambibili ng pagkain sa tuwing kumikita siya nang malaki.

Bukod pa rito, naglalaan din siya ng maliit na budget para sa kaniyang sarili para makabili ng makeup sa Divisoria na magagamit niya sa tuwing siya ay rarampa. Sa katunayan, maski raw ang makeup na nagkakahalagang 30-50 Pesos ay tinatawaran niya pa.
Samantala, umani na ng mahigit 196k reactions, mahigit 5.4k comments, at mahigit 33.7k shares ang video ni Zoraida.

Ayon din sa hiwalay na post ng uploader, nakalikom sila ng mahigit 27,000 pesos na cash donation para sa kontesera, at mayroon ding mga nagpadala ng mga makeup at gowns, makalipas lang ang dalawang araw matapos i-upload ang video.

Ikaw, nabigyan ka rin ba ng motibasyon na patuloy na lumaban matapos mapanood ang kwento ni Zoraida?