EXPLAINERS

Sa superhero movies nga lang ba talaga makakakita ng mga taong bulletproof ang katawan o posible rin ito sa totoong buhay? Ang isang lalaki kasi sa Davao, sinabi na bulletproof daw ang kaniyang katawan.

Kung totoo nga ba ito, alamin.

Madaling araw nitong Lunes nang mag-inuman ang 50-anyos na laborer na si Victor Hernale at ang lalaking itinago sa pangalang roland kasama ang ilan pa nilang katrabaho sa Brgy. Acacia sa Davao City.

Base sa report ng pusliya, nag-inuman daw ang mga ito nang maghamon si Victor na barilin siya at sinabing bullet proof daw ang katawan niya.

Kinuha ni roland ang kaniyang airgun at dalawang beses na pinaputukan sa tuhod si Victor.

Ang sinasabi ng biktima na bullet proof ang katawan niya? Hindi naman pala totoo dahil napuruhan ito at isinugod sa Southern Philippines Medical Center, habang ang suspek naman ay agad na sumibat mula sa pinangyarihan ng insidente.

Samantala, ang airgun ay ginagamit din pala ng suspek sa pamamaril ng mga ibon at ayon sa record ng mga otoridad, napatawan na pala noon ang lalaki ng mga kasong frustrated homicide, illegal possession of firearms, at paglabag sa comelec gun ban.

Ikaw, naging lesson ba sa’yo ang kwento na ito na mag-ingat sa mga makakainuman?

Kung sipag at tyaga lang din ang pag-uusapan, walang tatalo sa kontesera na ito, dahil kahit ni minsan ay hindi pa niya naiuwi ang korona, mayroon siyang nanay na nagbibigay sa kaniya ng inspirasyon para magpatuloy sa bawat hamon ng buhay.

Ang kaniyang kwento, eto.

Sa isang video na in-upload ni Jean Paolo Martin De Guzman sa social media, makikita ang kontesera na si Rizalino Nano o Zoraida Ek-Ek Sanchez na mag-isang inaayusan ang kaniyang sarili sa backstage habang ang mga kapwa niya candidates ay mayroong mga kasamang assistant na nag-aasikaso sa mga buhok, makeup, at damit ng mga ito.

Ang 56-anyos na si Zoraida, hindi tumitigil sa pagrampa sa mga pageant kahit na sa dami raw ng mga nasalihan niya ay hindi pa siya nanalo kahit isang beses.

Ang nagsisilbing inspirasyon para kay Zoraida na patuloy na tumuntong sa entablado ay ang kaniyang nanay na mayroong alzheimer’s disease.

Ayon kay Zoraida, pati raw ang contest na “Mr. Pogi” ay nasalihan na rin niya, at ang mga consolation prizes mula sa mga pageant na lang naiisip niyang diskarte para kahit paano ay kumita siya ng pera.

Ang dedikadong kontesera, bukod sa pagsali sa mga beaucon ay nangangalakal daw para maitawid ang pang kain araw-araw.

Kaya naman agarang inilalaan ni Zoraida ang kaniyang pera sa pagpapagamot sa kaniyang ina at ipinambibili ng pagkain sa tuwing kumikita siya nang malaki.

Bukod pa rito, naglalaan din siya ng maliit na budget para sa kaniyang sarili para makabili ng makeup sa Divisoria na magagamit niya sa tuwing siya ay rarampa. Sa katunayan, maski raw ang makeup na nagkakahalagang 30-50 Pesos ay tinatawaran niya pa.
Samantala, umani na ng mahigit 196k reactions, mahigit 5.4k comments, at mahigit 33.7k shares ang video ni Zoraida.

Ayon din sa hiwalay na post ng uploader, nakalikom sila ng mahigit 27,000 pesos na cash donation para sa kontesera, at mayroon ding mga nagpadala ng mga makeup at gowns, makalipas lang ang dalawang araw matapos i-upload ang video.

Ikaw, nabigyan ka rin ba ng motibasyon na patuloy na lumaban matapos mapanood ang kwento ni Zoraida?

Kadalasan ay sa loob ng mga maleta o di naman kaya ay iniipit sa mga damit ang mga iligal na kagamitan na sinusubukang ipuslit loob ng mga airprot. Pero ang lalaking ito, kakaiba man ang naging paraan, hindi pa rin nakalusot!

Ang buong kwento, eto.

Isang Colombian man ang babyahe sana pa-Amsterdam ngunit naharang ito sa Rafael Nunez International Airport sa Cartagena, Colombia matapos magsagawa ng unique na stunt para mag-smuggle ng droga.

Ang masamang binabalak ng lalaki, hindi nakalusot sa X-ray screening.

Makikita pa sa isang video na tila ginugupitan ng pulis ang buhok ng 40-anyos na suspek, pero ang totoo, tinatanggal lang pala nito ang wig ng mautak na lalaki kung saan niya itinago ang 19 na piraso ng cocaine tablets.

Umabot ng 220 grams ang natagpuang iligal na droga at nagkakahalaga ng halos 600,000 Pesos.

Nahaharap ngayon sa mga kasong trafficking, manufacturing, at possession of narcotics ang hindi pinangalanang lalaki.

Samantala, ayon sa imbestigasyon ng mga pulis, hindi pala ito ang unang beses na nakasuhan ang lalaki dahil bago pa siya magtago ng droga sa binansagan ng mga otoridad na “narco wig”, napatawan na pala ito ng drug trafficking nang dalawang beses.

Ikaw, napatunayan mo ba sa kwento na ito na walang lihim ang hindi nabubunyag?

Madalas ay istrikto at bantay-sarado ng mga tatay ang mga anak nilang babae, pero ang isang daddy na ito, siya na mismo ang gumawa ng paraan para magka-jowa ang kaniyang mga anak na babae.

Kung ano ang ginawa ng tatay, eto.

Sa isang video na in-upload ni Pat Morada sa social media, makikita ang kanilang pamilya na nasa loob ng isang sasakyan kung saan nagdi-distribute ang kanilang daddy ng mga booklet.

Pero hindi lang ito basta-bastang booklet, kundi prayer booklet!

Nangyari ito isang araw bago ang Valentine’s Day at ipinagpadasal pa raw sila ng kanilang daddy para sa Araw ng mga Puso.

Dagdag pa nito, nanggaling daw sa isang madre ang mga prayer booklet na maaaring dasalin ng mga naghahanap ng mapapangasawa.

Sinabi ng uploader na prayer booklet din daw ang naging daan para makahanap ng mapapangasawa ang kanilang daddy at tita.

Marami naman ang nag-testify sa comments section na naging effective raw ang pagdadasal nila noon kay St. Jospeh dahil nakahanap sila ng mabuting partner.

Ikaw, idadaan mo na rin ba sa dasal ang lovelife mo for more chances of winning?

Takot at pag-aalala ang inabot ng mga magulang ng mga estudyanteng ipinalabas na na-kidnap daw sila, pero ang totoo, hindi lang pala agad nakauwi ang mga ito galing sa paglalakwatsa.

Ang buong kwento, eto.

Dalawang estudyante ang ni-rescue sa isang barangay sa Los Amigos, Davao City, madaling araw nitong February 20 dahil ayon sa social media post ng isa sa mga ito, na-kidnap daw sila ng puting van.

Nabahala naman ang mga magulang ng mga nasabing estudyante nang mag-post din sa social media ang tatay ng isa sa mga kaklase nila tungkol sa sitwasyon ng mga ito.

Dahil dito ay mabilisang humingi ng saklolo ang mga magulang sa mga otoridad upang agad na mahanap ang kanilang mga anak.

Ngunit ayon sa CCTV footage mula sa kanilang eskwelahan, navideohan na sumakay sa isang PUV ang mga estudyante at nagtungo sa mall.

Sa kani-kanilang mga bahay kung kaya’t naisipan nilang palabasin na dinakip sila ng isang puting van at upang mas mukhang kapani-paniwala, sinugatan pa nila ang kanilang mga sarili gamit ang bato.

Sa tulong ng kanilang teacher, na-rescue at natagpuan ang mga estudyante sa isang convenience store.

Samantala, sa isa namang official statement mula sa social media page ng Davao City Police Office, wala raw katotohanan ang sinasabing kidnapping sa post ng isa sa mga estudyante at napag-alaman na nag-cutting classes lang pala ang mga ito

Sinabi pa ni Police Captain Hazel Tuazon na naisip lang daw ng mga estudyante na gawin ang stunt na ‘yon dahil sa takot ng mga ito na mapagalitan ng kanilang mga magulang dahil sa hindi agad pag-uwi sa kanilang mga bahay.

Gayunpaman, dadaan sa assessment ang mga estudyante sa tulong ng mga barangay social worker.

Ikaw, anong kwentong cutting classes mo?

Talaga nga namang makakaramdam ka ng comfort kapag mayroon kang nakitang kababayan sa isang foreign country. Pero ang Korean national na ito, hindi kapwa korean ang nakilala sa Batangas, kundi isang Korean speaking na tsuper.

Ang buong kwento, eto.

Sa isang video na in-upload ng Korean vlogger na si Filipino Boo o Seungha, makikita na naglilibot ito sa Batangas at nakikisalamuha sa mga residente.

Ang vlogger, makikita na naglalakad-lakad sa kalsada at nagku-commute pa.

Sa pagsakay nito sa isang jeep patungong Lipa, natiyempuhan niya ang isang tila ordinaryong tsuper pero mayroon palang tinatagong skills.

Pagkaupo ni Seungha, agad niyang tinanong sa ingles kung magkano ang pamasahe.

Bago sumagot, tinanong muna ng driver kung ano ang lahi ni Seungha pero hindi naman ito naintindihan ng dayuhan. Ang driver, sinundan ito ng isa pang tanong na “eodi?” o ‘where?” sa Korean.

Nagkwentuhan ang dalawa sa byahe at doon na namangha si Seungha sa tsuper at sinabi na magaling daw itong mag-Korean.

Pero ang mas nakakabilib pa, mag-isa lang palang nag-aral si mamang driver kung paano magsalita at maintindihan ang nasabing foreign language.

Sa kalagitnaan ng byahe, ipinakita ni Seungha na lowbatt na ang kaniyang cellphone at magpupunta raw muna sa isang convenience store para mag-charge. Pagkatapos nito, nag-abot ng papel ang tsuper kay Seungha at sinabi na tawagan ang nakasulat doon na numero kung magkaroon man siya ng problema.

Marami naman ang nag-comment sa video at mayroon pang nagsabi na mas magaling pa raw magsalita ng Korean language si manong driver kaysa sa kanila kahit na matagal na silang nanonood ng Kdrama.

Ikaw, napabilib ka rin ba sa bilingual na tsuper?

Pinatunayan ng isang lolo na ang wagas na pag-ibig ay posible pa ring matunghayan sa panahon ngayon dahil kahit na pumanaw na ang kaniyang misis, hands on pa rin siya rito.

Ang buong kwento, eto.

Sa isang video mula kay Lhurdes Dela Cruz, makikita ang kaniyang Lolo Jaime na paulit-ulit na bumibisita sa puntod ng kaniyang misis.

Pero hindi basta-bastang pagbisita ang ginagawa ni Lolo Jaime dahil araw-araw lang naman siyang bumabyahe ng mahigit kalahating oras para makapunta sa libingan ng kaniyang misis na si Lola Elvira sa Olongapo.

Ang palagiang pagbisita ni Lolo Jaime, naka-document pa raw. Sinabi ng kaniyang apo na si Lhurdes na araw-araw daw nagsesend ng video ang kaniyang lolo sa group chat nila.

Sa mga video, makikita na nililinisan nito ang puntod ng kaniyang misis, dinidiligan ang mga damo, nagpapalit ng mga bulaklak, at binabati pa ito ng good morning.

Dagdag pa ni Lhurdes, sa loob ng tatlong taon na routine ni Lolo Jaime, absent lang daw ito sa pagdalaw kapag mayroon itong sakit. Pero umaraw man o umulan, wala itong palya.

Pumanaw si Lola Elvira noong kasagsagan ng pandemya noong September 2021. Dahil sa higpit ng mga patakaran noon, nahirapan daw si Lolo Jaime na alagaan ang kaniyang misis.

Sa kasamaang palad, hindi na raw nakita pa nang personal ni Lolo Jaime noong binawian ng buhay si Lola Elvira. Sa video call niya lang daw ito nakita at hindi na rin naiburol.

Gayunpaman, natupad naman daw ang kagustuhan ni Lola Elvira na mamaalam nang mapayapa dahil binawian ito ng buhay habang natutulog.

Ayon naman sa anak nila na si Marilou, para sa kaniya ay ang mga magulang niya ang nagpapatunay na ang pag-ibig ay hindi nawawala, at ang mga ito rin daw ang halimbawa ng isang magkasintahan na hindi sumusuko anuman ang ibatong problema sa kanila ng mundo.

Ikaw, paano mo ine-express ang pagmamahal mo?

Bago sumabak sa laro, napasabak muna ang matatangkad na players ng Gilas Pilipinas sa paglusot sa maliit na siwang para makalabas sa elevator matapos ma-stuck dito.

Kung paano nakalabas ang mga manlalaro, eto.

Sa isang video na pinost ng shooter ng TNT Tropang Giga na si Calvin Oftana, makikita kung paano sila nagsiksikan ng mga kapwa niya basketbolista sa isang hotel elevator na na-stuck pala.

Dahil sa mga nagtatangkaran at umaabot pa ng 6 feet na height ng mga lalaki ay halos dumikit na nga ang mga ulo nila sa kisame ng elevator.

Nangyari ito kamakailan lang nang magpunta sila sa Doha, Qatar para lumaban sa Doha International Championship.

Ipinakita na binuksan ng Point Guard ng San Miguel Beermen na si CJ Perez ang pinto at doon na-reveal na na-stuck pala ang mga ito sa pagitan ng dalawang floors!

Nakakaaliw naman ang naging eksena nang dumating na ang mga sumaklolo sa mga players dahil kitang-kita na todo yuko pa ang mga ito para lang makalabas mula sa maliit na siwang ng pinto na para bang dumaan ang mga ito sa butas ng karayom.

Samu’t sari naman ang mga iniwang komento ng mga netizen. Ang ilan ay natawa pero marami ang masaya na ligtas na nakalabas ang kanilang mga iniidolo at nagsabi na sana ay mas mag-ingat pa ang mga ito sa susunod.

Sa mga taga suporta ng Gilas, anong masasabi mo sa nakakakabang experience na ito ng mga atleta?

Sa mga hindi marunong makuntento riyan, ingat-ingat at baka makahanap ka ng katapat mo! Ganyan ang nangyari sa isang lalaki na diumano nagloko habang ang kaniyang girlfriend ay nagdadalantao.

Ang paghihiganti ng babae, eto.

Sa isang viral video sa social media na umani na ng 6.5 million views, makikita ang isang babae na hinahataw ng pamalo na mayroong malaking pako ang motor ng kaniyang boyfriend.

Sa simula ng nasabing video, makikita na hinahampas ng babae ang unahang bahagi ng motor hanggang sa magkabutas-butas ito at pagkatapos ay nilapitan ang lalaki at kinwelyuhan.

Nanggagalaiti sa galit ang babae dahil matapos siyang buntisin ng kaniyang nobyo ay nahuli niya pala ito na mayroong ibang babae at inangkas pa nito sa motor.

Nangatwiran pa ang lalaki na hindi naman daw sila kasal ng babae.

Dahil sa pang-uudyok ng mga kasama, itinumba ng babae ang motor at winarak naman ang iba pang mga nagmamahalang mga pyesa ng motor katulad ng flarings at headlights na pinagbabasag niya naman.

Gayunman, hindi na ipinakita sa pa video kung ano ang mga sumunod na nangyari matapos ang insidente.

Komento naman ng mga netizen, mali raw ang naging aksyon ng babae at mayroon namang mas madali at legal na paraan para resolbahan ang problema. Habang ang iba naman ay talagang nagbigay pa ng suggestions para sirain ang motor at hindi na mapakinabangan pa.

Kaya kung loloko-loko ka, mag-ingat ka at baka hindi lang ang pinakamamahal mong sasakyan o motor ang mawala sayo, kundi pati na rin ang partner mo.
Ikaw, ano ang gagawin mo para makaisa sa nanlalamang sayo?

Talaga nga namang nakabibilib ang mga bata sa panahon ngayon dahil sa pagiging advanced nila ay marami na silang nagagawa at nalalaman sa murang edad, katulad ng isang taong gulang na batang babae na pati ang pwesto ng kamay sa pagkanta ng lupang hinirang, alam na rin agad.

Kung paanong natuto nang maaga ang bata, eto.

Sa New Bataan, matatagpuan ang isang pambihirang bata na aakalain mong nasa nursery na dahil marunong na itong magsalita at marami na ring nalalaman.

Sa tatas niyang magsalita at kakayahan na sumagot nang mabilis sa mga itinatanong sa kaniya, mukhang kayang-kaya na nitong makipagsabayan sa mga pre-school students.

Siya si Avianna Clea Bintas, isang taong gulang. Sa sobrang aga nitong natuto na magsalita, mayroon na agad itong kabisadong bible verse, at maniniwala ka ba na life verse niya rin pala ito?

Bukod sa kabisado na ng bata ang kaniyang buong pangalan, alam na rin nito na ang kulay ng balat niya ay morena.

Ayon sa tatay ni baby Avianna na si Marvin Bintas, nagsisimula nang magsalita ang kanilang unica hija noong sampung buwan pa lang ito.

Sinabi pa ni marvin na hindi raw nila bine-baby talk si Avianna at hindi nila ina-alter ang mga boses nila kapag kinakausap ito.

Dahil sa angking talino ni baby, nagulat na lang din si Marvin at ang kaniyang misis dahil sa murang edad, natatangi na ang communication skills ng kanilang anak.

Sa aga nitong magsalita, marahil ay magkainteres din agad ang bata na pumasok sa eskwela, pero wala rin namang duda na kayang-kaya na nitong makipagsabayan dahil bukod sa marunong na itong magbilang at mag-identify ng animal sounds, alam na rin nito kung saan ilalagay ang kamay kapag kumakanta ng lupang hinirang.

Ikaw, kaya mo bang sabayan ang daldal ni baby Avianna?