EXPLAINERS

Hindi na bago sa atin ang makakita ng mga taong sumasampa sa mga jeep para manlimos. Kalimitan ay mayroong bitbit ang mga ito na lata na tinatambol nila habang kumakanta. Pero ang lalaking ito sa Maynila, literal na kumapit sa patalim dahil umano sa pangangailangan ng pera ay nanlimos ito nang may bitbit na ice pick upang ipanakot sa mga pasahero.

Ang buong kwento, eto.

Sa Rizal Avenue sa Maynila, habang tirik pa ang araw, isang nakakakabang eksena ang naranasan ng mga sakay ng isang pampasaherong jeep dahil sa isang lalaki na sumabit dito.

Ang lalaki kasi na nanlilimos, mayroon palang dalang ice pick na ginagamit nito upang tutukan at sindakin ang mga pasahero kapag hindi siya nabibigyan ng pera.

Agad namang nabisto ang makabagong modus ng mautak na suspek dhail ayon kay Police Lt. Col. John Guiagui, Chief MPD- Intelligence Division, inaakyat ng lalaki ang mga jeep na maraming sakay na babae.

Kapag hindi siya binigyan ng pera ng mga ito, tinatakot niya ang mga pasahero gamit ang bitbit na ice pick.

Sa tulong naman ng barangay at ng mga social media post tungkol sa lalaki upang magbigay ng babala sa mga tao, nahuli ang kawatan sa Severino Street at nakumpiska ang ice pick nito.

Ang suspek, nakulong na rin pala noon dahil sa paggamit ng ilegal na droga at pagsusugal.

Samantala, mahaharap ang lalaki sa kaukulang kaso at habang nasa MANILA POLICE DISTRICT ay sinabi nito na nagawa niya lang daw ang nasabing insidente sa jeep upang makapag-abot ng pera sa kaniyang gilrfriend.

Ikaw, mas mag-iingat ka na ba ngayon matapos mong marinig ang kwento na ‘to?

Pinatunayan ng isang Siberian husky na para na ring mga tao ang mga aso dahil sa taglay nitong talino. Ang husky kasi, nakabisado na raw ang daan papunta sa clinic at ginawa itong tambayan?

Kung paano nakabisado ng husky ang direksyon? Ito ang kuwento.

Ganon na lang ang gulat ng mga staff sa LJ Veterinary Clinic sa Libertad, Surallah South Cotabato, dahil sa biglaang pagdating ng isang bisita na matapos kumatok sa pinto ay dire-diretso agad na pumasok sa loob.

Pero ang unexpected visitor, hindi pala isang tao kundi ….. Isang aso…!!

Ayon sa mga staff, ang nasabing husky ay si Bleu.

Pero bakit nagulat ang mga staff ng clinic? Kasi naman si Bleu, sariling sikap na dinala ang kaniyang sarili sa clinic ng walang kasamang amo!

Hindi naman na bago sa kanila si Bleu dahil suki ito sa kanilang clinic at dinadala roon ng kaniyang amo nang 2-3 beses kada buwan. Ito rin marahil ang dahilan kung bakit nakabisado na ng aso ang daan mula sa kanilang bahay papunta sa vet.

Ayon kay Dr. Lovely Eguia, agosto nitong nakaraang taon nang unang beses na mag-isang nagpunta si Bleu sa kanilang clinic.

Kahit na pangalawang beses na palang naulit ang kaparehong pangyayari, nagulat at hindi pa rin naiwasang mag-alala ng mga staff dahil may kalayuan daw pala ang bahay nila Bleu mula sa veterinary.

Dagdag pa ng doktora, dinala pala si Bleu ng kaniyang amo sa vet para ipa-groom isang araw bago ito mag-isang lumabas.

Palagay ni Dra. Eguia, marahil ay nagustuhan ni Bleu ang pagpapagroom dahil sa malamig na aircon ng grooming area at malamig na tubig.

Baka rin daw hindi naka-lock ang kulungan niBbleu at ang gate ng kanilang bahay kaya nakalusot ito sa kaniyang mga bantay.

Samantala, nilinaw ng beterinaryo na ang mga amo ni bleu ay responsable, at sa katunayan ay nagkaroon na sila ng kasunduan at alam na kung ano ang susunod na gagawin kung sakali mang magpunta ulit si Bleu sa clinic nang mag-isa.

Ikaw, tuturuan mo rin ba ang iyong aso na magpunta mag-isa sa vet?

Kung single ka, mapapa-sana all ka na lang at wala nang ibang magagawa kundi kiligin na lang sa relasyon ng iba. Sino ba naman ang hindi kikiligin sa mala-romantic movie na pakulo ng lalaking ito para sa kaniyang misis noong Valentine’s?

Kung ano ang ginawa ng lalaki, eto.

Iba’t ibang uri ng pagmamahal ang natutunghayan natin taun-taon sa tuwing sasapit ang valentine’s day. Iba’t iba rin ang ginagawang pakulo lalo na ng mga lalaki para sa kanilang special someone.

Pero ang mister na ito sa Cebu City na si Dizon Novabos o Kuya Vax, simple lang naman ang ginawang sorpresa para sa kaniyang misis na si Eva Marie.

Pero dahil sa lakas ng arrive ni Kuya Vax habang tumatawid ng kalsada at mayroong hawak na bouquet of flowers, idagdag pa ang malakas na tili mula sa mga estudyanteng customer ng kanilang eatery, at ang pa-background music, naging extra special ang valentine’s ng mag-asawa.

Ang video na ito ay in-upload mismo ni Kuya Vax sa social media account na umani na ng 8.4 million views kung saan makikita na nag-aasikaso ang kaniyang misis sa kanilang maliit na kainan. Na-tyempuhan pa na mayroon silang mga customer na mga estudyante nang iabot niya sa asawa ang mga bulaklak.

Matapos iabot ang bouquet, they sealed it with a kiss kung kaya mas nagwala ang mga kabataan.

Umani naman ng maraming positibong komento ang video. Karamihan ay nag-sana all, habang mayroon namang mga pumuri kay Eva Marie dahil sa taglay nitong ganda at halata raw na hindi naiistress sa kaniyang mister.

Ikaw, naki-sana all ka lang din ba noong valentine’s day o mayroong nagpakilig sayo?

Ang pagdedesisyon na muling magmahal ay labis na pinag-iisipan dahil mahirap nga namang kalimutan ang unang pag-ibig na nagdaan. Pero kapag handa ka na ulit sumugal, pakikinggan mo ba ang inirereto sayo ng dati mong kasintahan katulad ng isang lalaki sa Pangasinan?

Ang buong kwento, eto.

Sa Malasiqui, Pangasinan, isang kakaibang kwento ng pag-ibig ang ipinakita ni Reynald Galverio at ng kaniyang fiance na si Rizalyn Ranole.

Si Rizalyn kasi, inireto kay Reynald ng kaniyang misis bago ito pumanaw noong 2022 dahil sa sakit nito na blood cancer.

Sinabi ni Reynald na noong inireto siya ng kaniyang yumaong asawa kay Rizalyn ay nagagalit pa siya dahil hindi raw iyon sumasagi sa isip niya.

Nagkakilala naman ang soon-to-be bride at soon-to-be groom noong 2018 habang nag-aapply si Rizalyn para lumipad pa-Saudi Arabia, habang nagtatrabaho naman noon si Reynald sa isang travel agency.

Naging magkaibigan ang dalawa at pati ang unang asawa ni reynald ay napalapit din kay Rizalyn. Ngunit noong panahon na iyon, ang gusto lang daw ni Reynald ay ang matulungan si Rizalyn sa kaniyang application.

Ngunit naramdaman ni Reynald na mayroong puwang sa kaniyang buhay matapos pumanaw ng kaniyang misis.

Niligawan ni Reynald ang dati lang na inirereto sa kaniya at opisyal na naging magkasintahan ang dalawa pagdating ng December 2022.

Ayon kay Rizalyn ang nagustuhan niya raw kay Reynald ay ang pagiging mabait, mapagmahal, at responsable nito. Higit pa riyan, si Reynald raw ay halimbawa ng isang man of his words.

Pero bago ang lahat ay ipinaalam muna ni Reynald sa kaniyang mga anak at sa puntod ng kaniyang asawa ang kaniyang bagong pag-ibig at sa darating na March 11 ay ikakasal na ang dalawa.

Ikaw, anong masasabi mo sa hindi pangkaraniwang kwentong pag-ibig na ito?

Bagamat marami ang hindi naniniwala sa pag-ibig sa panahon ngayon, ang lolo na ito, pinatunayan na maaari pa ring maging wagas ang kaniyang pag-ibig kahit na ang asawa niya ay yumao na.

Kung ano ang buong kwento, eto.

Sa isang video mula kay Rehana Resse Tarasina na mayroong caption na “Seeing my lolo tatay eating with my nanay’s picture hurts the most”, makikita ang isang lolo na kumakain mag-isa habang kaharap at kinakausap ang picture ng kaniyang yumaong asawa.

Halatang-halata rin ang pagiging emosyonal ng matanda dahil napapayuko na lang ito at tila naiiyak.

Ayon kay Lolo Raul, pumanaw ang kaniyang asawa na si Lola Thess na kung tawagin niya raw ay ‘Mahal’ noong Pebrero nitong nakaraang taon dahil sa diabetes at tila inatake rin daw ito sa puso.

Sinabi pa niya na mahilig daw palang magluto ang kaniyang misis at lagi niyang kasabay kumain.

Ang nakakapawi raw ng kaniyang pagod ay sa tuwing ipinaghahanda siya nito ng pagkain o di kaya ay ipinagtitimpla ng kape.

Sa sobrang pagmamahal sa kabiyak, naluluha raw ang matanda sa tuwing tinitingnan ang litrato ni Lola Thess dahil hindi pa rin daw nito matanggap na hindi na nito makakasama pa ang asawa.

Ibinahagi pa ni Lolo Raul na talaga nga namang wagas ang pag-iibigan nila ni Lola Thess dahil kahit daw matanda na sila ay hindi nagbago ang pagtitinginan nila sa isa’t isa.

Gayunpaman, ang picture ng misis ang tumutulong kay Lolo Raul upang bahagyang maibsan ang pangungulila at inaalala na lang ang mga iniwanan nitong magagandang alala sa kanilang pagsasama.

Ikaw, ganito ka rin ba ka-faithful sa’yong iniirog?

Totoo nga na masarap ang bawal. Kaya pagdating sa usaping pagkain, mapapasama ka talaga kapag sobra-sobra. Katulad na lang ng nangyari sa isang dalagita sa Butuan City na halos matunaw daw ang kidney dahil nasobrahan sa soft drinks at noodles?

Kung ano na ang lagay ng dalagita, eto.

November nitong nakaraang taon nang madiskubre na ang kidney o bato ng 19-anyos na dalagita na si Angel Mae ay halos tunaw na pala at sa palagay nila ay dahil iyon sa sobra-sobrang consumption niya ng soft drinks at instant noodles.

Sinabi ng dalagita sa isang pahayag na tatlong beses sa isang araw kung uminom siya ng soft drinks at lagi rin daw siyang kumakain ng noodles dahil ‘yon ang madaling lutuin.

Dinala sa ospital si angel mae at sa murang edad ay kinakailangan na nitong mag-dialysis kung kaya ito tinubuhan sa leeg.

Si Angel Mae, na-diagnose na pala ng stage 5 Chronic Kidney Disease o CKD.

Ayon sa Adult Nephrologist na si Dr. Mark Anthony Tiu, ang sakit na CKD ay ang pagkakaroon ng damaged kidney. Ang acute type ng sakit na ito ay ang biglaang pagkasira ng kidney at temporary lang, habang ang chronic type naman ay mayroong anim na stages at hindi na nare-recover.

Sinabi pa ni Dr. Tiu na kung hindi makokontrol ang pagkonsumo sa mga pagkain ay maaari talagang mauwi sa pagkasira ng kidney.

Samantala, tumigil na muna sa pag-aaral si Angel Mae at dalawang beses din itong nagda-dialysis sa isang linggo. Ganoon man ang kalagayan niya sa ngayon ay hindi naman daw siya nawawalan ng pag-asa.

Ikaw, kokontrolin mo na rin ba ngayon ang pag-kain mo?

Hindi na lingid sa kaalaman ng lahat na pamahal na nga talaga nang pamahal ang mga bilihin. Pero sino ang hindi lalong aaray kung ang nabili mong inilalakong bottled water ay nagkakahalaga ng singkwenta Pesos?

Ang buong kwento, eto.

Sa isang nag-viral na video sa social media na kinuhanan mula sa loob ng isang sasakyan, makikita na stucked ang mga pasahero nito sa traffic at maririnig na binusinahan nila ang lalaking nagtitinda para tawagin at bumili ng tubig.

Nang makalapit sa tindero ay agad sila nitong binigyan ng tatlong bote ng mineral water.

Ganon na lang ang gulat ng mga pasahero nang tanungin nila kung magkano ang tubig at sinagot ito ng tindero ng “singkwenta.”

Agad na umangal ang mga motorista at sinabi na masyadong mahal ang singkwenta para sa maliit na bote ng tubig.

Iginilid ng drayber ang sasakyan at nagpatuloy pa ang mas mainit na diskusyon sa pagitan nila ng tindero.

Ang apela ng mga bakasyonistang sakay ng sasakyan, sampung piso lang daw ang bentahan ng tubig sa lugar nila, habang ang depensa naman ng tindero sa pagbebenta ng ganoong halaga ay ang pagkabilad niya sa tirik na araw habang naghahanapbuhay.

Binalak ng mga motorista na ibalik ang mga bottled water pero hindi pumayag ang vendor at nagalit pa dahil nagmamarunong daw ang mga ito samantalang siya naman ang nagtitinda.

Gayunpaman, hindi na nakita pa sa video kung paano natapos ang diskusyon ng dalawang panig.

Samantala, iba-iba naman ang mga ibinahaging sentimento ng mga netizen tungkol sa insidente. Mayroong nangatwiran na convenience ang binabayaran sa tindero.

Mayroon ding nag-comment na scripted lang daw ang content ng video na siya namang sinang-ayunan ng ilan, ngunit mayroong sumagot na scripted man ito, pero ang mga komento raw nila ay nakabase sa tunay na buhay.

Ikaw, ano ang sentimento mo sa isyu na ito?

Kung hindi ka pa committed sa isang relasyon, makipaghiwalay ka na lang. Hindi ‘yong maghahanap ka pa ng iba habang ikaw ay may jowa, katulad ng isang boyfriend na nahuli ng kaniyang girlfriend na nakikipag-meet up at nanliligaw sa ibang babae.

Kung ano ang kinahinatnan ng lalaki, eto.

Sa isang video, nakuhanan kung paano nabisto ang isang lalaking may girlfriend na pero nakikipagkita pa sa ibang babae. Ang mas matindi pa rito ay nililigawan niya pa ito!

Pero hindi ito isang tipikal na kwento ng love triangle, dahil ang dalawang babaeng involved sa kwento ay nagsabwatan!

Nang madiskubre kasi ng 26-anyos na si Joy Aninang na mayroon palang girlfriend ang kaniyang suitor na si ‘Mark’, agad niyang inabisuhan ang jowa nito na itinago sa pangalang ‘Jenny’ na mayroong ginagawang kalokohan ang lalaki.

Nakipagkita si Joy sa kaniyang manliligaw sa isang foodcourt sa isang mall. Habang magkasama ang dalawa at nagkukumustahan ay siya namang cue ng legal girlfriend na si Jenny para pumasok sa eksena.

Marahil ay dahil sa kahihiyan, sinabi ni Joy sa isang pahayag na namula raw ang mukha ni Mark at hindi makatingin ng diretso sa kaniya.

Pinagsabihan niya pa ito na huwag mag-walkout kundi ay mag-eeskandalo sila ni Jenny.

Ibinahagi rin ni joy na sa kaparehong araw na ‘yon ay nakipaghiwalay din si Jenny kay Mark.

Samantala, pagkatapos ng insidente ay naging magkaibigan daw sila Joy at Jenny at nagkakausap pa noon sa social media.

Ikaw, tutularan mo rin ba ang ginawa ni Joy kung malalagay ka sa kaparehong posisyon?

Para sa mga babad sa trabaho riyan, ingat-ingat at huwag kalimutan ang sarili dahil baka kalusugan niyo ang maging kapalit ng sobrang kasipagan niyo. Pero mayroon nga bang ambag ang pagiging subsob sa trabaho sa pagputok ng ugat sa utak?

Ang buong kwento, alamin.

Nitong nakaraang Nobyembre lang ay na-comatose at sumailalim sa isang operasyon ang negosyante na si Erika Duran dahil sa biglaang pagputok ng ugat sa kaniyang utak.

Nakaranas daw muna siya ng seizure at nakita na lang na tila wala ng malay bago ito dinala sa ICU at tinubuhan.

Pero bago ‘yon ay matagal na palang nakakaramdam ng pagsakit ng ulo si Erika. Hinala niya, resulta ito ng stress at pagiging workaholic niya.

Dahil dito ay dumaan sa isang open brain surgery si Erika para tanggalin ang namuong dugo sa ugat ng kaniyang utak.

Nang dalhin sa ospital ay napag-alaman na mayroon palang Arteriovenous Malformations o AVM si Erika na ayon sa Cerebrovascular Neurosurgeon na si GV T. Liabres ay ang pagkakaroon ng abnormal connection sa artery at utak.

Sa isang pahayag, sinabi ni Dr. Liabres na ang dugo na pina-pump ng ating puso ay dumederetso rin sa ating utak at dumadaan sa arteries. Pero sa kaso ng AVM, naghahalo-halo ang daloy ng dugo at may tyansa na mauwi sa rupture.

May posibilidad din daw na ang stress at pagpupuyat ay mayroong kontribusyon sa pressure sa ugat sa utak kung kaya ito pumutok.

Bukod sa sakit na inabot niya rito ay halos wala rin daw maalala si Erika matapos ang kaniyang operasyon.

Samantala, nagpapahinga muna si Erika mula sa trabaho at tuluy-tuloy pa ring nagpapagaling.

Ikaw, workaholic ka rin ba? Hinay-hinay.

Tila nakuyog sa kaniyang hearing ang lalaking nahaharap sa kasong murder matapos mag-eskandalo at sumugod sa gitna ng courtroom ang ilang mga kaanak ng biktima.

Kung ano ang buong kwento, eto.

Enero nitong nakaraang taon nang barilin si Alianna Farfan sa loob mismo ng kaniyang kwarto at ang hinihinalang salarin ay ang kaniyang nobyo na si Alexander Ortiz.

Ayon sa court records, binawian daw ng buhay si Farfan matapos barilin ng kaniyang nobyo at pagkatapos daw ng insidente sa kwarto ng biktima ay nakita si Ortiz na lumabas mula sa bintana nito.

Dahil dito ay sinampahan ng kasong 1^st degree murder at inaresto noong February 2024 si Ortiz ngunit naghain ito ng not guilty plea noong marso.

Ngunit nito lamang Enero ay nagkaroon ng hearing si Ortiz sa Bernalillo County Courthouse kung saan makikita sa isang footage kung paano siya sinugod ng ilang kaanak ni Farfan.

Sa kalagitnaan ng hearing ay bigla na lang tinalon ng tiyuhin ng biktima na si Carlos Lucero ang isang barrier at sinugod ng suntok si Ortiz at nagtamo ng mga sugat pati ang mga umawat na pulis. Bukod sa kaniya ay mayroon pang isang babae at isang lalaki na nakisali sa tila kuyog na nangyari.

Gumamit naman ng taser gun ang pulis upang pigilan ang mga sangkot sa insidente kung saan naaresto si Lucero at ang dalawa pang mga indibidwal na sumunod sa kaniya.

Samantala, biglaan mang naaresto ay hindi raw pinagsisihan ni Lucero ang ginawa niya sa akusado.

Ikaw, ano ang gagawin mo kung ikaw ang nasa posisyon ng mga kaanak ng biktima?