EXPLAINERS

Sinong hindi kakabahan kung bigla na lang may dumating na masamang loob sa bangko? Bukod sa takot para sa sarili mong buhay ay matatakot ka rin na baka mawala ang pinaghirapan mong pera.

Pero hindi kaya aatras ang takot mo kung malaman mo na water gun pala ang armas ng masamang loob na iyon katulad ng isang korean man na nanloob ng isang bangko?

Kung magkano ang nasabat ng lalaki, eto.

Sa isang CCTV footage na nakuhanan sa isang bangko sa Gijang Busan, South Korea, makikita ang pagpasok ng isang lalaki na mayroon pang dalang attache case.

Kung titignan ay iisipin mo na mayroon itong dalang malaking halaga ng pera na kaniyang idedeposit.

Pero matapos ilapag sa sahig ang dalang bag ay sandali itong nagpalakad-lakad bago nagdeklara ng holdap.

Itinutok ng lalaki ang kaniyang baril na nakabalot sa isang itim na plastik sa mga customer at empleyado na siya namang sumindak sa mga ito.

Gusto pa raw sanang pasukin ng suspek ang opisina ng branch manager pero sa kabutihang palad ay naka lock ito, kung kaya naman inutusan niya na lang ang isang empleyado na ilagay sa kaniyang bag ang pera.

Ngunit nang paluhurin ng suspek ang mga tao sa loob ng bangko ay ang kaniya namang pagbagsak matapos siyang dambain ng isang lalaki hanggang sa matumba ito sa sahig.

Kinuha na yon ng mga empleyado bilang oportunidad at tulong-tulong na dinaganan ang suspek hanggang sa dumating na ang saklolo.

Nang inspeksyunin naman ng mga pulis ang dalang weapon ng lalaki ay napag-alaman na isa lang pala itong water gun na hugis dinosaur.

Hawak naman na ng mga pulis ang lalaki at naghanda ng certificate upang bigyang parangal ang matapang na lalaki sa bangko.

Kung magkano naman ang hiningi ng lalaki sa kaniyang failed roberry attempt? 50,000 Korean Won lang naman o mahigit 2,000 Pesos.

Samantala, hindi na idinetalye ng mga pulis kung bakit nagawa ng suspek na manloob ng bangko.

Ikaw, anong masasabi mo sa kwento na ito? Aatras din ba ang kaba mo?

Sa isang branch ng Walmart malapit sa Detroit kung saan maraming nahuling nang-shoplift, magkakaroon ng libreng carwash pagdating ng spring season.

Kung bakit? Alamin?

Ang Judge ng Genesee County District Court na si Judge Jeffrey Clothier, nagpataw kamakailan lang ng parusa sa mga nahuling nangshoplift sa branch ng walmart sa grand blanc township.

Ang parusa? Hindi pagkakakulong o pagbabayad ng multa kundi paglilinis ng mga sasakyan sa parking lot ng Walmart!

Ayon sa Judge, aabot ng halos isandaan katao ang maglilinis ng mga sasakyan nang libre.

Sa isang pahayag sinabi ni Judge Clothier na paraan niya raw ito para pigilin ang mga masasamang loob sa pagnanakaw sa nasabing store.

Nagpakita pa ng malawak na pag-unawa ang Judge at sinabi na humaharap lang sa hirap ng buhay ang ibang tao na nagawang magnakaw at hindi naman talaga masasamang tao.

Gayunpaman, nagpaalala pa rin ito na ang batas ay batas, at dapat itong sundin. Dahil kung hindi ay mahaharap ka sa kaukulang reklamo.

Samantala, sa spring season sa March hanggang April ay magsasagawa ng community service na free carwash ang mga shoplifter sa mga weekend events sa Walmart.

Ikaw, sa tingin mo ba ay sapat na ang parusa na ito?

Tapos na ang new year pero mayroon pa ring nabiktima ng mga mapaminsalang mga paputok, katulad ng isang batang babae na tumilapon dahil sa malakas na impact ngpagsabog nito.

Kung ano ang kinahantungan ng bata, eto.

Sa isang footage na nakuhanan sa isang kalsada sa Chongqing, China, makikita ang isang 12-anyos na batang babae na nakaupo sa harapan ng isang manhole na mayroong katabing dalawa pang sewers.

Maya-maya lang ay tumayo ang bata upang tumakbo, pero hindi pa man ito nakakalayo ay sumabog na ang paputok na sinindihan pala ng bata sa ibabaw ng takip ng mga manhole.

Napuno ng usok ang pinangyarihan ng insidente at makikita pa ang pagtalsik ng bata sa ere na nagdulot sa napakasakit na pagbagsak nito sa semento.

Ayon sa mga otoridad, sumabog ang sewer gas na nasa ilalim ng takip ng drainage dahil sa paputok kung kaya naman ganoon na lang kalakas ang impact nito.

Samantala, sinabi rin ng mga otoridad na nasa maayos na kalagayan na ang bata at patuloy na nagpapagaling dahil sa mga tinamo nitong bali sa katawan at paso sa ulo.

Ikaw, anong masasabi mo sa kalunus-lunos na sinapit ng bata?

Sa liit ng aso na si Tiger, hindi mo aakalain na isa pala itong K-9 dog at naging star of the show pa dahil kabilang ito sa mga na-promote kasama ng mahigit 200 mga pulis.

Ang nakakagigil sa ka-cute-an na kwento, eto.

Nitong Febaruay 6 ay ginanap sa parade ground ng Rizal Police Provincial Office ang nationwide oath-taking upang bigyang parangal ang mga 2^nd-level uniformed personnel.

Kabilang sa mga ito ang K9-dog ng Rizal PPO na shih tzu-poodle mix na si Tiger. Palagi raw itong kasama ng mga pulis sa tuwing tumutugon sa tawag ng serbisyo.

Naghatid ng karagdagang aliw sa selebrasyon si Tiger at naging main event pa dahil na-promote lang naman ang matapang na police dog na ito bilang Corporal!

Ang mas nakatutuwa pa riyan ay kadalasan malalaking breeds ng aso ang mga nagiging K-9 dogs kung kaya naman hindi mo aakalain na ang small but terrible na si tiger ay mayroon palang noble duties.

Ang nasabing event ay isinagawa sa buong bansa at tinatayang mahigit 33,000 mga pulis ang na-promote sa mas mataas na ranggo na ayon kay PNP Chief Gen. Rommel Francisco D. Marbil ay mga patunay ng kanilang commitment sa kanilang responsibilidad.

Ikaw, nanggigil ka rin ba sa achiever dog na ito?

Pinatunayan ng video na ito na hindi lang ang mga anak ang dapat sinasabihan ng “kaka-cellphone mo yan!” Dahil ganon na lang ang gulat ng isang tatay na abala sa kaniyang cellphone matapos maamoy ang kamay ng kaniyang anak na mayroon palang jackpot!

Ang buong nangyari sa nakatutuwang kwento, eto.

Sa isang footage na nakuhanan sa loob ng isang kwarto, makikita ang isang batang lalaki na kasama ang kaniyang tatay.

Kapwa may kani-kaniyang ginagawa ang dalawa at hindi nagpapansinan. Ang tatay, abala sa kaniyang cellphone, habang ang bata naman ay tila mayroong pinapanood sa TV at may hawak pang remote.

Makikita ang dahan-dahang pagtayo ng bata mula sa pagkakaupo habang ang mga mata ay diretso pa rin ang tingin sa TV. Maya-maya lang ay isinilid nito ang kaniyang kamay sa loob ng kaniyang diaper at lumapit sa kaniyang abala na daddy.

Noong una ay tila inakala pa ng tatay na naglalambing sa kaniya ang bata dahil inaabot nito ang maliit nitong kamay sa kaniya.

Hinawakan naman ng clueless na daddy na ito na kamay ng bata at hinalikan pa!

Nang dumikit ito sa kaniyang labi at napalapit sa kaniyang ilong ay ganon na lang ang gulat niya at natatawang pinunasan ang kaniyang labi.

Agad na binitawan ng tatay ang kaniyang cellphone bago tatawa-tawang binuhat ang bata para palitan ng diaper.

Ikaw, agad mo bang nahulaan kung ano ang naamoy ng tatay?

Ganon na lang ang pagkawindang ng fur parent ng chihuahua na si Tiny nang malaman na mayroong daga sa tulugan ng kaniyang mga alaga at si Tiny pa mismo ang nagdala rito.

Kung bakit iyon nagawa ni Tiny, eto.

Ang fur parent na si Erwin Estoque mula Cabanatuan, Nueva Ecija, ginulat ng kaniyang alaga na si Tiny dahil bigla na lang itong tila na-attach sa isang daga.

Nagtaka pa raw siya noong una kung bakit mayroong kasama na kulay itim na tuta si Tiny, at nang tingnan itong maigi ay napagtanto niya na hindi pala ito kabilang sa mga ipinanganak ng kaniyang aso kundi isa palang daga.

Sa isang pahayag, sinabi ni Erwin na mas masipag pa raw manghuli ng mga daga si Tiny kaysa sa alaga nilang pusa dahil ayaw na ayaw daw talaga nito sa mga daga.

Pero kakaiba ang mga ikinilos ni tiny nang subukang alisin ni Erwin ang daga sa loob ng kahon kung nasaan si tiny at ang kaniyang mga tuta.

Pumalag si Tiny at nagalit pa raw! Kung kaya naman kumuha na lang ng tongs si Erwin para ihiwalay ang daga mula sa kaniyang mga alaga.

Ipinaliwanag naman ng beterinaryo na si Dr. Sean Javier kung bakit ito nangyari sa aso.

Sinabi niya na hirap daw ang mga mommy dogs na matukoy kung sino ang kanilang mga baby, at baka rin daw palagiang bumibisita kina Tiny ang daga kung kaya naging kaamoy na ito ng mga tuta ay napagkamalan niya ito na isa sa kaniyang mga anak.

Samantala, mabuti na lamang at nagawang alisin ni Erwin ang daga kahit pa nagalit si Tiny dahil maaari raw pala itong magdulot ng iba’t ibang uri ng sakit katulad ng Leptospirosis at Rocky Mountain Spotted Fever.

Ikaw, ano ang gagawin mo kung gulatin ka rin ng alaga mong hayop sa ganitong paraan?

Hanap mo ba ay work benefits na hindi ikakaltas sa sahod mo? Kung mahilig kang uminom, baka magka-interes ka sa kompanya na ito sa osaka na nagbibigay ng hangover leaves.

Kung ano ang dahilan para gawin ito ng CEO, eto.

Sa Midoribashi, Osaka, mayroong maliit na tech company na tinatawag na Trust Ring Co., Ltd. Pero huwag itong iismolin dahil generous ang CEO nito.

Kung bakit? Nagdadala lang naman ito ng alak sa kompanya at pinapayagan ang mga empleyado na uminom sa oras ng trabaho.

Hindi pa diyan nagtatapos ang saya sa nasabing kompanya dahil mayroon ding hangover leaves ang mga empleyado!

Weird man tignan, useful naman ito para sa mga empleyado. Sinabi ng isang female employee sa local media na mas mabuting gamitin ang hangover leave para klaro ang isip bago bumalik sa trabaho.

Pero bakit nga ba ito pinahihintulitan ng kanilang boss?

Iyon ay dahil hindi niya raw kayang magpasahod ng mataas.

Dahil sa hirap na sumabay sa mga malalaking kompanya na mayroong mataas na salary offers, nag-isip na lang siya ng unusual benefits para maka-attract ng possible applicants.

Sinabi pa ng ceo na dapat ay maging creative rin ang mga maliliit na negosyo sa pag-iisip ng kakaibang benefits para maka-attract ng mga aplikante.

Ikaw, interesado ka ba na mag-apply sa kompanya na ito?

Sa dami ng mga nauusong gimmicks ng mga expecting parents sa social media para mag-gender reveal, ang mag-asawa na ito pinili ang napakasimple pero saksakan ng witty na paraan para alamin ang gender ng kanilang baby.

Kung paano nila ito ginawa? Eto.

Para sa mga magulang, lalo na sa first time parents, mahalagang event sa kanilang buhay na malaman kung ano nga ba ang magiging gender ng kanilang baby.

Kung kaya naman kahit na nagtitipid, gumawa ng paraan ang content creator mula sa Binmaley, Pangasinan na si Banong delos Angeles para i-celebrate ang gender reveal ng kanilang unang anak ng kaniyang misis.

Sa isang pahayag, sinabi ni Banong na para hindi sila masyadong mapagastos, naisip niya na isabay ang gender reveal party sa kanilang new year’s celebration.

Ang noo’y expecting dad, inilabas ang kaniyang creativity at wit para sa kanilang first baby.

Kung saan ginawa ang gender reveal party? Sa kanilang bahay, partikular na sa CR. Kung bakit? Iyon ay dahil hindi pinata o confetti poppers ang main tool ni Banong para i-reveal ang kasarian ng kanilang anak, kundi toilet flush!

Para gawin pang mas special ang main event, nilagyan nila ng pink at blue na lobo ang banyo at metallic curtains.

Sinabi rin ni Banong na gumamit daw siya ng ink ng printer para kumulay ang tubig kapag pinindot na ang flush.

Ang resulta? Kulay asul ang tubig na inilabas ng toilet bowl, kung kaya naman pinlano ni banong na isunod ang pangalan ng kanilang anak sa tunay niyang pangalan na Urbano at tatawagin itong Sixto dahil ito na ang pang-anim na Urbano sa kanilang pamilya.

Simple man ang naging selebrasyon, suportado naman ito ng kaniyang asawa at ng kanilang pamilya, at paniguradong isa ito sa mga hindi malilimutang milestone sa buhay nila ng kaniyang misis lalo na at malayo ito sa ordinaryo.

Ikaw, kaya mo bang tapatan ang napaka unique na gender reveal gimmik na ito?

Inihalintulad sa mga sikat na pelikula na 50 First Dates at The Vow ang buhay ng isang babae mula sa Toronto, Canada matapos nitong magising na wala nang memorya.

Kung paano nalagay sa ganoong sitwasyon ang babae? Eto.

Matapos makaidlip, biglang nagbago ang buhay ng 34-anyos na babae na si Nesh Pillay, dahil pagkagising nito, hindi na nito natatandaan ang kaniyang anak at boyfriend.

Ang karanasan na ito ni nesh ay mapapanood na rin online, hindi nga lang sa pelikula, pero sa isang docu-series na may pamagat na 50,000 First Dates: a true story.

Tila isa talagang pelikila ang buhay ni Nesh noong mga panahon na yon dahil 20% lang at mga bagong memories lang din ang natatandaan niya.

Napagkamalan pa raw niyang Uber driver ang kaniyang 32-anyos na boyfriend na si Johannes Jakope at nagulantang din siya nang malaman na mayroon pala siyang anak, kung saan sinabi niya na hindi raw siya marunong mag-alaga ng bata.

Nagkaroon na raw ng noon ng head injury si Nesh pero baka raw na-trigger ang kaniyang amnesia sa naranasang traumatic brain injury kamakailan lang.

Kung kaya naman ipinatingin niya ito sa isang espesyalista at kinumpirma nga ng isang neurologist na nagkaroon siya ng concussion na siyang nagresulta sa memory loss.

Naghahanap pa rin daw ng lunas si Nesh dahil nakakaramdam pa rin siya ng pagsakit ng ulo at tremor o ang panginginig ng ilang parte ng katawan ngunit paunti-unti na raw bumubuti ang lagay nito sa tulong ni Johanne.

Samantala, nag-propose na rin sa kaniya si Johannes at nagkaroon sila ng anak na lalaki nito lamang nakaraang taon.

Ikaw, anong pelikula ang gusto mong maranasan sa tunay na buhay?

Pinagkaguluhan at kinatakutan ang isang malaking pating na bigla na lamang sumulpot sa daungan sa isang barangay sa Quezon.

Kung paano napadpad doon ang pating, eto.

Sa isang video na in-upload ni Kuya Etoha na kinuhanan sa Brgy. Pandan Real, Quezon na mayroon nang mahigit isang milyong views, makikita ang kumpol ng mga residente na mayroong close encounter sa isang pating na bigla na lamang nagpakita sa kanilang pantalan.

Kung bakit ganoon kalapit ang pating ay dahil itinali pala ito ng mga residente at sa kasamaang palad ay namatay din sa kaparehong araw.

Sinabi naman ng animal expert na si Dr. Romulo Bernardo na ang nakitang pating ay malaki ang sukat at mayroong puting underbelly at kulay greyish na likuran at hindi raw kapareho ng uri ng pating na great white shark, na siya namang madalas ay matatagpuan sa mga malalamig na lugar ngunit may posibilidad na mamataan din sa Pilipinas.

Nagbigay naman ng paalala ang eksperto na dahil kakaunti na lang ang mga pating sa panahon ngayon, dapat ay huwag itong papatayin. Kung mangingisda man ay maging tradisyonal na lang at huwag magsasagawa ng dynamite fishing o ang paggamit ng explosives upang patayin ang mga isda.

Bukod pa riyan, nagpaalala pa si Dr. Bernardo na kung magkakaron ng hindi sinasadyang close encounter sa pating ay kumalma lamang at tahimik na lumangoy papalayo rito.

Ikaw, ano ang una mong gagawin kapag nakakita ka ng pating? Mamamangha o magpapanic?