INTERNATIONAL NEWS

Bilang pagsisikap na pataasin ang national birth rate sa Japan, maglulunsad ang pamahalaan ng Tokyo ng sarili nitong dating app.

Layon ng “Tokyo Futari Story” app na paramihin ang couples o futari sa bansa kung saan mas pangkaraniwan na ang pagiging single o hitori.

Bago makapag-sign in, kailangan munang mag-submit ng documents ang users na nagpapatunay na sila ay legally single.

Common sa regular dating apps sa Japan ang paglalagay ng sahod, ngunit ire-require sa Tokyo Futari Story app ang pagpasa ng tax certificate slip upang malaman ang annual salary ng user.

Bukod rito, sasailalim pa sa interview ang user upang kumpirmahin ang identity nito.

Pipirma rin sila sa isang liham kung saan nakasaad na handa silang magpakasal.

Hindi na bago para sa mga munisipalidad sa Japan na mag-organisa ng matchmaking events dahil sa patuloy na pagbaba ng birth rate sa magkasunod na walong taon.

Sa katunayan, noong 2023 naitalang higit pa sa doble ang bilang ng mga namatay kumpara sa mga isinilang sa Japan.

Para sa Tokyo City Hall, “gentle push” lamang ang kanilang app upang makahanap ng partner ang mga residente.

May ilan mang interesado dahil tila mas ligtas sa dating app na dinevelop mismo ng kanilang pamahalaan, marami rin ang nag-aalinlangan kung dapat ba itong paggastusan gamit ang tax ng taumbayan.

Bandang alas-siyete ng umaga noong June 11, 2024, napansin ng ilang residente ng isang village sa Andhra Pradesh, India ang palutang-lutang na katawan ng isang lalaki sa lawa.

Noong una, hindi nag-panic ang mga residente. Ngunit makalipas ang limang oras, napansin nilang hindi pa rin kumikilos ang lalaki kahit sigawan na nila ito. Dito na sila natakot at tumawag ng mga pulis dahil ang akala nila, patay na ang lalaki.

Agad na rumesponde ang mga pulis, maging ang emergency medical services team na mayroong 108 personnel, upang i-rescue ang lalaki.

Maging ang mga awtoridad ay kumbinsido na wala nang buhay ang lalaki. Ngunit nang marekober nila ang katawan, bigla itong bumangon!

Tila naalimpungatan ang lalaki at nagtaka kung bakit maraming taong nakapalibot sa kanya.

Ang ilang residente at awtoridad, natawa na lamang sa nangyari.

Nang mahimasmasan na, ipinaliwanag niya sa mga pulis na sampung araw na siyang nagtratrabaho sa isang granite quarry kung saan tumatagal ng 12 oras ang kanyang shift kada araw.

Kaya sa kanyang day-off, napagdesisyunan niyang uminom ng alak upang makapag-relax.

Dahil sa sobrang pagod at init ng panahon, lumangoy muna siya sa lawa; ngunit dahil sa kalasingan, unti-unti na siyang nakatulog. Sa lalim ng kanyang pagkakahimbing, hindi na niya namalayan ang nangyayari sa paligid niya.

Marami man ang natawa sa insidenteng ito, naging paalala ito sa atin sa kahalagahan ng pahinga. Kaya kung pagod ka na, magpahinga ka muna—sa ligtas na paraan nga lang.

Tuwing February 14 o Araw ng mga Puso, marami sa atin ang naglalaan ng oras upang makasama ang ating pinakamamahal.

Ngunit sa Lima, Peru, iginugugol ng ilang fur parents ang kanilang Valentine’s Day sa pag-aasikaso sa kanilang mga alaga na ikakasal sa araw na iyon.

Naging tradisyon na kasi sa nasabing lugar ang pag-oorganisa ng mass weddings para sa mga aso.

Kaugalian na sa Peru ang kasalang bayan, partikular na tuwing Araw ng mga Puso. Ito ang naging inspirasyon ng mass dog weddings na nagbigay ng kakaibang twist sa naturang tradisyon.

Katulad ng kasal ng tao, naka-tuxedo at bow tie ang ilang groom na aso, habang naka-wedding dress naman ang bride nila. Ang iba naman, sinusuotan ng makukulay na damit.

At katulad ng kasal ng tao, makakakuha rin ng marriage certificate ang mga aso na tinatakan nila gamit ang kanilang paws.

Ayon sa organizer ng mass dog wedding, layon ng ganitong event na magbigay ng awareness sa pagiging responsible pet owners.

Espesyal din ang event na ito dahil ipinagdiriwang dito ang araw ng pagmamahalan at pagkakaibigan.

Sa edad lamang na dalawang taon, natutunan na ni Zhang Xinyang mula sa China ang mahigit isang libong Chinese characters sa loob ng tatlong buwan.

Nasa primary school siya sa edad na apat. Makalipas ang dalawang taon, nasa fifth grade na siya.

Ipinasok si Zhang sa high school at dumeretso ng third year noong nine years old. At pagtungtong ng 10 years old, tinagurian siya bilang pinakabatang university student sa China.

Dahil sa kanyang katalinuhan, maraming umasang magiging maganda ang kinabukasan ni Zhang. Ngunit ngayong 28 years old na siya, wala na siyang ibang ginawa kundi tumambay at umasa sa suporta ng kanyang mga magulang.

Bago pumasok bilang Ph.D. student sa Beijing University of Aeronautics and Astronautics (ngayon ay Beihang University) sa edad na 16, sinabihan ni Zhang ang kanyang mga magulang na bilhan siya ng sariling apartment sa Beijing. Kung hindi, titigil siya sa pag-aaral.

Aniya, gusto ng mga magulang niya na mag-aral siya sa Beijing, kahit wala naman siyang sariling tirahan doon.

Hirap na ang mga magulang ni Zhang na pag-aralin ang kanilang anak, kaya imposibleng makabili pa sila ng apartment.

Gayunman, ayaw nilang abandonahin nito ang kanyang pag-aaral. Gaya ni Zhang, gifted child rin ang kanyang ama, pero hindi nito natupad ang kanyang mga pangarap dahil sa kakulangan sa pera.

Dahil gusto nilang ibigay ang lahat para sa anak, umupa sila ng apartment sa Beijing at sinabi kay Zhang na binili nila ito.

Ngunit nag-backfire ang plano nila dahil ngayon, hindi na nga nag-aaral o nagtratrabaho si Zhang, sila pa ang ipinagbabayad nito ng renta.

Ayon kay Zhang, pinilit siya ng mga magulang niya na tuparin ang kanilang mga pangarap. Plinano na nila ang kanyang buhay, kahit iba naman ang kanyang gusto.

Dagdag pa niya, ang mga magulang niya pa ang may utang sa kanya dahil ang apartment na bibilhin dapat para sa kanya, nagkakahalaga na ngayon ng $1.4 million.

Hati naman ang opinyon ng mga netizen sa kwentong ito. Ang ilan, pinupuna ang pagiging arogante at kawalang respeto ni Zhang sa kanyang mga magulang; habang para naman sa iba, babala ito sa mga magulang na masyadong pinipilit ang kanilang mga anak sa halip na hayaan na lamang silang i-enjoy ang kanilang kabataan.

Kahit diabetic at sakitin na, hindi pa rin mapilit ng mga doktor ang 70-anyos na si Roberto Pedreira mula sa Bahia, Brazil na uminom ng tubig.

Sa halip, soft drinks lamang ang iniinom niya araw-araw!

50 years nang hindi umiinom ng tubig si Roberto. Nang tanungin kung bakit, ang sagot niya lamang: ayaw niya nito.

Noong maospital siya dahil sa COVID-19, binigyan niya ng mahigpit na instruction ang mga doktor at nurse na cola lang ang iinumin niya.

Kumalat sa social media ang care chart ni Roberto at akala ng karamihan, biro lamang ito.

Ayon sa kanyang apo na si Joao Victor, kahit sino naman ay hindi maniniwala rito, ngunit kinumpirma niyang totoo ito.

Bukod sa diabetes, mayroon na ring heart problems si Roberto. Gayunman, hindi ito sapat na dahilan para sa kanya upang tigilan ang pag-inom ng soft drinks. Nakikipagtalo pa nga siya sa mga doktor tuwing sinasabihan siyang uminom ng tubig!

Pagdidiin ni Roberto, hindi siya natatakot na mamatay. Aniya, nanalo na siya sa buhay dahil 70 years old na siya.

Hindi man mapagsabihan na uminom ng tubig, ibinahagi ni Joao na iniingatan naman ng kanyang lolo ang sarili nito. Regular itong nagpapa-check up at iniinom ang mga gamot na inirereseta sa kanya ng mga doktor.

Kaugnay nito, nagbabala naman ang nutritionist na si Greice Furlanetto Arraes na hindi maaaring maging pamalit sa tubig ang soft drinks dahil mayaman ito sa sugar, additives, at calories na nagpapataas sa risk ng diabetes at iba pang mga malalang sakit.

Tatlong taon nang magkarelasyon sina Yang Jingshan at Lee Xueying mula sa Malaysia. Dahil matagal na rin silang nagsasama, napag-usapan na rin nila ang pagpapakasal.

Sa katunayan, balak ni Yang na mag-propose sa kanyang girlfriend sa mismong kaarawan niya sa June 2.

Ngunit noong May 24, ilang araw lamang bago ang pinaghandaang proposal, biglang bumaligtad ang sinasakyang kotse ng magkasintahan habang dumadaan sa Perak, northwestern Malaysia.

Sa kasamaang-palad, walang nakaligtas sa kanila. At lahat ng plano at pangarap nila, naglaho na parang bula.

Hindi pa rin naging hadlang ang trahedyang ito para sa mga pamilya ng magkasintahan na ikasal ang dalawa sa pamamagitan ng “ghost marriage”.

Ayon sa paniniwala ng mga Chinese, kung mamatay ang isang tao nang hindi natutupad ang kanyang kahilingan, hindi ito makakahanap ng kapayapaan sa kabilang buhay.

Ito umano ang dahilan kung bakit may mga nagmumulto.

Upang tulungan ang unmarried dead spirits na matupad ang kanilang pangarap na ikasal sa kanilang minamahal, idinaraos ang ghost marriage.

Bukod sa China, isinasagawa ang ghost marriage sa iba pang East Asian countries katulad ng Malaysia, North Korea, at Japan.

Sa halip na kamatayan ang maging dahilan ng kanilang hiwalayan, o ‘yung sinasabing “till death do us part”, ito pa ang naging tulay para kina Yang at Lee na matupad ang kanilang pinakahihintay na pag-iisang dibdib—kahit sa kabilang buhay.

Isang 45-anyos na lalaki ang naglilibot-libot sa Sri Jaya night market sa Pahang, Malaysia. May dala itong paper bag at nanlilimos sa mga dumadaan dito.

Nang magsagawa ng pagsusuri ang mga opisyal ng Social Welfare Department sa lugar, nadatnan nila ang lalaki.

Noong una, akala ng social workers na pipi at bingi ang pulubi dahil hindi ito sumasagot sa kanila.

Gayunman, hindi nila tinigilan ang lalaki at hiningian pa rin ito ng identification (ID) card.

Nasorpresa sila nang biglang magsalita ang lalaki at sinabing naiwan niya raw sa kotse ang kanyang ID.

Mas nagulat sila nang makita nilang Proton X70 ang sasakyan ng pulubi. Isa itong premium sport utility vehicle (SUV) na tinatayang nagkakahalaga ng P1.5 million.

Inamin ng lalaki na kumikita siya ng higit sa P6,000 kada araw sa panlilimos. Nakakakuha pa siya ng P5,600 monthly allowance mula sa Social Welfare Department dahil isa siyang person with disability (PWD).

Ginagamit niya ang nakukuhang limos at allowance bilang pambayad sa car installment at para na rin sa pang-araw-araw niyang pangangailangan.

Hindi na inireklamo ng social workers ang lalaki dahil first offense niya ito sa distrito, ngunit sinabihan siyang tigilan na ang panlilimos.

Bagama’t kailangan nating mag-ingat sa binibigyan natin ng limos, dapat pa rin nating panatilihing bukas ang ating mga puso sa pagtulong dahil sa kabila ng mga panloloko, marami pa rin ang tunay na nangangailangan.

Noong July 25, 2023, isang lalaking nakilala sa pangalang Chen ang nagtungo sa Yuyao City Fire and Rescue Brigade sa Zhejiang, China.

Sinubukan niyang kausapin ang mga bumbero, ngunit hindi siya maunawaan ng mga ito dahil may nakatakip na t-shirt sa kanyang bibig.

Nang tanggalin ang t-shirt sa bibig, dito nila nadiskubreng may naisubo palang isang LED lightbulb si Chen at hindi na niya ito mailuwa!

Sa una, tinangka ng mga bumbero na mailabas ang bumbilya, ngunit nahirapan sila dahil kailangan nilang iwasang mabasag ito sa loob ng bibig ng lalaki. Kung magkataon, mas lalala ang kalagayan niya.

Dahil dito, idinala nila si Chen sa kalapit na ospital. Iniulat ng mga doktor na hindi na nito maibuka ang bibig para maluwa ang bumbilya dahil sa sobrang ngawit.

Upang mailabas ang bumbilya, napagdesisyunan nilang i-dislocate ang isang panga ng lalaki. Nang bumukas na ang bibig nito, naalis ng mga doktor ang bumbilya nang hindi nababasag.

Ayon kay Chen, dalawang oras nang na-stuck sa bibig niya ang lightbulb nang humingi siya ng tulong sa mga bumbero.

Nang tanungin kung bakit niya isinubo ang bumbilya in the first place, inamin ni Chen na dahil ito sa isang online challenge.

Challenge failed na nga siya, kailangan niya pang sumailalim sa rehabilitasyon dahil sa nangyari sa kanyang panga.

Naging paalala ang kwento ni Chen na huwag basta susubukan at gagayahin ang mga nakikita sa internet, lalo na kung magdudulot ito ng panganib sa iyong buhay.

Dismayado ang mga naging bisita ng isang zoo sa Jiangsu, China.

Sa halip kasi makakita ng panda katulad ng ipinangako nila sa kanilang advertisement, mga asong kinulayan ng itim at puti ang nadatnan nila!

Unang ipinakita ng Taizhou Zoo ang mga “panda” sa publiko noong May 1. Mula 8 a.m. hanggang 5 p.m., dinadagsa ng mga turista ang mga panda.

Ngunit napansin ng ilang zoogoers na masyadong mabilis kumilos ang mga hayop para maging panda.

Dito na nabunyag na mga Chow Chow pala ang nasa exhibit!

Napag-alamang ginupitan ng zoo officials ng balahibo ang mga aso at pinintahan ng black and white dye upang magmukhang panda. Tiniyak naman nilang hindi ito delikado.

Nang tanungin kung bakit gumamit sila ng Chow Chow upang magpanggap, sinabi ng zoo officials na wala silang panda at ito lamang ang naisip nilang paraan.

Marami man ang gustong makakita ng tunay na panda, mailap at mahirap itong mahanap, lalo na’t nanganganib itong ma-extinct.

Bagama’t nag-improve ang conservation status nito sa “vulnerable” mula sa noo’y “endangered”, kailangan pa rin nating protektahan ang mga panda at ang kanilang mga tirahan upang mapanatili ang balanse sa ating kalikasan.

Bagama’t 20 times na siyang inaresto ng mga pulis, hindi pa rin tumigil ang isang lalaki mula sa Spain sa pag-iwas sa pagbabayad ng kanyang bills sa mga kinainang restaurant sa pamamagitan ng pagpapanggap na inaatake siya sa puso.

Isa sa mga pinakahuling target ng Lithuanian scammer na si Aidas J. ang El Buen Comer, isang tapas and seafood restaurant.

Dito, umorder siya ng seafood paella at dalawang whiskey na nagkakahalaga ng $37 o P2,150.

Matapos kumain, tinangka ni Aidas na umalis, ngunit hinarang siya ng isang staff ng restaurant upang singilin ito sa kanyang bill.

Nagpaalam siya na kukuha muna ng pera sa kanyang tinutuluyang hotel. Nang hindi siya payagan ng staff, bigla siyang humandusay sa sahig na tila inaatake sa puso.

Hindi kumbisido rito ang staff, kaya agad itong tumawag ng mga awtoridad.

Pagdating ng mga pulis, kinumpirma nilang paulit-ulit nang ginagawa ng lalaki ang ganitong scam, at ilang beses na rin siyang nadakip dahil dito.

Ayon pa sa mga pulis, madalas nilang nahuhuling nakangiti ang suspek tuwing inaaresto. Paniniwala nila, walang pakialam si Aidas sa ilang araw na pananatili sa selda.

Sa kanilang batas, magtatagal lamang kasi ng anim na linggo ang pagkakakulong sa kasong minor crime of fraud.

Upang hindi na maulit ang krimen, ikinalat ng El Buen Comer ang larawan ni Aidas sa kanilang lungsod.

Nanawagan din ang iba pang restaurant owners na nabiktima ng scammer na ipakulong ito ng dalawang taon.

Sa hirap ng buhay ngayon, iba’t ibang paraan ang ginagawa ng mga tao para lamang mapunan ang kanilang kumakalam na sikmura; ngunit sa halip na manloko, mas maigi pa ring humanap ng patas na paraan upang matugunan ang anumang pangangailangan.