INTERNATIONAL NEWS

Nagbabala si Ukrainian President Volodymyr Zelenskyy sa kaniyang nightly address nitong Sabado na naghahanda umano ang Russia para sa isang “malawakang pag-atake” sa Ukraine, kasabay ng panawagan sa mga residente na maging alerto sa mga air raid warning.

Sa mga nakalipas na linggo, nagsagawa ang Russian forces ng serye ng mabibigat na pag-atake sa Kyiv at iba pang pangunahing lungsod, kabilang ang isang strike noong Lunes na ikinasawi ng 10 katao at nagdulot ng malawak na pinsala sa Pechersk Lavra monastery, 1,000-taong-gulang na monasteryo na nagsisilbing simbolo ng espiritwal at kultural na pamana ng Ukraine.

Kasabay nito, naiulat din na hindi bababa sa anim na katao ang nasawi sa magkakahiwalay na pag-atake ng Russia sa iba’t ibang rehiyon ng Ukraine. Sa Zaporizhzhia, limang katao ang nasawi matapos tamaan ng glide bombs ang lungsod, habang 10 iba pa ang sugatan at ilang residential buildings ang nasira, ayon sa regional governor na si Ivan Fedorov. Sa southern Kherson region, sinabi ni regional governor Oleksandr Prokudin na isa ring indibidwal ang nasawi matapos ang drone attack sa isang nayon sa hilaga ng pangunahing lungsod ng Kherson.

Nangako si President Zelenskyy na ipagpapatuloy ng kanyang militar ang mga medium at long-range strikes, na nakatuon sa oil sector. Sinabi rin ni President Zelenskyy na gumamit din ang Ukraine ng drones laban sa ilang oil facilities sa Russia, kabilang ang isang refinery sa Tyumen region sa western Siberia at Moscow-area oil refinery na umano’y dalawang beses na tinamaan ngayong linggo.

Hindi bababa sa siyam na katao ang nasawi, kabilang ang isang bata at isang journalist ng Al Jazeera, matapos ang magkakahiwalay na airstrike at pamamaril ng puwersa ng Israel sa Gaza Strip noong Sabado, June 20, ayon sa mga health officials.

Sa Gaza City, apat na Palestinians ang nasawi kabilang ang dalawang babae at isang bata, matapos tamaan ng airstrike ang isang apartment building sa Sabra neighborhood, nawasak ang unit at marami rin ang nasugatan.

Sinabi ng Israeli military na isang “militant” ang target ng kanilang strike, ngunit hindi nagbigay ng karagdagang detalye.

Sa hiwalay na insidente sa Beit Lahiya, isang babae naman ang nasawi matapos umano barilin ng mga puwersa ng Israel. Samantala, isa pang airstrike sa Khan Younis sa timog ng Gaza ang ikinasawi ng isa at ikinasugat ng walo, ayon sa medics.

Pinakahuli, tatlo ang nasawi sa Bureij refugee camp sa gitnang Gaza, kabilang si Ahmed Wishah, isang cameraman ng Al Jazeera. Tinawag ng network na “heinous crime” ang kanyang pagkasawi, na sinundan pa ng naunang pagkamatay ng kanyang kapatid na isa ring journalist sa parehong organisasyon.

Kinondena ng Palestinian Journalist Syndicate ang insidenteng ito at nanawagan ng pananagutan sa Israeli leaders, habang iginiit na halos 300 Palestinian journalists na ang nasawi simula nang sumiklab ang digmaan noong Oktubre 2023. Ayon sa mga ulat, paulit-ulit na sinasabi ng Israel na ang ilan sa mga mamamahayag na target nito ay may kaugnayan sa mga militanteng grupo, tulad ng Hamas, ngunit hindi ito napapatunayan.

Bagama’t may umiiral na ceasefire na nagsimula noong Oktubre 2025, patuloy pa rin ang mga ulat ng mga pag-atake ng Israel sa Gaza. Ayon sa Gaza health ministry, mahigit 1,010 Palestinians na ang nasawi mula nang magsimula ang tigil-putukan, habang apat na Israeli soldiers naman ang nasawi sa parehong panahon.

Batay sa Israeli authorities, 1,200 katao ang napatay ng Hamas-led fighters sa cross-border attack nito noong Oktubre 7, 2023. Samantala, tinatayang mahigit 73,000 Palestinians na ang nasawi sa Gaza mula noon, batay sa Gaza health ministry.

Napilitang lumikas ang halos 1,700 turista matapos sumiklab ang matinding sunog sa Viva Wyndham Dominicus Beach resort sa bayan ng Bayahibe, Dominican Republic noong Hunyo 19. Ayon sa DAEH emergency services, isang 46-anyos na turistang Italyana ang naiulat na nasawi sa insidente habang tatlo pang katao ang isinugod sa mga pagamutan, at anim na iba pa ang agad na nilapatan ng lunas sa mismong lugar ng insidente.

Makikita sa drone footage ang lawak ng pinsalang idinulot ng sunog, kung saan ilang gusali sa loob ng resort ang nilamon ng apoy at makapal na itim na usok ang bumalot sa kalangitan.

Ayon sa Emergency Operations Center (COE), kontrolado na ang sunog at nailipat na sa ibang hotel ang mga apektadong turista. Patuloy pa ring iniimbestigahan ng mga awtoridad ang sanhi ng insidente.

“Preliminary observations indicate that the fire spread rapidly due to the flammable nature of parts of the roof structures made of palm, as well as wind ​conditions,” dagdag ng COE.

Gayunman, nilinaw ng COE na walang naging malaking epekto ang sunog sa sektor ng turismo sa Bayahibe. Patuloy umanong ligtas at normal ang mga aktibidad sa lugar, at nananatiling bukas sa mga turista ang mga kalapit na resort at iba pang pasyalan sa kabila ng nangyaring insidente.

Kasunod ng naging insidente, agad na isinara ang resort at hindi muna ito bubuksan sa publiko hanggang sa maglabas ng panibagong anunsyo ang pamunuan.

Kinumpirma ng Kremlin na dadalo si Russian President Vladimir Putin sa gaganaping summit sa pagitan ng Russia at ng Association of Southeast Asian Nations o ASEAN.

Nabatid na magaganap ang naturang pagpupulong sa Kazan, Russia mula Hunyo 17 hanggang 19.

Inaasahan namang dadaluhan ni Pangulong Ferdinand Marcos Jr. ang naturang summit bilang chairman ng ASEAN ngayong taon.

Ayon naman sa mga pag-uulat, dadalo rin si Putin sa ilang bilateral meeting sa pagitan ng ilang ASEAN member nations. — sa panulat ni Anjo Riñon