INTERNATIONAL NEWS

Nakasanayan na ng iba na bumili ng pagkain kapag bumabiyahe. Ang problema nga lang, kadalasan itong malamig.

Ngunit hindi ito isyu sa Japan dahil nakalikha sila ng lunch box o bento na kusang umiinit! Ang kailangan mo lamang gawin, hilain ang tali sa gilid ng box at sa loob ng ilang minuto, mayroon ka ng hot meal!

Sa ilalim ng bento, mayroong lalagyan ng maliliit na white coals o calcium oxide. Naglalabas ng tubig ang paghila sa tali at kapag humalo ito sa uling, nagkakaroon ng exothermic reaction o pag-release ng heat.

Sa ganitong paraan, pwede mo nang i-enjoy ang isang hot at freshly-made bento, anytime, anywhere!

Patunay ang self-heating bento sa Japan na napapadali ng inobasyon ang ating buhay.

Nasubukan mo na bang mag-file ng leave sa iyong kumpanya dahil biglang nag-aya ng date ang ka-chat mo sa dating app?

Ang mga empleyado ng isang kumpanya sa Thailand, hindi na kailangang gumawa pa ng palusot para lang makapag-bebe time dahil mayroon silang paid date leave!

Katulad rin ng sick o vacation leave ang date leave na inaalok ng Whiteline Group, isang marketing agency. Upang makapag-avail nito, kailangan munang magbigay ng one-week notice ang empleyado.

Ngunit limited offer lamang ito dahil pwede lamang itong i-file mula July hanggang December 2024.

Bukod sa paid date leave, mayroon ding six months free premium subscriptions sa isang dating app ang mga empleyado.

Ayon sa ulat, isang empleyado ang nagreklamo na wala na siyang oras para makipag-date dahil sa kanyang trabaho.

Upang i-boost ang kanilang well-being, nagsimulang maghandog ang Whiteline Group ng mga nasabing benepisyo, dahil naniniwala rin silang kung matagpuan ng mga empleyado ang kanilang “The One”, mas magiging produktibo sila.

Napatalon at napaiyak na lamang sa tuwa ang mga estudyante ng Albert Einstein College of Medicine sa New York City matapos ianunsyong bayad na ang kanilang tuition fee.

Ang nagbayad nito? Isang dating propesor ng nasabing private medical school.

Nagsimulang magtrabaho si Dr. Ruth Gottesman sa Albert Einstein College of Medicine noong 1968.

Noong September 2022, sumakabilang-buhay ang kanyang asawa na si David Gottesman, isang negosyante at bilyonaryo.

Upang magkaroon ng kahalagahan ang naiwang yaman ng asawa, nagdesisyon si Dr. Gottesman na magbigay ng $1 billion sa unibersidad bilang pambayad sa tuition fee ng lahat ng nag-aaral dito.

Dahil sa donasyong ito, makatatanggap ng refund ang mga estudyanteng nagbayad na ng kanilang matrikula, habang wala nang babayaran ang mga papasok pa lang sa medical school.

Pumapalo sa $60,000 o mahigit P3.3 million kada taon ang tuition fee sa Albert Einstein College of Medicine, na nag-iiwan sa maraming estudyante ng P11.2 million na utang matapos nilang maka-graduate dito.

Kaya para sa mga estudyante, napakalaking tulong ang ginawang kabutihan ng dating propesor dahil makakapag-aral na sila nang hindi inaalala ang pambayad sa matrikula. Mahihikayat din nito ang mga talentadong indibidwal na mag-aral ng medisina, ngunit nag-aalinlangan dahil wala silang sapat na kakayahan upang tustusan ang kanilang edukasyon.

Kilala ang mga Japanese sa kanilang displina. Sa katunayan, madalas silang ituring bilang pamantayan pagdating sa katangiang ito.

Patotoo rito ang isang video na nag-viral sa social media kamakailan. Bagama’t puno at siksikan na ang kanang hagdan at walang katao-tao sa kaliwa, makikitang naghihintay pa rin sila sa kanilang pagkakataon na makaakyat.

Dahil ito sa mahigpit nilang sinusunod ang patakarang, “Keep Right”.

Umani naman ang video na ito ng iba’t ibang reaksyon mula sa mga netizen.

Ayon sa ilang netizen, hindi susundin ng mga Pilipino ang ganitong patakaran dahil gagamitin pa rin nila ang hagdan na walang tao.

Komento naman ng isa, disiplinado ang mga Japanese dahil bata pa lamang, tinuturuan na sila ng mabuting asal; hindi umano katulad sa Pilipinas na kahit simpleng pagtapon sa tamang basurahan ay hindi magawa.

Ngunit ayon sa isang netizen, mawawala rin ang disiplina ng mga Japanese kung nasa bansa silang may malaking populasyon, katulad ng India.

Paliwanag niya, ilang minuto lang ang nasasayang ng mga Japanese sa ganitong paraan ng pag-akyat sa hagdan, ngunit kung sa ibang bansa ito, maaari silang ma-late ng ilang oras sa kanilang trabaho o paaralan.

Sinang-ayunan naman ito ng isa pang netizen na nagsabing hindi akma ang kultura ng Japan sa sitwasyon ng ibang bansa.

Kilala ang tribong Mundari mula sa South Sudan sa East Africa bilang “Cow Tribe” dahil malaki ang bahagi ng mga baka sa kanilang pamumuhay.

Bukod sa nakatira ang tribo kasama ang libu-libong baka, ginagamit din nila ang mga ito para sa pagkain, kalakalan, dowry, at iba pa.

Ngunit hindi lamang ito ang pakinabang ng mga baka para sa kanila dahil ginagamit din nila ang ihi nito bilang shower o panligo!

Katulad ng maraming tribo sa rehiyon, simbolo ng kayamanan at kapangyarihan ang mga baka para sa mga Mundari. Subalit ito rin ang pinagmumulan ng alitan sa kanila.

Sa katunayan, gumagamit pa sila ng baril para lamang protektahan ang kanilang mga baka mula sa mga magnanakaw.

Ginagamit naman ng mga Mundari ang ihi ng baka bilang panghugas sa kanilang mukha, kamay, at maging sa kanilang mga ngipin dahil naniniwala silang antiseptic ito o panlinis.

Nakatutulong din ang uric acid na matatagpuan sa ihi na magbigay sa kanila ng kulay pula, orange, o dilaw na buhok na para sa kanila ay maganda.

Bukod sa ihi, ginagamit nila ang dumi ng baka bilang panlinis at sunscreen. Susunugin nila ang mga dumi at ipapahid ang abo nito sa kanilang katawan.

Sumasalamin ang paraan ng pamumuhay ng tribong Mundari sa kanilang malalim na koneksyon sa kalikasan. Kakaiba man ito para sa atin, ngunit para sa kanila, ito ang kanilang kultura na patuloy nilang ipepreserba at iingatan.

Tila pampelikula o teleserye ang buhay ni Zhang Huaiyuan mula sa China.

Sa loob ng 33 taon, lumaki sa hirap si Zhang sa isang maliit na nayon sa probinsya.

Sa edad na 17, kinailangan niyang huminto sa pag-aaral upang kumayod at makatulong sa kanyang mga magulang.

Ngunit nang pumanaw ang kanyang ama noong 2023, isang nakagugulat na rebelasyon ang ibinunyag sa kanya ng kanyang ina: hindi sila ang tunay niyang magulang.

Siya pala ay anak ng mga milyonaryong negosyante!

Sa tulong ng mga pulis, sa wakas ay nakita ni Zhang ang kanyang totoong pamilya.

Mga luha at mahigpit na yakap ang sumalubong kay Zhang nang makaharap ang kanyang mga magulang at kapatid sa kauna-unahang pagkakataon.

Inabutan din siya ng kanyang ama ng bank card na may lamang 1.2 million yuan o mahigit P9.5 million.

Ayon sa ulat, idineklara ng doktor na nagpaanak sa ina ni Zhang na namatay ito bilang premature baby.

Subalit ang totoo, buhay na buhay ito at ipinaampon lamang ng doktor sa kanyang kamag-anak na hindi biniyayaan ng anak.

Lumaki man sa hirap si Zhang, nakapagpundar siya ng maliit na pabrika. Mayroon na rin siyang asawa at sariling anak.

Patunay ang kwento ni Zhang na puno ng milagro ang buhay. Ngayong natagpuan niya ang kanyang tunay na pamilya, natagpuan na rin niya ang yaman na hindi lamang materyal, kundi ang pagmamahal na noon ay ipinagkait sa kanya.