INTERNATIONAL NEWS

Kumukonsumo ang isang average Japanese person ng 10 grams ng asin sa isang araw.

Doble ito sa inirekomendang less than 5 grams na sodium intake ng World Health Organization (WHO).

Dahil dito, nagbenta ang Japanese company na Kirin ng isang battery-operated na kutsara na nagpapaalat sa pagkain!

Ito ang tinatawag na Electric Salt Spoon.

Gawa ang Electric Salt Spoon sa plastic at metal na pinapagana ng rechargeable lithium battery.

Inimbento ito upang maging malasa pa rin ang pagkain, kahit wala itong asin.

Naging posible ito sa pamamagitan ng pagpasa ng mahinang electric current sa dulo ng kutsara na nagco-concentrate ng sodium ion molecules sa dila na nagpapaalat sa panlasa.

Mabibili online ang Electric Salt Spoon sa halagang ¥19,800 o mahigit P7,600.

Iniuugnay ang sobrang sodium intake sa pagtaas ng kaso ng high blood pressure, stroke, sakit sa puso, at iba pa, kaya malaking tulong ang pagbabawas ng pagkonsumo ng asin.

Habang mas gusto nating kumain ng malasa at masasarap na pagkain, mahalaga pa rin na una nating isaalang-alang ang ating kalusugan.

Sa Pilipinas, kung saan mataas din ang sodium intake na 10.4 grams ng asin kada araw, posibleng maging kapaki-pakinabang ang teknolohiya na katulad ng Electric Salt Spoon.

Nagtungo sa damuhan ang isang lalaki mula sa Madhya Pradesh, India upang tumugon sa “tawag ng kalikasan”.

Ngunit habang nagbabawas, isang malaking sawa ang biglang sumulpot at umatake sa lalaki!

Nadatnan na lamang ang lalaki ng kanyang mga kasamahan na nakaupo, nakababa ang pantalon, at may nakapulupot na sawa sa leeg. Mababakas sa mukha niya ang labis na pagkatakot.

Sinubukan ng mga kasamahan niyang alisin ang sawa na tinatayang may habang 13 talampakan gamit ang kahoy, ngunit mas humigpit pa ang pagkakapulupot nito sa lalaki.

Dahil ayaw bumitiw sa lalaki, walang nagawa ang mga kasamahan niya kundi patayin ang ahas.

Sa kabutihang palad, ligtas ang lalaki at walang natamong sugat mula sa insidente.

Bagamat hindi makamandag ang sawa, kaya nilang pumatay ng tao at ibang hayop sa pamamagitan ng pagpulupot nito sa katawan ng biktima hanggang sa malagutan ng hininga sa loob lamang ng ilang minuto.

Kalunos-lunos ang sinapit ng isang lalaking kinilalang si Wu mula sa Shenzhen, Guangdong, China.

Kinailangan niya kasing sumailalim sa operasyon upang tanggalin ang kanyang kaliwang mata.

Ang dahilan? Pagpatay sa langaw na dumapo sa kanyang mukha!

Isang oras matapos hampasin ang langaw, nagsimulang mamaga at mamula ang kaliwang mata ni Wu.

Agad siyang nagtungo sa ospital, kung saan siya na-diagnose na may seasonal conjunctivitis o seasonal allergy.

Sa kabila ng pag-inom ng gamot, mabilis na lumala ang kondisyon ni Wu. Makalipas ang ilang araw, halos mawalan na ng paningin ang kanyang kaliwang mata.

Lumabas sa karagdagang pagsusuri na ang allergy niya ay talagang bacterial infection mula sa dumapo sa kanyang drain fly.

Sa kasamaang palad, hindi na mapigilan ng gamot ang pagkalat ng impeksyon. At dahil nanganganib nitong maapektuhan ang kanyang utak, tinanggal na lamang ng mga doktor ang kanyang kaliwang eyeball.

Pinayuhan naman ng mga eksperto ang publiko na kung may lumipad na insekto malapit sa mukha, huwag itong hampasin at sa halip, tabuyin na lamang.

Hindi na bago para sa mga vlogger ang pagsasagawa ng social experiments sa kanilang videos. Kabilang na dito ang pangyayakap sa random strangers na layong magpakalat ng peace and love sa kanilang kapwa.

Ito ang tinularan ng Algerian vlogger na si Mohamed Ramzi. Lingid sa kanyang kaalaman, ang ganitong video pa ang magiging dahilan ng kanyang pagkaaresto.

Sa kanyang vlog na ngayon ay burado na, nakita kung paano niyakap ni Mohamed ang ilang dumadaang estranghero.

Ayon sa vlogger, ginawa niya lamang ito upang magpalaganap ng positivity; ngunit hindi niya naisip na hindi katanggap-tanggap sa kultura nila ang ganitong asal.

Kung matatandaan, Islam ang pangunahing relihiyon sa Algeria.

Dahil dito, sinampahan si Mohamed ng kasong indecent behavior. Bukod pa rito ang kasong display of indecency dahil sa isa niya pang video kung saan makikita ang dalawang kababaihan na nakasuot ng maikling palda at may tattoo.

Sa una, nahatulan siya ng not guilty; ngunit nang dalhin sa Algerian Judicial Council ang kanyang kaso, dito na napatunayang nagkasala siya.

Nakulong siya ng dalawang buwan at pinagbayad ng multang nagkakahalaga ng P2.1 million.

Paalala ang insidenteng ito na kahit maganda ang intensyon, mahalaga pa ring isaalang-alang at igalang ang kultura at paniniwala ng bawat komunidad upang maiwasan ang hindi pagkakaunawaan at paglabag sa batas.

Ang Power Nap Contest ng South Korea ang itinuturing na pinakamasaya at pinaka-relaxing na paligsahan sa buong mundo.

Sa halip kasing mapagod at pagpawisan, ang kailangan mo lamang gawin sa kompetisyong ito ay matulog!

Kamakailan lamang, nasa 100 South Koreans ang nagtungo sa Han River Park sa Seoul upang lumahok sa Power Nap Contest.

Suot ang kanilang mga damit pantulog, kanya-kayang hanap ng kumportableng pwesto ang mga kalahok upang matulog nang mahimbing sa loob ng isang oras at 30 minuto.

Ayon sa organizer ng 2024 Power Nap competition na si Lim Ji-Hyeon, ang South Korea ang may pinakamababang sleep duration sa mga bansang kasapi ng Organization for Economic Cooperation and Development (OECD).

Batay sa datos, natutulog lamang ang isang South Korean ng 7 oras at 41 minuto kada gabi; mas mababa kumpara sa OECD average na 8 oras at 22 minuto.

Sa pamamagitan ng pagdaraos ng Power Nap Contest, umaasa ang organizers na makakapagpahinga ang mga kalahok at mararamdaman ang mga benepisyo ng pagtulog.

Hindi naman ganun kadali ang kompetisyon dahil habang natutulog, iistorbohin ang mga kalahok sa pamamagitan ng pagkiliti, pagbulong, at iba pa.

Matutukoy naman ang nanalo sa pamamagitan ng pag-alam sa heart rate ng mga kalahok dahil kung mas malaki ang pinagkaiba ng tibok ng puso bago at habang natutulog, mas maayos ang naging pahinga.

Gaano man tayo kaabala sa buhay, mahalaga pa ring tiyakin na mayroon tayong sapat na tulog at pahinga. Tandaan, ang pagtulog ay isang mahalagang bahagi ng ating araw na nagbibigay sa atin ng lakas at sigla upang harapin ang mga hamon ng buhay.

Dahil sa init ng panahon, nag-order ang doktor na si Orlem Brandon Serrao mula sa Mumbai, India ng tatlong ice cream cones sa pamamagitan ng isang online grocery delivery app.

Habang kinakain ang butterscotch-flavored ice cream, bigla siyang nakakagat ng isang matigas na bagay.

Akala niya noong una, mani o tsokolate ito; ngunit matapos iluwa, dito na tumambad sa harap niya ang isang putol na daliri ng tao!

Nang suriin ang niluwang sahog ng ice cream, napansin ni Serrao ang kuko at fingerprints nito. Dahil isang doktor, pamilyar siya sa mga bahagi ng katawan at nakumpirma niyang isa itong hinlalaki.

Agad niya itong ipinagbigay-alam sa mga pulis.

Ayon sa manufacturer na Yummo Ice Cream, itinigil na nila ang produksyon ng naturang produkto. Tiniyak din nilang tutulong sa imbestigasyon hinggil sa insidente.

Kaugnay nito, isang hindi pinangalangang empleyado ng Yummo ang kinasuhan ng food adulteration and endangering human life.

Sa ngayon, ipinadala na sa isang forensic lab ang putol na daliri upang matukoy kung pagmamay-ari ba ito ng isang tao o hayop.

Nawa’y magsilbi ang kwentong ito bilang paalala sa mga negosyante, partikular na sa mga pabrika, na palaging bigyan ng pansin ang paggawa ng kanilang produkto dahil nakasalalay rito ang kaligtasan ng publiko at maging ng kanilang mga empleyado.

Ilang araw nang hindi mapakali si Cecil Andre Gomes mula sa India.

Walang tigil kasi ang pagdurugo ng kanyang ilong!

Dahil hindi na makatiis, nagtungo na siya sa isang ospital sa Prayagraj upang malaman ang sanhi ng kanyang nosebleed.

Nang suriin ng doktor, dito na nadiskubreng mayroon palang buhay na linta sa loob ng kanyang ilong!

Ayon kay Dr. Subhash Chandra Verma, sinisipsip ng linta ang dugo ni Gomes kaya siya nakararanas ng nosebleed.

Ang linta o leech ay isang uri ng parasite na sumisipsip ng dugo mula sa iba’t ibang organismo, kabilang na ang tao. Kaya nitong mabuhay ng ilang linggo sa loob ng katawan ng tao.

Sa kabutihang palad, maayos namang natanggal ang buhay na linta mula kay Gomes. Wala ring naiwang pinsala sa loob ng kanyang ilong.

Paniniwala ni Gomes, posibleng nakapasok sa ilong niya ang linta nang maligo siya sa isang maduming ilog.

Hindi maikakailang nakakikilabot ang nangyari kay Gomes, kaya naman laging mag-ingat at iwasang maligo sa maduming tubig upang hindi ito mangyari sa’yo.