HOT STORIES OF THE WEEK

Isinasantabi muna ng Malacañang ang usapin ng charter change at federalismo.

Ito ang inihayag ni Presidential Spokesperson Harry Roque kasunod ng resulta ng survey ng Pulse Asia na hindi maitutiring na national concern ang pagsusulong sa pagpapalit ng porma ng pamahalaan.

Ayon kay Roque, mas pinagtutuunan ng pansin ngayon ng pamahalaan ang mga usaping malapit sa bituka ng masa tulad ng inflation.

Gayundin ang mga paraan para mapatatag ang presyo ng mga pangunahing bilihin lalo na sa pagkain.

Gayunman, nilinaw ni Roque na hindi pa rin naman tuluyang isinasantabi ng Malacañang ang pagsusulong sa pederalismo.

Aniya, may tamang panahon para muling pag usapan ang charter change.

—-

Inalis na ng Department of Environment and Natural Resources (DENR) ang ban sa operasyon ng ilang quarrying companies.

Ayon kay DENR Secretary Roy Cimatu, ito ay matapos ng ginawang pagaaral ng Mines and Geosciences Bureau (MGB) sa sitwasyon at mapatunayang hindi nanganganib ang mga ito sa anumang pagguho.

Batay sa listahan ng DENR maaari nang magbalik operasyon ang mga quarrying companies sa mga rehiyon ng Ilocos, Cagayan, Calabarzon, Bicol, Northern Mindanao at Davao.

Gayunman nanatili pa ring suspendido ang operasyon ng mga quarrying sa Naga City, Cebu at maging sa benguet area kung saan may nangyaring landslide.

Samantala, nilinaw ng DENR na nasa sampung porsyento lamang ng mga mining at quarrying operations ang kanilang sinuspende.

Tiwala ang Malakanyang na sobra-sobra ang nakukuhang suporta ni Pangulong Rodrigo Duterte mula sa militar.

Ito ang ipinahayag ni Presidential Spokesperson Harry Roque sa gitna na rin mga umuugong na tangkang pagpapatalsik sa pwesto kay Pangulong Duterte.

Ayon kay Roque, nakatitiyak aniya siya sa suporta ng mga pulis at sundalo kay Pangulong Duterte dahil sa ibinigay nitong dagdag sweldo sa lahat ng mga uniformed personnel.

Gayundin aniya ang madalas na pagiikot ng pangulo sa mga kampo militar para mapalapit sa mga sundalo

Dahil dito, umaasa si Roque na walang sundalo at pulis ang sasama sa mga grupong nagtatangkang magpabagsak sa administrasyong Duterte.

Imposibleng mapabagsak ng mga kalaban ng gobyerno ang Duterte administration.

Binigyang diin ito ni Philippine National Police (PNP) Spokesman Chief Supt. Benigno Durana sa kabila nang patuloy na paglutang ng ‘Red October’ plot.

Ayon kay Durana mananatiling panaginip lamang para sa mga grupong nais pabagsakin ang gobyerno ang kanilang mga plano laban dito dahil wala itong suporta ng mayorya ng mga Pilipino.

Itinaas ng Bangko Sentral ng Pilipinas (BSP) ang inflation forecast ngayong 2018 at 2019.

Ipinabatid ni BSP Assistant Governor Francisco Dakila Jr. na mula 4.9 percent ay inaasahang aakyat pa sa 5.2 percent ang inflation outlook para sa taong ito.

Sinabi ni Dakila na binago nila ang inflation forecast para sa susunod na taon kung saan lumobo na ito sa 4.3 percent mula sa 3.7 percent.

Nananatili namang nasa 3.2 percent ang inflation forecast nila para sa taong 2020.

Ayon kay Dakila, nakaapekto dito ang higit sainaasahang antas ng inflation nuong agosto maliban pa sa epekto ng Bagyong Ompong at ang mas mabagal na paglago ng gross domestic product sa unang bahagi ng 2018.

Subalit sa ginawang revision, inihayag ni Dakila na maaaring bumalik sa target range ng gobyerno na dalawa hanggang apat na porsyento ang 2019 inflation sakaling maisabatas na ang Rice Tarrification Bill.

Inalis na ng Department of Labor and Employment (DOLE) ang deployment ban sa mga Pinoy nurses sa Micronesia.

Sinabi ni Labor Secretary Silvestre Bello III na ang lifting ng ban ay batay na rin sa rekomendasyon ng Department of Foreign Affairs (DFA) sa ahensya.

Ayon kay Bello, mahigpit nang pinag-aaralan ng kanilang technical working group ang nasabing hakbang.

Magugunitang ipinagbawal ng DOLE ang pagpapadala ng Pinoy nurses sa Micronesia dahil sa mga reklamo kabilang na ang mababang sahod.

DFA itinaas ang sitwasyon sa Libya sa alert level 3

Samantala, itinaas na ng Department of Foreign Affairs (DFA) sa alert level 3 ang sitwasyon sa Libya.

Ito ang nagtulak sa Department of Labor and Employment (DOLE) para magpatupad ng deployment ban sa Libya dahil sa kaguluhan dito at mga insidente nang pagdukot sa mga Pilipino.

Samantala, inalis na ng DOLE ang deployment ban sa Pinoy nurses sa Micronesia base na rin sa rekomendasyon ng DFA.

Una nang nagpatupad ng deployment ban sa Micronesia dahil sa mga reklamo ng mababang pasahod sa Pinoy nurses.

—-

Tiniyak ng Armed Forces of the Philippines (AFP) na nananatiling tapat sa konstitusyon at sa kanilang sinumpaang tungkulin ang lahat ng sundalo sa bansa.

Tugon ito ni AFP Spokesman Brigadier General Edgar Arevalo sa pahayag ng Pangulong Rodrigo Duterte na ilang sundalo ang nakikipagsabwatan sa Liberal Party (LP) para pabagsakin siya sa puwesto.

Binigyang diin ni Arevalo na sigurado ang pamunuan ng AFP sa katapatan ng mga sundalo sa konstitusyon kaya’t hindi na kailangan ng loyalty check.

Sapat naman aniya ang counter intelligence network ng militar para malaman kung totoo ang alegasyon na mayroong mga sundalong naliligaw na naman ng landas.

Una nang iminungkahi ni Senador Panfilo Lacson ang loyalty check sa AFP matapos magpahayag ng hinanakit ang Pangulong Duterte sa mga sundalong nakikipagsabwatan di umano para patalsikin siya sa puwesto.

—-

Bubuksan na sa mga lokal na turista ang Boracay Island sa October 15.

Ayon kay Atty. Richard Fabila, Officer in Charge ng CENRO o Community Environment and Natural Resources Office sa Boracay, layon nito na masubukan muna kung epektibo ang mga inilagay nilang sewerage treatment plants (STP) sa isla bago ito buksan para sa lahat ng turista.

Plano rin aniya ni DENR Secretary Roy Cimatu na magtalaga ng mga environment enforcers na huhuli sa mga magtatapon ng basura.

“Ang purpose po nun ay kailangan nating ma-test ‘yung mga STP ng mga establishment na kakalagay lang po, so mga hanggang end of October po ‘yun, hindi po natin ma-detect ang pagiging handa o kung epektibo ba ang mga STP na itinayo kung hindi natin papasukan ng mga bisita.” Pahayag ni Fabila

 (Tolentino Online Interview)

Walang planong tumakbo sa 2019 elections si dating Senador Bongbong Marcos.

Sinabi ni Atty. Vic Rodriguez, isa sa mga abogado ni Marcos na walang plano ang dating senador na abandonahin ang kanyang electoral protest laban kay Vice President Leni Robredo.

Ayon kay Rodriguez, posibleng iapela nila ang pasya ng Presidential Electoral Tribunal (PET) na gamitin ang election returns sa recount at paggamit sa decrypted images ng mga nabasang balota.

Binigyang diin ni Rodriguez na bahagi ng kanilang protesta ang pagkuwestyon sa mga ginamit na makina sa eleksyon kayat hindi tama na gamitin ang mga election returns at decrypted images na nagmula rin sa kinikuwestyong mga makina.

“This is by far the farthest election protest for vice president, walang natuloy, walang natapos, walang nagsimula, hanggang nag-file lang, ito pong atin ay hindi tayo natigil sa pagfa-file, umabot tayo hanggang ngayon manual recount and judicial revision at malapit nang matapos ang pangatlong pilot province at isususmite na po natin sa Tribunal ang mga ebidensyang nakalap, pati ‘yung report ng revision committee upang ma-appreciate ng korte ang mga ebidensyang ihahain sa harap nila.” Ani Rodriguez

(Balitang Todong Lakas Interview)

Posibleng magsimula nang umiral sa ilang panig ng bansa ang northeast monsoon o hanging amihan sa susunod na buwan, Oktubre.

Batay sa obserbasyon ng Philippine Atmospheric Geophysical and Astronomical Services Administrationo PAGASA, mahina na ng hanging habagat.

Indikasyon na anila ito ng nalalapit na pagpapalit mula sa habagat patungong amihan.

Una namang mararamdaman ang amihan sa hilagang bahagi ng bansa na hudyat naman ng paglamig na ng temperatura.

Samantala, sa kasalukuyan, inaasahang magdadala pa rin ng kalat-kalat na pag-ulan sa Visayas at katimugang bahagi ng Mindanao ang hanging habagat.

—-