HOT STORIES OF THE WEEK

Pasok na rin ang National Bureau of Investigation (NBI) sa pagsisiyasat sa sinasabing Red October o ang planong pagpapatalsik umano sa puwesto kay Pangulong Rodrigo Duterte.

Ayon kay Justice Secretary Menardo Guevarra, nagsasagawa na ng fact finding investigation ang NBI sa nakuhang impormasyon ng Armed Forces of the Philippines (AFP) sa umano’y pagsasabwatan ng komunistang grupo, oposisyon at ilang mga sundalo para mapatalsik ang Pangulo.

Partikular aniyang titignan ng NBI ay kung may katotohanan ang naturang report at matukoy ang mga personalidad na nasa likod nito.

Sinabi ni Guevarra, sakaling mapatunayang may katotohan ang report, maaaring maharap sa kasong sedisyon at kudeta ang mga taong nasa likod nito.

AFP-PNP magpupulong

Nakatakdang magpulong sina Armed Forces of the Philippines (AFP) Chief of Staff Carlito Galvez at Philippine National Police (PNP) Chief Director General Oscar Albayalde.

Ayon kay Albayalde, partikular na kanilang pag-uusapan ni Galvez ang umano’y Red October o planong pagpapatalsik sa puwesto kay Pangulong Rodrigo Duterte sa pangunguna ng mga komunista.

Aniya, kanila nang paplantsahin ang mga ilalatag na seguridad laban sa umano’y banta ng komunistang grupo na pabagsakin ang administrasyong Duterte.

Kasabay nito, tiniyak ni Albayalde na walang pulis ang sumusuporta sa Red October at wala rin aniyang mga retiradong pulis na nagbibigay ng suporta rito.

—-

Hindi pa rin ligtas si Senador Antonio Trillanes IV sa posibilidad na mapaharap sa general court martial ng Armed Forces of the Philippines (AFP).

Ayon sa isang mapagkakatiwalaang source sa AFP na tumangging magpabanggit ng pangalan, maingat na pinag-aaralan ngayon ng kanilang hanay ang kaso ni Trillanes sa court martial habang nakabinbin pa sa civilian court ang iba pang kaso nito.

Sinabi din ng source na may kapangyarihan pa rin ang Military Court na iparesto ang senador kahit pa wala na ito sa tungkulin bilang navy officer ngayong ipinawalang bisa ni Pangulong Rodrigo Duterte ang iginawad na amnesty sa kaniya.

Gagamitin din umanong jurisprudence o batayan ng afp ang kaso ni retired Brig. Gen. Francisco Gudani na isinalang pa rin sa court martial nuong 2006 matapos suwayin ang utos ng nuo’y AFP chief of staff Gen. Generoso Senga.

Magugunitang pinagbawalan ni Senga si Gudani na humarap sa pagdinig ng Senado kaugnay ng ‘hello garci scandal’ kahit pa nagretiro na ito sa tungkulin.

Hinimok ni Pangulong Rodrigo Duterte ang mga sundalong nais siyang patalsikin sa pwesto na kausapin na lamang siya kaysa magplano pa ng kudeta.

Sa kaniyang talumpati sa seremonya para sa mga bagong biling sasakyan ng Bureau of Jail Management and Penology (BJMP), sinabi ng pangulo na pwede siyang sa Malakanyang ng mga sundalo upang kausapin ukol sa pagbaba sa kaniyang pwesto.

Sinabi ni Duterte na ang pagsasagawa ng kudeta para lamang siya ay pababain sa pwesto ay aksaya lamang ng oras.

“So if you think that I do not deserve to be there, just tell me. I’d be happy to oblige pagod na rin ako. If you think that is better neither on the side who should be…kayo? I will not order my PSG ako sa likod pupunta kayo sa harap magdala kayo ng mga mechanized you would look silly. Do not do that. Just go to my office mag-usap tayo, I will hear you.  And if you think that tama ka matanda na ako, hindi na ako makakapagtrabaho or I am no longer be able to articulate what I should be doing in government, just tell me.” Pahayag ni Duterte.

Pinaboran ng Korte Suprema na tumatayo bilang Presidential Electoral Tribual (PET) sa isyu ng 25 percent shading sa balota ang kampo ni Vice President Leni Robredo.

Sa resolusyon ng PET, susundin sa recount ng mga balota ang shading threshold na 25 percent na sya ring ginamit ng Commission on Elections (COMELEC) noong 2016 elections.

Matatandaan na isinusulong ng kampo ni dating Senador Bongbong Marcos sa kanyang electoral protest ang 50 percent shading threshold.

Ibinasura rin ng PET ang mosyon ni Marcos na hindi dapat gamitin ang decrypted ballot images ng mga nabasang balota.

Ibig sabihin nito, puwede nang gamitin sa pagbibilang ang larawang kuha ng machine sa mga balota na nabasa at hindi na mabasa ang nilalaman.

Kaugnay nito, posibleng iurong na lamang umano ni dating Senador Bongbong Marcos ang kanyang electoral protest laban kay Vice President Leni Robredo.

Ayon kay Atty. Romulo Macalintal, abogado ni Robredo, ang malaking bahagi ng protesta ni Marcos ay nakabase sa shading threshold o yung mga balota na halos dalawampu’t limang (25) porsyento lamang ang shade.

Sinabi ni Macalintal na mababale-wala ang mga ito dahil pumayag na ang Presidential Electoral Tribunal (PET) na tanggapin ang 25 percent shading threshold.

Nais ng kampo ni Marcos na ibalewala ang mga balota ni Robredo na hindi aabot sa limampung (50) porsyento ng oval ang mayroong shade.

—-

Isinusulong ni Senate President Vicente Sotto III ang panukalang naglalayong maibaba sa edad na labing tatlo (13) pataas ang criminal liability para sa mga kabataang masasangkot sa krimen.

Ayon kay Sotto, nakakabahala na ang dumaraming kaso ng mga menor de edad na nasasangkot sa mga krimen tulad ng pagnanakaw.

Sa ilalim ng Senate Bill 2026 ni Sotto, sinabi nitong inaabuso ng mga criminal syndicate ang probisyon sa juvenile justice and Welfare Act of 2006 kaya ginagamit ng mga ito ang mga menor de edad sa paggawa ng krimen.

Iginiit ni Sotto hindi na naaayon sa international standards ang nakasaad sa nabanggit na batas kung saan hindi maaaring panagutin sa anumang kasong kriminal ang mga kabatang may edad labing lima (15) pababa.

Batay aniya sa pag-aaral na isinagawa ng Child Rights International Network, nasa labing isang (11) taong gulang ang minimum age criminal responsibility sa Asya at Africa habang sa Estados Unidos at Europa ay labing tatlong (13) gulang.

(Ulat ni Cely Bueno)

Tinawag ng Communist Party of the Philippines (CPP) na kathang isip lamang ng militar at pamahalaan ang umano’y “Red October” o ang planong pagpapabagsak sa administrasyong Duterte sa pangunguna ng mga komunista.

Sa ipinalabas na pahayag ng CPP, kanilang kinondena ang Armed Forces of the Philippines (AFP) sa anila’y pagiimbento ng sitwasyon na may malinaw na layuning magpatupad ng mararahas na aksyon laban sa taumbayan.

Mariin ding itinanggi ng CPP ang akusasyon ng militar na umano’y kanilang pakikipagsabwatan sa oposisyon para sa planong pagpapatalsik kay Pangulong Rodrigo Duterte.

Binigyang diin pa ng CPP na walang maipakitang matibay na ebidensiya ang AFP sa nakuha umano nitong intelligence information at maging ang sinasabi ni Pangulong Duterte na recorded na pag-uusap ng kanilang organisasyon at iba pang grupo hinggil sa ouster plot.

Samantala sa hiwalay na pahayag, sinabi ni CPP founding chairman Jose Maria Sison na sina Pangulong Duterte at ang militar ang nagsasabwatan para sa isang psy-war campaign na layuning pagandahin ang rehimenng Marcos at mabigyang katwiran ang plano nitong magdeklara ng batas militar.

Inilabas na ng Liberal Party (LP) ang kanilang initial senatorial list para sa 2019 midterm elections.

Sa isinagawang national executive council meeting ng LP ngayong umaga sa Quezon City, opisyal nang inanunsyo ng partido ang pagtakbo nina reelectionist Senator Paolo Benigno “Bam” Aquino IV, dating Quezon Rep. Lorenzon Erin Tanada III at Human Rights Lawyer Jose Manuel “Chel” Diokno.

Dumating sa naturang pagpupulong sina Vice President Leni Robredo, dating Pangulong Benigno “Noynoy” Aquino III, LP president Senator Francis Pangilinan at iba pa.

Ipina-aresto na ng Makati RTC Branch 150 si Senador Antonio Trillanes IV.

Kasunod ito nang pag i isyu ng korte ng warrant of arrest laban kay Trillanes pabor sa kahilingan ng Department of Justice.

Magugunitang binawi ni Pangulong Rodrigo Duterte ang amnesty na ipinagkaloob ng dating Pangulong Noynoy Aquino kay Trillanes.

Maliban sa arrest warrant, nag isyu na si Judge Elmo Alameda ng hold deprture order laban sa senador.

Itinakda naman ng Korte ang 200,000 pisong piyansa para sa pansamantalang kalayaan ni Trillanes.

Bumagsak ang bilang ng mga Pinoy na bilib sa trabaho at nagtitiwala sa Pangulong Rodrigo Duterte.

Batay ito sa survey na isinagawa ng Pulse Asia mula Setyembre 1 hanggang 7 sa may 1,800 respondents.

Labing tatlong (13) puntos ang ibinaba ng bilang ng mga Pinoy na bilib sa trabaho ng Pangulo o 75 percent mula sa 88 percent noong June survey.

Pinakamalaki ang ibinagsak ng performance ratings ng Pangulo sa Luzon na umabot sa 17 percent at sa Class D na pumalo sa 13 percent na pagbagsak.

Samantala, tumaas naman ng pitong (7) porsyento ang disapproval rating ng Pangulo.

Kinse (15) porsyento rin ang ibinagsak ng bilang ng mga nagtitiwala sa Pangulong Rodrigo Duterte mula sa 87 percent noong June survey, sa 72 percent na lamang ngayong Setyembre.

Ang dating 2 porsyento lamang na walang tiwala sa pAngulo ay pumapalo na ngayon sa 9 porsyento o pagtaas ng 7 porsyento.

LOOK: PULSE ASIA’S SEPTEMBER 2018 NATIONWIDE SURVEY ON THE PERFORMANCE AND TRUST RATING OF THE TOP PHILIPPINE GOVERNMENT OFFICIALS AND THE PERFORMANCE RATINGS OF KEY GOVERNMENT INSTITUTIONS

—-

Ilalabas na sa Oktubre ng National Wages and Productivity Commission kung magkano ang dagdag sahod para sa minimum wage earners sa National Capital Region (NCR).

Ayon kay Labor Secretary Silvestre Bello III, batay sa nakuha niyang impormasyon mula sa Wage Board, 20 pesos ang idadagdag sa minimum wage.

Aminado si Bello na hindi sapat ang P20 na umento sa sahod subalit ito lamang aniya ang kakayanin ng mas nakararaming employers.

Kapag nagkabisa ang bagong wage order, magiging limangdaan at tatlumpu’t dalawang piso (P532) na ang minimum wage mula sa kasalukuyang limang daan at labing dalawang piso (P512).

—-