HOT STORIES OF THE WEEK

Asahan na ang pagbaha ng imported na bigas hanggang sa pagtatapos ng taon bilang solusyon sa pagnipis ng supply nito sa merkado na nagresulta naman sa pagtaas ng presyo.

Ito, ayon kay Department of Agriculture (DA) Secretary Manny Piñol, ay dahil sa inaasahang delivery ng 750,000 metric tons ng imported rice at karagdagang 1 million metric tons sa unang bahagi ng susunod na taon.

Aprubado na aniya ng interagency National Food Authority (NFA) council ang importasyon ng 500,000 metric tons ng bigas bukod pa sa naunang 250,000 metric tons o kabuuang 750,000 metric tons.

Si Piñol na ang kasalukuyang chairman ng NFA council makaraang ilipat ni Pangulong Rodrigo Duterte sa ilalim ng pangangasiwa ng DA ang NFA.

Asahan na ang pagbabalik-pulitika ni dating Vice President Jejomar Binay matapos ang dalawang taong pagpapahinga simula nang matapos ang kanyang termino.

Tatakbo si Binay sa pagka-kongresista ng unang distrito ng Makati City sa 2019 midterm elections.

Ayon kay Joey Salgado, spokesman ng nakatatandang Binay, sa sasabak muli sa halalan ang dating pangalawang pangulo sa ilalim ng ticket ng kanyang anak na si Mayor Abby Binay.

Inanunsyo aniya ng nakababatang Binay ang pagbabalik-pulitika ng ama sa flag ceremony, kahapon.

Magugunitang natalo sa 2016 presidential elections si dating Vice President Binay sa noo’y Davao City Mayor na si Rodrigo Duterte.

—-

Hindi magtatagumpay ang people power o anumang pag-aaklas para mapatalsik si Pangulong Rodrigo Duterte.

Pahayag ito ni Presidential Spokesman Harry Roque sa harap ng nabunyag na planong Red October para patalsikin ang Pangulong Duterte.

Ayon kay Roque, nagtagumpay ang people power nuon laban kina dating Pangulong Ferdinand Marcos at Joseph Estrada dahil nawalan na ng mandato mula sa taong bayan ang dalawang pangulo.

“We have no doubt that the CPP-NPA has been out to overthrow the government since they were founded. We have no doubt that they are power hungry individuals. We have no doubt that there are power hungry individuals in the opposition who would like to resort to extra-constitutional means in putting down the government of President Duterte and we have no doubts that the Magdalo group are addicted to coup d’etats. However, what I will say is that we are confident that we enjoy overwhelming support from the people and therefore what these groups would want to see, the ouster of President Duterte would not happen.” Pahayag ni Roque.

Binigyang diin ni Roque na lalo pang naging malawak ang mandato ng Pangulong Duterte matapos suportahan ng mas nakararaming Pilipino ang pinaka kontrobersyal na programa ng kanyang administrasyon.

Tinukoy ni Roque ang resulta ng Social Weather Station (SWS) survey kung saan lumalabas na walo sa kada sampung Pilipino ang sumusuporta sa war on drugs ng pangulo.

“It’s one issue pero ito po yung pinaka matinding issue na ibinabato nila laban kay Presidente hindi umano’y yung mga illegal killings na nagaganap dahil sa war on drugs. Despite po sa mga binabato nila sa Presidente sa war on drugs eight out of ten Filipinos support the president. I can say it with confidence that the people overwhelmingly support the president’s war on drugs as evidenced by the survey.” Ani Roque.

Dumistansya ang Malacañang sa pahayag ni dating Senador Juan Ponce Enrile na walang nakulong o naaresto noong panahon ng martial law ni dating Pangulong Ferdinand Marcos.

Ayon kay Presidential Spokesman Harry Roque, kinikilala ng Palasyo na nagkaroon ng mga biktima ang martial law dahil mayroong mga desisyon hinggil dito ang mga korte.

Tumanggi si Roque na mag komento kung ano ang motibo ni Enrile sa kanyang mga pahayag gayung isa siya sa mga nanguna sa EDSA People Power Revolution na nagpatalsik kay Marcos.

“That’s an issue that we have nothing to do with. I don’t think they can twist history when there is a law and court decision attesting to what happened during martial law. If you remember couple of weeks back, we even had here in Malacañang as guests the members of the compensation board and they still have last minute problem to resolve on how to release all the compensation for the victims of martial law. So, the position of the Palace is we are implementing the law and the law says, that there should be reparations pay to victims of martial law.” Pahayag ni Roque.

---

—-

Umabot na sa 53 ang nahukay na labi mula sa landslide na tumabon sa humigit kumulang 60 bahay sa Naga, Cebu.

Ayon kay Baltazar Tribulano ng Cebu Provincial Disaster Risk Reduction Office, mahigit 40 iba pa ang kanilang hinahanap.

Patuloy rin anya ang paglilikas nila ng mga residente matapos ipag utos ng Dept of Environment and Natural Resources ang sapilitang paglilikas sa lahat ng residenteng nasa isang kilometro ang layo sa landslide area.

Sinabi ni Tribulano na lubha talagang mapanganib pa ang lugar dahil sa malambot na ang lupa sa quarry area ng apo cement.

Nagpapatuloy pa rin ang bantang pagpapatalsik sa puwesto kay Pangulong Rodrigo Duterte.

Ito ay ayon sa Armed Forces of the Philippines (AFP) kung saan tinatawag anila ang plano bilang Red October.

Sinabi ni AFP Deputy Chief of Staff for Operations Brigadier General Antonio Parlade, isinabay ang plano sa international celebration sa buwan ng communism, Marxism at IP o indigenous people.

Iginiit din ni Parlade na totoo ang naunang ulat ng planong pagpapatalsik kay Pangulong Duterte o destabilization plot sa administrasyon noong Setyembre 21.

Nananatili rin aniya ang banta dahil inorganisa aniya nito ni Communist Party of the Philippines Founding Chairman Jose Maria Sison.

Dagdag pa ni Parlade, batay sa kanilang nakuhang mga dokumento, muntik nang pumirma sa isang alyansa ang opposition group na Tindig Pilipinas sa komunistang grupo para sana sa planong pagpapatalsik kay Pangulong Duterte noong Setyembre 21.

Pero hindi aniya ito natuloy matapos nilang malaman na mga lider ng komunistang grupo ang nasa likod nito.

—-