HOT STORIES OF THE WEEK

Walang dapat ikaalarma sa seguridad sa Ninoy Aquino International Airport (NAIA).

Ito ang tiniyak ng Manila International Airport Authority (MIAA) sa kabila ng  kautusan ng US Department of Homeland Security sa lahat ng  airlines na bumibyahe sa Amerika at Pilipinas na alertuhin ang kanilang mga pasahero dahil sa hindi umanong epektibong security measures sa NAIA.

Ayon kay MIAA General Manager Ed Monreal, patuloy na tumatalima ang Pilipinas sa international standards matapos ireklamo ng US authorities ang seguridad at mga pasilidad sa nabanggit na paliparan.

Inirekomenda aniya ng transportation security administration ng US na magkaroon ng improvement sa airport security tulad ng paglalagay ng mga bagong x-ray machine, walk-through metal detector at alarm systems sa NAIA.

Sa 16 na rekomendasyon, ipinagmalaki ni Monreal na pito na ang nakukumpleto ng Pilipinas.

Kinumpirma mismo ng isang dating founding member ng Communist Party of the Philippines (CPP) na ang kanilang founder na si Jose Maria Sison ang mastermind sa 1971 Plaza Miranda Bombing sa Quiapo, Maynila.

Siyam katao ang nasawi at mahigit 90 ang nasugatan sa pambobomba na naging daan upang magdeklara ng martial law si dating Pangulong Ferdinand Marcos.

Sa isang dokumentaryo ng  sambayanan kasabay ng ika-limampung anibersaryo ng CPP, ibinunyag ni Ruben Guevarra na si Sison mismo ang nag-utos sa miyembrong si Danny Cordero na maghagis ng granada sa Plaza Miranda.

Ito, ayon kay Guevarra, ay  bahagi  ng  serye ng kampanya CPP na oplan big leap forward  kung saan nakipag-sabwatan ang rebeldeng grupo sa gobyerno ng noo’y Chinese leader na si Mao Zedong.

Gayunman, hindi na aniya dapat maniwala ang publiko sa ideyolohiya at ipinaglalaban ng NDF-CPP-NPA sa nakalipas na limang dekada.

Kinasuhan si Iloilo 1^st District Rep. Richard Garin at kanyang amang si Guimbal Mayor Oscar Garin dahil sa pambubugbog sa isang pulis.

Ayon kay Western Visayas Regional Police Director Chief Supt. John Bulalacao, ipinatawag ng mag – amang garin si Police Officer 3 Federico Macaya bandang alas tres ng madaling araw nuong Miyerkules sa Guimbal Public Plaza.

Dinisarmahan, kinapkapan, pinosasan pa ng mag ama ang pulis bago pinagsasampal, pinag sisipa at ilang beses na dinuraan si Macaya.

Nag-ugat ang galit ng mag – ama sa hindi umano pagsasampa ng kaso ni Macaya sa isang lalaking nanakit di umano sa isang menor de edad sa gitna ng pagdiriwang ng Disyembre sa Guimbal.

Nahaharap ang dalawa sa kasong physical injuries, alarm and scandal, direct assault of person in authority, grave coercion at grave threat.

Rep. Garin humingi ng paumanhin sa PNP

Nag – sorry si Iloilo Rep. Richard Garin sa Philippine National Police (PNP) sa kanyang ginawang pambubugbog sa isang pulis.

Ayon kay Garin, ginawa lamang nya ang pananakit kay PO3 Federico Macaya dahil kanyang frustration dahil sa kabiguan na masampahan ng kaso ang isang lalaking nanakit ng bata sa gitna ng kanilang selebrasyon sa Guimbal, Iloilo.

Ngunit nilinaw ng mambabatas na ang kanilang ginawang pananakit sa pulis kasama ang kanyang amang alkalde ay walang kaugnayan sa PNP bilang isang institusyon, maging sa mga opisyal at iba pang miyembro ng kapulisan kundi sa isang pulis lamang na sa tingin nya ay tumalikod sa paglilingkod sa mamamayan ng Guimbal.

Nangako naman si Garin na haharapin ang anumang maging parusa ng kanyang naging aksyon.

Kilala na ng Philippine National Police (PNP) ang anim na person of interest sa kaso ng pamamaslang kay Ako Bicol Party list Rep. Rodel Batocabe.

Ayon kay PNP Chief Director General Oscar Albayalde, walang ni isa man sa mga itinuturing na person of interest ang naimbitahan o inaresto dahil nagpapatuloy pa ang isinasagawang imbestigasyon.

Tumanggi rin si Albayalde na pangalanan ang naturang mga tao dahil kumakalap pa aniya ng iba pang mga ebidensya na mag uugnay sa kanila sa pagpatay kay Batocabe.

Bukod dito, sinabi ni Albayalde na hindi pa rin ligtas sa naturang kaso ang isang lokal na opisyal sa Albay.

Sinuway mismo ng New People’s Army (NPA) ang idineklara nilang holiday ceasefire ngayong kapaskuhan.

Ayon kay Philippine Army 202^nd Infantry Brigade Commander Brigadier General Arnulfo Burgos Jr., dahil mismong araw ng pasko nang atakihin ng mga rebelde ang Macaingalan Patrol Base sa Barangay Puray sa Rodriguez, Rizal.

Sugatan sa naging engkwentro ang isang sang miyembro ng CAFGU active auxilliary.

Una nang nag deklara ng temporary ceasefire ang CPP – NPA ngayong kapaskuhan habang hindi naman ito tinapatan ng gobyerno.

Nagsimula na ang parallel investigation ng Philippine National Police – Criminal Investigation and Detection Group (PNP – CIDG) at National Bureau of Investigation (NBI) sa kaso ng pamamaslang kay Ako Bicol Party list Rep. Rodel Batocabe.

Ito ang siniguro ni PNP Chief Director General Oscar Albayalde sa kanyang naging pagdalaw sa burol ng nasawing police escort ni batocabe na si SPO1 Orlando Diaz ngayong araw.

Ayon kay Albayalde, pamumunuan ng CIDG ang magiging imbestigasyon upang siguruhing hindi magkakaroon ng white wash at magkakaroon ng fall guy.

Mahirap aniya ang isinasagawang imbestigasyon dahil walang nais na magsalita sa mga nakasaksi.

Samantala, bumisita si Pangulong Rodrigo Duterte sa burol ng yumaong mambabatas.

Hinimok ni Department of Health (DOH) Secretary Francisco Duque III ang magulang na kumpiskahin ang mga paputok na binibili ng kanilang mga menor de edad na anak.

Ito’y sa gitna ng preparasyon para sa pagsalubong sa bagong taon.

Ayon kay Duque, hindi dapat isugal ng mga magulang ang kalusugan at kaligtasan ng kanilang mga anak dahil lamang sa kanilang kapabayaan.

Dapat aniyang silipin ng ang mga kuwarto at cabinet kung may mga nakatagong paputok at kumpiskahin ito agad.

Nanawagan naman ang kalihim sa publiko na iwasan na ang pagpapaputok sa pagsalubong sa bagong taon upang maiwasan ang disgrasya gaya ng pagkaputol ng mga daliri.

Anim na testigo sa pagpatay kay Ako Bicol Party-list Rep. Rodel Batocabe at bodyguard nitong si Senior Police Officer 1 Orlando Diaz ang dumulog na sa Daraga, Albay Municipal Police.

Ayon sa bagong hepe ng Daraga Police na si Chief Supt. Dennis Balla, isang magandang development ang paglutang ng anim na testigo upang maresolba ang double murder case.

Bagaman natukoy na ang ilang “persons of interest” na kasalakuyang kinukwestyon at isinasailalim sa background checking, hindi muna anya nila ito papangalanan.

Samantala, nilinaw ni Daraga Mayor Carlwyn Baldo na wala siyang kinalaman sa pagpatay kay Batocabe na tumatakbo sa pagka-alkalde ng naturang bayan sa 2019 midterm elections.

Hinamon pa ni Baldo ang mga nag-aakusa sa kanya na maglabas ng mga pruweba kung totoong may kinalaman siya sa krimen.