HOT STORIES OF THE WEEK

Nananatiling nakataas ang alerto ng militar hindi lamang ngayong holiday kundi maging sa selebrasyon ng ika-50 anibersaryo ng Communist Party of the Philippines-New People’s Army (CPP-NPA) bukas.

Ayon kay Armed Forces of the Philippines Spokesman Col. Noel Detoyato, nakamonitor ang militar sa mga posibleng aktibidad ng mga komunista kasabay ng kanilang anibersaryo.

Sinabi pa ni Detoyato, naudlot ang planong pagdalo sana nina National Democratic Front Panel Chair Fidel Agcaoili at Chairman Luis Jalandoni sa anibersaryo ng grupo.

Gayundin ang planong pagsasagawa ng tinatawag na People’s Congress ng mga komunista.

Naging generally peaceful ang pagdiriwang Pasko sa Metro Manila.

Ito ang naging pagkumpira ng Philippine National Police National Capital Region Police Office (PNP-NCRPO) kasunod ng kanilang isinagawang inspeksyon sa ilang matataong lugar sa kalakhang Maynila.

Ayon kay NCRPO Chief Director Guillermo Eleazar, walang anumang untoward incident na naitala sa mga nagtungo sa simbahan at iba pang lugar.

Samantala, tinataya namang nasa limang libong (5,000) inbiduwal ang nagdiwang ng Pasko sa Rizal Park kagabi.

Kasunod nito ay ang tambak na basura na iniwan ng mga bisita kabilang ang pinaglagyan ng kanilang mga Noche Buena at mga karton na ginamit bilang sapin sa parke.

Samantala, higit isang libong (1,000) miyembro ng mga katutubo ang naialis ng National Capital Region Police Office sa mga kalsada ng Metro Manila.

Ayon kay NCRPO Chief Director Guillermo Eleazar, ang naturang bilang ay bunsod ng operasyon para nailigtas ang mga katutubo simula pa noong Disyembre 11.

Aniya, higit dalawang daan (200) sa mga ito ay mga Aeta habang isang daan at siyamnapu’t walo (198) ay mga Badjao kung saan karamihan ay mga bata.

Kaugnay nito, kumikilos na ang Department of Social Welfare and Development (DSWD) para mapauwi sa probinsya o kaya ay madala sa kanilang kaanak ang katutubo.

—-

Muling nagsilbing Santa Claus si Pangulong Rodrigo Duterte sa mga cancer patient sa Southern Philippines Medical Center (SMPC) sa Davao City bilang bahagi ng kanyang taunang holiday ritual.

Tatlong oras namalagi si Pangulong Duterte sa SMPC upang mamahagi ng Christmas gift tulad ng mga laruan sa mga batang may cancer.

Namahagi rin ng pagkain at cash ang punong ehekutibo sa mga pasyente maging sa kani-kanilang pamilya.

Simula pa lamang noong alkalde ng Davao ay nakagawian na ni Pangulong Duterte na mamamahagi ng tulong sa mga cancer patient tuwing mag-pa-pasko.

Nagbabala ang Department of Health (DOH) laban sa firecracker poisoning o pagkalason dahil sa di sinasadyang paglunok ng paputok.

Ayon kay DOH Spokesperson Undersecretary Eric Domingo, mahirap itong lunasan dahil walang maaaring gawing first aid sa pagkakalason dahil sa paputok at dapat na dalhin agad ang biktima sa ospital.

Delikado aniya ang mga paputok na itsurang candy na nakabalot sa foil at madalas mapagkamalang makakain.

Samantala, nagsimula nang mamili ang mga tao ng mga paputok partikular na sa Bocaue, Bulacan na gagamitin sa pagsalubong ng bagong taon.

Ipinagtanggol ng Malakanyang si Pangulong Rodrigo Duterte hinggil sa mga akusasyon at mga kritisismong natatanggap na bully daw ang pangulo.

Kasunod ito ng kontrobersiya sa nag-viral na bullying scandal na ikinayanig ng isang kilalang pamantasan sa Maynila.

Giit ni Presidential Spokesperson Salvador Panelo, hindi bully ang pangulo dahil ang pambubully aniya ay pananakit sa mga walang laban lamang.

Dagdag pa ni Panelo, ang matapang na pananalita ng pangulo ay paraan lamang nito para bigyang diin ang kanyang mga pahayag.

Kilala ang pangulo sa kanyang pananakot at pagsumpa sa mga taong may kaugnayan sa droga at mga korap na opisyales.

Pupuwede pang mabago ang dismissal decision ng pamunuan ng Ateneo De Manila University (ADMU) sa estudyante nitong nam bully sa viral video.

Ayon ito kay Education Secretary Leonor Briones kung may pangangailangang isalang nila sa review ang nasabing desisyon ng Ateneo sa nasabing reklamo.

Gayunman, ipinabatid ni Briones na batay sa karanasan nila, nagkakasundo ang magkabilang partido kapag naglabas na ng desisyon ang isang paaralan lalo na sa mga kaso nang pambu bully.

Nilinaw pa ni Briones na maaaring umakyat ang hatol sa expulsion sa halip na dismissal lamang kung saan pupuwedeng lumipat lamang sa ibang paaralan ang nasabing estudyanteng bully.

Batay sa DepEd manual, sinabi ni Briones na ang mga pinatawan ng expulsion ay hindi na puwedeng tanggapan kahit saang pribado o pampublikong paaralan sa bansa base na rin sa bigat ng kasalanan nito.

Magsasagawa ng case build up ang Philippine National Police (PNP) laban sa ilang pulitiko sa Bicol Region na umano’y mayruong private armed groups.

Kinumpirma ito ni PNP Chief Director General Oscar Albayalde bagama’t hindi naman nito masabi kung private armed group ang nasa likod nang pagpatay kay Ako Bicol Party-list Representative Rodel Batocabe.

Tiniyak ni Albayalde na mahigpit nilang hahabulin at papanagutin ang mga pulitikong matutukoy na nagme maintain ng private armed group.

Person of interest sa Batocabe Slay tukoy na

Tukoy na ng mga otoridad ang persons of interest kaugnay sa kaso nang pagpaslang kay Ako Bicol Party-list Representative Rodel Batocabe.

Ayon kay PNP Region 5 Director Chief Supt. Arnel Escobal, nakapagsumite na ng salaysay ang anim na sibilyang nasugatan sa pamamaril ng suspek sa Brgy. Burgos, Daraga, Albay.

Tumanggi munang magbigay ng impormasyon ang opisyal hinggil sa mga person of interest subalit malaki anito ang naitulong ng P30 million reward money sa paglutang ng mga impormasyon hinggil sa suspek.

Bukod sa motibong pulitikal, kumbinsido si Escobal na may kinalaman din sa aktibidad ng New People’s Army (NPA) ang pamamaslang kay Batocabe.

Hinimok ng pamilya batocabe ang sinuman na may nalalaman sa pagkamatay ng kaanak na si Ako Bicol Party-list Representative Rodel Batocabe.

Ayon kay Justin Batocabe, anak ng kongresista, dahil pasko, handa ang kanilang pamilya na magpatawad kung sinuman ang least guilty subalit may alam sa buong detalye sa pagpatay sa kaniyang ama at ipasok sa wpp o witness protection program.

Ibibigay din aniya ang cash reward maituro lamang ang mastermind sa pagpaslang sa kaniyang ama at naniniwala silang mananaig ang hustisya.

Umaasa naman si Kiel Batocabe, isa pang anak ng kongresista na tiwala siyang ang ama na lamang niya ang huling biktima at mareresolba rin ang kaso nito sa lalong madaling panahon.

Ipinabatid pa ni Kiel na masyadong nalungkot ang kaniyang ina sa pagpaslang sa kongresista dahil itinaon sa anibersaryo ang krimen.

Kasabay nito, sinabi ng mga batang Batocabe na hihintayin din nila ang pinal na imbestigasyon ng mga otoridad hinggil sa kaso nang pagpaslang sa kanilang ama.

Sinibak na ang Hepe ng Albay Provincial Police Office na si Senior Supt. Milo Pagtalunan.

Iyan ang kinumpirma sa DWIZ ni Police Regional Office 5 o Bicol PNP Director Chief Supt. Arnel Escobal kasunod na rin sa nangyaring pamamaslang kay AKO-Bicol Party-list Representative Rodel Batocabe noong Sabado

Ayon kay Escobal, hahalili kay Pagtalunan ang Deputy nito na si Supt. Dennis Rellata.

Samantala, sinabi rin ni Escobal na may anim (6) na persons of interest na silang tinututukan na posibleng nasa likod ng nangyaring pagpatay kay Batocabe.

Nakuha na rin nila ang kopya ng CCTV ng Rosewood Inn malapit sa Barangay Bañag dahil doon pinaniniwalaang nakita ang mga salarin.

Sinabi rin ni Escobal na nakakuha na rin sila ng salaysay mula sa anim na nasugatan sa insidente para makakalap pa ng iba pang impormasyon.

—-

Sinibak sa puwesto ang hepe ng Daraga, Albay Municipal Police Station kasunod ng nangyaring pananambang kay AKO-Bicol Party-list Rep. Rodel Batocabe at sa bodyguard nito.

Ayon kay Police Regional Office 5 Director Chief Superintendent Arnel Escobal, ipinag-utos agad niya ang pagsibak kay Supt. Benito Dipad Jr bilang bahagi ng isinasagawang imbestigasyon.

Mariing kinondena naman ni Escobal ang sinapit nila Batocabe at SPO1 Orlando Diaz at umaasa siyang wala nang susunod pa na mapapatay.

Kasunod niyan, pansamantalang uupo bilang hepe ng Daraga PNP si Supt. Dennis Balla habang nagpapatuloy ang imbestigasyon.

Naniniwala naman si Escobal na hindi droga ang dahilan ng pagkakapatay sa dalawa pero posible aniyang pulitika at NPA o New People’s Army ang nasa likod ng naturang krimen.

—-