HOT STORIES OF THE WEEK

Nagluluksa ang pamilya Batocabe sa pagkasawi ng kanilang haligi na si AKO-Bicol Partylist Rep. Rodel Batocabe.

Batay sa Facebook post ng asawa ng pinaslang na mambabatas na si Gng. Gertie Duran, itinaon pa sa anibersaryo ng kasal nila ang pagpaslang sa kaniyang asawa.

Nagpatutsada pa si Ginang Batocabe na batid na umano ng kanilang kalaban na magwawagi ang kaniyang asawa kaya’t ipinadispatsa na ito.

Si Batocabe ay kumakandidato sa pagka-alkalde ng bayan ng Daraga, Albay para sa darating na 2019 mid-term elections.

Magugunitang tinambangan si Batocabe at ang bodyguard nitong si SPO1 Orlando Diaz matapos dumalo sa isang gift giving activity sa Barangay Burgos sa naturang bayan.

Nakaburol naman ang labi ni Batocabe sa Arcilla Hall, tapat ng Bicol College sa Daraga, Albay at isinasaayos pa ng pamilya kung kailan siya dadalhin sa Maynila.

Special investigation task group binuo na

Agad bumuo ng isang special investigation task group na siyang tututok sa imbestigasyon ukol sa pagpatay kay AKO-Bicol Partylist Rep. Rodel Batocabe.

Ayon kay PNP Chief Dir/Gen. Oscar Albayalde, ipinag-utos na niya sa naturang lupon na gawin ang lahat ng paraan para matukoy ang motibo sa pagpatay gayundin ay maihatid ang hustisya sa pamilya Batocabe.

Binigyang diin pa ng PNP chief, makatutulong ng malaki kung may isang grupo na susubaybay sa development sa kaso lalo’t kabilang din sa mga biktima ang isa nilang kabaro.

Magugunitang tinambangan kahapon hanggang sa mapatay si Batocabe kasama ang bodyguard nitong si SPO1 Orlando Diaz buhat sa dinaluhan nilang gift giving activity sa Burgos, Daraga, Albay.

Kasunod nito, nagpaabot ng pakikiramay ang pamunuan ng pambansang pulisya sa pamilya ng mambabatas gayundin sa pamilya ni Diaz at tiniyak na ipaabot nila ang kaukulang tulong at pagkilala sa nasawi nilang kasamahan.

Pinatawan ng parusang ‘dismissal’ ang Junior High School student na nahuli sa viral video na nam-bubully ng kapwa niya estudyante sa loob ng isang comfort room sa Ateneo de Manila University.

Ito ay matapos kausapin ng pamunuan ng Ateneo ang dalawang partidong naugnay sa bullying incident bilang bahagi ng inilunsad na imbestigasyon ng unibersidad.

Ibig sabihin nito, hindi na maaring mag-enroll o bumalik pa ulit ang naturang estudyante sa nabanggit na paaralan.

Dahil dito, isang task force na rin ang binuo ng school administrators upang panatilihin ang bully-free environment sa loob ng campus at nangakong hinding hindi palalagpasin ang anumang uri ng insidente ng pam-bubully o pang-haharass sa kapwa estudyante.

Matatandaan na kumalat sa social media ang video ng bullying incident sa Ateneo kung saan ay huling huli sa camera ang ginawang pananakit ng estudyante sa iba pang mag-aaral matapos papiliin kung “Bugbog o Dignidad?”

Ipinag-utos na ni Pangulong Rodrigo Duterte sa sandatahang lakas ng Pilipinas ang tuluyang pagwasak sa CPP-NPA.

Sa ginanap na aktibidad kagabi sa Camp General Manuel T. Yan, Compostela Valley, mariin ring tinanggihan ng Pangulo ang idineklarang unilateral ceasefire ng rebeldeng komunista ngayong holiday.

We do not subscribe to their ceasefire. We are ready for anything and I said change your paradigm. Do not fight them. Destroy them. Kill them. Pahayag ni Pangulong Duterte

Maliban sa NPA, inatasan rin ng Pangulo ang militar na pulbusin at lansagin rin ang Abu Sayyaf Group.

Pangulong Duterte, nanawagan sa NPA na magbalik loob sa pamahalaan

Nanawagan  si Pangulong Rodrigo Duterte sa teroristang grupo na New People’s Army o NPA na abandunahin na ang kanilang mga baluktot na paniniwala at magbalik loob na sa pamahalaan.

Hinimok din ng Pangulo ang mga miyembro ng 10^th infantry division, na manatiling dedikado sa kanilang sinumpaang tungkulin na protektahan ang bansa at ang mamamayan nito.

Tiwala naman ang Punong Ehekutibo na sa pagdiriwang ng kapaskuhan at bagong taon, patuloy na bibigyang kasiguraduhan ng Armed Forces of the Philippines ang kapayapaan at kaayusan sa buong bansa.

Patay si AKO – Bicol Partylist Rep. Rodel Batocabe at kanyang bodyguard matapos na pagbabarilin sa Daraga, Albay.

Sa paunang ulat, nangyari ang pamamaril pasado alas 3:00 ng hapon habang nasa gitna ng gift giving event para sa mga senior citizen sa covered court ng Brgy. Burgos.

Dead on arrival si Batocabe sa pagamutan dahil sa walong gun shot wounds na tumama sa kanyang katawan habang dalawang tama naman sa ulo ang pumatay sa bodyguard nitong si SPO1 Orlando Diaz.

Si Batocabe ay nasa kanyang huling termino bilang mambabatas at kasalukuyang tumatakbo sa pagka-alkalde sa Daraga, Albay.

Nakahanda ang Philippine National Police (PNP) na tumulong para maresolba ang insidente ng bullying sa Ateneo Junior High School.

Kasunod ito ng viral video ng isang estudyante na nananakit ng kapwa niya mag-aaral.

Ayon Philippine National Police (PNP) Deputy Spokesperson Kimberly Molitas, unang dapat umaksyon sa insidente   ng bullying ang pamunuan ng paaralan habang nakanda naman ang pambansang pulisya umalalay kung hihingin ang kanilang tulong sa problema.

“Mayroon tayong batas na Anti-bullying Act of 2013 that defines the procedure on how we go about bullying. At nakasaad doon na nang mag-take action an gating school administrators muna. Then it is upon their determination upon the case or the incident, it is their job to inform the law enforcement body. So, inaatay po natin yung school administration ng Ateneo na siguro to inform or coordinate sa ating mga kapulisan if they find it necessary for the intervention of the law enforcement sa case na iyon.” Pahayag ni Molitas.

Kasabay nito, hinimok ni Molitas ang lahat ng mga biktima ng bullying at kanilang pamilya na huwag matakot na dumulog  sa mga kinauukulan sa  paaralan para mabigyan ng karampatang tulong.

“We of course encourage families or victims or children na huwag matakot to report kung na-bubully sila sa school administrator para ma-aksyunan at mabigyan sila ng kaukulan tulong ng administrator. And, if needed ng ating law enforcement.” Ani Molitas.

Naglunsad na ng sariling imbestigasyon ang Philippine Taekwondo Association sa nangyaring insidente ng bullying sa Ateneo Junior High School.

Ito ay para kumpirmahin kung isa ngang taekwondo practicioner ang estudyanteng si Joaquin Montes na siyang nakunan sa viral video na nanakit sa isang kamag-aral sa loob ng banyo ng eskwelahan.

Sinabi ng National Federation na kanilang igagalang ang anumang ipapataw  na parusa ng Ateneo De Manila Junior High School sa naturang estudyante.

Dito anila nakasalalay ang kanilang magiging pasya kung tatanggalan ng belt si Montes.

Nakapagtala ang National Capital Region Police Office (NCRPO) ng may pinakamataas na insidente ng mga pambu-bully sa loob ng mga paaralan.

Sa datos ng Department of Education (DepEd), aabot  sa mahigit 3,700 ang kaso ng bullying sa NCR para sa school year 2016 hanggang  2017 na sinundan ng Region 10 na may mahigit 2,500.

Ang Region 11 naman ang pumangatlo sa listahan na may 1,980 kaso ng bullying na sinundan naman ng  Region 12 na may 1,957 insidente.

Aminado ang DepEd na tumataas ang kaso ng bullying sa mga paaralan taon-taon kung ikukumpara      sa mga nakalipas na school year.

Binigyang diin naman ng ahensya na dapat tutukan sa mga paaralan ang insidente ng bullying lalo na kung kapwa sangkot dito ay mga bata.

Nanawagan ang Malakanyang sa Ateneo De Manila University (ADMU) na aksyunan ang nga viral na video ng bullying sa loob ng paaralan.

Ayon kay Presidential Spokesman Salvador Panelo, dapat na imbestigahan ng unibersidad ang pambubully ng isang mas maliit na estudyante sa isa pang estudyante.

Aniya, maging siya ay nakita nya ang video at nagulat sa ginawa ng Ateneo Junior High School student na pambubully.

Binigyang diin ni Panelo na mahigpit na ipinagbabawal sa batas ang pambubully.

Hayagang sinabi ngayon ni Pangulong Rodrigo Duterte ang kanyang posisyon nito sa Road Board at Road Users’ Tax.

Sa ginanap na change of command ng Philippine Air Force ngayong gabi sa Villamor Air Base, inihayag ng pangulo ang kanyang mariing pagsuporta sa posisyon ng Senado na buwagin na ang Road Board.

Matatandaang inaprubahan ng senado ang isang resolusyon na humihiling kay Pangulong Duterte na lusawin na ang Road Board.

Sinabi ng pangulo, naniniwala siyang ginagawang gatasan ng mga tiwaling mambabatas ang road users’ tax na pinangangasiwaan ng Road Board.

Kaya’t binigyang diin ng pangulo dapat na talagang buwagin na ang road board at itigil na ang pangongolekta ng Road Users’ Tax.

Una nang Inihayag ni Presidential Spokesman Atty. Salvador Panelo na gusto ng chief executive na ibalik na lamang sa National Treasury ang bilyong pisong una nang nakolekta mula sa Road Users’ Tax nitong mga nakalipas na panahon.

Asahan na ngayong araw ang mas matinding pagsisikip sa daloy ng trapiko sa Metro Manila bunsod ng patuloy na pagdagsa ng mga uuwi sa probinsya upang magdiwang ng pasko bukod pa sa mga humahabol sa pag-sho-shopping.

Inabisuhan ni Metropolitan Manila Development Authority (MMDA) Task Force Special Operations at EDSA Traffic Czar Bong Nebrija ang mga motorista na magbaon ng mahabang pasensya.

Ayon kay Nebrija, inaasahang mararamdaman ang matinding epekto ng traffic congestion simula mamayang hapon o rush hour hanggang gabi.

Batay aniya sa monitoring ng MMDA, umaabot na lamang sa average na 14 kilometers per hour ang bagal ng mga sasakyan sa EDSA at posibleng bumagal pa sa mga susunod na oras.

Inaabot na ng tatlo hanggang apat na oras ang biyahe sa magkabilang dulo ng EDSA o mula Monumento, Caloocan City hanggang Pasay City pabalik kapag malapit na ang pasko.

Sa datos ng MMDA data, mahigit 400 sasakyan ang dumaraan sa EDSA kada araw kumpara sa capacity ng kalsada na 288,000 vehicles.

MMDA naka-full alert na sa inaasahang ‘Carmageddon’ ngayong araw

Naka-full alert na ang Metropolitan Manila Development Authority (MMDA) sa inaasahang Carmageddon o matinding pagsisikip ng daloy ng trapiko, ngayong araw sa ginta ng holiday rush.

Ayon kay MMDA General Manager Jojo Garcia, bukod sa EDSA ay hindi rin ligtas sa traffic congestion lalo sa mall na nasa major roads lalo ang mga malapit sa mall.

Kabilang sa mga tinututukan ng m.m.d.a. ang marcos highway kung saan apat na mall ang matatagpuan; C-5; Roxas Boulevard; Commonwealth Avenue.

Maliban sa mahabang pasensya, pinagbabaon ng ahensya ang mga motorista ng disiplina bunsod ng mas mahabang oras ng biyahe dahil sa bagal ng takbo ng mga sasakyan.

Samantala, tinututukan din ang mga chokepoint sa EDSA gaya sa Balintawak, Cubao, Shaw Boulevard at Magallanes Interchange.

—-