HOT STORIES OF THE WEEK

(Presidential Photo)

Tinawag na traydor ng Armed Forces of the Philippines (AFP) ang New People’s Army (NPA).

Sa harap ito ng claim ng NPA na mayroon silang labing anim (16) na ‘prisoners of war’ na kinabibilangan ng dalawang sundalo.

Ayon kay AFP Chief of Staff Lt. General Benjamin Madrigal, mismong ang NPA pa ang nagdeklara ng tigil putukan ngayong Kapaskuhan subalit sila rin ang naunang lumabag sa kanilang deklarasyon.

Binigyang diin ni Madrigal na tama lamang na hindi sila nagtiwala sa NPA at hindi sila nagdeklara ng ceasefire ngayong Kapaskuhan.

Ipinag-utos na rin ni Madrigal ang imbestigasyon kung paano nalusutan ng NPA ang tropa ng pamahalaan nang umatake sila sa Barangay New Tubigon Sibagat, Agusan del Sur.

—-

Tumindi pa ang kontrahan sa pagitan ng Mataas at Mababang Kapulungan ng Kongreso sa isyu ng pagbuwag sa Road Board.

Sa harap ito ng pahayag ni Senate President Vicente Sotto III na ipadadala na niya sa Malacañang ang pinagtibay nilang bicameral conference report sa panukalang pagbuwag sa Road Board.

Ayon kay House Majority Leader Ronaldo Andaya, hindi rin lalagdaan ng Pangulo ang ipadadalang kopya ng Senado kung wala ang katapat nitong kopya na pinagtibay ng Kamara at may lagda ng House Speaker.

Kinontra rin ni Andaya ang pahayag ni Sotto na mismong ang Pangulo ay nais na mabuwag ang Road Board.

Bago aniya sila nagpasya na bawiin ang suporta sa ipinasa nilang panukala para sa abolition ng Road Board ay kinausap na nila ang Pangulong Rodrigo Duterte.

Binigyang diin ni Andaya na malinaw ang instruction sa kanila na ituloy ang operasyon ng Road Board basta’t tiyakin lamang na walang katiwaliang nagaganap dito.

Una rito, sinasabing ginagawang gatasan ng ilang kongresista ang Road Board.

—-

(Updated)

Umaabot na sa labing anim (16) katao ang hostage ngayon ng New People’s Army (NPA) na tinagurian nilang ‘prisoners of war’.

Maliban sa  dalawang (2) sundalo at labing dalawang (12) miyembro ng CAFGU o Citizens Armed Geographical Unit na nauna nang dinukot ng rebeldeng grupo ay nadagdagan pa ito ng dalawa.

Sa isang statement, sinabi ng nagpakilalang si Ka Sandra, tagapagsalita di umano ng Northeastern Mindanao Region ng NPA, bago pa sila sumalakay sa Barangay New Tubigon Sibagat, Agusan del Sur, ay nagsagawa na sila ng blockade sa Barangay Kulambugan kung saan tinangay nila ang isang Bernade Salahay na miyembro rin ng CAFGU.

May isa pa umano silang bihag ngayon na tinangay naman nila sa Barangay Los Angeles sa Butuan City.

Sa isa namang pahayag ay sinabi ng Communist Party of the Philippines (CPP) na maayos nilang trinatrato ang mga ‘prisoners of war’.

Handa anila silang palayain ang mga bihag kung ititigil ng Armed Forces of the Philippines (AFP) ang opensiba laban sa NPA ngayong Kapaskuhan.

Matatandaan na bagamat nagdeklara ng ceasefire ang NPA ngayong Kapaskuhan, hindi ito tinapatan ng tigil putukan ng militar.

Photo Courtesy: CPP Website

Hindi papatulan ni dating Senador Mar Roxas ang pahayag ng Pangulong Rodrigo Duterte na ito ang nag-utos na patayin ang dating police aide na si General Vicente Loot.

Ito ayon kay Congressman Edgar Erice, ka partido ni Roxas sa Liberal Party ay dahil hindi naman marahas na tao ang dating senador.

Dahil pasko, sinabi ni Erice na hindi na lamang papansinin ni Roxas ang aniya’y joke o biro ng pangulo base na rin sa naging paglilinaw ni Presidential Spokesman Salvador Panelo.

Gayunman, ipinabatid ni Erice na umaapela si Roxas na ma-i-level up o maitaas ang talakayan sa kampanya ngayong eleksyon at mas mabuting matutukan ang mga usapin tulad ng ekonomiya ng bansa.

Nanguna ang Pilipinas sa listahan ng most tweeting countries sa buong mundo nuong kasagsagan ng Miss Universe 2018 Coronation Ceremony.

Ipinabatid ng twitter na umabot sa halos anim na milyon ang tweet na nai rehistro nuong Lunes, December 17 habang ginaganap ang coronation.

Katumbas ito ng 1.4 million tweets kada minuto at ang pinakamaraming tweet ay naitalang alas nueve ng umaga.

Sumunod sa Pilipinas ang mga bansang Thailand, US, Brazil at Venezuela.

Ayon pa sa twitter, umabot sa walong milyong viewers ang nanuod sa crowning moment ni Catriona Gray bilang Miss Universe 2018.

Itinanggi ni House Minority Leader Danilo Suarez ang alegasyon na ginagawang gatasan ng ilang kongresista ang Road Board kaya’t isinulong ang pagbuwag dito sa administrasyon ni dating House Speaker Pantaleon Alvarez.

Binigyang diin ni Suarez na hindi ito nangyari at hindi mangyayari dahil napakaganda ng kanyang intensyon nang isulat niya ang bata na lumikha sa Road Board.

Inamin ni Suarez na naging bahagi sya ng Road Board nang matapos noon ang kanyang termino subalit bilang consultant lamang at hindi opisyal na tulad ng sinasabi ni Budget Secretary Benjamin Diokno.

Taliwas aniya sa inaakusa sa kanila ni Diokno, mga opisyal mismo ng Road Board ang dumulog sa kanila hinggil sa halos kalahating trilyong pisong mga proyekto na gustong papondohan sa kanila ng hindi nya tinukoy na mga opisyal nung panahon ni Alvarez bilang House Speaker.

Dahil dito, umaasa si Suarez na hindi lalagdaan ng Pangulong Rodrigo Duterte ang panukalang batas na bubuwag sa Road Board.

Matatandaan na pasado na sa bicameral conference committee ang panukalang pagbuwag sa Road Board nang biglang ipabawi ito ni House Speaker Gloria Arroyo.

Gayunman, nanindigan ang Senado na tapos na ang proseso at lagda na lamang ng Pangulo ang kulang upang tuluyang mabuwag ang Road Board.

on Budget Secretary Diokno

Itinanggi ng House of Representatives ang di umano’y pambubully ng mga kongresista kay Budget Secretary Benjamin Diokno.

Ayon kay House Minority Leader Danilo Suarez, napakasimple lamang naman ng tanong na dapat sagutin ni Diokno subalit pinapaikot-ikot pa ang isyu.

Nakapagtataka aniya nasa mahigit isang libo apat na raang (1,400) munisipalidad sa bansa at mahigit isandaang (100) mga syudad tanging ang Casiguran, Sorsogon at Sorsogon City lamang ang napagkalooban ng halos walumpung (80) bilyong pisong budget para sa imprastraktura.

Simple lamang rin aniya ang katanungan kung bakit iisang contractor ang nakakuha sa proyekto at bakit ito naisalang sa bidding bago pa maipasa ang budget.

Una rito, inakusahan ng ilang mambabatas si Diokno ng pagbibigay ng pabor sa biyenan ng kanyang anak na may koneksyon sa contractor na nakakuha sa proyekto.

Matatandaan na ginamit na ng Malacañang ang executive order noon ni dating Pangulong Gloria Arroyo na nagsasabing hindi puwedeng dumalo sa anumang pagdinig ng Kongreso ang isang miyembrong gabinete kung walang basbas ang Pangulo.

—-

Mabubura na sa mga pamilihan ang NFA rice sa sandaling maisabatas at maipatupad ang Rice Tariffication Bill.

Ayon kay NFA Administrator Tomas Escarez, sa ilalim ng panukalang batas, tinanggal na ang obligasyon ng NFA na maglagay ng murang bigas sa mga pamilihan.

Sinabi ni Escarez na mamimili pa rin ng palay sa mga magsasaka ang NFA subalit ilalaan na lamang ito sa buffer stock na kailangan sa panahon ng kalamidad at emergencies.

Ipinaliwanag ni Escarez na dahil sa rice tariffication, babaha ng imported rice sa bansa dahil wala nang limitasyon ang pag-angkat ng pribadong sektor ng bigas basta’t magbabayad sila ng taripa.

At kapag marami aniyang supply ng imported rice, sinasabi sa batas na bababa rin ang presyo nito sa pamilihan kaya’t hindi na kailangan pa ng murang NFA rice.

—-

Pinaghahanda na ng Department of Transportation (DOTr) ang mga motorista at pasahero sa inaasahang “Carmageddon” o paglala ng traffic situation “kahit saang sulok ng Metro Manila,” anim (6) na araw bago ang pasko.

Ayon kay Transportation Assistant Secretary Mark De Leon, inaasahang mararamdaman sa Biyernes ang matinding pagsisikip ng daloy ng trapiko dahil sa holiday rush.

Ito’y dahil magkakasabay ang pag-uwi sa probinsya ng libu-libong pasahero at last minute shopping sa mga mall kaya’t mapupuno ng mga sasakyan ang mga pangunahing kalsada hindi lamang sa EDSA.

Bukod sa mga major road, nagbabadya rin ang matinding traffic congestion sa mga kalsadang patungo sa mga pantalan, paliparan at bus terminal.

Sumampa na sa 5,050 ang bilang ng patay sa pinaigting na kampanya kontra iligal na droga ng Duterte administration.

Ang naturang bilang ay nagmula sa datos ng Philippine Drug Enforcement Agency (PDEA), simula Hulyo 1 taong 2016 hanggang Nobyembre 30 ng kasalukuyang taon.

Ayon kay PDEA Spokesman Derrick Carreon, tinaya na sa 164,000 drug personalities na ang naaresto sa 115,000 anti-drugs operations sa buong bansa.

Ipinaliwanag naman ni Carreon na natural lamang na lumaban sa anumang security threat ang isang law enforcer tulad ng pulis kung mamemeligro ang kanyang buhay maging ng mga tao sa kanilang paligid.

Samantala, umabot na sa tatlong toneladang shabu na nagkakahalaga ng P18.4 billion ang nasabat ng mga otoridad hanggang noong Nobyembre 30.