HOT STORIES OF THE WEEK

Napanatili ng Pilipinas ang mataas na gender gap equality sa Asya batay sa Global Gender Gap report 2018 ng World Economic Forum (WEF).

Sa Global Gender Gap Report, umakyat ang Pilipinas sa ikawalong pwesto kumpara sa 10th rank noong isang taon sa isandaan apatnapu’t siyam (149) na bansa.

Sinusuri sa naturang report ang estado ng pantay na karapatan ng magkaibang kasarian sa pamamagitan ng economic participation at opportunity, educational attainment at health.

Samantala, nananatili ang Iceland bilang “most gender neutral” country na sinundan ng Norway, Sweden at Finland.

Nag-issue na si Pangulong Rodrigo Duterte ng “shoot to kill” order laban sa mga miyembro ng New People’s Army (NPA).

Ito’y matapos ang panibagong pag-atake ng mga rebeldeng komunista na ikinasugat ng tatlong pulis at isang sibilyan sa bayan ng Magallanes, Sorsogon kahit may idineklarang ceasefire ang NDF-CPP-NPA.

Sa kanyang talumpati sa Barangay Summit on Good Governance Region 11 sa Davao City, inihayag ni Pangulong Duterte na itinuturing na lamang na pangkaraniwang kriminal ang mga rebeldeng komunista na dapat patayin sa halip na kaawaan.

Ayon sa pangulo, hindi na rin siya tatanggap ng mga surrenderee mula sa NPA sa mga susunod na panahon dahil sa patuloy na pag-atake kahit may tigil putukan.

“Wala nang surrender…surrender because you are cruel and brutal people. You do not deserve mercy pati yung mga babae aatakihin ninyo.” Pahayag ni Duterte.

Iginagalang ng Malakanyang ang desisyon ng Makati City Regional Trial Court Branch 148 na huwag ipaaresto at hindi magpalabas ng hold departure order laban kay Senador Antonio Trillanes IV.

Ayon kay Presidential Spokesperson Salvador Panelo, tulad aniya ng palagi nilang sinasabi, sinusunod ng ehekutibo ang isinasaad ng batas at hindi ito magbabago maging sa nabanggit na kaso.

Dagdag pa ni Panelo, kanilang namang ikinalugod ang ginawang pagkilala ng Makati RTC Branch 148 sa legalidad ng ipinalabas na Proclamation 572 ni Pangulong Rodrigo Duterte na nagpapawalang bisa sa ibinigay na amnestiya kay Trillanes.

Samantala, ipinauubaya naman ng Malakanyang sa tanggapan ng Solicitor General at Department of Justice na magpasya ng kanilang magiging susunod na hakbang.

—-

Binigo ng Makati City Regional Trial Court Branch 148 ang hirit ng DOJ o Department of Justice kaugnay sa kasong kudeta ni Senador Antonio Trillanes IV.

Ito ay matapos na tumanggi ang nabanggit na korte na magpalabas ng warrant of arrest at hold departure order laban kay Trillanes.

Batay sa inilabas na resolution ni Judge Andres Soriano, wala siyang nakikitang dahilan para muling buksan ang kasong final at executory na aniya ang desisyon dito.

Dagdag ni Soriano, malinaw ding nakapagsumite ng aplikasyon para sa amnestiya si Trillanes kahit pa walang mailabas na kopya nito.

Nagkaroon din aniya ng admission of guilt si Trillanes sa mga akusasyon laban sa kanya na nakapaloob naman sa kanyang application.

Gayunman, nakasaad din sa desisyon ni Soriano na kinikilala nito ang legalidad ng Proclamation 572 ni Pangulong Rodrigo Duterte na bumabawi sa ibinigay na amnestiya kay Trillanes kaugnay sa kasong kudeta.

Ang desisyon ng Makati City RTC Branch 148 ay kabaliktaran sa naunang resolusyon ng Branch 150 noong Setyembre 25 na nag-utos ng pagpapaaresto kay Trillanes kaugnay ng kasong rebelyon bagama’t agad na nakapagpiyansa ang senador.

—-

Nagkasa ng kilos protesta ang ilang grupo kasunod ng pananambang sa siyam na magsasaka sa Sagay City, Negros Occidental.

Magsasagawa ng kilos protesta ang mga miyembro ng Kabataan party-list sa Department of National Defense (DND) ngayong araw.

Una nang kinondena ng grupong Gabriela ang pagmasaker sa mga magsasaka kung saan kabilang sa siyam na nasawi ang apat na kababaihan at dalawang menor de edad.

Nanawagan naman sa Commission on Human Rights (CHR) ang grupong karapatan na panagutin ang utak sa nangyaring krimen.

Naniniwala ang mga militanteng grupo na ang ‘red tagging’ sa mga magsasaka ang dahilan sa pamamaslang sa mga biktima.

(Ashley Jose, News Writer)

Sa Senado hihintayin ni Senador Antonio Trillanes IV ang posibleng ipalabas na desisyon ni Judge Andres Soriano ng Makati City Regional Trial Court (RTC) Branch 148 ngayong araw.

Kaugnay ito ng petisyon ng Department of Justice (DOJ) na magpalabas ng alias warrant of arrest at hold departure order laban kay Trillanes matapos namang ipawalang bisa ni Pangulong Rodrigo Duterte ang amnestiya nito.

Magugunitang sinabi na noon ni Atty. Rey Robles, abogado ni Trillanes, na ayaw ng senador na sa kanyang bahay isilbi ang warrant of arrest na posibleng ipalabas laban sa kanya dahil magiging traumatic aniya ito sa kanyang pamilya.

Samantala, sakaling tuluyan namang magpalabas ng warrant of arrest ang Makati RTC Branch 148, iginiit ng Senado na kailangang dumaan ito sa tamang proseso at makipag-ugnayan muna sa tanggapan ng Senate Sergeant of Arms bago isilbi kay Trillanes.

Posibleng ilabas na ngayong araw na ito ng Makati RTC Branch 148 ang warrant of arrest laban kay Senador Antonio Trillanes IV.

Nabatid na maagang dumating sa court room ng branch 148 ang mga tauhan ng Philippine National Police-Criminal Investigation and Detection Group (PNP-CIDG).

Naka antabay na rin ang media sa Senado matapos unang ihayag ng Clerk of Court ng Branch 148 na posibleng ngayong araw na ito ilabas ang resolusyon.

Sinasabing nuong Biyernes ay tinapos na ni Judge Andres Soriano ang pag-aaral sa mga hawak na ebidensya kaugnay sa kasong kudeta ni trillanes para matapos na ang resolusyon at maipalabas na rin ito.