HOT STORIES OF THE WEEK

Welcome sa Malakanyang ang pagtaas ng net satisfaction rating ng gabinete ni Pangulong Rodrigo Duterte batay sa pinaka-bagong Social Weather Stations (SWS) survey.

Batay sa SWS survey noong Setyembre 15 hanggang 23,  48 percent ng mga respondent ang kuntento at  16 percent ang hindi kuntento sa trabaho ng gabinete o katumbas ng positive 32 net satisfaction rating o “good.”

Ayon kay Presidential Spokesman Salvador Panelo, indikasyon   ang nabanggit na survey na kuntento ang mga pinoy sa paglalatag ng gobyerno ng solusyon sa mataas na presyo ng mga bilihin o inflation.

Maka-aasa anya ang publiko na hindi magpapaka-kampante ang mga cabinet member sa halip ay ipagpapatuloy ang pagharap sa mga national issue.

Malaki umanong peligro para sa mga kandidatong may nakabinbing kaso ang pagsabak sa may 2019 midterm elections.

Ito’y makaraang maghain ng certificate of candidacy (COC) sina dating Senador Juan Ponce Enrile, Jinggoy Estrada at Ramon “Bong” Revilla Jr.na pawang akusado sa pork barrel fund scam.

Ayon kay Presidential Spokesman Salvador Panelo, mali man o tama, marami na ang naniniwala na sangkot ang mga dating senador sa kontrobersya kahit pa sabihin nilang hindi pa naman sila convicted.

Kahit aniya may mga corruption charges ang ilang kandidato, labag naman sa konstitusyon kung pagbawalan ang mga ito na tumakbo sa halalan lalo’t hindi pa naman sila tuluyang dini-diskwalipika sa paghawak ng isang government position.

Bandang huli ay ipinunto ni Panelo na taumbayan pa rin ang magpapasya kung ihahalal o hindi ang mga kandidatong sangkot umano sa katiwalian.

Ipinagtanggol ni Senador Sherwin Gatchalian ang kanyang panukalang batas kontra sa mga nuisance candidate o ‘panggulo’ sa gitna ng pagtutol ni Commission on Elections Commissioner Rowena Guanzon.

Nilinaw ni Gatchalian na hindi naman paparusahan ang mga ‘panggulo’ sa ilalim ng kanyang Senate Bill 911.

Malinaw na multa lang na 50,000 pesos ang ipapataw. It’s very clear na di tayo maglalagay ng dagdag na qualifications. ‘Yung proseso pareho pa rin, lahat puwedeng magfile, ang Comelec i-eevaluate pa rin, ang dagdag lang multa kapag nadeclare kang nuisance candidate. Sa Omnibus election code nakadefine na ‘yan, ‘yung definition ng nuisance candidate na ginagamit na ngayon ng Comelec para idisqualify ang mga taong tingin nila ay binababoy ang election process.

Bagaman iginagalang ng senador ang opinyon ni Guanzon, dapat aniyang mapag-tanto ng komisyon na mahabang oras ang kanilang ginugugol sa pagsasala ng mga kandidato.

Every election process gaya nito, balikan natin ang 2016, ‘yung 130 candidates ang Comelec iisa-isahin yan, pag-aaralan nilang mabuti, i-checheck ang background. ‘Yung proseso eh katakut-takot na oras ang gagawin ng mga abogado ng Comelec tapos aakyat pa sa en banc pag-uusapan nila ito so imbis na pag-usapan nila ang mahahalagang problema, nauubos ang oras nila para kay Lucifer at Jesus Christ.

Ipinunto ni Gatchalian na malaking tulong sa electoral process  kung mababawasan o kung maaari ay matanggal na ang mga nuisance candidate na kadalasang sanhi ng kalituhan ng mga botante.

Nakausap ko rin si dating Comm. Goyo Larrazabal ang sabi niya alam niyo ang dami ngayong habitual candidate. Every election na lang sila sila ang nagpa-file dahil alam nila makakakuha sila media attention. Tuwing election process ang sinasabi natin sa mga botante natin pumili ng magagaling. Pero kung itong mga taong ito ay paulit-ulit na nagpa-file at ang kanilang mga adbokasiya ay kalokohan lang tulad ng four seasons at ang tawag nila sa sarili nila ay Lucifer talagang binababoy nila ang proseso sa eleksyon.

Posibleng himukin ni Senate President Tito Sotto na palipatin sa kanilang hanay sa Nationalist People’s Coalition o NPC ang on leave president ng United Nationalist Alliance o UNA na si Senator Nancy Binay.

Ayon kay Sotto, isa sa mga senior leader ng NPC, susubukan niyang ligawan si Binay upang maging opisyal na nila itong miyembro.

Pero meron kami katulong din ng NPC na gusto naming ligawan na maging miyembro na rin tulad ni Nancy, Pia at Angara. Meron kami announcement… Kasi ang gusto namin, lahat ng nasa line up unanimous ang support, merong di popular sa kanila, ayaw nilang dalhin kami na lang on the personal level ang magdadala sa kanila.

Gayunman, hindi aniya nila matiyak sa partido kung papayag si Binay na mapabilang sa NPC.

Samantala, kabilang din sa posibleng mapabilang sa line-up ng NPC sina dating Senate President Juan Ponce Enrile at dating Senador Jinggoy Estrada sa 2019 midterm elections.

(Usapang Senado Interview)

Nagpahayag ng pagkabahala si dating Senador Juan Ponce Enrile sa isinusulong Pederalismo ng Duterte administration, partikular ang isyu ng perang gugugulin sa pagpapatupad nito.

Ngunit paglilinaw ni Enrile, hindi naman siya ganap na tutol sa pagpapalit ng Saligang Batas dahil wala aniyang permanenteng istruktura ng gobyerno para sa isang bansa.

Ang pag-aalala lamang niya ay mahalagang mapag-aralan at huwag madaliin ang pagtatatag ng panibagong uri ng pamahalaan dahil ang mapapahamak lamang dito ay ang taumbayan na siyang sasagot ng gastusin sa pamamagitan ng buwis.

I am totally in favor of any revision ng ating Saligang Batas dahil walang permanent structure ng government. Ang sinasabi ko ay ito ba ay pinag-aralan ninyo kung magkano ang kailangan na gugugulin para maitayo iyan dahil ang sasagot niyan ay ang taumbayan, ang pera diyan ay manggagaling sa bulsa ng bawat Pilipinong nagbabayad ng buwis. Mawawalan sila ng sapat na pera para sa kanilang kabuhayan.

Ibinatay ni Enrile ang obserbasyon sa kanyang naging pag-aaral at malawak na karanasan bilang isang mababatas.

Delikado iyan kapag minadali. Napag-aralan ko iyan, kaya nga gusto ko nang sumali sa usapan.

 TRAIN Law, Pagbagsak ng halaga ng piso vs. dolyar, Inflation, Oil price hike

Binigyan diin din ni Enrile na nararapat ding pagtuunan ng pansin ng pamahalaan ang ilang isyu na kinakaharap ng bansa tulad ng inflation, oil price hike at pagbagsak ng halaga ng piso kontra dolyar.

Inflation, pagbagsak ng presyo ng ating pera at ang TRAIN Law, dapat din ‘yan pag-aralan dahil nagpapahirap iyan sa ating taumbayan. Kasama ng problema sa enerhiya, ano ba ang plano ng gobyerno diyan? Kapag wala tayong sapat na enerhiya lalo na sa transport system natin, magkakagulo rito.

Pagdating naman sa isinusulong na Tax Reform for Acceleration and Inclusion o TRAIN 2, sinabi ni Enrile na hindi niya ito haharangin ngunit magmumungkahi lamang ng mga kailangang repasuhin para sa kapakanan ng taumbayan.

Hindi ko haharangin ang TRAIN 2 pero i-susuggest ko ‘yung mga babaguhin para hindi masaktan ang taumbayan. Sa TRAIN Law,  ire-revise ko ‘yung mga taxes na ipinataw doon na nagpre-pressure ng presyo ng mga bilihin sapagkat pag pinatawan mo ng buwis, halimbawa ‘yung enerhiya at babagsak ang valor ng pesos natin, hindi maso-solve ang inflation na iyan.

(Usapang Senado Interview)

Itinanggi ng Malakanyang na pinababayaan ng gobyerno ang usapin ng patuloy na pagtaas ng presyo ng mga pangunahing bilihin at serbisyo sa bansa.

Ito ay matapos na maitala ng Bangko Sentral ng Pilipinas (BSP) ang 6.2 percent inflation rate sa ikatlong bahagi ng taon, mataas ng 1.4 percent sa naitalang 4.8 percent noong second quarter.

Ayon kay Presidential Spokesperson Salvador Panelo, ginagawa ng pamahalaan ang lahat para matugunan ang mabilis na pagtaas sa presyo ng mga bnilihin.

Kabilang aniya rito ang ipinalabas n administrative order 1-3 at tatlong memorandum orders ni Pangulong Rodrigo Duterte na nagpapadali sa proseso ng importasyon sa mga agricultural products tulad ng bigas, isda at karne.

Dagdag pa ni Panelo, tiwala rin ang Malakanyang na mararamdaman na ang disinflationary trend o unti unting pagbaba sa inflation rate ngayong buwan.

Ito aniya ay sa oras na bumaha na ng suplay ng mga produktong pang-agrikultura sa mga merkado sa bansa.

BSP tiwalang baba ang inflation rate

Tiwala ang Bangko Sentral ng Pilipinas (BSP) na bababa na ngayong Oktubre hanggang sa taong 2020 ang inflation rate sa bansa.

Ayon kay BSP Deputy Governor Diwa Guinigundo, ginagawa ng pamahalaan ang lahat para matugunan ang mabilis na pagtaas ng presyo ng mga pangunahing bilihin at serbisyo sa bansa.

Kabilang aniya sa mga hakbang na ito ang pagpapadali ng importasyon ng mga produktong pang-agrikultura tulad ng bigas, karne at mga gulay.

Dagdag ni Guinigundo, makatutulong din sa pagpapababa ng inflation oars na maipapasa na ang rice tarification bill na layuning bawasan ang buwis sa mga agricultural products.

Samantala, sinabi ni guinigundo na tinaasan na rin ng bsp ang kanillang policy rate o interest na sinisingil sa mga pautang na inaasahang mabibigay solusyon sa pagbaba ng halaga ng piso sa world market.

Pinayuhan ng Malakanyang ang publiko na magtiis-tiis na muna sa kasalukuyang sitwasyon.

Ito ay sa harap ng nakatakdang pagtataas sa pasahe sa jeep at bus na inaprubahan ng Land Transportation and Franchising Regulatory Board (LTFRB).

Humingi ng pang-unawa si Presidential Spokesperson Salvador Panelo lalo’t wala aniyang magagawa ang pamahalaan kundi payagan ang mga hirit ng taas pasahe dahil sa pagmahal ng presyo ng langis sa pandaigdigang merkado.

Iginiit ng Malaknyang na hindi nila kontrolado ang pagtaas ng presyo ng langis lalo’t lahat naman aniya ng bansa ay apektado nito.

Sa kabila nito, kumpiyansa si Panelo na bababa din ang presyo ng langis gaya sa mga nakaraan.