HOT STORIES OF THE WEEK

Tumanggi munang magkomento ang Armed Forces of the Philippines (AFP) sa mungkahing muling pagpapalawig sa ipatutupad na martial law sa Mindanao.

Ayon kay AFP Public Affairs Office Chief Col. Noel Detoyato, patuloy pa ang kanilang ginagawang assessment sa sitwasyon sa Mindanao.

Wala naman aniyang itinakdang timeline sa AFP para sa pagbibigay ng rekomendasyon kay Pangulong Rodrigo Duterte kung kinakailangan pang palawigin ang martial law sa Mindanao na mapapaso na rin sa katapusan ng taon.

Una nang lumutang ang muling pagpapalawig sa umiiral na martial law sa Mindanao matapos ikadismaya ni Pangulong Duterte ang mabagal na pag-usad ng rehabiliotasyon sa Marawi City, isang taon mula nang mapalaya ito mula sa Maute-ISIS group.

Hindi pabor ang Malakanyang sa panukala ng Philippine Drug Enforcement Agency (PDEA) na isailalim sa random o surprise drug testing ang mga kandidato sa 2019 midterm elections.

Ayon kay Presidential Spokesperson Salvador Panelo, dapat na gawing boluntaryo at hindi kinakailangang pwersahan ang pagsasagawa ng drug testing sa mga kandidato.

Ito aniya ay upang maiwasang may malabag sa karapatang pantao ng mga ito.

Paliwanag ni Panelo, kung wala namang itinatago ang mga kandidato, nakatitiyak siyang magkukusa na ang mga ito na sumailalim sa drug testing.

Magugunitang ipinanukala ng PDEA ang pagsasagawa ng suprise at random drug testing sa mga kandidato para hindi anila makapaghanda ang mga ito at malaman ng mga bontante kung sino ang mga gumagamit ng iligal na droga.

Walang batayan ang ‘surprise random testing’ — Lacson

Hindi uubra at walang ligal na batayan ang nais ng Philippine Drug Enforcement Agency (PDEA) na isailalim sa random o surprise drug testing ang mga kandidato sa 2019 midterm elections.

Ito ang iginiit ni Senador Panfilo Lacson.

Ayon kay Lacson, maaari lamang isagawa ang random drug testing kung may expressed consent o payag ang taong isasailalim dito.

Hindi aniya ito maaaring ipilit ng PDEA o ibang pang law enforcement agency ang pagsasailalim sa drug testing.

Magugunita naman na noong 2008, idineklara ng Korte Suprema na unconstitutional ang mandatory drug test na kabilang sa probisyon ng Comprehensive Dangerous Drugs Law.

Nag-alok ng mas murang diesel ang Petron Corporation sa pamahalaan na mas mura ng mula P11 hanggang P17 kada litro.

Pahayag ito ni Petron President at CEO Ramon Ang sa harap ng plano ng Philippine National Oil Company Exploration Corporation (PNOC-EC) na pag-aari ng pamahalaan na umangkat ng hanggang dalawang bilyong pisong halaga ng mas murang diesel sa Singapore.

Ayon kay Ang, kung ililibre ng pamahalaan sa buwis ang aangkating diesel ng PNOC-EC para mapamura ang presyo, mas makakabuti kung sa Petron na lamang sila bumili sa halip na mag-import.

Maaari naman aniya silang bigyan na lamang ng certification  para sa Bureau of Internal Revenue na nagbenta sila ng murang diesel sa pamahalaan.

Maliban dito, sinabi ni Ang na Euro 5 o Euro 6 ang puwede nilang ibenta sa gobyerno na mas maganda ang kalidad kumpara sa Euro 4 na planong bilhin ng PNOC-EC sa Singapore.

DOE, blangko pa sa alok ng Petron Corp.

Blangko pa ang Department of Energy sa alok ng Petron Corporation na magbenta ng mas murang diesel kumpara sa planong pag-import ng pamahalaan sa Singapore.

Ayon kay DOE Undersecretary Donato Marcos, wala pang pormal na komunikasyon sa kanila ang Petron Corporation.

Sa ngayon aniya ay plantsado na ang pag-import ng mas murang diesel sa Singapore sa pamamagitan ng Philippine National Oil Company Exploration Corporation.

Garantisado aniyang limang pisong mas mababa ang presyo nito sa kasalukuyang pump price ng diesel.

Prayoridad na mabentahan ng murang disel ang mga pampublikong sasakyan at mga mangingisda.

Tumaas sa 6.2 percent ang inflation rate para sa ikatlong bahagi ng taon o mula Hulyo hanggang Setyembre batay sa datos ng Bangko Sentral ng Pilipinas o BSP.

Ayon sa BSP, lubha itong mas mataas sa 4.8 percent inflation para sa ikalawang bahagi ng taon o mula Abril, Mayo at Hunyo.

Sa kabuuan, sinabi ng BSP na umaabot sa 5 percent ang inflation rate mula enero hanggang setyembre na pasok pa rin sa kanilang 4.8 hanggang 5.2 percent para sa kabuuan ng 2018.

Una rito, nakapagtala na ng 6.7 percent inflation rate ang Philippine Statistics Authority para lamang sa buwan ng Setyembre.

Ilalabas na ng Department of Agriculture ang SRP o Suggested Retail Price ng bigas sa susunod na linggo.

Ayon kay Agriculture Secretary Manny Piñol, nakatakdang magpulong ang NFA Council sa October 23 upang pagtibayin ang rekomendasyong SRP ng stakeholders sa industry ng bigas.

Sa pulong ni Piñol at ng stakeholders, napagkasunduan ang P39 pababa na SRP para sa regular milled rice samantalang P44 pababa naman sa well milled rice.

Sinabi ni Piñol na natuklasan niya sa pulong na kayang ibaba ang presyo ng imported na bigas sa P40 mula sa kasalukuyang P55.

Posibleng ikunsider ng Malakanyang ang pagpapalawig sa ipinatutupad na martial law sa Mindanao.

Ito ayon sa Malakanyang ay dahil malaki ang tulong ng batas militar para mapanatili ang kapayapaan sa Mindanao at ma protektahan ang mga sibilyan mula sa mga planong pag-atake ng mga terorista.

Sinabi ni Presidential Spokesman Salvador Panelo, tanggap ng local residents ang martial law subalit hihingi pa rin ng rekomendasyon ang Pangulong Rodrigo Duterte sa Philippine National Police (PNP) at Armed Forces of the Philippines (AFP) bago magpasya kung palalawigin pa ang batas militar sa Mindanao.

Ang martial law ay nakatakdang ipawalang bisa sa Disyembre 31, ang ikalawa at dapat na huling extension nang pagpapatupad nito na pinapayagan ng Kongreso.

Naniniwala ang Philippine National Police (PNP) na planado ang pananambang ng mga rebelde sa grupo ni Food and Drug Administration (FDA) Director General Nela Puno sa Camarines Sur, kung saan nasawi ang tatlong police escorts nito.

Ayon kay PNP Chief Director General Oscar Albayalde, hindi malabong sinadya ang nasabing pananambang dahil may pumutok pang improvised explosive device (IED).

Sinabi ni Albayalde na posibleng nakarating sa grupo ng mga rebelde ang pagkilos ng mga pulis lalo’t may VIP na bibisita sa lugar.

Hindi naman matiyak pa sa ngayon ni Albayalde kung ang pakay ng mga rebelde ay si Puno o ang mga pulis para makakuha ng mga armas.

Tiniyak naman ng opisyal ang malalimang imbestigasyon kaugnay sa insidente.

Umapela si Pangulong Rodrigo Duterte sa publiko na maging matalino sa pagboto sa 2019 midterm elections.

Sa kaniyang talumpati sa 44^th Philippine Business Conference and Expo sa Manila Hotel, binalaan ni Pangulong Duterte ang publiko laban sa mga pulitikong umaabuso sa kanilang kapangyarihan.

“You choose your candidates wisely. Kayo, kayong Pilipino, alam ninyo ’yan. Kung bigyan kayo na sabihin ah because ito mahusay magdaldal. And they are there just to wallow in their lost sense of pride.” Pahayag ni Duterte.

Sinabi pa ng pangulo na mayroong mga kilalang pulitiko na ginagamit ang kanilang posisyon upang manghiya ng ibang opisyal sa mga isinasagawang pagdinig sa Senado at Kongreso.

Gaya umano ng nangyari kay dating Special Assistant to the President (SAP) Bong Go matapos itong isangkot sa navy frigate deal gayundin ang sinapit na panggigisa sa mga pagdinig na dinaluhan ni dating PNP Chief Director Ronald “Bato” Dela Rosa, kaniyang anak na si dating Vice Mayor Paolo Duterte.

“O ‘di nakita mo ngayon si Bong Go senador na. O totoo he will win. Kita mo how fate play – destiny of men are played. Hindi kilala yan mas kilala yung nagpatawag sa kaniya. O tingan mo ngayon he weighed the scales all their character.” Ani ni Duterte.

Dinepensahan ni Pangulong Rodrigo Duterte ang pagsabak sa pulitika ng kaniyang tatlong anak.

Ito’y sa kabila ng pagtutol ng pangulo sa political dynasty.

Sa kaniyang talumpati sa 44^th Philippine Business Conference and Expo sa Manila Hotel, sinabi ni Pangulong Duterte na ang pagtakbo ng kaniyang anak na sina Davao City Mayor Sara, dating Davao City Vice Mayor Paolo at Sebastian ay para mapanatili ang kapayapaan at kaunlaran sa lungsod.

Tatakbo sa 2019 midterm elections si Sara bilang alkalde ng Davao, habang congressional seat ang target ni Paolo at bise alkalde naman ng lungsod si Sebastian.

“So ayoko ng dynasty, but we are forced. Ako, ayoko na 73-years-old, I could not see Davao go back in shambles, so I insisted on my daughter kasi kaya niya.” Pahayag ni Duterte.