HOT STORIES OF THE WEEK

Umakyat na sa 71 ang bilang ng nasawi sa pananalasa ng bagyong Usman.

Karamihan o 57 ay mula sa bulubunduking bahagi ng Bicol Region habang ang nalalabi ay mula sa Eastern Visayas at pawang mga biktima ng landslides.

Ayon kay Office of Civil Defense-Region 5 director Claudio Yucot, pinangangambahang madagdagan pa ang bilang ng fatalities sa gitna nang nagpapatuloy na search and rescue operation.

Aminado si Yucot na nabigo ang karamihan sa mga biktima ng kalamidad na paghandaan ang pagtama ng  bagyo dahil hindi naman ito malakas partikular ang hanging dala nito bagkus  ay nagdulot ng matinding pag-ulan.

Samantala, isinailalim na rin sa state of calamity ang mga lalawigan ng Camarines Norte at Albay dahil sa lawak ng pinsalang idinulot ng bagyo.

Mayorya ng mga Pilipino ang positibo sa pagharap sa bagong taong 2019 batay sa Social Weather Stations (SWS) survey.

Batay sa naturang survey noong huling quarter ng taong 2018 sa 1,440 respondents, 92 percent ng mga Filipino ang sumalubong sa bagong taon na puno ng pag-asa sa halip na pangamba.

Kumpara ito sa 96 na porysentong naitala noong 2017.

Ipinaliwanag ng SWS na karaniwan nang puno ng pag-asa ang mga Pinoy tuwing magbabagong taon na nagsimula sa 87 percent nang unang mag- survey noong 2000.

Palasyo, ikinalugod ang resulta ng survey

Ikinalugod ng Malakanyang ang resulta ng survey kung saan mayorya ng mga Pilipino ang nananatiling positibo ngayong bagong taon.

Ayon kay Presidential Spokesperson Salvador Panelo, ipinakikita sa survey na maliit lamang o halos walang epekto sa nakararaming Pilipino ang mga kritiko ni Pangulong Rodrigo Duterte.

Kasabay nito pinasalamatan ni Panelo ang lahat ng mga Pilipinong nananatiling positibo sa ilalim ng Duterte administration.

Tiwala rin aniya ang Malakanyang sa patuloy na suporta ng taumbayan sa pamahalaan para makamit ang tunag na pagbabago at kaunlaran ng bansa.

Umabot sa 3,500 ang naaresto ng Bureau of Immigration (BI) na mga banyagang nagtangkang pumasok sa bansa sa unang sampung buwan ng 2018.

Batay sa report, ipinaabot kay Immigration Commissioner Jaime Morente ni Immigration Port Operations Division chief Grifton Medina na kabuuang 3,528 iligal aliens mula sa iba’t-ibang bansa ang hindi pinayagang makapasok sa mga paliparan sa bansa.

Sinasabing nagkakaroon ng banta sa seguridad kapag nakapasok ang mga naturang banyaga sa bansa.

Nabatid na karamihan sa mga nahuli ay aabot sa 1,508 na sinundan naman Indian national na may 262, pumangatlo naman ang Americans na may 151 at Koreans na 138.

Aabot sa 3,448 o katumbas ng 13,469 na mga indibidwal ang magbabagong taon sa evacuation centers dahil sa pananalasa ng bagyong Usman.

Ito ay batay sa tala ng Department of Social Welfare and Development (DSWD) kung saan kabilang sa mga lugar na apektado ay Cavite, Laguna, Batangas, Rizal, Quezon, Mindoro, Marinduque, Romblon, Palawan, Bicol at ang Eastern Visayas.

Kaugnay nito, tiniyak naman ng dswd na naka antabay pa rin ang kanilang emergency communication equipment sakaling kakailanganin.

Nabatid na sa aabot na sa 395,144 na halaga ng tulong ang naibigay ng DSWD sa mga local government units (LGUs).

Muling binira ni Pangulong Rodrigo Duterte ang Simbahang Katolika dahil sa aniya’y mga maling turo at aral nito sa mga mananampalataya.

Sa kaniyang talumpati sa Kidapawan City, Cotabato kahapon, tinawag ng pangulo na isang kabaliwan ang doktrina ng simbahan hinggil sa holy trinity o banal na isantatlo.

Ayon sa pangulo, iisa lamang ang diyos at hindi ito maaaring hatiin kailanman sa tatlong persona na ama, anak at espiritu santo.

“Yong Diyos mo, pinako sa krus. Tangina. Nakakawala ng bilib. Ako ang Diyos, tapos ipako mo ako? Putangina. Sabihin ko, ‘Lightning, ubusin mo ito. Sunugin mo lahat ng mga erehes,’” Pahayag ni Duterte.

Hindi rin bilib ang pangulo sa pagpapapako sa krus ni Hesukristo dahil hindi aniya nanaisin ng diyos na maipako siya sa krus sabay pagbibiro na kung siya umano ang diyos ay uubusin niya ang lahat ng makasalanan sa pamamagitan ng kidlat.

Ang doktrina ng trinity at ang pagpapakasakit ni Hesukristo ang pangunahing aral na itinuturo ng Simbahang Katolika na siyang itinuturing na matibay na sandigan ng pananampalataya ng mga Katoliko sa ikaliligtas ng sangkatauhan.

“Isa lang ang diyos. There is only one god, period. You cannot divide god into three, that’s silly.” Ani Duterte.

Nakapagtala ng 143 aftershocks ang Philippine Institute of Volcanology and Seismology (PHIVOLCS) kasunod ng pagtama ng magnitude 7.2 na lindol sa Davao Oriental kahapon.

Gayunman, sinabi ni PHIVOLCS director Renato Solidum, karamihan sa mga ito ay hindi na naramdaman.

Pinakamalakas naman aniya sa mga nasabing aftershocks ang magnitude 5.6 na naramdaman sa Davao Oriental ala singko trese ng hapon, kahapon.

Ipinaliwanag naman ni Solidum na ang naramdamang malakas na lindol sa Davao Oriental ay bunsod ng pababang paggalaw ng tail-end ng Philippine Trench.

Sumampa na sa 22 ang nasawi sa pananalasa ng bagyong Usman.

Batay ito sa tala ng National Disaster Risk Reduction and Management Council (NDRRMC) kung saan 16 ang mula sa Bicol Region at anim sa silangang Visayas.

Ayon kay NDRRMC Spokesperson Edgar Posadas, karamihan sa mga nasawi ay dulot ng landslides.

Kabilang dito ang mag-asawa at kanilang tatlong taong gulang na anak na nasawi matapos matabunan ng mga gumuhong lupa ang kanilang bahay sa Legazpi City, Albay.

Gayundin ang isang lalaking nasawi dahil landslide sa Sorsogon City habang limang iba pa ang napaulat na nawawala.

Dagdag ni Posadas, may mga naitala ring nawawala sa bahagi ng Eastern Visayas.

Patuloy naman aniya ang kanilang ginagawang kumpirmasyon kung ang lahat ng mga nasawi ay dulot ng bagyong Usman.

Hinimok ng Malakanyang ang lahat ng Filipino na makiisa sa pagtitiyak sa karangalan ng bansa gayundin ang pagsasabuhay sa mga iniwang aral at pamana ni Gat Jose Rizal.

Ito ang naging sentro ng mensahe ng Malakanyang sa paggunita ng ika isang daan at dalawamput dalawang anibersaryo ng kamatayaan at kabayanihan ni Rizal ngayong araw.

Ayon sa Malakanyang, ang naging buhay at kamatayan ni rizal ay malaking patunay ng dakila at matinding pagmamahal ng isang mamamayan sa kanyang sinilangang bayan.

Dagdag ng Palasyo, ngayong nahaharap ang pilipinas sa mga hamon at kritikal na panahon, kinakailangan ang mga Filipinong may katulad na katapangan at prinsipyo ni Rizal na walang pag-iimbot para patuloy na maipaglaban ang kalayaan ng bansa.

Binigyang diin pa ng Malakanyang, dapat tularan ng bawat Filipino ang ipinakitang kagitingan ni Rizal para makamit ang tunay na pagbabago at kaunlaran.

Pinangunahan ni Vice President Leni Robredo ang wreath laying ceremony o pag-aalay ng bulalak sa monumento ni Gat Jose Rizal sa Luneta kaninang umaga.

Ito ay bilang paggunita sa ika isang daan at dalawamput dalawang anibersaryo ng kamatayan at kagitingan ng pambansang bayani ng bansa na si Jose Rizal.

TINGNAN: VP Leni Robredo at NCRPO Chief Police Director Guillermo Eleazar, nanguna sa seremoniya para 122th Rizal Day. | via @jaymarkdagala

Photo Courtesy: NCRPO-PIO pic.twitter.com/BSE0SLoTbR

— DWIZ Newscenter (@dwiz882) December 30, 2018

Inaasahan namang pangungunahan ni Pangulong Rodrigo Duterte ang pagbibigay pugay kay Rizal sa Rizal Park sa Davao City mamayang hapon.

Si Rizal na isang nobelista at doctor ay hinatulan ng kamatayan dahil sa rebelyon laban sa Spanish colonial government noong Disyembre 30 taong 1896.

(with report from Jaymark Dagala)