HOT STORIES OF THE WEEK

Kumpiyansa ang gobyerno na malaki ang maitutulong ng itatayong 18.7 billion pesos Kaliwa dam project sa nararanasang krisis sa tubig.

Ayon kay Finance Secretary Carlos Dominguez, kung naitayo lamang ng mas maaga ang naturang proyekto na pinopondohan ng Tsina ay malamang na hindi naging ganito kalala ang problema sa tubig.

Dahil sa sitwasyon ngayon, posible aniyang kumbinsinhin na ng Metropolitan Waterworks and Sewerage System (MWSS) ang mga contractor na bilisan ang konstruksiyon ng nasabing proyekto.

Kabilang ang naturang dam sa mga loan na ipinagkaloob ng China noong bumisita sa bansa si Chinese President Xi Jinping noong Enero.

—-

Nanawagan ang Malacañang sa Kongreso at Senado na itigil na ang patigasan sa pagpasa sa panukalang 2019 national budget.

Ayon kay Presidential Salvador Panelo, maraming naaapektuhan sa nakabinbing pambansang pondo.

Kabilang na rito aniya ang ilang mga proyekto ng pamahalaan at umento sa sahod ng mga manggagawa sa gobyerno.

Sinabi ni Panelo na kapag naisumite na sa Office of the President ang enrolled bill, bubusisiin ng husto ni Pangulong Rodrigo Duterte ang bawat item nito at sisiguraduhing naayon sa constitutional demands.

Magugunitang kagabi ay pinulong ng Pangulo ang liderato ng Kamara at Senado para maayos ang kanilang hindi pagkakasundo sa national budget.

—-

Patuloy na nararamdaman ang pamiminsala ng El Niño sa iba’t-ibang rehiyon.

Ito’y matapos hindi mabuhay ang mga pananim ng mga magsasaka sa halip na mamukadkad ang mga ito.

Sa General Santos City, apat na barangay na ang naapektuhan ng tagtuyot.

batay sa City Agriculture Office ng Gensan, aabot na sa isangdaan dalawampung (120) ektarya ng maisan ang napinsala dahil sa labis na tagtuyot.

Dahil dito, pinag-aaralan na ng lokal na pamahalaan na irekomendang isailalim na sa state of calamity ang mga apektadong barangay.

Isinailalim naman na sa cash for work program ang mga apektadong magsasaka.

Samantala, tinatayang nasa siyamnaraang apatnapung (940) ektarya ng palayan ang apektado ng dry spell sa Albay.

Iba’t-ibang sangay ng pamahalaan bumabalangkas na ng EO upang tugunan ang krisis sa tubig

Bumabalangkas na ng executive order ang iba’t-ibang sangay ng pamahalaan para tugunan ang krisis sa suplay ng tubig sa Metro Manila at mga kalapit na bayan.

Ayon kay Cabinet Secretary Karlo Alexei Nograles, ito ay upang masulusyunan ng pamahalaan ang nararanasan ngayon na problema sa tubig ng mga residente sa mga apektadong lugar.

Sinabi ni Nograles na bago pa man mangyari ang krisis sa tubig ay may mga ginagawa nang hakbang ang economic cluster para mapaghandaan ang problema sa tubig.

Bukod aniya sa tubig, kabilang din sa mga inaayos ng pamahalaan ay ang problema sa sewerage, sanitation, irrigation, flood management, watershed management at iba pa.

Hindi naitago ni Pangulong Rodrigo Duterte ang kaniyang galit sa sinapit ng disi sais anyos na si Christine Silawan na ginahasa at pinatay sa Lapu-Lapu, Cebu.

Sa talumpati ng pangulo sa campaign rally ng PDP-Laban sa Ilagan City, Isabela, inihayag nito ang kaniyang nararamdamang galit sa gumawa ng karumaldumal na pagpatay kay silawan.

Hindi pa aniya nakuntento ang mga suspek sa panghahalay nito sa estudyante at nakuha pang balatan ang mukha nito at patayin.

Naniniwala rin umano ang pangulo na lulong sa ipinagbabawal na gamot ang mga gumawa nito sa biktima.

Magsasanib pwersa na ang Manila Water Company at Maynilad Water Services upang maibsan ang problema sa kakulangan ng suplay ng tubig sa iba’t-ibang bahagi ng Metro Manila.

Ayon kay Jeric Sevilla, tagapagsalita ng Manila Water, umaasa sila na maipatutupad na ngayong linggo ang water sharing o pagbabahagi ng suplay ng tubig sa pagitan nila at ng Maynilad.

Pinag-uusapan na anya ngayon ng dalawang water concessionaire ang implementasyon ng naturang hakbang.

Tinatayang nasa tatlumpu (30) hanggang limampung (50) milyong litro ng suplay ng tubig kada araw ang paunang ibabahagi ng Maynilad sa Manila Water.

Samantala, magugunitang una ng ipinaalam ng Metropolitan Waterworks and Sewerage System (MWSS) na tutulong ang Maynilad sa pagsu-supply ng tubig sa mga customer ng Manila Water Company.

Resolusyon para suriin ang mga insidente ng water service interruption sa Metro Manila inihain na

Naghain na ng resolusyon na naghihimok sa House committee on good government and public accountability na magsagawa na ng pagdinig upang suriin ang mga insidente ng water service interruption sa mga lugar sa Metro Manila.

Batay sa House Resolution 2518 na inihain ni Bayan Muna Party-list Representative Carlos Zarate, layon nito na tukuyin ang epekto nito sa mga consumer maging ang kahandaan ng mga ito sa ganitong kondisyon.

Ayon kay Zarate, patuloy na iginigiit ng pagasa na predictable pa ang kondisyon ng tagtuyot sa bansa at mapaghahandaan pa ito ng mga water concessionaire.

Tila aniya hindi nagawa ng mga water concessionaire ang naturang paghahandang ito dahil sa libo-libong mamamayan na naapektuhan ng water interruption.

Ito’y sa kabila rin ng pahayag ng Metropolitan Waterworks and Sewerage System at ng National Water Resources Board na walang problema sa suplay ng tubig sa bansa.

Giit ni Zarate, nakababahala na ang sitwasyong ito at dapat na aniyang imbestigahan.

—-

Itinakda na sa susunod na linggo ang imbestigasyon sa nakaambang krisis sa tubig partikular na sa nararanasanang kakulangan sa suplay nito sa ilang bahagi ng Metro Manila at sa maraming sakahan sa bansa.

Ito, ayon kay Senadora Grace Poe, chairman ng Senate committee on public services ay dahil sa mga mamamayan na wala ng mainom at uhaw na rin sa paliwanag hinggil sa totoong sitwasyon ng water supply.

Itinakda ng senadora ang pagdinig sa ikalabing-siyam ng marso sa ganap na alas-diyes ng umaga hinggil sa naturang isyu.

Iimbitahan rin sa naturang pagdinig ang mga opisyal ng mga kinauukulang ahensya ng gobyerno, mga head ng water concessionaires at iba pang stakeholders para talakayin ang nararanasang water supply interruptions.

Layon ng pagdinig na makabuo ng solusyon para maibsan ang epekto ng kakulangan ng suplay ng tubig at upang maiwasan na ang pagkakaroon muli ng ganitong uri ng krisis.

Mananatili sa above critical system ang water level ng Angat dam sa Norzagaray, Bulacan hanggang Mayo.

Ito’y kahit pa sa gitna ng nararanasang tagtuyot sa bansa.

Ayon kay PAGASA Hydrologist Sonia Serrano, kaninang umaga ay nasa 199.94 meters ang water level ng Angat dam, malayo pa ito kumpara sa 180 meters na critical level nito.

Mananatili aniya sa above critical level ang naturang dam kung hindi magbabago sa .35 meters ang ibinababa ng level nito sa bawat araw.

Samantala, siyamnapung (90) porsyento ng suplay ng tubig sa Metro Manila ay nanggagaling sa Angat dam.

Posibleng partial list pa lamang ng mga pulitikong sangkot sa operasyon ng iligal na droga ang maipalabas ng Department of Interior and Local Government o DILG.

Ayon ito kay Philippine Drug Enforcement Agency (PDEA) Chief Aaron Aquino dahil ilan sa mga nasa ‘narco-list’ ay patuloy pa nilang isinasailalim sa revalidation.

Sinabi sa DWIZ ni Aquino na maaaring ngayong linggo ay masampahan na ng administrative case ang ilang pulitikong natapos nang sumalang sa revalidation at talagang dawit sa illegal drug trade sa bansa.

“Ito’y gagawin nila maybe within the week, kailangan na masampahan man lang kahit administrative case, ako inaamin ko we’re in the process of revalidating all the narco-politicians kasi 82 lahat ‘yun eh so kung mailabas man it’s a partial list kaya nga sinasabi ko hindi pa tapos ang revalidation namin, that’s the reason why na ‘yung initial stand ko talaga noon ay huwag munang i-reveal dahil ito’y hindi pa tapos.” Pahayag ni Aquino

(Balitang Todong Lakas Interview)

Kung ang Palasyo naman ang tatanungin, hindi na mapipigilan pa ang inaasahang paglalantad sa mga pangalang kabilang sa ‘narco-list’ ngayong linggong ito.

Ayon kay Presidential Spokesman Salvador Panelo, wala silang nakikitang dahilan para maudlot pa ang nakatakdang pagbubunyag sa publiko ng mga pulitikong may kinalaman sa ipinagbabawal na gamot.

May instruction na aniya tungkol dito si Pangulong Rodrigo Duterte at na kay Department of Interior and Local Government (DILG) Secretary Eduardo Año na ang bola para isapubliko ang mga sangkot sa illegal drug trade na kinabibilangan ng mga tumatakbo ngayong midterm elections.

Una nang sinabi ng Palasyo na may karapatan ang mga botante na malaman ang background ng mga kandidato at hindi dapat ipagkait sa mga ito ang katotohanan kontra sa isang tumatakbo.

Hindi aniya kailanman dapat mangibabaw ang individual right sa usaping may kinalaman sa pambansang seguridad at interes kaya wala nang makapagpapabago pa sa pasya ng pamahalaan upang ilantad sa taong bayan ang ‘narco list’ ngayong linggong ito.—By Jopel Pelenio

—-