HOT STORIES OF THE WEEK

Gumulong na ang implementasyon ng national ID system.

Ayon kay Atty. Lourdines Dela Cruz ng Philippine Statistics Authority (PSA), mula ngayong Marso hanggang July ay nasa proseso na sila ng bidding para sa lahat ng kakailanganin nila upang maipatupad ang national ID.

Sa Setyembre naman aniya ay puwede nang magparehistro ang lahat ng Pilipino para mabigyan ng national ID.

Katuwang ng PSA sa registration ng mga Pilipino ang GSIS, SSS, PhilHealth, PHLpost at Comelec.

“’Yun pong system integrator siya po ‘yung magte-train sa mga staff natin sa PSA para po sa gagawa sa national ID na ito, at syempre po sa printing, card production at personalization ng ID, ang gusto nating mangyari dito ay  ibigay sa government printers natin, may close coordination na tayo with Bangko Sentral ng Pilipinas regarding this.” Ani Dela Cruz

Tatlumpu’t pitong (37) bilyong piso ang inilaan ng pamahalaan para maipatupad ang national ID system hanggang 2023.

Ayon kay Dela Cruz, para sa taong ito, target nilang mabigyan na ng ID ang may anim na milyong Pilipino.

“Kung wala po silang birth certificate or ID maire-register pa rin po sila through the introducer based system, ito ay mangyayari sa pamamgitan ng pagre-refer ng isang person sa community na kilala niya ang taong ‘yun, so inclusive siya, hindi lang siya mali-limit doon sa may mga birth certificate at ID.” Pahayag ni Dela Cruz

(Ratsada Balita Interview)

Hinikayat ng Kongreso ang pamahalaan na mamuhunan sa mga paraan para masolusyunan ang kakulangan sa tubig sa Metro Manila.

Paliwanag ni Kabayan Representative Ron Salo, mainam na mag-invest ang pamahalaan sa mga kagaya ng mobile desalination at water purification assets tulad ng ginawa noong manalasa ang Yolanda at Ondoy kung saan naging problema rin ang pagkukunan ng malinis na tubig sa lugar na sinalanta ng naturang mga bagyo.

Hindi aniya nakikita ni Salo na isang epektibong solusyon sa kakapusan ng tubig ang pagtatayo ng mga karagdagang dam.

Kasabay nito, tiniyak ni Salo na susuportahan ng Kamara ang pagpopondo sakaling maisulong ang proyekto.

Water crisis

May iba pang dahilan bukod sa El Niño phenomenon kaya nakararanas ng kakulangan ng supply ng tubig sa Metro Manila at Rizal.

Ayon sa PAGASA, kasama dito ay ang paglaki ng konsumo ng tubig at alokasyon na ibibigay ng water concessionaire.

Sinuportahan naman ito ng Metropolitan Waterworks and Sewerage System (MWSS).

Ayon sa MWSS, nagkaroon ng kakulangan ang Manila Water sa pag-tantiya sa water demand ng kanilang mga customer.

Posible anilang sa paglipas ng panahon ay dumami na ang tao sa mga lugar na nasasakupan ng Manila Water kaya lumobo na rin ang kailangan nitong supply ng tubig.

—-

Nilagdaan na ni Pangulong Rodrigo Duterte ang panukalang maging ganap na batas ang pagtiyak sa kaligtasan ng mga bata na nakasakay sa mga sasakyan.

Nakasaad sa Republic Act 11229 o Child Safety in Motor Vehicles Act na obligado ang driver na i-secure ang batang pasahero na 12-taong gulang pababa sa pamamagitan ng child restraint system habang nasa biyahe sa kalsada o highway.

Maaaring gumamit ng device na kayang magsakay ng batang pasahero sa paupong posisyon na ang disenyo ay layong mabawasan ang pinsala sakaling magkaroon ng aksidente o anumang banta sa kaligtasan ng bata.

Ang device ay dapat angkop sa edad, taas at timbang ng bata at dapat aprubado alinsunod sa safety standards para sa child restraint system.

Inaatasan din dito ang Department of Transportation (DOTr) na bumalangkas ng mga panuntunan na magtitiyak sa kaligtasan ng mga may dalang bata na sumasakay sa pampublikong sasakyan.

Ipinaubaya naman sa Department of Trade and Industry (DTI) ang paglalabas ng mga standard base na mga kagamitan para matiyak ang kaligtasan ng mga bata.

Ayon sa Philippine Statistics Authority o PSA nasa average na 667 bata na may edad 14 pababa ang namamatay kada taon mula 2006 hanggang 2015 dahil sa vehicular accidents.

—-

Mahaharap sa demanda ang Manila Water kapag hindi nag deliver ng sapat na supply na kailangan ng mga pampublikong ospital.

Ayon ito kay Health Secretary Francisco Duque III matapos mag reklamo ang Rizal Medical Center sa kulang na supply ng tubig ng Manila Water sa mga nasasakupan nito.

Sinabi sa DWIZ ni Duque na dapat maging priority ng Manila Water ang rasyon ng tubig sa mga public hospitals.

“Pwede silang i-demanda, pwede silang kasuhan so I’m sending notice to Manila Water. You cannot avoid not to provide sufficient water to our public hospitals.”

Pinakilos na ni Health Secretary Francisco Duque III ang pamunuan ng Rizal Medical Center para tiyakin sa Manila Water ang supply kada araw ng sampu hanggang 20,000 galon ng tubig.

Binigyang diin sa DWIZ ni Duque na dapat maging priority ang isang pampublikong ospital tulad ng RMC para rasyunan ng tubig na kailangang kailangan sa araw araw na operasyon ng ospital.

“Hindi pwedeng maapektuhan yung operations ng ospital dahil very very crucial and critical ang services dahil syempre kailangan ng tubig for operations, kailangan ng tubig pangligo, mga sanggol at ng mga bagong panganak, kailangan ng tubig for hygiene, for flushing of toilet, so napaka importante niyan because it is a public facility, it must be given priority. Dapat naiintindihan ng Manila Water yan hindi yung ganung patumpik, tumpik lang sila.”

Nabawasan pa ang water level sa La Mesa dam sa nakalipas na 24 oras.

Ayon sa PAGASA Flood Forecasting and Warning Section, alas-6:00 kaninang umaga ay naitala sa 68.85 meters ang water level sa La Mesa dam na mas mababa kumpara sa 68.93 meters sa parehong oras kahapon.

Ang Angat dam naman na nagsu-supply din ng tubig sa La Mesa dam ay nasa 200.28 meters ang water level.

Bahagya itong bumaba mula sa 200.59 meters kahapon subalit malayo pa sa low level.

—-

Dumami ang mga Filipinong kuntento sa performance ng Duterte administration batay sa resulta ng pinakabagong Social Weather Stations o SWS survey.

Sa December 16 to 18, 2018 SWS survey sa isanlibo limandaang (1,500) adults, tumaas ng plus 66 points o very good ang net satisfaction rating ng administrasyon.

Katumbas ito ng 76 percent ng mga Pinoy na “satisfied” habang 9 percent ang “dissatisfied” at 15 percent ang “undecided.”

Umani ng mataas na puntos o “excellent” ang administrasyon ni Pangulong Rodrigo Duterte sa pagtataguyod ng karapatan ng kababaihan at pagpapatayo ng mga infrastructure project.

Sa naturang survey, tinanong ang mga respondent kung gaano sila nasisiyahan o hindi nasisiyahan sa kasalukuyang administrasyon.

‘Vote of confidence’

Itinuturing ng Malacañang na vote of confidence ang mataas na satisfaction rating ng Pangulong Rodrigo Duterte sa Social Weather Stations (SWS).

Ayon kay Presidential Spokesman Salvador Panelo, ang pagtaas ng satisfaction rating ng Pangulo ay pagpapakita ng hindi natitinag na tiwala ng taongbayan sa Duterte administration.

Maaari rin aniya itong ituring na sampal o buwelta sa mga kritiko ng Pangulo.

Una rito, lumabas sa survey ng SWS na tumaas ng 16 points ang satisfaction rating ng Pangulo mula sa 55 percent noong September 2018 mula sa 66 percent nitong December 2018.—Len Aguirre

—-

Inirereklamo na ng mga customer ng Manila Water ang nararanasang krisis sa supply ng tubig.

Nasa dalawandaan pitumpu’t tatlong (273) barangay na sa Metro Manila at Rizal Province ang apektado ng limang araw na water crisis dahil sa patuloy na pagbaba ng antas tubig sa La Mesa dam na kasalukuyang nasa critical level.

Sa pag-iikot ng DWIZ sa Barangay Oranbo, Pasig at Barangka Itaas, Mandaluyong, kanya-kanyang diskarte ang mga residente sa pagkuha ng tubig.

Ayon kay Barangka Itaas Kagawad Jose Romulo Nario, halos hindi na natutulog ang mga residente para lamang makakuha ng tubig sa fire truck.

Mga residente sa Brgy. Barangka Mandaluyong, nakapila para sa rasyong tubig ng Manila Water | via Eugene Castro pic.twitter.com/6RfdTFk5ua

— DWIZ Newscenter (@dwiz882) March 11, 2019

EARLIER:
Mga residente ng Brgy. Itaas sa Mandaluyong City, pila para sa ibinibigay na rasyon ng tubig ng mga fire volunteer | via @gilbertperdez pic.twitter.com/JBPyNjWJ35

— DWIZ Newscenter (@dwiz882) March 11, 2019

Palaisipan naman sa PAGASA at Metropolitan Water Sewerage System o MWSS kung paano humantong sa krisis sa tubig ang limang araw na kawalan ng supply ng mga customer ng Manila Water.

Ayon kay Rusy Abastillas ng PAGASA Climate Monitoring and Prediction Section, hindi maaaring i-ugnay ang nararanasang service interruption ng Manila Water sa El Niño phenomenon.

Bagaman unti-unting bumababa ang lebel ng tubig sa La Mesa dam, nananatiling normal ang water level sa ilang dam tulad sa Angat na pangunahing pinagkukunan ng supply ng Metro Manila.

Nilinaw naman ni MWSS Administrator Reynaldo Velasco na maka-ilang ulit na niyang binanggit na “reserba” lamang ang La Mesa dam pero ipinagpatuloy pa rin ang pagkuha ng supply ng tubig mula rito na dapat ay magmula sa Angat.

Nagtataka rin si Velasco dahil tanging ang Manila Water ang mayroong service interruption pero wala namang nararanasan ang Maynilad na nasa west zone gayong sa Angat dam din naman ito kumukuha ng supply.

Hindi rin aniya apektado sa ngayon ang Maynilad ng El Niño kahit pa “direkta” itong kumukuha ng supply ng tubig.

NWRB nanawagang magtipid at mag-recycle ng tubig

Samantala, muling nanawagan ang National Water Resources Board o NWRB sa publiko na magtipid ng tubig upang maiwasan kakapusan ng supply.

Ayon kay NWRB Executive Director Sevillo David Jr., makakatulong para mapahaba ang suplay ng tubig kung tama ang magiging paggamit dito gaya ng pagre-recycle.

Samantala, aminado si David na dahil sa patuloy na paglobo ng populasyon ay kinakailangan nang makahanap ng iba pang maaaring pagkunan ng tubig upang maiwasan ang banta ng water shortage.

Matatandaang kahapon ay bumagsak na sa kritikal na lebel ang tubig sa La Mesa dam na pinagkukunan ng tubig ng Manila Water.

—-