HOT STORIES OF THE WEEK

Pasok bilang high value targets sa kampanya kontra ilegal na droga ang ilang taga-media, artista, kongresista at ilang pulitiko.

Ibinunyag ito ni Philippine Drug Enforcement Agency (PDEA) Chief Aaron Aquino na nagsabing ilang malalaking pangalan sa tri-media industry ang nagsisilbing protektor sa high value targets.

Ilang opisyal din ng PDEA, PNP at militar ang sangkot din sa operasyon ng ilegal na droga.

Sinabi ni Aquino na nasa mahigit 12 katao ang kabilang sa listahan ng high value target na ang ilan ay local chief executives.

Itinuturing nang person of interest ang mister ng babaeng Chinese na dinukot sa Makati City.

Sinabi ni Makati City Police Criminal Investigation Unit Chief Police Major Gideon Ines na nakausap nila ang mister ng biktimang si Zhou Mei na kinilalang si Chen Tangbin.

Ayon kay Ines, mayroong mga inconsistencies sa mga pahayag ng mister ng biktima bukod sa ilang oras pa aniya ang lumipas matapos ang pagdukot bago pa ito nagtungo sa mga otoridad.

Patuloy pang hinahanap ang biktima na batay sa CCTV ay nagpaikot-ikot lang ang sasakyang kumuha sa kaniya sa Makati.

Hindi na palalawigin pa ang umiiral na batas militar sa Mindano.

Ito ang inanunsyo ng Tanggapan ng Pangulo sa pamamagitan ni Presidential Spokesperson Salvador Panelo kung saan hanggang sa pagtatapos na lamang ng kasalukuyang taon (2019) o sa ika-31 ng Disyembre iiral ang batas militar sa naturang rehiyon.

The Office of the President wishes to announce that President Rodrigo Roa Duterte will not extend martial law in Mindanao upon its expiration on December 31, 2019,” ani Panelo.

Sa isang pulong-balitaan, sinabi ni Panelo na ito ay batay sa nagkakaisang pagpapasiya ng mga defense adviser ni Pangulong Duterte.

Dagdag panito, kumpiyansa aniya ang Palasyo sa puwersa ng seguridad na kaya na nitong panatilihin ang kapayapaan at seguridad sa rehiyon kahit pa hindi na palawigin ang batas militar.

Maguguntiang kapwa sinabi ng Philippine National Police (PNP) at ni Defense Secretary Delfin Lorenzana noong Nobyembre na maaaring mapananatili ang kapayapaan nang walang martial law.

Isinailalim sa batas militar ang buong rehiyon ng Mindanao makaraang umatake ang isang ISIS-inspired Maute group sa Marawi City noong buwan ng Mayo, taong 2017 —nakatakda sana itong magtagal lamang ng 60-araw ngunit hiniling ni Pangulong Rodrigo Duterte sa Kongreso na palawigin pa ito ng tatlong beses.

Pinayagan ng Korte Suprema ang live media coverage sa magiging pagbasa ng sakdal kaugnay sa Maguindanao massacre case.

Ito mismo ang kinumpirma ng Korte Suprema sa pulong-balitaan nito ngayong Martes, ika-9 ng Disyembre.

Ayon sa Assistant Court Administrator at Public Information Office chief ng Korte Suprema na si Brian Keith Hosaka, ito’y sa pamamagitan ng People’s Television (PTV-4).

Gayunman, may ilang panuntunan namang inilatag si Hosaka hinggil sa naturang live coverage dahil aniya sa mahigpit na seguridad at limitadong espasyo sa lugar na pangyayarihan ng paghatol.

Dalawang camera lamang aniya ang papayagan sa loob ng courtroom —mamanduhan ito ng PTV-4 ngunit sa mahigpit na pagsubaybay at pamamahala ng Supreme Court Public Information Office.

Korte Suprema sa live media coverage sa Maguindanao massacre verdict: Two (2) cameras allowed inside the courtroom will be manned by PTV-4, subject to strict control and supervision by the Supreme Court Public Information Office.

— DWIZ Newscenter (@dwiz882) December 10, 2019

Hindi rin papayagan sa loob ng courtroom ang mga cellphone, mga camera, recorders o anumang uri ng recording gadgets maliban sa camera ng PTV-4 at ng Korte Suprema.

Pinapayagan naman aniya na mag-hook up sa PTV-4 ang lahat ng media outfits pati na ang mga foreign correspondents.

Posible namang ilabas, ani Hosaka, ang buong resolusyon at panuntunan hinggil sa live coverage sa huling bahagi ng linggo.

Samantala, nakatakdang ianunsyo ang hatol hinggil sa Maguindanao massacre case sa darating na ika-19 ng Disyembre sa ganap na alas-9 ng umaga sa Quezon City Jail Annex sa Camp Bagong Diwa, Taguig City.

Magugunita namang maraming mga organisasyon, news outfits at government communications agencies ang humiling na payagan ang nabanggit na live coverage.

Nilinaw ng isang commuter group na hindi sila tutol na mabigyang pagkakataon na maging legal ang mga app-based motorcycle-taxi companies.

Paglilinaw ni Atty. Ariel Inton ng Lawyers for Commuters’ Safety and Protection (LCSP), kanilang tinututulan lamang ang mga lumalabas na ilegal at kulorum na kumpanya na nagsimula na ng kanilang operasyon ngunit hindi man lamang dumaan sa pilot testing ng Department of transportation (DOTr).

Hindi po kami kontra dito. In fact, kami po ang isa sa relentless na prime mover na bigyan ng pagkakataon na maging legal ang motorcycle taxi… kung merong ibang gustong pumasok [na kagaya ng Angkas], dapat hindi muna sila mag-operate ngayon, dahil hindi sila kasama sa pilot testing at lalabas na kulorum sila.” ani Inton.

Kasunod ito ng paghahain nila ng petisyon para sa preliminary injunction laban sa limang kumpanya na umano’y nag-ooperate na nang labas sa regulasyon ng gobyerno: We Move Things Philippines Inc. (Joyride), Habal Rides Corp. (Habals Inc.), i-Sabay, Sampa-Dala Corp. at Trans-Serve Corp.

Malaking problema, ani Inton, sakaling magkaroon ng aksidente sa mga aniya’y tila kulorum na mga motorcycle-taxi companies kung papayagan silang mag-operate kaagad na maaaring maging dahilan pa ng pagkabigo ng buong motorcycle-taxi community.

Kung papayagan natin ang ibang gustong pumasok na player nang hindi dumadaan sa pilot testing, ‘pag nagkaroon ng aksidente ‘yan, the whole motorcycle taxi will fail. Doon po kami nag-iingat,” ani Inton.

Nilinaw din ni Inton na hindi nila pinapanigan ang Angkas, nagkataon lamang aniya na nakapasok ang Angkas sa pilot testing ng DOTr kaya’t kanila itong sinusuportahan.

Nagkataon na ang Angkas ay nakapasok, kaya nga nililinaw po ng aming grupo, ito ay para sa motorcycle taxi. Nagkataon lang na ang Angkas lang ang nakapasok sa pilot testing, pero kung meron pang pumasa sa DOTr, okay din po kami doon,” ani Inton.

Katunayan aniya ay isa sila sa mga masipit na tagapagtaguyod ng mga motorcycle-taxi at welcome sa kanila ang kompetisyon at ibang kumpanyang nais pumasok sa operasyon nito basta dadaan sa pilot testing at tamang proseso ng DOTr.

Samantala, pabor naman si Inton sakaling palawigin pa ang pilot testing ng Angkas nang sa gayon aniya ay malaman kung ano pa ang dapat na pag-unlarin. — sa panayam ng Ratsada Balita

Hindi magrerekomenda ng ceasefire o tigil-putukan ang kalihim ng Department of Interior and Local Government (DILG) sa Communist Party of the Philippines-New People’s Army (CPP-NPA) ngayong kapaskuhan.

Ito mismo ay ayon kay Interior Secretary Eduardo Año na kabilang sa umano’y “kill list” ng mga rebeldeng komunista.

Sa kabila nito, bukas aniya ang gobyerno sa mga komunista na nais sumuko sa batas at magsimula ng kanilang panibagong buhay.

Pagkakalooban aniya nila ng lahat ng benepisyo at oportunidad ang sinumang magbabalik-loob sa pamahalaan upang maging isang produktibo at payapang mamamayan.

Samantala, naglabas si Año ng kanyang pahayag hinggil dito –isang araw matapos namang ipahayag ni Defense Secretary Delfin Lorenzana ang hindi rin nito pagrekomenda ng tigil-putukan sa CPP.

Magugunitang sinabi rin ni Lorenzana na maaaring magkasundo ang gobyerno at mga rebeldeng komunista para sa ceasefire kung titigil ang mga rebelde sa paggawa ng mga ilegal na aktibidad –bagay na tradisyonal na idinedeklara ng dalawang panig tuwing kapaskuhan.

Samantala, nakatakdang ipagdiwang ng CPP ang kanilang founding anniversary sa darating na ika-26 ng Disyembre.

Hindi na ikinagulat ni Labor Secretary at GPH Chief Negotiator Silvestre Bello III ang muling pagbuhay ni Pangulong Rodrigo Duterte sa usapang pangkapayapaan.

Ito ay matapos siyang atasan mismo ni Pangulong Duterte na magtungo ng the Netherlands para makipag-usap sa Communist Party of the Philippine – National Democratic Front (CPP-NDF).

Ayon kay Bello, kailanman ay hindi nawala ang hangarin ng Pangulo na makamit ng Pilipinas ang panghabambuhay na kapayapaan.

Sinabi ni Bello, isa sa magiging pangunahing niya sa pagtungo sa The Netherlands ang kumbinsihin sina CPP Founding Chairman Joma Sison na ganapin sa Pilipinas ang pagpapatuloy ng peacetalks.

Umaasa naman ang kalihim na magkakaroon ng positibong resulta ang kanyang pagtungo sa The Netherlands dahil naniniwala siyang kapwa hinahangad ng magkabilang panig ang kapayapaan.

Alam ko naman na sa isip ng ating Pangulo ang kanyang pinaka-legacy sa ating bansa ay ang kapayapaan, everlasting and inclusive peace for our country and our people. I’ll pray na magiging matagumpay itong laban na ito. Ito ang pinakamagandang aginaldo ng Pangulo sa ating bansa,” ani Bello.  — sa panayam ng Balitang Todong Lakas.

Desidido si Pangulong Rodrigo Duterte na kasuhan ng plunder ang Manila Water at Maynilad.

Kumbinsido ang pangulo na mayroon siyang matibay na kaso laban sa water concessionaires.

Binigyang diin ng pangulo na wala siyang planong bayaran ang pitong bilyong pisong multa na napanalunan ng Manila Water mula sa arbitration tribunal.

‘’If I file the case, I just state that they have any operations for so many years then all of the contracts there, all the provisions that been complied with, pag nag comply, kinomply na yun lahat nung increases ah, pasok ng atni graft lord so yun na nga eh. That’s my evidence. Para sa akin yun ah. I could establish a case then I’ll file plunder. Ang plunder … gusto ko makita na bilyonaryo ang makulong,’’ ani Pangulong Duterte.

Ayon sa pangulo, noong una pa lamang na mawalan ng tubig ang maraming bahagi ng Metro Manila ay naging curious na siya matapos na sabihan siya ng isang opisyal rin ng pamahalaan na mayroong sapat na suplay ng tubig.

Lalo anya siyang nagduda nang biglang magkatubig matapos niyang pagbantaan ang isang opisyal ng MWSS.

Sinabi ng pangulo na dito na siya nagka interes na silipin ang kontrata ng Manila Water at Maynilad na pinasok nila sa panahon ng Ramos administration at pinalawig hanggang 2037 sa panahon ng Arroyo administration.

‘’Our country surrendered everything to Manila Water and Maynilad. Everything! Including the sovereignty. Kasi nakalagay doon, kung malugi sila attributable to the government. What animal is that? It is not stated in the contract. Magbayad tayo. We pay, at yung CIF nila, corporate income tax, ipapasa nila to the consumers. Bilib naman talaga ako sa mga bituka nito,’’ ani Duterte.

Hindi na dapat na palawigin pa ang pinalawig nang martial law o batas militar sa Mindanao.

Ito ang naging rekomendasyon ni Defense Secretary Delfin Lorenzana matapos nitong ipahayag sa isang forum sa Makati City na nagpadala na siya ng kanyang rekomendasyon sa Tanggapan ng Pangulo hinggil dito.

I just sent my recommendation today to the President, recommending the non-extension of martial law in Mindanao, the whole of Mindanao,” ani Lorenzana.

Ayon kay Lorenzana, binatay niya ang kanyang rekomendasyon sa pagsusuri na rin ng mga militar at ng pulisya.

Tiniyak aniya sa kanya ng Armed Forces of the Philippines (AFP) at ng pulisya na kanila nang natupad ang mga kailangang gawin sa lugar at batay na rin sa kasalukuyang sitwasyon ay kanila na aniyang mapananatili ang kapayapaan at kaayusan sa Mindanao nang wala nang umiiral na martial law.

Personal ding naniniwala si Lorenzana na natupad na ng pwersa ng seguridad ang kanilang layunin na panatilihing ligtas ang naturang rehiyon.

Dagdag pa nito, makabubuti rin aniya sa negosyo o business sector sa Mindanao kung hindi na palalawigin pa ang umiiral nang batas militar.

Samantala, magugunitang isinailalim sa batas militar ang buong rehiyon ng Mindanao makaraang umatake ang isang ISIS-inspired Maute group sa Marawi City noong buwan ng Mayo, taong 2017 —nakatakda sana itong magtagal lamang ng 60-araw ngunit hiniling ni Pangulong Rodrigo Duterte sa Kongreso na palawigin pa ito ng tatlong beses.

Nakatakdang magtapos ang pag-iral ng martial law sa Mindanao sa darating na ika-31 ng Disyembre ng kasalukuyang taon.