HOT STORIES OF THE WEEK

Pinag-aaralan na ng Land Transportation Franchising and Regulatory Board (LTFRB) ang hiling na taas-pasahe ng ilang transport groups.

Ayon kay LTFRB Executive Director Maria Kristina Cassion, inaaral ng ahensya ang petisyon ng ilang driver at operators na itaas sa P10 mula sa P9 ang minimum na pasahe sa jeep.

Sa katunayan aniya, mayroon nang nakatakdang pagdinig tungkol sa nasabing isyu na isasagawa sa March 8.

Una na ring sinabi ni Trade Undersecretary Ruth Castelo na maaaring makaapekto sa paggalaw ng presyo ng krudo ang ginawang paglusob ng Russia sa Ukraine.

Matatandaang inihayag ng ilang driver at operators na hindi na nila kaya pa ang sunod-sunod na taas-presyo ng produktong petrolyo na sa ngayon ay nasa higit P60 kada litro.

Imumungkahi ng Land Transportation Franchising Regulatory Board (LTFRB) ang hanggang 100% kapasidad sa mga Public Utility Vehicles (PUVs) sakaling isailalim na sa Alert Level 1 ang National Capital Region.

Ayon LTFRB Executive Director Maria Kristina Cassion, nais nilang itaas sa full passenger capacity ang mga pampublikong sasakyan mula sa kasalukuyang ipinatutupad sa 70%.

Pero kailangan pang aprubahan ng Inter-Agency Task Force for the Management of Emerging Infectious Diseases (IATF) ang nasabing rekomendasyon.

Kaugnay nito, nanawagan ang LTFRB sa publiko na huwag pa ring makampante at magpatuloy lamang sa pagsunod sa ipinatutupad na health protocols.

Dapat pa rin aniyang magsuot ng facemask ang mga pasahero at palagiang pag-disinfect ng saksakyan ng mga tsuper.—sa panulat ni Abie Aliño-Angeles

Inihayag ng Ukrainian military na naharang nito ang pag-atake ng Russia sa isang army base sa capital ng Kyiv.

Ayon sa ahensya ng Interfax Ukraine, sinusubukan ng mga sundalong ruso na makuha ang isa sa electricity generating stations sa Victory, Avenue.

Nagbabala naman si Ukrainian President Volodymyr Zelenskiy sa posibleng pagsakop ng Moscow sa Kyiv bago sumikat ang araw sa kanilang bansa. —sa panulat ni Airiam Sancho

Wala nang plano pa ang pamahalaan na bumili ng dagdag na suplay ng Sputnik V COVID-19 vaccines na gawa ng bansang Russia.

Ayon kay Health Underscretary Myrna Cabotaje, sapat pa ang suplay ng bansa sa nasabing brand ng bakuna.

Maliban dito, posible rin kasing makaapekto sa delivery ng bakuna ang nangyayaring paglusob ng Russia sa bansang Ukraine.

Samantala, inamin ni Cabotaje na bahagyang naantala ang delivery ng COVID-19 vaccines para sa mga batang edad 5 hanggang 11.

Pero sa kabila nito, wala silang nakikitang malaking problema sa ilan pang bakuna pero may posibilidad na tumaas ang presyo ng ilan sa mga ito dahil sa logistic issues at collateral damages

Samantala, tinitignan na rin ng pamahalaan na limitahan na lamang sa tatlo hanggang apat na brand ng COVID-19 vaccines ang kanilang bibilhin.—sa panulat ni Abie Aliño-Angeles

Wala pang napupusuan si Pangulong Rodrigo Duterte para maging ‘manok’ sa nalalapit na Eleksyon 2022.

Ayon kay Pangulong Duterte, magiging neutral pa rin ang kaniyang desisyon maliban na lamang kung sapilitan ito.

Pero kung nakataya na ang interes ng mga Pilipino, tiniyak ng Pangulo na papangalan na niya ang nais na suportahan sa mga tatakbo sa pambansang eleksyon.

Unang naghain ng Certificate of Candidacy (COC) ang matagal nang aide ng Pangulo na si Senator Christopher ‘bong’ Go pero agad din itong ini-atras.

Walang papanigan at mananatiling neutral ang Pilipinas bunsod pa rin ng kaguluhan sa pagitan ng Russia at Ukraine.

Ayon kay defense secretary Delfin Lorenzana, binabantayan na ng awtoridad ang mga nangyayari sa Ukraine, ngunit hindi ito naglabas ng pahayag ukol sa Russia sa kabila ng  pagkondena mula sa iba’t ibang pinuno ng mga bansa.

Aniya,  hindi siya nababahala na masangkot ang Pilipinas sa digmaan  dahil ang mga Armed Forces  ng bansa ay gumagawa ng mga contingency plan sakaling magkagulo.

Samantala, lubos aniyang maaapektuhan ang Pilipinas sa naturang kaguluhan dahil posibleng patuloy na tumaas ang presyo ng produktong petrolyo.

Pinabubuksan ni presidential Adviser for Entrepreneurship Joey Concepcion sa pamahalaan ang ekonomiya sa bansa sa lalong madaling panahon.

Ito ay para umano maibsan ang epekto sa presyo ng mga bilihin kung saan nasa  pagitan pa rin ng gulo ang Russia at Ukraine.

Sinabi pa ni Concepcion, tumaas na ngayon ang presyo ng trigo bunsod ng kaguluhan.

Aniya, kailangan hindi na lumala pa ang kaguluhan sa Russia at Ukraine dahil posibleng mas tumaas pa ang presyo ng mga bilihin sa merkado.

Samantala, pinaghahanda naman ni Concepcion ang mga negosyante sa bansa sa magiging epekto sa ekonomiya ng naturang gulo.

May sapat na suplay ng produktong petrolyo ang bansa.

Ito ang tiniyak ni Department of Energy (DOE) Oil Industry Management Bureau Director Rino Abad, sa gitna ng paglusob ng Russia sa bansang Ukraine.

Dagdag ni Abad, walang dapat ikabahala ang publiko dahil sapat pa ang suplay ng langis sa bansa sa buong taong ito.

Samantala, asahan namang tataas ang presyo nito dahil sa tinatawag na speculative price bunsod ng nangyayaring gulo.

Aniya, hindi direktang bumibili ng langis ang bansa sa Russia, ang mga trading partners naman na China, South Korea, at Japan ay bumibili sa naturang bansa.