HOT STORIES OF THE WEEK

Aminado ang Commission on Elections (COMELEC) na nagkaroon ng kapalpakan sa gitna ng 2022 National and Local Election noong Mayo 9.

Ayon kay Commisssioner George Garcia, kabilang sa mga naging problema noong eleksiyon ay ang mga Vote Counting Machines (VCMs) at SD cards dahilan para magreklamo ang maraming botante dahil sa matagal na paghihintay sa pila noong araw ng botohan.

Humingi naman ng paumanhin si Garcia sa mga naapektuhan ng naturang aberya maging ng matagal at mahabang pila.

Iginiit ni Garcia na hindi parinmaaaring isisi ang lahat ng problema sa mga makina.

Nangako naman ang COMELEC sa publiko na ang mga VCM na ginamit ngayong taon ay hindi na nila gagamitin pa sa mga susunod na halalan.

Umaasa din si Garcia na mapagbibigyan ng kongreso ang hiling ng kanilang ahensya na bigyan sila ng sapat na pondo para sa pagbili ng mga bagong VCMs.

Inihayag ng Trade Union Congress of the Philippines (TUCP) na posibleng panandalian lang mararamdaman ng mga manggagawa ang umento sa kanilang sahod sa Metro Manila at Western Visayas.

Ayon kay Alan Tanjusay, tagapagsalita ng TUCP, ito ay dahil sa muling pagtaas ng mga pangunahing bilihin sa Metro Manila at iba pang lugar sa bansa.

Sinabi ni Tanjusay na hindi parin maibabalik ang purchasing power o ang kakayahang bumili ng mga manggagawa hinggil sa umento sa sahod dahil hindi umano ikinunsidera ng Regional Wage Boards ang 4.9% na inflation rate noong nakaraang buwan maging ang inaasahang 5.5% na inflation rate  para naman sa buwan ng Hunyo.

Sa kabila nito, hindi parin i-aapela ng naturang grupo ang rekomendasyon ng Regional Wage Boards pero kanilang isusulong ang amiyenda sa Wage Rationalization Act.

Hindi kasi maaring maghain ng panibagong petisyon ang TUCP para sa umento sa sahod sa loob ng isang taon.

Nanawagan ang Parish Pastoral Council for Responsible Voting (PPCRV) sa mga nais mag volunteer para sa manual audit ng election returns (ERs) sa command center sa University of Sto. Tomas.

Ayon sa PPCRV, hindi pa tapos ang manual audit dahil 37% palang ang ERs sa bansa mula sa 98.42% ng kabuuang match rate o napagtugmang audit para sa ERs mula sa Transparency Server.

Sinabi ng PPCRV na wala pang dumarating na ERs mula sa ibang mga bansa kung saan, higit 1% o katumbas nang 34 na ERs ang hindi mapagtugma dahil wala umanong katapat na digital reports kaya muli itong isasailalim sa susunod na matching process.

Mayroon ding 297 ERs ang hindi na maipagtutugma dahil wala na itong katapat na digital reports habang 308 naman ang kailangang idaan sa verification system.

Ayon sa PPCRV, kailangang magtugma sa una at ikalawang batch ang mga na-audit na ERs upang hindi maulit ang verification at pag-encode nito.

Nilinaw naman ng PPCRV na hindi balota kundi mga ER ang kanilang mano-manong ino-audit base narin sa kanilang mandato at nakapaloob sa batas.

Nangako ang susunod na administrasyon sa pangunguna ni Presidential Frontrunner Ferdinand “Bongbong” Marcos Jr. na hindi nila bibiguin ang Pilipinas lalo na ang mahigit 31 milyong botanteng bumoto sakaniya noong May 9, 2022 elections.

Sa BBM video vlog, masayang inihayag ni Marcos ang kaniyang pasasalamat sa mga taong tumulong, nagtiwala, nagbahagi ng galing at talento para sa BBM-Sara Uniteam campaign.

Nag-uumapaw rin ang pasasalamat ni Marcos sa kaniyang mga taga-suporta, mga personalidad at ang kaniyang pamilya maging ang mga nasa likod ng kaniyang tagumpay sa pangangampaniya.

Ayon kay BBM, hindi sapat ang kanilang mga salita para ipaabot ang kanilang pasasalamat sa mga taong nagtiwala at itinaya ang kanilang suporta para sa Uniteam.

Iminungkahi ni Commission on Elections (COMELEC) Spokesman Atty. John Rex Laudiangco, kay Commissioner Marlon Casquejo na isulong sa Commission En Banc ang pagsasagawa ng random audit ng Vote-Counting Machines (VCMs) at secure digital (SD) cards na nagkaroon ng aberya noong Mayo 9.

Ayon kay Laudiangco, dapat maimbestigahan ang mga VCMs at SD cards upang malaman ang dahilan kung bakit nasira at hindi gumana sa mismong araw ng botohan.

Nabatid na nagkaroon din ng aberya sa mga connector, battery at AC plugs noong halalan dahilan para dumami ang mga natatanggap na reklamo ng COMELEC mula sa mga botante.

Ayon kay Laudiangco, layunin ng random audit na mas ma-improve pa ang mga gagamiting election paraphernalias para sa susunod pa na halalan.

Sa ngayon, hinihintay pa ang desisyon ng poll body ukol sa naturang mungkahi.

Hindi dapat ipangamba ng publiko ang isyu hinggil sa 20,000 bilang ng pagtatangkang pag-atake sa website ng Commission on Elections (COMELEC) kung saan, natukoy din ang ilang Internet Protocol Address (IPS).

Ito ang inihayag ni comelec Acting Spokesperson John Rex Laudiangco dahil napigilan naman ito at nablock sa tulong narin ng poll body mula sa Department of Communications and Technology (DICT) at Cybercrime Investigation Division.

Ayon kay Laudiangco, hindi dapat mag-alala o maalarma ang bansa dahil matagal nang pinaghandaan ng komisyon ang naturang insidente kung saan, mas pinagtibay pa ang kanilang website para sa Halalan 2022.

Nanawagan sa mga kandidato at kanilang mga taga-suporta ang Davao City-Based Environmental Group – Interfacing Development Interventions for Sustainability (IDIS) na kolektahin at linisin ang kanilang campaign materials.

Ayon kay IDIS Executive Director Atty. Mark Peñalver na base sa inilabas na Executive Order No. 15 Series of 2022 ng lokal na pamahalaan ng Davao, ang mga kandidatong nanalo man o natalo ay kailangang kolektahin at itapon ng tama ang mga campaign paraphernalia na kanilang ginamit noong sila ay nangampaniya para sa eleksiyon.

Sinabi ni Peñalver na halos isang linggo na ang nakalipas, nananatili paring nakasabit at nakakabit sa mga bangketa at open places ang mga poster at tarpaulins na may mukha ng mga kandidato.

Samantala, base naman sa Seksyon 2 ng Executive Order No. 15, ang lahat ng lokal na kandidato ay dapat lumikha ng kanilang mga pangkat pagdating sa paglilinis at lumahok sa tatlong araw na aktibidad sa loob ng kanilang distrito.

Nilinaw naman ni Peñalver na ang lahat ng mga election paraphernalia na nakolekta at nalinis ay hindi dapat itapon sa mga basurahan at mga collection point kundi kinakailangan itong i-recycle at ihatid sa mga recycling center.

Asahan na bukas, Martes ang tapyas-singil sa presyo ng produktong petrolyo.

Ayon sa ilang kumpaniya ng langis, magkakaroon ng bawas singil sa kada litro ng diesel at gasolina sa Mayo 17.

Inanunsiyo kumpaniyang Unioil Philippines na maglalaro sa P2.90 centavos hanggang tatlong piso ang bawas singil sa presyo ng kada litro ng diesel.

Aabot naman sa P0.40 centavos hanggang P0.60 centavos ang magiging bawas singil sa presyo ng kada litro ng gasolina.

Matatandaang nito lamang nakaraang linggo ay nagkaroon ng taas singil sa presyo ng langis ang ilang mga kumpanya.

Dahil dito, nagkaroon ng  adjustment ang presyo ng gasolina na may  P22 kada litro, ang diesel ay nasa  P34.50 centavos kada litro at ang  kerosene ay P29.75 centavos kada litro bunsod ng mataas na halaga ng petroleum products dulot ng pag-iral ng  COVID-19 lockdowns sa China na  top oil exporter at patuloy na bakbakan sa pagitan ng Russia at Ukraine.