HOT STORIES OF THE WEEK

Tumambad ang maraming basura na nagkalat sa Rizal Park o Luneta, isang araw matapos ang pasko.

Ayon sa Ecowaste Coalition, maaari pang i-recycle ang ilang mga nagamit sa pasko tulad ng mga gift wrapper at Christmas cards.

Anila, pwedeng gawing cover ng libro at notebook, DIY paper crafts ang mga gift wrappers.

Maaari namang gamiting bookmarks ang mga christmas cards.

Samantala, hinikayat ng Ecowaste Coalition ang mamamayan na maging creative o malikhain upang mapakinabangan ang mga ginamit ngayong holiday season.

Nagtataka ang ilang sugar producers sa rekomendasyong mag-angkat ng karagdagang 64,000 metric tons ng asukal ngayong “full swing” na ang milling season.

Binigyang-diin ni National Federation of Sugar Workers (NSFW) Secretary General John Milton “Butch” Lozande na sa Marso o Abril dapat mag-angkat o panahon kung saan malalaman ang eksaktong dami ng produksyon.

Ayon kay Lozande, nagkaroon na ng dalawang bugso ng importasyon ngayong taon bukod pa sa halos 3.8-M metric tons na local production na dapat ay sapat para sa mahigit 2-M metric tons ng consumption kada taon.

Ipinunto naman ng Department of Agriculture na mataas ang presyo ng asukal, kulang ang supply at para mapababa ito ay importasyon ang sagot ng gobyerno.

Gayunman, nagtataka si Lozande at hinihinala nilang mayroong manipulasyon sa supply at presyo ng asukal dahil nagmura na ito noong Oktubre subalit tumaas muli noong Nobyembre hanggang pagpasok nitong Disyembre.

Para anya sa kanilang mga producer ay dapat nagsisimula nang bumaba ang presyo lalo’t nagpapatuloy ang gilingan na pasok sa peak season ng milling ngayong buwan hanggang Pebrero.

Iginiit ng NSFW na kung tutuusin ay wala pang dapat ikabahala pagdating sa supply dahil lahat ng mills sa buong bansa ay operational.

Samantala, iminungkahi ni Lozande na para maibsan ang epekto ng mataas na inflation ay pansamantalang tanggalin ang VAT sa basic goods, gaya ng asukal at magtakda ng price cap sa halip na mag-angkat na naman.

Pinayagan na ng MMDA na magbalik normal na ang oras ng operasyon ng mga mall sa Metro Manila.

Maaari nang simulan ngayong araw alas-9:00 ng umaga ang operasyon ng mga mall kumpara sa dating alas-11:00 ng umaga hanggang alas-11:00 ng gabi.

Ito, ayon kay MMDA acting Chairman Romando Artes, ay upang mabigyan ng mas maraming panahon ang publiko na makapag-last-minute Christmas shopping.

Una nang itinakda simula November 14 hanggang January 6, 2023 ang 11:00AM hanggang 11:00PM schedule  upang maiwasan ang rush hour.

Gayunman, batay sa bagong memorandum circular, inihayag ni Artes na hindi naramdaman ang mabigat na daloy ng trapiko ngayong Christmas season dahil sa inilatag na “pre-emptive measures” sa kabila ng kaliwa’t kanang pagtitipon at aktibidad.

Noon lamang isang linggo inamin ng ahensya na ang mabigat na daloy ng trapiko sa kalakhang Maynila ay dulot ng Christmas rush na naging kalbaryo naman para sa mga commuter dahil sa pahirapang pagsakay sa mga public transportation, tulad sa mga taxi.

Binuksan na kahapon sa Pasig City ang isa sa pinaka-malaking dialysis centers sa bansa.

Ang bagong “Mega Dialysis Center” sa Barangay San Miguel ay mayroong total floor area na 1,390 square meters at 79 na dialysis machines.

Ayon kay Pasig City Mayor Vico Sotto, libreng makapagpapagamot ang mga Pasigueño sa nasabing pasilidad na itinayo sa tulong ng pribadong sektor.

Kabilang anya sa maaaring i-avail na treatment ng mga taga-Pasig na mayroong Renal Failure at nangangailangan ng Renal Replacement therapy ay Kidney Transplantation, Peritoneal Dialysis at Hemodialysis.

Sa pamamagitan ito ng “No-Balance Billing Scheme” nangangahulugang libre ang serbisyo, partikular sa mga taga-Pasig.

Karamihan ng medical services ay sasagutin ng PhilHealth, pero sakaling maging limitado ang partisipasyon ng PhilHealth ay mismong Pasig Local Government na ang sasalo sa gastos ng pasyente.

Pinaigting pa ng Philippine National Police (PNP) ang pagpapatupad ng seguridad ng ilang lugar sa bansa, ilang araw bago ang anibersaryo ng Communist Party of the Philippines (CPP) sa Disyembre 26.

Ayon kay PNP spokesperson, Police Colonel Jean Fajardo, wala silang namomonitor na banta na maaaring makagulo sa pagdiriwang ng Pasko.

Katuwang ng PNP sa programa ang Armed Forces of the Philippines (AFP) na wala ring natatanggap na posibleng problema kasunod ng pagpanaw ni Jose Maria ‘Joma’ Sison, founder ng CPP.

Sa ngayon, nagdagdag na ng mobile forces ang PNP sa mga lugar na inaasahang dadagsain ng mga Pilipino.

Inabisuhan ng Department of Health o DOH ang mga pribadong sektor at Local Government Units o LGUs na huwag bumili ng sariling bivalent vaccines.

Sinabi ito ni DOH officer-in-charge Maria Rosario Vergeire kasabay ng plano ng kagawaran na bumili ng mga bagong generation na bakuna na magiging available sa bansa pagsapit ng unang kwarter ng 2023.

Ayon kay Vergeire, hanggang ngayon ay wala pang Emergency Use Authority (EUA) ang bivalent vaccines.

Dahil dito, kapangyarihan ng national government na bumili ng bakuna at ipamahagi sa pribadong sektor at lokal na pamahalaan.

Mahalaga rin ang rekomendasyon mula sa Health Technology Assessment Council para matukoy kung sino ang tatanggap ng bivalent vaccines.

Kahapon, nakatakdang makipagpulong ang DOH sa bivalent vaccine manufacturer para pag-usapan ang proseso ng pagbili.

Palalawigin ng Commission on Election (COMELEC) ang information campaign sa Register Anywhere Project (RAP).

Layunin nitong mahikayat ang publiko na magparehistro para sa 2023 Barangay at Sangguniang Kabataan Elections.

Ito, ayon kay COMELEC Chairman George Garcia, ay dahil mababa ang turn-out ng registrants sa RAP hubs sa Metro Manila, Tacloban City sa Leyte at Legazpi City sa Albay kaya’t i-e-extend ang registration.

Nakapagtala naman ng pinakamataas na bilang sa SM Fairview na may 190 registrants; Robinsons Galleria, 133 at Robinsons Place Manila, 118.

Magtatapos ang pilot test ng register anywhere hanggang Enero 22, 2023. —sa ulat ni Aya Yupangco (Patrol 5), sa panulat ni Jenn Patrolla

Nagtataka ang Bureau of Fire Protection – National Capital Region kung bakit mabilis ang pagkamatay at marami ang nasawi sa sunog sa Barangay Putatan, Muntinlupa noong linggo ng umaga.

Sampung magkakamag-anak ang patay, kabilang ang isang bata nang hindi makalabas ang mga ito sa kanilang nasunog na bahay sa Larva Street, Bruger Subdivision kahit naganap ito dakong alas-9.

Ayon sa BFP-NCR Public Information Office, umabot lamang sa first alarm ang sunog at tuluyang naapula dakong alas-10:20 palaisipan din para kay City Fire Marshall Fire Supt. Eugene Briones kung bakit walang nakapansin sa sunog gayong umaga ito naganap at maraming tao ang nasa loob ng bahay.

Pero dahil sa batay sa naunang imbestigasyon ay nagsimbang gabi ang mga biktima, maaari anyang pagod at nagpapahinga ang mga ito nang lamunin ng apoy ang kanilang bahay.

Malaki rin umano ang maitutulong ng recording ng CCTV Camera sa loob ng bahay sa gagawing imbestigasyon kahit nasunog na ang naturang aparato.

Ito’y dahil buo pa naman ang hard drive na pino-proseso na ng I.T. Experts ng BFP.

Epektibo na ngayong araw, ang Bigtime Oil Price Hike ng ilang kumpaniya ng langis.

Pasado alas 12:01 kaninang madaling araw, inilarga na ng kumpaniyang Caltex ang P2.90 centavos na taas-singil sa presyo ng kada litro ng Diesel; P.70 centavos ang magiging dagdag-singil sa kada litro ng gasolina; habang P1.65 centavos naman sa kada litro ng Kerosene.

Nagpatupad naman ng kaparehong presyo kaninang alas-6 ng umaga ang mga kumpaniyang Petron, Flying V, Phoenix Petroleum Philippines, JETTI Petroleum, Petro Gazz, PTT Philippines, at Seaoil.

Habang mamayang alas-4:00 ng hapon, ipatutupad din ng Cleanfuel ang kaparehong presyo.

Nabatid na ito na ang unang taas-singil sa presyo ng produktong petrolyo ngayong buwan ng Disyembre, matapos ang walong magkakasunod na linggong tapyas-singil sa kada litro ng langis sa bansa.

Ang paggalaw sa presyo ng produktong petrolyo ay bunsod ng pagluluwag ng China na posibleng magtulak para muling magtaas ang demand ng langis sa pandaigdigang merkado.

Walang nang pag-asang buhayin pa ang peace talks sa pagitan ng gobyerno at CPP NPA NDF.

Sa kabila ito, ayon kay National Security Adviser Clarita Carlos nang pagkamatay ni CPP Founder Jose Maria Sison.

Sinabi sa DWIZ ni Carlos na tinuldukan na ng gobyerno ang anumang usapang pangkapayaan at ang gagawin na lamang ay tugisin hanggang sa huli ang mga miyembro ng komunistang grupo.