HOT STORIES OF THE WEEK

Nakalikha ang isang Filipino scientist ng isang cleaner cooking fuel na maaaring gamiting alternatibo sa liquefied petroleum gas (LPG).

Ayon sa Department of Science and Technology (DOST), si Dr. Fiorello Abenes, isang professor emeritus sa CalPoly Pomona University sa California at isang DOST Balik Scientist sa Ilocos Norte ang nakadiskubre ng “Nipahol,”.

Isa itong cleaner cooking fuel na nakabase sa langis mula sa ethanol na nakuha mula sa nipa.

Si Abenes at ang kanyang grupo ang nakalikha ng nipahol-fueled stove na maaaring pumalit sa LPG stove.

Ang nipahol-fueled stove ay may burner at gumagana sa pamamagitan ng pull of gravity.

Ang Balik Scientist Program ng DOST ay naglalayong isulong ang pagpapalitan ng impormasyon at pabilisin ang daloy ng bagong teknolohiya sa bansa sa pamamagitan ng pagpapalakas ng mga tauhan ng lokal na akademya.

Patuloy na naka-monitor si Pangulong Ferdinand ‘Bongbong’ Marcos Junior sa kalagayan ng mga residente sa Visayas at Mindanao na apektado ng pagbaha.

Dahil ito sa walang-humpay na pag-ulan bunsod ng shear line rainfall.

Ayon kay Cheloy Garafil, Undersecretary ng Office of the Press Secretary (OPS), nasa Malakanyang na ngayon ang Pangulo at sunod-sunod ang pakikipagpulong sa iba’t ibang opisyal ng pamahalaan.

Kabilang sa pinag-uusapan kung paano makakapaghatid ng tulong ang pamahalaan sa mga lugar na sinalanta ng pagbaha.

Matatandaang una rito, tiniyak ng Malakanyang na makatitiyak ang publiko, lalo na ang mga nananatili sa evacuation center na patuloy na kumikilos ang pamahalaan upang agad makapagpaabot ng tulong.

Tiniyak ng Telecommunications company na Globe Telecom na handa ang kanilang online portal para sa sim card registration at verification processes.

Kasunod ito ng pag-arangkada ngayong araw ng pagpaparehistro online ng mga telco subscribers ng kanilang mga sim card.

Sa panayam ng DWIZ kay Yolly Crisanto, Chief Sustainability and Corporate Communications Officer ng Globe, sinabi nito na matagal na nilang pinaghandaan ang pagbubukas ng registration.

Sa datos ng malaking telecommunication company, aabot sa 87-M Pilipino ang globe subscribers.

Tiniyak naman ni Crisanto na handa silang mapaunlakan ang bilang na ito sa registration na magtatagal hanggang Abril 26 sa susunod na taon.

Samantala, para sa mga matatanda o yung hindi maalam na gumamit ng mga gadgets at magtungo online, sinabi ni Crisanto na handa silang solusyunan ito sa pamamagitan ng pakikipag-ugnayan sa National Telecommunication Commission.

Hindi pa rin madaanan ang mga kalsada at tulay sa ilang lugar sa Visayas at Mindanao dahil sa sama ng panahon.

Sa datos ng National Disaster Risk Reduction and Management Council (NDRRMC), 14 na mga kalsada mula sa Region 5 ang nananatiling unpassable o hindi pa rin madaanan ng mga motorista.

Hindi rin madaanan ng mga light vehicle ang Brgy. Biliran Spillway maging ang ilang kalsada sa Brgy. Pilar, at Bulan sa Sorsogon.

Bukod sa mga kabahayang partially damaged, hindi din madaanan ang mga kalsada at tulay sa Mindoro Occidental, Mindoro Oriental, Marinduque, Romblon, at Palawan o ang MIMAROPA, maging sa Regions 8, 10 at BARMM.

Ayon sa NDRRMC, 113 na bahay ang bahagyang nasira habang 34 naman ang totally damaged bunsod ng patuloy na pag-iral ng shear line at hanging Amihan.

Sa ngayon, patuloy pang nagsasagawa ng operasyon ang mga tauhan ng Department of Public Works and Highways para linisin at ayusin ang mga kalsada at tulay na nasira.

Nanawagan sa publiko si Information and communications Technology Undersecretary Anna Mae Yu Lamentillo na tumalima sa bagong tatag na Sim Registration Law.

Magugunitang nilagdaan ni Pangulong Bongbong Marcos noong Oktubre ang naturang batas na layong sugpuin ang lumalalang insidente ng mga text scam, misinformation at spam messages.

Ayon kay Lamentillo, lalabanan din ng batas ang human trafficking, online sexual abuse at exploitation sa mga bata.

Wala naman anyang gagastusin kahit singko ang mga subscriber sa implementasyon ng Sim Registration Law.

Alinsunod sa naturang batas, kailangan nang iparehistro ang sim card ng subscribers gamit ang pangalan, petsa ng kapanganakan, kasarian, postal address at valid government identification na may kasamang litrato.

Muling ipinaalala ni Lamentillo na ang kabiguan na magparehistro sa loob ng anim na buwan ay magreresulta sa deactivation ng sim o hindi na ito magagamit ng subscriber.

All systems go na ang mga telecommunication company o telco para sa implementasyon ng Sim Registration Law, simula ngayong araw.

Aminado si Atty. Ariel Tubayan, Senior Legal Counsel ng Globe, na isa sa nakikita nilang hamon ang mga hindi pamilyar sa registration platform o paano ito gamitin at kung saan magpaparehistro ang isang subscriber.

Inihalintulad ng Globe ang sim registration sa pagsubok na kanila anyang kinaharap sa mobile number portability.

Sa kabila nito, tiniyak ni Tubayan na nakahanda ang mga impormasyon at video kung paano maiparerehistro ang sim sa kanilang website.

Kumpiyansa naman ang nasabing telco na makapagpaparehistro ang nasa walumpu’t pitong milyon nilang subscriber sa loob lamang ng 15 araw.

Sa panig ng PLDT at Smart Communications, inihayag ni Corporate Communications Chief Cathy Yang na nakalatag na ang lahat ng kanilang platforms matapos sumailalim sa ilang serye ng test.

Samantala, inamin ni DITO Telecommunications Chief Administrative Officer, Atty. Adel Tamano na ang pagdadalawang-isip ng mga subscriber na iparehistro ang kanilang numero ang isa sa posibleng problema na harapin kaugnay ng sim registration.

Kasado na ngayong araw ang pagpaparehistro sa sim card ng mga Pilipino, alinsunod na rin sa Sim Card Registration Law.
Sa ilalim ng naturang batas, kailangan magpresenta ng mga sim card users ng kanilang official identification bago e-sim o bagong uri ng sim card.
Batay sa inilabas na Implementing Rules and Regulations (IRR) ng naturang batas, kinakailangang magparehistro ng lahat ng sim subscribers o end-user kabilang ang mga:
• Individual end-user
• Juridical entity end-user (tulad ng mga negosyo)
• Foreign national end-user
Para naman makarehistro kailangan lamang pumunta sa ibibigay na registration website ng mga telco, pag-fiill up ng personal information at isumite ang government ID na may picture o barangay certificate.
PARA SA MGA INDIVIDUAL END-USER, KAILANGANG IBIGAY ANG:
– BUONG PANGALAN
– PETSA NG KAPANGANAKAN
– KASARIAN
– OFFICIAL ADDRESS
– URI NG ID NA ISINUMITE
– ID NUMBER NA ISINUMITE
PARA NAMAN SA MGA JURIDICAL ENTITY-END USER:
– PANGALAN NG NEGOSYO
– BUSINESS ADDRESS
– BUONG PANGALAN NG AUTHORIZED SIGNATORY
KINAKAILANGAN NAMAN ANG MGA SUMUSUNOD PARA SA MGA FOREIGN NATIONAL END-USER:
– FULL NAME
– NATIONALITY
– DATE OF BIRTH
– PASSPORT
– ADDRESS SA PILIPINAS
– URI NG TRAVEL O ADMISSION DOCUMENT
– ID NUMBER O NUMBER NG DOKUMENTONG ISINUMITE
MAAARI NAMANG ISUMITE ANG ALINMAN SA MGA SUMUSUNOD NA DOKUMENTO:
• PASSPORT
• PHILIPPINE IDENTIFICATION
• SOCIAL SECURITY SERVICE ID
• GOVERNMENT SERVICE INSURANCE SYSTEM E-CARD
• DRIVER’S LICENSE
• NATIONAL BUREAU OF INVESTIGATION CLEARANCE
• POLICE CLEARANCE, FIREARMS’ LICENSE TO OWN AND POSSESS ID
• PROFESSIONAL REGULATION COMMISSION ID
• INTEGRATED BAR OF THE PHILIPPINES ID
• OVERSEAS WORKERS WELFARE ADMINISTRATION ID
• BUREAU OF INTERNAL REVENUE ID
• VOTER’S ID
• SENIOR CITIZEN’S CARD
• UNIFIED MULTI-PURPOSE IDENTIFICATION CARD
• PERSON WITH DISABILITIES CARD
• OTHER GOVERNMENT-ISSUED ID WITH PHOTO.
SA MGA PARA SA JURIDICAL ENTITY-END USER NARITO NAMAN ANG MGA KAILANGANG ISUMITE:
• CERTIFICATE OF REGISTRATION
• KAILANGAN NAMAN NG “DULY-ADOPTED RESOLUTION DESIGNATING THE AUTHORIZED REPRESENTATIVE, AND IN THE CASE OF OTHER JURIDICAL ENTITIES, A SPECIAL POWER OF ATTORNEY.” KAPAG PARA SA KORPORASYON
SAMANTALA, IPAPANGALAN NAMAN SA MGA MAGULANG O GUARDIAN ANG SIM CARD NG MGA MENOR-DE-EDAD KABILANG ANG ID CARD AT CONSENT FORM.
PARA NAMAN SA MGA TOURIST – FOREIGN NATIONAL END-USER:
• PASSPORT
• PROOF OF ADRESS (HOTEL, AIRBNB BOOKINGS AT IBA PA)
• RETURN TICKET SA SARILING BANSA O IBA PANG TICKET NA MAGPAPAKITA NG PETSA AT ORAS NG DEPARTURE MULA PILIPINAS
PARA SA MGA FOREIGN NATIONAL END-USER NA MAY IBA PANG URI NG VISA:
• Passport
• proof of address
• Iba pang dokumento gaya ng alien employment permit mula sa Department of Labor and Employment, Alien Certificate of Registration Identification Card mula sa Bureau of Immigration o iba pang ID mula sa visa-issuing agency
• Para sa mga estudyante, kailangang i-presenta ang kanilang school registration form at ID
• Dokumento mula sa Department of Justice para sa Persons of Concern, travel o admission
Samantala, mayroon lamang 180 days o katumbas ng anim na buwan ang mga subscribers para makapagparehistro ng kanilang pre-paid at post-paid sim card upang hindi ito ma-deactivate sa susunod na taon.
Mapaparusahan naman ng anim na buwan hanggang anim na taong pagkakakulong o multang 100,000 pesos hanggang 300,000 pesos o pareho ang sinumang magbebenta o maglilipat ng rehistradong sim nang hindi sumusunod sa mga inire-require sa pagpaparehistro. —mula sa panulat ni Hannah Oledan

Inilabas ng Philippine National Police (PNP) ang mga parusang ipapataw sa sinumang mahuhuling nagpapaputok sa mga lugar na hindi designated community firework display areas.

Ayon kay Philippine National Police Spokesperson Police Colonel Jean Fajardo na mahaharap sa kasong paglabag sa Republic Act 7183 ang mga indibidwal na magpapaputok sa mga lugar na hindi pinahintulutan.

Maaaring makulong ng hindi bababa sa anim na buwan at hindi lalagpas sa isang taon ang ipapataw sa mga mahaharap sa kasong ito.

Maliban dito, pagmumultahin din ang mga ito ng hindi bababa sa P20,000 at hindi lalagpas sa P30,000.
Posible ring magresulta sa kanselasyon ng pagri-release ng business permits ng Local Government Units (LGUs).

Obligadong mag-upload ng kanilang selfie ang mga magrerehistro ng kanilang sim card sa ilalim ng Sim Registration Law.

Ito ang ipinaalala ni DICT Undersecretary Anna Mae Lamentillo at ang mga telecommunications company kasabay ng pagsisimula bukas ng registration ng mga sim card.

Ayon kay Usec. Lamentillo bahagi ito ng verification process sa ID na ipakikita ng subscriber.

Kung wala sila aniyang selfie maaaring manloko lang o mandaya sa ID na gagamitin .

Sinabi naman ng Globe, Dito Telecommunity at Smart na agad magagamit ang sim card sa oras na wala namang maging problema sa registration process.

Babala ng DICT at telco ‘wag magsinungaling dahil may katapat na parusa alinsunod sa batas ang paglalagay ng maling impormasyon.

Pinag-iingat ng National Telecommunications Commissions (NTC) ang publiko laban sa mga text message na ginagamit ang Sim Registration Law para makapanghingi ng mga personal information.

Ito’y matapos kumpirmahin ni NTC Deputy Commissioner Ella Lopez na kanila nang inatasan ang telecommunications company para i-block ang mga cellphone number o sim card na ginagamit para makapang-scam.

Sinabi ni Lopez na magtungo lamang sa official website at mga social media page ng mga telco para malaman ang proseso at ‘wag maniwala sa text messages na kumakalat na numero lamang ang nakikita.

Inaalam na rin ng NTC kung sino-sino ang mga nagpapadala ng mga text scam at nananamantala sa Sim Registration Law.

Bukas, December 27 ay simula na ang registration at ang mga bagong sim card na bibilhin ay awtomatikong deactivated na at kailangan muna i-register bago magamit.