HOT STORIES OF THE WEEK

Isinusulong ni Senator Raffy Tulfo ang total deployment ban sa Kuwait kasunod ng pagkasawi ng Overseas Filipino Workers (OFW) na si Jullebee Ranara.

Ayon kay Senator Tulfo, na umuupong Committee on Migrant Workers sa upper chamber ng kongreso, dapat magkaroon ng bilateral meeting sa pagitan ng Pilipinas at Kuwait kung saan, dapat mabigyan ng prayoridad ang mga kondisyon na ibibigay para sa mga Pinoy OFWs na magtatrabaho sa nasabing bansa.

Sinabi ng senador na dapat mailigtas ang mga Pilipino na nakararanas ng hirap katulad ni Ranara na natagpuang wala nang buhay sa isang disyerto.

Iginiit ni Tulfo na maraming mga Pinoy workers ang inaabuso, pinapatay at nangangailangan ng tulong kaya dapat ibalik ang total deployment ban.

Nanawagan si Senator Raffy Tulfo na itigil na ang anumang uri ng human trafficking sa bansa.

Sa naganap na pagdinig sa Committee on Women, Children, Family Relations and Gender Equality Investigating, sinabi ni Tulfo na trabaho ng gobyerno na protektahan at ingatan ang buhay ng mga biktima ng human trafficking schemes.

Ayon kay Tulfo isang “fraud factories” o pabrika ng pandaraya  ang nangyayari sa South-East Asian countries na target umano ang mga Pilipinong nagtatrabaho sa kanilang kumpaniya.

Hinikayat din ng senador ang law enforcement agencies at Inter-Agency Council Against Trafficking (IACAT), na alamin at arestuhin ang mga sindikato o mga sangkot sa human trafficking dahil nilalabag nito ang karapatang pantao ng mga mabibiktima.

Iginiit ni Tulfo na dapat ituring na isang krimen ang mga lumalabag sa human trafficking kaya dapat parusahan ang mga sangkot dito.

Patuloy pa ring makararanas ng pagkaantala sa suplay ng tubig ang ilang lugar sa Metro Manila.

Sa abiso ng Maynilad water services, mawawalan ng suplay ng tubig ang Barangay Sangandaan, partikular na sa Benefits at Claims Street, maging sa kanto ng Engineering at Premium St. sa Quezon City.

Asahan din ang water interruption bukas, January 31 sa ilang lugar na sakop ng Brgy. Doña Imelda; Brgy. Salvacion at San Isidro; Brgy. San Bartolome, Brgy. Sauyo; Brgy. Damayan at Del Monte; Brgy. Bungad at Veterans Village; Brgy. San Antonio; Brgy. Nagkaisang Nayon; Nova Proper; Brgy. Bahay Toro; at Brgy. Apolonio Samson sa Quezon City.

Apektado naman ng pagkaantala sa suplay ng tubig ang Brgy. 93, 97, 98, 101, 105, 107, 108 at 121 sa Caloocan City.

Kasama din sa mawawalan ng suplay ang panulukan ng 8th street at 7th Avenue; Brgy. 22, 24, 27, 28 at 31; Brgy. 92, 94 hanggang 100; Brgy. 21 hanggang 31; Brgy. 86, 88, 90 at 91; maging ang Brgy. 152 at 153.

Samantala, apektado rin ng water interruption ang Brgy. Gen. T. De Leon; Mapulang Lupa; at Ugong sa Valenzuela City.

Nanawagan naman ang water concessionaire sa kanilang mga customer na panatilihin ang pag-iimbak ng tubig at maging handa sa biglaang pagkaantala ng water supply.

Pagkalat ng mga smuggled na frozen chicken ang itinuturong dahilan nang pagnipis ng supply ng itlog at pagtaas ng presyo nito sa bansa.

Ito ang inihayag ni Albay 2^nd District Rep. Joey Salceda sa gitna nang “nangingitlog” na problema sa local poultry industry.

Ayon kay Salceda, ang problema sa itlog ay anak ng problema sa supply ng manok at ang pagkaunti ng mga nag-aalaga nito o populasyon ng manok ang puno’t dulo ng egg shortage at price increase sa bansa.

Una nang inihayag ni Philippine Egg Board President Irwan Ambal na 20% ang ibinaba ng populasyon ng paitluging manok sa Luzon simula noong Enero ng nakaraaang taon dahil sa bird flu outbreak.

Sinabi naman ni Samahang Industriya ng Agrikultura (SINAG) Chairman Rosendo So na aabot na sa P15-B ang nawalang kita sa poultry industry noong 2022 dahil sa pagpasok ng P25.4-B na halaga ng smuggled meat, kabilang ang P4-B na halaga ng frozen chicken.

Dahil dito, hinimok ni So ang gobyerno na buhayin ang Pre-Boarding Inspection Process para sa imported products upang mapigilan ang pagpupuslit ng agricultural products.

Aminado ang LPG Marketers Association (LPGMA) na sadyang walang magagawa ang Pilipinas sa hindi maawat na pagtaas ng presyo ng mga produktong petrolyo, partikular ang LPG.

Inihayag ni LPGMA President Arnel Ty sa DWIZ na nakaasa lamang kasi ang bansa sa oil importation kaya’t tila imposibleng mapababa ang presyo ng mga produktong petrolyo.

Pinayuhan anya sila ng kanilang mga supplier na maaantala ang pagpapadala ng dalawa hanggang tatlong linggo dahil sa pagtaas ng demand pero ang sitwasyon ay kaya namang mapangasiwaan.

Ipinaliwanag naman ni Ty na dahil lumaki ang demand sa Liquified Petroleum Gas, nagbabadya ring sumirit ang presyo nito sa merkado sa Pebrero, kasabay ng pagbubukas ng ekonomiya ng Tsina at Chinese Lunar New Year.

Humihiling ng fuel subsidies mula sa gobyerno ang ilang transport group kasabay ng kanilang paghihintay sa desisyon sa nagpapatuloy na fare hike petitions sa gitna ng walang prenong oil price hike.

Ayon kay Samahan ng mga Tsuper at Operators sa Pilipinas Convenor Danilo Yumul, dapat regular na ibigay ang subsidiya sa mga tsuper, gaya nang ginagawa sa ibang programa ng gobyerno.

Partikular na tinukoy ni Yumul ang 4Ps, senior citizen at TUPAD Program na buwanang nakatatanggap ng pondo.

Sila anyang mga tsuper ay nagtataas lamang ng pasahe tuwing nagmamahal ang krudo kaya’t dapat ipagpatuloy ang fuel subsidies para maging consistent kahit magkano man ang itaas ng presyo ng langis.

Bukas muling ilalarga ng mga kumpanya ng langis ang ikatlong sunod na linggong price hike.

Patuloy ang pagbaba ng presyo ng sibuyas sa ilang pamilihan, gaya sa Metro Manila bunsod nang pagdating ng imported suplay sa bansa.

Batay sa monitoring ng Department of Agriculture (DA), umaabot na ng P170 hanggang P300 na lamang ang kada kilo ng presyo ng ilang uri ng sibuyas sa Metro Manila.

Nasa P240 hanggang P250 naman ang presyo ng local red onions habang P200 hanggang P250 naman ang kada kilo ng imported.

Ayon kay DA Assistant Secretary at Spokesperson Rex Estoperez, sa ngayon ay wala silang nakikitang kakulangan sa suplay ng sibuyas sa bansa dahil sa pagsisimula nang anihan sa unang linggo ng Pebrero.

Magugunitang umabot hanggang P720 ang kada kilo ng sibuyas sa Metro Manila dahil sa kakulangan ng suplay nito noong Disyembre.

Paliit na nang paliit ang kinikita ng mga tsuper ng jeep kasabay ng pagtaas ng presyo ng mga produktong petrolyo.

Ito ang inihayag ni Pinagkaisang Samahan ng mga Tsuper at Operator Nationwide (PISTON) National President Mody Floranda kaugnay sa panibagong serye ng oil price hike na ilalarga bukas.

Ayon kay Floranda, nasa P300 hanggang P400 na lamang ang arawang kita ng mga jeepney driver kumpara sa tinatayang family living wage na P1,100.

Batay anya sa mismong pag-aaral ng Ibon Foundation, dapat ay P1,133 kada araw ang kailangan ng isang pamilya para lamang matugunan ang pangangailangan sa loob ng isang araw, gaya ng pagkain.

Sa oil trading sa nakalipas na limang araw, posibleng tumaas ng 60 hanggang 80 centavos ang kada litro ng diesel habang P1.20 hanggang P1.40 sa gasolina.

Ito na ang ikatlong sunod na linggong magpapatupad ng price increase ang mga kumpanya ng langis ngayong unang buwan ng taon.

Kinuwestyon ni Senador Ronald “Bato” Dela Rosa ang motibo ng International Criminal Court (ICC) sa panggigiit na maimbestigahan ang Anti Drug War Campaign ng bansa.

Ayon kay Dela Rosa, mayroon talagang agenda ang patuloy na pagsusulong ng ICC ng nasabing imbestigasyon at may nagtutulak dito para gawin ang nasabing hakbang.

Pagod na aniya siya sa naturang usapin lalo na’t pinagbawalan na rin ang ICC investigators na pumasok sa bansa.

Inihayag ni Manila Water Head of Corporate Communications Department Dittie Galang, na hindi na nagiging sapat ang suplay ng tubig sa bansa.

Sa panayam ng DWIZ, sinabi ni Galang na nagkukulang na ang water suplay sa Angat Dam na isa sa pinagkukuhanan ng kanilang kumpaniya para makapaghatid ng serbisyo sa mga kosyumer.

Ayon kay Galang, gumagawa na sila ng hakbang kabilang na ang augmentation sources; mga portable treatment plant; deep wells rehabilitation; at treatment plant mula sa Laguna Lake habang hinihintay pa ng pamahalaan ang isa pang major water source na ipapalit sa Angat Dam.

Bukod pa dito, pinaghahandaan na rin nila ang mga buwan kung saan, naitatala ang matinding tag-init sa bansa.

Iginiit naman ni Galang na hindi pa nila nakikita na mayroong malaking pagbaba ng singil sa tubig na mararanasan ng kanilang mga customer.