HOT STORIES OF THE WEEK

13 ang sugatan sa karambola ng 12 sasakyan sa Mandaluyong City.

Naganap ang insidente sa kanto ng Shaw Boulevard at San Miguel Avenue, Barangay Wack Wack, dakong alas 8:30 kahapon ng umaga.

Batay sa CCTV footage, nagmula sa Sherdian Street at patungo sanang One San Miguel, Pasig City ang sports utility vehicle na Toyota Landcruiser nang araruhin nito ang dalawang motorsiklo.

Ayon sa Eastern Police District, inararo rin ng Landcruiser ang isa pang SUV at motorsiklo maging ang poste ng ilaw habang tinatahak ang panulukan ng Shaw at San Miguel Avenue.

Umatras pa ang Landcruiser pero nabangga nito ang isa pang motorsiklo na may dalawang sakay hanggang sa muling araruhin ang ilan pang sasakyan.

Agad namang isinugod sa Rizal Medical Center sa Pasig at Mandaluyong Medical Center ang mga nasugatan.

Samantala, arestado ang driver ng Landcruiser na si Dominador Varga at pasaherong si Jose Marie Roldan.

Sumailalim sa Alcohol test sina Varga at Roldan sa Land Transportation Office at posibleng maharap sa mga kasong Reckless Imprudence Resulting Multiple Physical Injuries at Damage to Property.

Iniimbestigahan na rin kung sinadya o nagkaroon ng mechanical malfunction ang sasakyan.

Iniluklok na ni Pang. Ferdinand Marcos Jr. si  Atty. Cheloy Garafil bilang kalihim ng Presidential Communications Office o PCO.

Ayon sa Office of the President o OP, nanumpa na si Garafil sa harap ni Pang. Marcos bilang PCO Secretary.

Magugunitang itinalaga si Garafil bilang officer-in-charge ng dating Office of the Press Secretary na noo’y undersecretary pa ang posisyon.

Kasabay nito, kinumpirma naman ni Garafil na pinulong din ni PBBM ang mga miyembro ng kanyang gabinete ngayong araw.

Iginiit ng Armed Forces of the Philippines (AFP) na walang nagaganap na destabilization plot laban sa Marcos administration.

Kasunod ito ng kumakalat na pekeng memo at maling impormasyon kung saan may ikinakasa umanong destabilisasyon sa hanay ng ahensya dahilan para isailalim sa full alert status ang Philippine National Police (PNP).

Sa naging pahayag ni AFP spokesperson Colonel Medel Aguilar, hindi totoo ang balitang may nagaganap na destabilisasyon sa kanilang ahensya laban sa kasalukuyang administrasyon sa ilalim ng pamumuno ni Pangulong Ferdinand “Bongbong” Marcos Jr.

Ayon kay Aguilar, nananatiling matatag ang moral at walang nagiging hadlang sa AFP para protektahan ang Pilipinas laban sa mga bansang nagnanais ng kaguluhan o kasamaan.

Una nang inihayag ni PNP chief Rodolfo Azurin Jr., na normal lang ang ganitong haka-haka lalo na sa tuwing magkakaroon ng pagbabago sa mga posisyon sa hanay ng PNP, AFP at iba pang ahensya ng gobyerno.

Sinabi pa ni Azurin na natural lang na naka-heightened alert ang mga nagpapatupad ng batas dahil na rin sa mga nagdaang aktibidad partikular na ang Holiday season.

Sa ngayon, iniimbestigahan na ng PNP at AFP ang mga sangkot sa pagpapakalat ng maling impormasyon hinggil sa destabilisasyon.

Sumampa na sa record-high ang presyo ng mga pagkain sa mundo noong isang taon sa gitna nang global food supply disruption dulot ng giyera sa pagitan ng Russia at Ukraine.

Batay ito sa Food Price Index ng United Nations – Food and Agriculture Organization (UN-FAO) na sumusubaybay sa international prices ng karaniwang food commodities.

Ayon sa UN-FAO umakyat sa average 143.7 points ang food price index noong 2022, kumpara sa 123.2 points noong 2021.

Ito na sa ngayon ang pinaka-mataas na lebel ng food price index simula nang umpisahan ang record noong 1990.

Kabilang sa mga labis na nagtaas ng presyo ang mga cereal products, tulad ng trigo; asukal; karne; dairy products, gaya ng gatas at keso at vegetable oils, tulad ng mantika.

Dahil sa nagpapatuloy na giyera, nagbabala ang UN-FAO na posibleng mas numipis o kulangin ang supply ng pagkain sa mundo kasabay ng lumalaking demand, na sinabayan nang hindi maawat na pagtaas ng presyo ng krudo at kuryente.

Nangangamba ang ilang grupo ng magsasaka sa posibleng pagbaha ng imported na sibuyas dahil sa ikinakasang importasyon na itatapat sa kasagsagan ng anihan sa Pebrero.

Inihayag ni PESA Onion and Vegetable Farmers Association chairman Victor Layug na bago umangkat ay dapat magkaroon ng konsultasyon sa maliliit na samahan ng magsasaka.

Una nang inihayag ni Assistant Secretary Kristine Evangelista ng Department of Agriculture, na nasa 22,000 metric tons ang planong angkatin.

Gayunman, wala pa anyang pinal na desisyon ang kagawaran at kanila munang kokonsultahin si Pangulong Bongbong Marcos, na kalihim ng DA at ang mga magsasaka bago magpasya.

Aminado si Evangelista na sa sandaling mag-import ay maaaring mahirapan ang mga local onion farmer na makipag-kompetensya lalo’t mas mura ang imported na sibuyas.

Sa ngayon ay ilang magsasaka na ang nagsisimulang mag-ani na maaaring tumagal hanggang Marso o Mayo.

Lumobo sa mahigit 1.356 billion kilo ng imported meat products ang inangkat ng Pilipinas noong isang taon sa gitna nang problema sa supply at produksyon ng baboy.

Ito na sa ngayon ang pinaka-malaking bulto ng karneng baboy na inangkat sa kasaysayan ng bansa sa kabila ng pagkalat ng African Swine Fever.

Kumpara ito sa naitala ng Bureau of Animal Industry (BAI) na 1.165 billion kilo ng karneng inimport noong isang taon.

Ayon sa BAI, ang pagtaas ng overall meat imports ay dulot ng 28% growth sa pork imports noong isang taon na umabot sa 710.3 million kilograms.

Halos 400 million kilograms ng kabuuang inangkat na karne ay belly cuts, na pinatawan ng mas mababang taripa na kamakailan ay pinalawig ni Pangulong Bongbong Marcos hanggang katapusan ng Disyembre, 2023.

Una nang inihayag ng pamahalaan na layunin ng mas mababang taripa na makapag-import ng mas maraming agricultural products, gaya ng karne upang mapababa ang presyo ng mga nasabing bilihin.

Batay sa datos ng Consumer at Market data platform na Statista, pang-pito ang Pilipinas sa mga bansang may pinaka-malaking konsumo ng karne habang nangunguna ang China, sinundan ng Japan, Mexico, U.K, South Korea at U.S.

Nagtalaga si Pangulong Ferdinand Marcos Jr. ng mga bagong opisyal ng state-owned Development Bank of the Philippines (DBP).
Ang mga appointees ay kinabibilangan ni Michael Osmeña De Jesus na iniluklok bilang acting President at Chief Executive Officer (CEO) ng DBP.
Nakasaad sa appointment papers na papalitan ni De Jesus si Emmanuel Herbosa.
Maliban dito, nag-appoint din si PBBM ng tatlong acting members ng Board of Directors (BOD) ng nasabing bangko na pagmamay-ari ng gobyerno.
Kasama sa mga bagong BOD members sina Emmeline Calderon David, Jaime Zita Paz, at Maria Lourdes Laurel-Avanceña Arcenas.
Papalitan ni David si Dante Liban habang si Paz naman ang hahalili kay Emmanuel Galicia Jr.

Kasado na bukas ang buena manong rollback sa presyo ng produktong petrolyo ngayong taon.

Batay sa abiso ng Pilipinas Shell, Sea Oil Philippines at Petro Gazz, bababa ng 0.75 centavos per liter ang presyo ng gasolina, habang P2.80 sa kada litro ng diesel, at P2.10 naman sa kerosene.

Epektibo ang panibagong price adjustment sa produktong petrolyo simula bukas ng ala-6 ng umaga, maliban sa Cleanfuel na magpapatupad ng rollback dakong alas-8 ng umaga.

Sapat pa rin ang ipinatutupad na border control protocols sa bansa sa gitna ng pagsirit ng mga kaso ng COVID-19 sa China.

Ayon sa Department of Health, hindi pa kailangang baguhin ang border control measures ng Pilipinas at kasalukuyan anila na ipinatutupad ang heightened surveillance at monitoring sa mga biyaherong papasok sa bansa.

Ginawa ng DOH ang pahayag matapos i-require ng ilang European countries sa mga biyahero mula China na magprisinta ng negatibong  COVID-19 test pagdating sa kani-kanilang mga bansa.

Matatandaang noong January 4 nang iulat ng DOH na walong mga Pilipinong nanggaling sa China ang nagpositibo sa COVID-19.

Tuluy-tuloy na nakikipag ugnayan ang Department of Agriculture sa mga magsasaka para makahanap ng paraan upang maiwasan ang pagsirit pa ng presyo ng sibuyas.

Tiniyak ito ni Agriculture Spokesperson Assistant Secretary Khristine Evangelista na nagsabi pang nananatiling mataas ang presyo ng sibuyas na nasa 500 hanggang 700 pesos kada kilo dahil na rin sa mataas na farmgate price.

Sinabi ni Evangelista na posibleng bumaba ang presyo ng sibuyas sa mga susunod na linggo sa gitna na rin nang inaasahang pagsisimula ng pag-aani sa ikalawang linggo ng buwan.

Kasabay nito, pinalakas pa ng DA ang operasyon ng Kadiwa on Wheels para mabigyan ang publiko ng alternatibong pagbibilhan ng mga gulay.