HEADLINES

Inihayag ng Department of Transportation (DOTr), na kanilang ipamamahagi ang ayuda para sa mga Public Utility Vehicle (PUV) drivers sakaling abutin ng tatlong buwan ang mataas na presyo ng krudo sa international market.

Ayon kay DOTr Undersecretary Mark Steven Pastor, patuloy kasing tumataas ang halaga ng Dubai Crude Oil batay na rin sa resulta ng Mean of Platts Singapore (MOPS).

Sinabi ni Pastor, na sakaling lumampas sa 80 dollars ang presyo sa kada bariles ng Dubai Crude Oil, maari silang mamahagi ng fuel subsidy.

Nanawagan naman ang opisyal sa mga driver na hintayin na lamang ang implementasyon dahil pinag-aaralan pa nila ang nasabing programa matapos pondohan ng P3B alinsunod sa 2023 General Appropriations Act.

Kabilang sa pinag-aaralan ng ahensya ang opsyon na gawing isahan na lang o dalawang bugso ang bigayan ng fuel subsidy na pangungunahan naman ng Land Transportation Franchising and Regulatory Board (LTFRB) sa pamamagitan ng cash card o fuel voucher.

Gumagawa na ng hakbang ang Department of Agriculture (DA) para matulungan ang mga magsasaka sa Nueva Vizcaya matapos maitala ang sobrang suplay ng kamatis.

Ayon sa ahensya, bibilhin ng mga institutional buyer ang ani ng mga tomato farmer upang hindi sila malugi sa kanilang puhunan.

Matatandaang nanawagan ng mga magsasaka sa pamahalaan bunsod ng sobrang produksiyon ng kamatis kung saan, ang ilan sa kanilang mga produkto ay itinatapon nalang matapos mabulok.

Bukod pa dito, ibinagsak-presyo din nila ang sobrang ani ng kamatis dahil sa takot na baka masayang.

Umaasa naman ang mga magsasaka na matutugunan ng ahensya ang oversupply ng kamatis sa kanilang probinsya at maibabalik ang kanilang kita.

Dalawang masuwerteng mananaya ang maghahati sa P73.4M na premyo sa 6/45 Mega Lotto ng Philippine Charity Sweepstakes Office (P.C.S.O.)

Kapwa natumbok ng mga lucky better ang winning combination na 37 – 29 – 42 – 21 – 27 – 5 sa PCSO draw, kagabi.

45 bettors naman ang nakasikwat ng second prize na tig-P32,000.

Ang Mega Lotto draw ng PCSO ay tuwing Lunes, Miyerkules at Biyernes alas-9 ng gabi.

Samantala, bigo namang masungkit ang mahigit P29M jackpot prize sa 6/55 Grand Lotto makaraang walang makahula ng kombinasyong 40 – 8 – 45 – 6 – 23 – 41.

Nagpasaklolo na ang TV host-actor na si Luis Manzano sa National Bureau Investigation upang imbestigahan ang Flex Fuel Petroleum Corporation.

Nagpadala ng liham ang aktor kay NBI Director, Atty. Medardo De Lemos sa pamamagitan ng kanyang legal counsel na si Atty. Regidor Caringal noon pang November 8, 2022.

Ayon kay Luis, nagdesisyon siyang alisin na ang kanyang interes at nag-resign na rin bilang Chairman of the Board ng mga korporasyon ng ICM Group na pinamumunuan ni Ildefonso “Bong” Medel.

Si Medel ay isa sa mga malapit na kaibigan at chief executive officer ng ICM Group na nagpapatakbo rin ng Flex Fuel.

Aminado ang aktor na marami umanong investors ng flex fuel ang lumalapit sa kanya upang mabawi ang mga perang inilagak sa naturang kumpanya.

Samantala, itinanggi rin ni Manzano na sangkot siya sa scam o itinakbo ang P100M na pera ng mga investor at sa katunayan ay si Medel ang may utang sa kanya na P66M.

Nagsasagawa na ng imbestigasyon ang Department of Education kaugnay sa pagbili ng mga overpriced umanong DSLR cameras.

Ito ang tiniyak ni DepEd spokesperson, Atty. Michael Poa bilang tugon sa social media post ng isang photo-journalist na ikinumpara ang biniling Canon EOS 1500d ng DepEd na nagkakahalaga ng P155,929.

Kumpara ito sa presyo sa mismong Canon Philippines at mga online store na naglalaro lamang sa P22,000 hanggang P33,000.

Ayon kay Poa, hindi pa nila mabatid kung anong camera ang ginagamit ng kagawaran, lalo’t sa kanyang pagkaka-alam ay walang entry-level cameras kundi mga mark 4 sa kanilang Public Affairs Service sa Central Office.

Bagaman binura na ang nasabing post, kinuwestyon ng netizens, partikular ng mga photo-journalist at enthusiast ang quotations para sa entry-level dslr.

Kabilang na rito ang quotation sa proposal request para sa isang mirrorless DSLR camera na nagkakahalaga ng P170,000 noong september 2022 sa Agusan del Norte.

Nilinaw naman ni Poe na kinansela na ng DepEd – Caraga ang pagbili ng nasabing camera na gagamitin sana para sa broadcast-livestream dahil nagbigay ang Regional Information Communications Technology ng mga camera.

Pinagpapaliwanag ng Alliance of Concerned Teachers ang Department of Education sa pagbili nito ng overpriced umanong mga DSLR camera.

Nito lamang linggo nang umani ng iba’t ibang reaksyon ang social media post ng isang photojournalist na ikinumpara ang biniling Canon EOS 1500d ng Deped na nagkakahalaga ng P155,929 pesos sa modelong mabibili lang ng P23,000 hanggang P33,000 pesos sa online stores.

Ayon kay Vladimir Queta, Chairperson ng Alliance of Concerned Teachers, dapat may managot o maparusahan at imbestigahan ng gobyerno ang nasabing alegasyon.

Pinasisilip din ng grupo sa Commission on Audit ang naturang isyu.

Samantala, tiniyak naman ni Deped spokesperson Michael Poa na nag-iimbestiga na ang kagawaran.

Naniniwala ang isang economic analyst na kakayanin ng pamahalaan na maipatupad ang Philippine Development Plan ngayong taon hanggang 2028.

Ito’y matapos aprubahan ni Pang. Ferdinand Marcos Jr. ang plano na magsisilbing guidelines sa pagbabalangkas ng mga hakbang na nais ipatupad ng kaniyang administrasyon.

Sa panayam ng DWIZ, iginiit ni U.P Professor Astro Del Castillo na makatutulong ang development plan na magabayan ang taumbayan at mga pribadong sektor.

Aniya, bago pa man ang pandemya ay may momentum na ang bansa kaugnay sa social economic indicators.

Ipinabatid naman ni Prof. Del Castillo na ang socio-economic agenda ay nagdidikta kung ano ang dapat gawin ng pamahalaan upang maabot ang mga plano nito para sa bansa.