Posibleng dumating sa bansa ang unang batch ng Bivalent covid-19 vaccines sa katapusan ng Marso.
Ayon kay Health officer-in-charge Maria Rosario Vergeire mula ang nasabing mga bakuna sa Covax facility na planong ipamahagi at iturok sa target population sa Pilipinas.
Sinabi ni Vergeire, na may ilang bansa na rin ang nag-alok sa Pilipinas ng donasyon ng Bivalent vaccines.
Nabatid na target ng naturang bakuna na puksain ang omicron variant at orihinal na uri ng covid-19 virus.
Inaasahang mananatiling mataas ang inflation rate ng bansa ngayong buwan sa kabila ng pagtaya na bababa ito dahil sa mataas na presyo ng utilities at commodities.
Batay sa pagtaya ng Central Bank, bababa sa 7.5% hanggang 8.3% ang inflation kasunod ng naitalang 8.1% noong December 2022, na pinakamataas kumpara sa 9.1% na naiulat noong November 2008.
Nabatid na ang pagsirit ng inflation ay dahilan ng mataas na singil sa kuryente at produktong petrolyo, mataas na presyo ng pangunahing bilihin at annual increase sa bansa.
Itinuturing na matagumpay ni Philippine National Police Chief Gen. Rodolfo Azurin Jr., ang isinagawang internal cleansing sa hanay ng pambansang pulisya.
Kasunod ito ng sampung senior officials na hindi parin nakakapagsumite ng kanilang courtesy resignation sa kabila ng naging panawagan ng DILG kaugnay sa mga tiwaling pulis na sangkot sa illegal drug trade sa bansa.
Ayon kay Azurin, kahit may ilang mga PNP officials ang hindi parin nakakapaghain ng call resignations ay nangangahulugan parin ito na isang adhikain ng ahensya na linisin ang kanilang organisasyon laban sa iligal na droga.
Matatandaang kahapon ang huling araw o deadline sa filing ng courtesy resignation ng mga colonel at generals upang agad na masimulan ang imbestigasyon ng binuong 5-man committee.
Sa ngayon, nasa 941 na o katumbas ng 98.74% mula sa kabuuang 953 PNP officials ang nakapaghain na ng kanilang courtesy resignation habang 10 pa ang bigo pa rin at hinihintay pang makapagsumite dahil sa iba’t-ibang kadahilanan.
Ipinag-utos na ng Court of Appeals (CA) Ang pagpapalawig sa suspensyon ng 670-megawatt Power Supply Agreement (PSA) Sa pagitan ng Meralco at San Miguel-subsidiary na South Premiere Power Corporation (SPPC).
Sa January 25 resolution, pinabigyan ng C.A. 13th division ang aplikasyon ng SPPC para sa Writ of Preliminary Injunction (WPI) Dahil tatagal lamang ng dalawang buwan ang TRO na inisyu ng Korte noong Nobyembre.
Ang WPI ay isang legal remedy na layuning mapigilan ang anumang “pinsala” sa magkabilang partido bago pag-aralan ang kanilang claims o kaso at i-adjudicate o desisyunan.
Ipinunto ng Appellate Court na may pangangailangan para sa agarang issuance ng WPI upang maiwasan ang matinding pinsala sa SPPC, na “napuwersang ipagpatuloy ang pag-supply ng kuryente sa Meralco para sa kabutihan ng lahat nang hindi man lamang nababawi ang ipinuhunan”.
Kinailangang maglagak ng P100 million bond ang SPPC upang “sagutin ang anumang damages na maaaring matamo ng respondents” dahil sa injunction habang inatasan ang magkabilang partido na pumasok sa negosasyon sa ilalim ng PSA.
Nag-ugat ang desisyon ng CA Sa pagbasura ng Energy Regulatory Commission sa hirit ng San Miguel at Meralco na itaas ang generation charge dahil sa nagmamahal na coal at natural gas na ginagamit upang mapatakbo ang mga plantang nag-poproduce ng kuryente.
Gagawing mas accessible ni Pangulong Ferdinand “Bongbong” Marcos Jr. para sa lahat ang mga serbisyo ng gobyerno sa bansa.
Kasunod ito ng direktiba ng pangulo sa lahat ng ahensya ng gobyerno partikular na sa Department of Social Welfare and Development (DSWD) na tugunan ang lahat ng pangangailangan ng mga Pilipino lalo na ang mga mahihirap at mga nakaranas ng mga nagdaang kalamidad.
Tiwala si PBBM na maihahatid sa publiko ang abot-kayang serbisyo sa lahat ng rehiyon sa bansa partikular na ang mga liblib o tagong lugar.
Nangako naman si Pangulong Marcos na mananatiling kasangga ng mga ahensya ng gobyerno ang kaniyang administrasyon sa pagbibigay ng maaasahang serbisyo sa bawat mga Pilipino.
Binigyang pagkilala ni Pangulong Ferdinand “Bongbong” Marcos Jr., ang katatagan at pagiging maaasahan ng Department of Social Welfare and Development (DSWD) sa loob ng mahigit 70 taon.
Sa naganap na 72nd anniversary ng DSWD kasabay ng inagurasyon at ceremonial turn-over ng bagong multi-purpose building ng ahensiya kahapon na dinaluhan ni Pangulong Ferdinand “Bongbong” Marcos Jr. na may temang: “Kaagapay sa pagbangon, katuwang sa bawat hamon.”
Ipinagmalaki ng pangulo ang pagiging matatag ng DSWD kung saan, hindi ito natitinag sa anomang hamon o misyon para sa taumbayan.
Layunin ng DSWD na mapabuti ang pamumuhay ng bawat pilipino, lalo na yung mga nasa panganib o hindi inaasahang sitwasyon, at ang mga nakararanas ng kagipitan o kakulangan sa kanilang pang araw-araw na gastusin.
Ayon sa pangulo, malaki ang ginagampanang papel ng ahensya dahil kanilang ipinakita ang dedikasyon na makatulong para sa tagumpay at marangal na institusyon.
Samantala, pinasalamatan naman ni PBBM ang mga tauhan at opisyal ng DSWD na walang tigil sa pagbibigay ng serbisyo-publiko para sa mga pilipino.
Nanindigan ang Department of Justice (DOJ) na tanging ang Pilipinas lang ang dapat na mag-imbestiga sa war on drugs ng nagdaang administrasyon.
Ayon sa DOJ, hindi dapat makialam sa Pilipinas ang International Criminal Court (ICC) kaugnay sa pagresolba ng isyu sa ipinatupad na drug war ni dating Pangulong Rodrigo Duterte.
Posible kasing makaapekto sa soberanya ng bansa kung ipauubaya sa ICC ang imbestigasyon.
Bukod pa dito, mas matagal ang pag-iimbestiga ng ICC kumpara sa ikinasakasang imbestigasyon ng hukuman sa Pilipinas kung saan, mas madaling naibibigay ang hustisya sa mga biktima ng war on drugs.
Nananatiling “manageable” ang covid-19 situation sa bansa.
Tiniyak ito ni DOH officer-in-charge Maria Rosario Vergeire sa kabila ng pasya ng World Health Organization na ipagpatuloy ang pagpapatupad ng global public health emergency.
Kampante si Undersecretary Vergeire sa pangangasiwa sa mga covid case sa bansa dahil sa mababang hospital admission rate maging ang severe at critical infections.
Ayon kay Vergeire, kung tutuusin ay mas preparado ngayon ang gobyerno kumpara noong taong 2020.
Naka-adopt na rin anya ang mga Filipino sa sitwasyon sa pamamagitan ng pagsusuot ng face masks habang umakyat na sa 94% ang vaccination rate para sa primary doses.
Gayunman, naiintindihan ng DOH ang desisyon ng WHO na ituring pa rin ang covid-19 pandemic bilang public health emergency of international concern dahil sa banta ng mga bagong variants; Average na 10,000 hanggang 30,000 deaths per day sa mundo at kakulangan ng reports at datos sa ilang bansa, gaya sa China.
Kinumpirma ni PNP Chief Gen. Rodolfo Azurin, Jr. na pansamantalang ipagpapaliban ang rekomendasyon ng internal affairs service na sibakin sa serbisyo si Master Sergeant Rodolfo Mayo, Jr.
Si Mayo na miyembro ng PNP-Drug Enforcement Group ay nahulihan umano ng P6.7 billion na halaga ng shabu sa Maynila noong Oktubre ng nakaraang taon.
Ayon kay General Azurin, pina-rerebisa niyang maigi ang kaso, anggulo, proseso at documentation upang matiyak na walang ‘loopholes’ at hindi mababasura dahil lamang sa teknikalidad.
Inatasan na rin ang discipline, Law and Order Division ng Directorate for Investigation and Detection Management sa pangunguna ni Maj. Gen. Eli Cruz na tiyaking hindi mababago o mababaligtad ang rekomendasyon ng IAS na sibakin si Mayo.
Hindi na anya dapat makabalik ang scalawag na pulis sa serbisyo dahil sa teknikalidad at kawalan ng due process.
Samantala, walang nakikitang dahilan si Azurin upang tanggalin sa puwesto bilang hepe ng PNP-Drug Enforcement Group si Brig. Gen. Narciso Domingo matapos na maaresto si Mayo.
Kinundena ni Kuwaiti Foreign Minister, Sheikh Salem Abdullah Al-Jaber Al-Sabah ang pagpatay sa overseas Filipino worker na si Julleebee Ranara sa Kuwait.
Ito’y kahit pa mismong kababayang Kuwaiti ni Al – Sabah ang gumahasa at pumatay umano kay Ranara.
Sa pagbisita ni Philippine Charge D’ Affaires to Kuwait Jose Cabrera III sa Ministry of Foreign Affairs, nagpaabot din ng pakikiramay si Sheik Salem sa pamilya ng ofw at gobyerno ng Pilipinas.
Ayon kay Foreign Affairs Undersecretary Eduardo De Vega, tiniyak ni Al – Sabah na mapaparusahan ang disi syete anyos na suspek na anak ng amo ng biktima, na naaresto kamakailan.