HEADLINES

Plano ng Bureau of Corrections o BuCor na i-develop ang 270-hectare property na pag-aari nito sa Tanay, Rizal.
Ayon kay BuCor Acting Director General Gregorio Pio Catapang Jr., ang bureau pa rin ang may-ari ng property na sinasabing inaangkin ng Masungi Georeserve Foundation.
Sinabi ni Catapang na balak nilang magtayo ng mga headquarters at residential sites para sa mga empleyado ng Bucor.
Binigyang diin ng opisyal na dahil ang BuCor ang registered owner ng subject property ay ito pa rin ang may karapatang gumawa ng anumang aktibidad sa lugar.

Hinimok ni Vice President Sara Duterte ang mga lokal na lider na itaguyod ang integridad at pairalin ang pagkakaisa upang mailatag ang tunay na serbisyo publiko.
Ang pahayag ay ginawa ni Duterte sa joint mass oathtaking ng Davao de Oro at Davao del Norte Lakas-CMD sa Tagum City Historical and Cultural Center.
Sa kanyang talumpati, sinabi ni Duterte na kaakibat ng pagiging miyembro ng partido ay ang pagtanggap sa hamon na magkaisa tungo sa iisang layunin at ito ay ang pagsisilbi sa mamamayan.
Samantala, nagpasalamat naman ang bise-presidente sa Korte Suprema sa pagbibigay nito ng payo sa kanya para sa posibleng partnership sa pagitan ng Department of Education at Integrated Bar of the Philippines o IBP.

Tinanggal na ng Bureau of Fisheries and Aquatic Resources o BFAR ang fishing ban sa Kabisayaan.
Ayon sa BFAR, wala namang iniulat na lumabag sa tatlong buwan na ‘closed fishing season’.
Nagpasalamat din ang ahensya sa pakikiisa ng mga fishing stakeholders, kabilang ang mga mangingisda sa iba’t ibang bayan.
Matatandaang ipinag-utos ng BFAR ang pagbabawal sa paghuli, pagbebenta at pagbili ng sardinas, herring at mackerel species sa Visayan Sea.

Inaprubahan ng Commission on Elections ang pilot testing ng Automated Elections System sa tatlong barangay para sa Barangay at Sangguniang Kabataan Elections sa Oktubre.

Ayon kay Comelec Spokesperson Atty. John Rex Laudiangco, ang nasabing hakbang ay bahagi ng regular en banc meeting na idinaos noong February 15.

Isasagawa aniya ang pilot testing sa Barangay Zone II Poblacion at Barangay Paliparan III sa Dasmariñas City, Cavite habang ang ikatlo naman ay sa barangay Pasong Tamo sa Quezon City.

Paliwanag ni Laudiangco, ang napiling mga barangay ay resulta nang naging regular hearing ng House Committee on Suffrage and Electoral Reforms, at nilinaw na ito ay mula sa mutual consultation at mutual agreement sa pagitan ng house committee at Comelec.

Binalaan ng Department of Health – Western Visayas Center for Health Development ang publiko laban sa pagtaas ng kaso ng hand, foot at mouth disease.

Simula Enero 1 hanggang Pebrero 4, nakapagtala na ng 2,350 H.F.M.D. cases sa nasabing rehiyon kumpara sa 132 cases sa parehong panahon noong isang taon.

Ayon kay Airene Legarda, Medical Technologist 2 at D.O.H. Regional Food and Water Borne Disease Program coordinator, nakatuon sila sa hygiene at sanitation dahil mabilis kumalat ang naturang viral disease.

Ang pagpapatuloy anya ng face-to-face activities ay maaaring isa sa dahilan ng pagtaas ng bilang ng mga kaso.

Batay sa datos ng Regional Epidemiology and Surveillance unit, ang lalawigan ng Iloilo ang may pinakamaraming kaso, 1,132; Antique, 240 at Negros Occidental, 331.

Samantala, kabilang naman sa mga pinaka-lantad sa sakit ang mga batang edad isa hanggang lima.

PATAY ang limang sundalo habang sugatan naman ang isa pa matapos mag-amok ang kanilang kabaro sa headquarters ng Camp Edilberto Evangelista, Cagayan de Oro City.
Ayon kay Major Alden Briñas, Command Duty Officer ng Philippine Army, unang nasawi ang apat na personnel ng Service Support Battalion o SSBn na sina Sgt. Rogelio Rojo Jr., Cpl. Bernard Rodrigo, Private First Class Prince Kevin Balaba at Pvt. Joseph Tamayo habang napatay din kalaunan ang gunman na si Pvt. Johmar Villabito.
Sugatan naman sa insidente si Staff Sgt. Braulio Macalos Jr.
Sa paunang imbestigasyon, pasado ala-una kaninang madaling araw (Pebrero 11) ay natutulog ang mga tauhan ng SSBN nang biglang mag-amok si Villabito at pinagbabaril ang kanyang mga kabaro.
Puwersahan umanong pumasok sa silid si Villabito kaya’t nakipagpambuno dito sina Pvt. Mark Anthony Aguined at Pfc. Josiah Estrada hanggang sa naagaw ang hawak nitong armas at nabaril ito na ikinasawi ng suspek.
Patuloy ang imbestigasyon ng mga awtoridad sa naturang insidente.

Inatasan ng Department of Justice o DOJ ang mga prosecutor na i-atras ang mga kasong maliit lamang ang tsansang maipanalo.
Base sa Department Circular No. 008, binanggit na layunin nitong mapaluwag ang court dockets at maisulong ang mga kasong mataas ang posibilidad na magkaroon ng conviction.
Bukod dito, inatasan din ang mga prosecutor na i-asssess nang mabuti ang mga hawak nilang kaso upang mabatid kung minipis o hindi ang tsansang maipanalo, batay sa hawak na ebidensya, availability ng mga tesitigo, at interes ng mga private complainant.
Samantala, binigyang diin ni DOJ spokesperson Mico Clavano na nasasayang lamang ang government resources sa pagsasampa ng mga mahihinang kaso.

Isinusulong sa Senado ang pag-regulate sa pribadong paggamit ng Remotely Piloted Aircraft System o drone upang matiyak na hindi ito magagamit sa iligal na aktibidad.
Sa Senate Bill 1777 o Drone Regularization Act ni Sen. Raffy Tulfo, inilalarawan ang drone bilang isang ‘robotic device’ na maaaring maging ‘space hazard’ at magdulot ng panganib kapag nagamit sa maling paraan.
Pinapayagan sa ilalim ng bill ang Civil Aviation Authority of the Philippines o CAAP na i-classify ang mga drones, ito man ay ginagamit sa pribado, commercial, profession at hobbyist use.
Batay sa mga kasalukuyang tuntunin, ang mga drone na higit pitong kilograms o 15 pounds ay kailangang kumuha ng CAAP certificate.
Ngunit sa bill naman ni Tulfo, ang mga unregistered drone na ginagamit sa commercial purposes ay maaaring kumpiskahin at papatawan ng hindi bababa sa P50,000 at hindi hihigit sa P100,000.
Maliban dito, may katapat ding multa ang anumang paglabag sa general safety regulations at restrictions sa paggamit ng drone.