HEADLINES

Pinangunahan ni Pang. Ferdinand Marcos Jr. ang panunumpa ng negosyanteng si Maynard Ngu bilang special envoy to China for trade, investments and tourism.

Ayon sa Presidential Communications Office o PCO, isinagawa ang oath-taking ceremony ni Ngu sa Study Room ng Malacañang Palace sa Maynila.

Kabilang sa mga tututukan ni Ngu ay ang pagsusulong ng international trade at investment sa pagitan ng Pilipinas at China.

Bago napunta sa gobyerno, si Ngu ay nagsilbi bilang chief executive officer o CEO ng Cosmic Technologies Inc., ang kompanyang nasa likod ng mobile phone firm na Cherry Mobile.

Sinisimulan na ng Department of Social Welfare and Development o DSWD ang pamamahagi ng ayuda sa mga pamilyang apektado ng oil spill na dulot ng paglubog ng MT Princess Empress sa Oriental Mindoro.

Para alamin ang update sa nangyaring pagkalat ng langis, pinulong ng lokal na pamahalaan ang mga kinatawan ng ilang ahensya, kabilang ang Phil. Coast Guard, Department of Health, Bureau of Fire Protection, Armed Forces of the Philippines, at Philippine National Police.

Maliban sa LGU, dumalo rin sa Operational Period Briefing ngayong araw si DSWD Secretary Rex Gatchalian na nangakong maghahatid ng 10,000 family food packs kada apat na araw sa mga mamamayan sa anim na bayan ng probinsya.

Magkakaroon din ng cash for work program ang DSWD upang makatulong sa pagkukunan ng pangkabuhayan ng mga apektadong pamilya.

Inihayag ng Department of Education o DepEd na magpapatuloy ang mga klase sa mga pampublikong paaralan sa kabila ng nakaambang transport strike sa Marso 6 hanggang 12.

Ayon kay DepEd spokesperson Michael Poa, walang idedeklarang ‘suspension of classes’ sa loob ng nasabing panahon.

Gayunman, sinabi ni Poa na maaaring magkaroon ng ibang ‘learning modes’ ang mga maaapektuhan ng tigil-pasada.

Aniya, ang mga hindi makaka-attend ng ‘in-person classes’ ay dapat payagang gumamit ng alternative delivery modes o ADM.

Matatandaang nag-anunsiyo na ng suspensiyon ng face-to-face classes ang ilang lokal na pamahalaan at hinikayat ang mga kinauukulan na magsagawa na lamang ng modular o online learning.

Iginiit ni Pangulong Ferdinand Marcos Jr na pangangalagaan niya ang soberenya ng Pilipinas at pananatilihin ang territorial integrity ng bansa.
Sa kanyang talumpati sa Philippine Military Academy Alumni Homecoming sa Baguio City, tinalakay ng Presidente ang sinasabing geopolitical tension na aniya’y salungat sa hinahangad nating kapayapaan.
Binigyang diin ni PBBM na mahalagang mapanatili ang pambansang seguridad habang pinatitibay ang bilateral relations sa mga kaalyadong bansa.
Samantala, muli ring tiniyak ni Pangulong Marcos na hindi niya hahayaang mawala ang anumang bahagi ng teritoryo ng Pilipinas.

Inaprubahan na ng Department of Science and Technology o DOST ang P1.8 million grant para sa “Smart City” initiative ng Dapitan City.
Ayon kay DOST Zamboanga del Norte Director Nuhman Aljani, ang grant ay suporta nila sa implementasyon ng CHARM Technology ng lungsod.
Lumagda na rin sa isang memorandum of agreement sina Aljani at City Mayor Seth Frederick Jalosjos para sa nasabing proyekto.
Ang CHARM o ‘Charging in Minutes’ ay isang pasilidad kung saan maaaring i-charge nang mabilis ang mga electric o e-vehicles.

Umarangkada na ang “trash trap” projects ng Department of Environment and Natural Resources-Northern Mindanao o DENR-10.
Ayon kay DENR-10 Executive Director Henry Adornado, layunin nitong maibsan ang mga lumulutang na basura sa dalawang barangay sa Cagayan de Oro City.
Kabilang naman ang Brgy. Lapasan at Brg. Puntod sa pilot areas ng proyekto na nagkakahalaga ng kalahating milyong piso.
May karagdagan din na isang daang libong piso na pondo para rito na hahawakan ng mga caretaker ng programa.

Pinaiimbestigahan ni Sen. Raffy Tulfo ang umano’y bullying incidents sa mga ospital at klinika sa bansa.
Batay sa Senate Resolution No. 467, kabilang sa mga apektado ng pambu-bully ay ang mga clerks, interns, residents, nurses at iba pang medical professionals.
Maituturing aniya itong banta sa pisikal, psychological o mental health at kaligtasan ng mga apektadong manggagawa.
Binanggit ng senador ang aklat na sinulat ni Dr. Erwin Manzano na pinamagatang “Hospital Bullies in the Philippine Clerkship and Residency Training” kung saan isiniwalat nito na may mga ospital at klinika na tila kinukunsinti pa ang kultura ng bullying.
Partikular na tinukoy ang mga junior residents, trainees, clerks at iba pang mabababa ang ranggo bilang mga biktima ng pambu-bully habang mga senior at consultants naman umano ang mga salarin.