HEADLINES

Nagpalabas ang DBM Department of Budget and Management ng mga bagong panuntunan kaugnay sa pagpapalabas at paggamit ng LGSF-FA to LGUs o Local Government Support Fund-Financial Assistance to local government units and support for local programs sa ilalim ng 2023 general appropriations act.

Ayon kay budget secretary Amenah Pangandaman, tuluy-tuloy ang pagbuo ng mga hakbangin ng DBM para epektibong maipatupad ang digital transformation at ease of doing business, bilang suporta na rin anya sa 10 point priority agenda ng Marcos administration.

Maging sila anya sa DBM ay nagpapatupad na ng digitalization kabilang ang pagsusumite ng request for financial assistance sa ilalim ng local government support fund.

Sinabi ni Pangandaman na tiwala silang sa pamamagitan ng mga bagong panuntunan ay matutulungan nilang mapadali ang proseso para sa pagre request ng pondo ng LGUs upang maikasa na ang programa ng mga ito.

Batay sa mga bagong  guidelines, ang pagsusumite ng request for financial assistance ang chargeable sa LGSF-FA to LGUs ay maaari lamang gawin sa pamamagitan ng DRSL o Digital Requests Submission for Local Government support fund  na nasa DBM apps portal.

Lahat ng mga isusumiteng dokumento sa iba pang hindi otorisadong paraan ay otomatikong maibabasura lang.

Ang LGSF-FA to LGUs  ay uubra lamang gamitin hanggang December 31, 3024.

Arestado ang isang pulis matapos ireklamo ng isang beauty queen dahil sa umano’y pambabastos at panghihipo sa kanya sa Ninoy Aquino International Airport o NAIA Terminal 3 nitong Biyernes ng gabi.

Kinilala ang complainant na si Ms. Maria Ahtisa Manalo, 25 taong gulang, habang  nasakote naman ang suspek na si Patrolman Alvin Bonales ng Aviation Security Group.

Matatandaan na naging first-runner up si Manalo sa Miss International noong 2018.

Batay naman sa imbestigasyon, kagagaling lang ng Boracay ni Manalo at naghihintay ng masasakyan sa airport nang lapitan ng pulis at hinipuan sa pribadong parte ng katawan.

Dahil dito, agad na ipinag-utos ni airport general manager Cesar Chiong ang pag-review sa mga kuha ng CCTV kung saan nakumpirma na ginawa nga ito ni Bonales.

Bukod sa administrative complaint, nahaharap din si Bonales sa reklamong paglabag sa Republic Act No. 11313 o ang Safe Spaces Act na mas kilala rin sa tawag na “Bawal Bastos Law.” —mula sa ulat ni Raoul Esperas (Patrol 45)

Isinusulong sa Senado ang pagtatayo ng isang Emergency Medical Service System o EMSS.

Sinasabing layon ng Senate Bill No. 1973 o Emergency Medical Services System Act na lumikha ng pambansang pamantayan o national standard para sa emergency medical services at protocols sa panahon ng kalamidad o sakuna.

Ayon kay Sen. JV Ejercito, may-akda ng panukala, lumitaw sa 2022 World Risk Reports na kasama ang Pilipinas, India at Indonesia sa ‘highest overall disaster risk’.

Binanggit din na kabilang ang bansa sa 193 countries sa buong mundo na lantad sa mapaminsalang natural na kalamidad tulad ng lindol, tsunami, baha at tagtuyot.

Tinatayang 50,000 biyahero ang darating sa bansa ngayong summer months.

Ayon kay Ms. Dana Sandoval, tagapagsalita ng Bureau of Immigration o BI, matapos tanggalin ang travel restrictions ay inaasahan nilang bubuhos ang mga turista sa bansa.

Magbubukas naman ang ahensya ng mga karagdagang immigration counters sa gitna ng kaliwa’t kanang reklamo ng mahabang pila.

Para naman maiwasan ang paghaba ng pila, sinabi ni Sandoval na nakikipag-ugnayan na sila sa mga stakeholders sa paliparan upang matugunan ito.

Magdedesisyon ang mga prosecutor ng Department of Justice o DOJ nang batay sa ebidensya at hindi sa espekulasyon sa mga kaso ni Negros Oriental 3rd District Rep. Arnolfo Teves Jr.

Ito ang tiniyak ni Justice Secretary Jesus Crispin Remulla matapos salakayin ng mga pulis ang tahanan ni Teves sa Barangay Poblacion sa bayan ng Basay kung saan may mga nakitang baril, bala at granada.

Sinabi ni Remulla na legal ang operasyon ng mga awtoridad at may dalawang search warrant na inisyu ang korte ukol dito.

Samantala, tiniyak din ni Remulla na dadaan sa due process ang criminal complaint laban kay Teves na may kinalaman umano sa ilang kasong pagpatay noong 2019.

Sinisimulan na ng Aircraft Accident Investigation and Inquiry Board ng Civil Aviation Authority of the Philippines o CAAP ang imbestigasyon kaugnay nang pagbagsak ng Cessna 206 plane na iniulat na nawawala noong Enero 24 at natagpuan nitong Huwebes lamang sa Isabela.

Ayon sa CAAP, nadiskubre ang wreckage site sa dalisdis ng Sierra Madre mountain range sa bayan ng Divilacan.

Kabilang sa mga parte ng Cessna na nais makuha ng mga imbestigador ay ang emergency locator transmitter o ELT na makatutulong upang matukoy kung bakit walang “distress signal” na naipadala mula sa eroplano.

Sinabi naman ni CAAP deputy director general Capt. Edgardo Diaz na mahalaga ring malaman kung masamang panahon o aberya sa makina ang dahilan nang paglihis ng ruta ng eroplano at pagbagsak nito.

Ipinagpaliban ng Pag-IBIG ang pagtataas sana nito ng kontribusyon nito ngayong taon.

Ito ayon sa Pag-IBIG ay para makatulong sa mga empleyado at negosyo na patuloy pang makabawi matapos ang COVID-19 pandemic.

Binigyang diin ni Secretary Jose Rizalino Acuzar ng Department of Human Settlements and Urban Development na iniurong na lamang nila ang dagdag-singil sa January 2024 bilang tugon sa panawagan mismo ng Pangulong Ferdinand Bongbong Marcos, Jr. na ipagpaliban ang dagdag kontribusyon para makabawas sa alalahaning pampinansyal ng mga Pilipino.

Nakita naman aniya ng lahat ang epekto ng pandemya sa mga miyembro ng Pag-IBIG at kahilingan ng employers sa pangunguna ng ECOP o Employers Confederation of the Philippines na makunsinder ang kanilang sitwasyon kaya’t ipinagpaliban ng pag-IBIG sa nakalipas na tatlong sunod na taon ang dagdag-singil nito kung saan ang kontribusyon ay nananatili base na rin sa 1986 rate.