HEADLINES

Ilang Memorandum of Understanding (MOU) ang nilagdaan sa pagitan ng Pilipinas at Vietnam. Ito ang naging bunga ng pagbisita ni Pangulong Ferdinand Marcos Jr. sa Vietnam.

Matatandaang dumating si Pangulong Marcos sa Vietnam noong January 29, 2024 ng hapon para sa kanyang two-day state visit na inaasahang magpapalakas sa ugnayan ng dalawang bansa, partikular na sa agrikultura, maritime security, at iba pang mga sektor.

Isa sa mga nilagdaang kasunduan sa pagitan ng Pilipinas at Vietnam ang MOU para sa Rice Trade Cooperation.

Sa Rice Trade Cooperation, sumang-ayon ang Vietnam sa isang five-year trade commitment kung saan magsusuplay ng white rice ang kanilang private sector sa pribadong sektor ng Pilipinas na aabot sa 1.5 million hanggang 2 million metric tons (MT) kada taon. Nakatakda itong ibenta sa abot-kayang halaga.

Sa naturang kasunduan, bubuuin ang isang framework upang matiyak ang pagkakaroon ng sustainable food supply sa gitna ng mga epekto ng climate change, pandemic, at iba pang mga kaganapan.

Paiigtingin naman ng Cooperation in Agriculture and Related Fields ang ugnayan ng Pilipinas at Vietnam sa larangan ng agrikultura, rural development, at iba pang mga kaugnay na sektor; gayundin ang pagtatatag sa 19 areas of cooperation. Kabilang dito ang high value crops, livestock and aquaculture, farm management and sustainability, smart agriculture and aquaculture technology, research trainings, at palitan ng mga eksperto.

Bukod dito, nagkasundo ang Pilipinas at Vietnam na pahusayin ang kanilang koordinasyon pagdating sa maritime issues sa bisa ng Incident Prevention and Management in the South China Sea. Sa pamamagitan ng dialogue at cooperative activities, palalakasin ng dalawang bansa ang kanilang mga pagsisikap upang tumibay ang kanilang tiwala, kumpiyansa, at pagkakaunawaan sa nasabing isyu.

Kaugnay nito, bubuuin ang Joint Coast Guard Committee sa bisa naman ng Maritime Cooperation upang talakayin ang mga isyu at interes ng Philippine Coast Guard (PCG) at Vietnam Coast Guard (VCG). Isang hotline communication ang itatatag sa pagitan ng coast guards ng dalawang bansa.

Samantala, palalawakin naman ng Pilipinas at Vietnam ang cultural exchanges at patitibayin ang kanilang pagkakaibigan sa pamamagitan ng Cultural Cooperation Program. Alinsunod ito sa Cultural Agreement na nilagdaan ng dalawang bansa noong 1998.

Ayon kay Pangulong Marcos, mahalaga ang kanyang state visit sa Vietnam dahil ito ang nag-iisang strategic partner ng Pilipinas sa Association of Southeast Asian Nations (ASEAN) region. Sa pagbisita ng Pangulo sa Vietnam kung saan nilagdaan ang iba’t ibang kasunduan, muling tumibay ang pangako ng Pilipinas na higit pang palakasin ang relasyon ng dalawang bansa.

Kabilang na ngayon ang mga homeless o mga nakatira sa lansangan sa mga magiging benepisyaryo ng Pag-Abot program ng Department of Social Welfare and Development (DSWD).

Ito ay matapos ilabas ni Pangulong Ferdinand Marcos Jr. ang Executive Order No. 52 noong January 18, 2024 upang mailayo ang street dwellers at iba pang mga mahihirap na Pilipino sa lansangan.

Isa sa pilot programs ng DSWD ang Pag-Abot program na layong magbigay ng tulong sa mga mahihirap na indibidwal, bata, at pamilya.

Ayon kay Pangulong Marcos, hindi lang financial assistance ang ipamamahaging assistance package sa homeless beneficiaries ng Pag-Abot program. Mabibigyan din sila ng relocation assistance, transitory shelter assistance, livelihood assistance, employment assistance, psychosocial support, at community assistance.

Sa bisa ng Executive Order No. 52, itatatag ang Interagency Committee na titiyak sa mahusay na implementasyon ng Pag-Abot program. Pamumunuan ito ng DSWD secretary bilang chairperson, samantalang secretary naman ng Department of Interior and Local Government (DILG) ang magiging vice chairperson.

Matatandaang nagbigay ng commitment ang Pilipinas na maisakatuparan ang Sustainable Development Goal No. 1 ng United Nations na ‘No Poverty’. Sa pamamagitan ng patuloy na pagpapatupad ng social protection systems and measures at pagbibigay ng pantay na access sa economic resources katulad sa Pag-Abot program, posibleng mapuksa ang kahirapan sa bansa.

Ayon nga kay Pangulong Marcos, ang Pag-Abot program ang magbibigay ng social safety nets at proteksyon sa mga panganib na dulot ng kahirapan sa kapwa nating Pilipino. Ito rin ang tutulong sa kanilang maging produktibong miyembro ng lipunan.

Upang matiyak ang kahandaan ng Pilipinas sa epekto ng El Niño phenomenon, muling binuhay ni Pangulong Ferdinand Marcos Jr. ang Task Force El Niño sa bisa ng Executive Order No. 53.

Ayon sa recent monitoring ng Department of Science and Technology- Philippine Atmospheric, Geophysical, and Astronomical Services Administration (DOST-PAGASA), lumabas na ganap nang El Niño ang warm sea surface temperature sa central at eastern tropical Pacific mula July 2023 at inaasahang tatagal hanggang sa second quarter ng 2024.

Upang masiguro ang patuloy at sapat na supply ng pagkain, tubig, at enerhiya sa gitna ng tagtuyot, muling binuo ni Pangulong Marcos ang Task Force El Niño nitong January 19, 2024 sa ilalim ng Office of the President.

Pangungunahan ng secretary ng Department of National Defense (DND) ang Task Force El Niño bilang chairperson. Magsisilbi namang co-chair ang kalihim ng DOST.

Kabilang sa mga miyembro ng Task Force ang mga kalihim ng Department of Environment and Natural Resources (DENR), Department of Agriculture (DA), Department of Health (DOH), at National Economic and Development Authority (NEDA).

Magbibigay naman ng administrative at technical support sa Task Force ang Office of Civil Defense.

Binigyan ng mandato ang Task Force El Niño na i-revise at i-update ang Strategic El Niño National Action Plan na nakatutok sa water security, food security, power security, health, at public safety.

Sila rin ang magbabantay sa pagpapatupad ng short at long-term solutions and programs at makikipag-ugnayan sa mga kaukulang ahensya upang matiyak ang agarang pagkumpleto sa water infrastructure projects bago matapos ang April 2024.

Dagdag pa rito, makikipagtulungan ang Task Force sa Presidential Communications Office (PCO) para sa malawakang information campaign; pati na rin sa DOST para sa pagtatatag ng El Niño Online Platform na magbibigay ng mga datos at impormasyon tungkol sa El Niño.

Itinuturing ang Pilipinas bilang isa sa most vulnerable countries sa Asya pagdating sa epekto ng El Niño, ngunit posible itong maiwasan dahil sa mga ginagawang aksyon ng administrasyong Marcos. Sa muling pagbuo sa Task Force El Niño, mas mapaghahandaan na ng bansa ang anumang masamang epekto ng tagtuyot.

Bagama’t isa’t kalahating taon pa lang sa pwesto, 51% na sa Farm-to-Market Road Network Program ang natapos ng administrasyon ni Pangulong Ferdinand Marcos Jr.

Mula sa target nitong 131,410.66 km, 67,328.92 km o katumbas ng 32 times na road trip mula Aparri hanggang Jolo na ang nagawa ng pamahalaan.

Para kay Department of Agriculture (DA) Undersecretary Mercedita Sombilla, mahalaga ang pagkakaroon ng farm-to-market roads upang magkaroon ng connectivity lalo na sa mga liblib na lugar na malayo sa mga lungsod at mga konsyumer na nangangailangan ng mga produkto.

Kaya naman noong September 26, 2023, matatandaang inatasan ni Pangulong Marcos ang DA na gawing prayoridad ang pagpapatayo ng farm-to-market roads para sa efficient transportation. Aniya, dapat laging on-track ang pamahalaan sa National Farm-to-Market Roads Network Plan.

Ang National Farm-to-Market Roads Network Plan ang nagsisilbing guide ng pamahalaan sa implementasyon ng mas maayos na transportasyon ng agricultural at fishery products, mula sa sakahan o pangisdaan, patungong merkado, at sa kalaunan, sa hapagkainan ng pamilyang Pilipino.

Sa pagkakaroon ng mas maayos na farm-to-market roads, mas mapapadali na ang paghahatid ng mga magsasaka at mangingisda sa kanilang produkto. Para kay Usec. Sombilla, ang pagpapatayo ng farm-to-market roads ay nangangahulugan din ng karagdagang kita para sa mga magsasaka at mangingisda dahil bababa ang gastos sa paghahatid ng mga produkto sa market centers.

Kapag mas mataas ang kita at mas maganda ang business opportunities ng mga magsasaka, mas lalago ang agribusiness. Inaasahang magbibigay ito ng mas maraming trabaho para sa mga kababayan nating nasa rural areas.

Ayon kay Pangulong Marcos, hindi maganda ang mga kalsadang madalas daanan ng mga produktong pang-agrikultura. Ito ang nais niyang ayusin. Pangako ng Pangulo, kukumpletuhin ng pamahalaan ang target sa farm-to-market roads bago matapos ang kanyang termino.

Mas mabilis na disaster response mula sa Department of Social Welfare and Development (DSWD) ang dapat asahan ng mga Pilipino.

Ito ang sinabi ni DSWD Assistant Secretary Irene Dumlao matapos magkaroon ng upgrade sa monitoring equipment ng ahensya para sa bagong lunsad nitong command center.

Matatandaang noong January 12, 2024, kasabay ng 73rd anniversary celebration ng DSWD, pinangunahan ni Pangulong Ferdinand Marcos Jr. ang launching ng Disaster Response Command Center (DRCC).

Titiyakin ng DRCC ang pagkakaroon ng mas mahusay at mas pinabilis na disaster response at relief operations sa bansa.

Magsisilbi itong central hub para sa disaster monitoring, reporting, at coordination of preparedness and response efforts. Dito, masisiguro na ang lahat ng situation reports mula sa regional offices ng DSWD ay consolidated o sama-sama, automated, consistent, at compatible sa ibang command centers ng bansa.

Gamit ang teknolohiya at real-time data analysis, mas magiging masusi ang monitoring sa sitwasyon tuwing kasagsagan ng kalamidad. Mas mabilis nang matutukoy kung saang mga lugar sa bansa ang pinaka-nangangailangan ng tulong. Maaari na ring malaman kung saang field office ang mayroong available resources at kung alin dito ang pinakamalapit sa apektadong lugar. Sa ganitong paraan, magiging mas mabilis ang paghahatid ng disaster relief items at response para sa ating mga kababayan.

Noon pa man, isinusulong na ni Pangulong Marcos ang paggamit ng makabagong teknolohiya para sa disaster response. Sa pamamagitan ng pag-utilize sa teknolohiya, pati na rin sa patuloy na pagpapatupad ng education campaigns at simulation drills, tiyak na mas maraming buhay ang maililigtas.

“Isa po akong anak ng Pasig. Bago po ako’y pumasok sa larangan ng Serbisyo Publika, nandiyan na ang Bongbong Marcos na Batang Pasig. I grew up by the Pasig River.”

Ito ang ibinahagi ni Pangulong Ferdinand Marcos Jr. sa ginanap na ceremonial opening ng “Pasig Bigyang Buhay Muli: Pasig River Urban Development” project sa Binondo, Manila noong January 17, 2024.

Kwento ng pangulo, sumasakay siya ng bangka papunta at pauwi sa trabaho. Aniya, pagdating sa estado ng Ilog Pasig, hindi lang siya nakabase sa statistics report. Personal niya itong nakikita at naaamoy sa araw-araw niyang biyahe.

Kaya naman para kay Pangulong Marcos, panahon na para ayusin at buhayin muli ang makasaysayang Ilog Pasig.

Ayon sa Pangulo, magiging tuloy-tuloy ang pagpapatupad ng Pasig Bigyang Buhay Muli (PBBM) project, katulong ang lead proponent nitong si First Lady Louise ‘Liza’ Araneta-Marcos.

Master plan ng Inter-Agency Council for the Pasig River Urban Development (IAC-PRUD) ang PBBM project, hindi lang para sa rehabilitasyon ng ilog, kundi sa pag-maximize ng economic potential nito.

Upang lubusin ang potensyal ng Ilog Pasig, plano ng ahensya na i-convert ang 25-kilometer na kahabaan nito mula Manila Bay hanggang Laguna de Bay upang maging open public parks at commercial areas.

Magde-deploy rin ng karagdagang ferry boats at stations upang mas maraming pasahero ang sumakay rito at mas magamit ang maritime highway.

Samantala, higit sa 10,000 na pamilya na informal settlers malapit sa Ilog Pasig ang ire-relocate sa mga disenteng tirahan. Ayon kay Department of Human Settlements and Urban Development (DHSUD) Secretary Jose Rizalino Acuzar, tinatayang aabot ng P1 million kada pamilya ang relocation costs na popondohan ng private sources.

Pagtitiyak ni Pangulong Marcos, hindi lang “ningas cogon” o sa simula lang ang rehabilitasyon sa Ilog Pasig dahil maigi nilang tututukan ito ng first lady. Sa katunayan, inatasan na ng Pangulo ang DHSUD, Metropolitan Manila Development Authority (MMDA), Department of Interior and Local Government (DILG), at ilang local government units (LGUs) na magpasa ng quarterly at yearly report tungkol sa proyekto.

Aminado si Pangulong Marcos na mahabang panahon ang kinakailangan upang tuluyang maayos ang Ilog Pasig. Ika nga niya, “Decades of neglect cannot be undone in months.” Sa kabila nito, nanindigan ang Pangulo na hindi para sa kapakanan ng administrasyon ang rehabilitasyon nito kundi para sa mga susunod na henerasyon.