HEADLINES

Hindi umano ihihinto ng pamahalaang lokal ng Maynila ang pamamahagi ng monthly allowance sa mga senior citizens.

Ayon kay Manila City Vice Mayor, Honey Lacuna-Pangan, tuloy-tuloy at hindi umano maaantala ang pamamahagi ng buwanang allowance ng mga senior sa lungsod.

Dagdag pa ni Lacuna, ipinaubaya na sakaniya ni Manila City Mayor Isko Moreno ang pamamahagi nito kung saan, mahigpit nitong habilin na hindi ito mahihinto lalo na sa gitna ng lockdown.

Tiwala naman si Moreno sa kakayahan ni Lacuna partikular sa isyu ng kalusugan.—sa panulat ni Angelica Doctolero

Nasa tatlong milyong halaga ng shabu ang nasabat ng mga otoridad matapos maaresto ang isang lalaki sa Maynila.

Sa imbestigasyon, nahuli ang suspek na kinilalang si Musa Nasrudin Baguilan, matapos magsagawa ng operasyon ang mga tauhan ng Philippine Drug Enforcement Agency o PDEA, sa harapan ng Bureau of Immigration o BI, sa bahagi ng Magallanes Drive, Intramuros, Manila.

Ayon kay PDEA Director General Wilkins Villanueva, nakuha mula sa suspek ang kalahating kilo ng shabu at buy-bust money.

Sa ngayon ay nakakulong na ang suspek na nahaharap sa kasong paglabag sa Republic Act 9165 o Comprehensive Dangerous Drugs Act of 2002.—sa panulat ni Angelica Doctolero

Nanawagan ng blood donation sa publiko ang Philippine General Hospital o PGH.

Ito ay matapos maitala ang “very critical level” sa suplay ng dugo sa kanilang ospital.

Para sa mga nais magdonate ng dugo, bukas ang PGH blood donor center tuwing Lunes hanggang linggo sa oras na alas-8 ng umaga hanggang alas-4 ng hapon.

Tinatanggap din ng PGH ang mga walk-in mula alas-8 ng umaga hanggang alas-2 ng hapon.—sa panulat ni Angelica Doctolero

Maikukunsidera pa ring high risk sa COVID-19 ang Metro Manila kahit bumaba na ang reproduction rate sa rehiyon.

Ito ayon sa OCTA research group, ay kung ang pagbabatayan ay ang indicators na ginagamit ng COVID act now.

Nasa average na 4,220 pa rin ang arawang kaso ng COVID sa nakalipas na isang linggo at may growth rate naman na negative 20% at reproduction number na 0.94.

Bagaman patuloy na bumababa, ipinunto ng grupo na nasa mataas na lebel pa rin ang positivity rate ng COVID o dami ng mga nagpopositibo sa isinasagawang testing.– —sa panulat ni Drew Nacino

Muling tumungtong sa mahigit 20k ang bilang ng daily COVID-19 cases sa bansa makaraang makapagtala ng 20,755 na additional cases, kahapon.

Sa datos ng DOH, sumipa na sa 2,490,858 ang kabuuan bilang ng nagkakasakit habang umabot sa 24,391 ang gumaling kaya’t sumirit sa 2,292,006 ang total recoveries.

Lumagpak naman sa 161,447 ang total active cases at bagaman walang naitalang pumanaw sa nakalipas na tatlong araw, nananatili sa 37,405 ang kabuuang bilang ng namatay.

Samantala, dalawang laboratoryo lamang ang hindi nakapagsumite ng kanilang datos sa COVID-19 document repository system.

Gayunman, nilinaw ng DOH technical issues sa COVID kaya ang dahilan kaya’t walang naitalang namataykahapon at ang maitatalang dami ng pumanaw sa susunod na mga araw ay dahil sa mga backlog. —sa panulat ni Drew Nacino

Inihayag ni COMELEC Spokesperson James Jimenez na posibleng ianunsiyo ng kanilang ahensya ang pagpapalawig ng voters registration sa Metro Manila.

Aniya, magsasagawa palang ng pagpupulong ang COMELEC Management Committee para pag-usapan ang hiling sa pagpapalawig.

Matatandaang sinabi ng ahensya na hanggang Setyembre 30 na lamang ang huling araw ng pagpaparehistro dahilan para humiling ang ilang mga senador kabilang na sina Senator Juan Miguel Zubiri, Senator Francis “Kiko” Pangilinan at iba pang senador. —sa panulat ni Angelica Doctolero

Inaasahang dadating ngayong araw ang dagdag na 3-M doses ng Sinovac vaccines sa bansa.

Ito ay kabilang sa binili ng pamahalaan upang mas mapabilis ang target na bilang ng mga nababakunahan.

Nabatid na mamayang alas-6 ng gabi ay dadating mula sa bansang China ang mga bakuna na sakay ng Philippine Airlines.

Umaasa naman ang pamahalaan na mas dadami pa ang mga maidedeliver na bakuna mula sa ibang bansa. —sa panulat ni Angelica Doctolero

Magdedeploy ng limang medical teams ang Armed Forces of the Philippines (AFP) at Philippine National Police (PNP) upang mabantayan ang mga pribado at pampublikong ospital sa National Capital Region.

Ito ay para matugunan ang direktiba ni Pangulong Rodrigo Duterte na matulungan ang mga lubos na naapektuhan ng COVID-19 pandemic.

Matatandaang una nang inatasan ni Pangulong Duterte ang Department of National Defense na magpadala ng medical practitioners para laban ang nakakahawang sakit.

Ayon sa afp magkakaroon ng dalawang team mula sa Philippine Army at tag-iisa sa AFP Health Services Command, Philippine Navy at Philippine Air Force ang itatalaga sa hospital deployment.

Samantala sa naging pahayag naman ng PNP, sinabi ni Philippine National Police (PNP) Chief Gen. Guillermo Eleazar na handang-handa na ang nasa 150 police medical workers ng PNP medical reserve force para sa deployment. —sa panulat ni Angelica Doctolero