HEADLINES

Karagdagang suplay ng COVID-19 vaccine na binili ng pamahalaan sa China ang dumating sa bansa nitong linggo.

Pasado alas singko ng hapon nang lumapag sa NAIA Terminal 2 ang eroplanong may dala ng tatlong milyong doses ng Sinovac vaccine.

Ayon kay  National Task Force  against COVID-19 Chief, Secretary Carlito Galvez Jr., ipapamahagi ang nasabing mga bakuna sa region 1, 4-a, 3, 6, 7, 9, at 11.

Sa ngayon ay umabot na sa 69.7 milyon doses ng COVID-19 vaccine ang dumating sa Pilipinas.—sa panulat ni Hyacinth Ludivico

Nasa 35 Barangay sa Ilagan City, Isabela ang isinailalim sa granular lockdown simula nitong linggo hanggang Oktubre 4, 2021 upang mapigilan ang pagkalat ng COVID-19.

Kabilang sa mga sakop ng lockdown ay ang Barangay Alibagu, Guinatan, Calamagui 2nd, Baculod, Bliss Village, Bagumbayan, Baligatan, Osmena, Sta. Barbara, San Vicente, Centro Poblacion, San Felipe, San Ignacio, Cabisera 2, Cabisera 4, Alinguigan 1st, Fuyo, Salindingan, Namnama, San Juan, Cabannungan 2nd, Alinguigan 2nd, Centro San Antonio, Manaring, Calamagui 1st, Camunatan, San Isidro, Siffu, Naguilian Norte, Cabisera 3, Cabiseria 8, Aggasian, Marana 3rd, Naguilian Sur at Cabisera 22.

Kaugnay nito, nagtalaga naman ng watchmen sa nasabing mga barangay upang matiyak na hindi makakalabas ang mga residente na nasa edad 18 pababa at 65 pataas gayundin ang mga buntis at may mga comorbidity.

Ipatutupad rin ang curfew hours mula alas-8 ng gabi hanggang ala-5 ng umaga.

Epektibo rin ang liquor ban, odd-even scheme sa mga tricycle at pinaiiral rin ang ”by schedule” system sa mga pamilihan.—sa panulat ni Hyacinth Ludivico

Binawian ng buhay nitong linggo ang Alkalde ng bayan ng Guimbal, Iloilo na si Mayor Oscar “Oca” Garin.

Kinumpirma ito ng kaniyang mga anak na sina Aambis-Owwa Rep. Sharon Garin at Iloilo Vice Governor Christine Garin.

Magkakaroon ng send-off caravan mula sa munisipyo ng Guimbal patungong oton.

Noong nakaraang linggo nang maospital ang Alkalde matapos mahawaan ng COVID-19.

Si Mayor Garin ay nagsilbi ring kinatawan ng 1st district ng lalawigan ng Iloilo.—sa panulat ni Hyacinth Ludivico

Pinabulaanan ng kampo nina Senator Ping Lacson at Senate President Tito Sotto ang ulat na umurong na sila sa pagtakbo sa pagka-Pangulo at pangalawang Pangulo sa 2022 National Elections.

Ayon kay Ashley Acedillo, tagapagsalita ng Lacson-Sotto tandem, fake news lamang o walang katotohanan ang ikinakalat na balita ng ilang kampo laban sa kandidaturang dalawang Senador.

Naka-full speed na anya tambalan at patuloy na lumalakas ang base sa personalidad at grupo na sumasanib o nagbibigay ng suporta sa kanilang dalawa.

Isang patunay nito ang pagdalo ng dalawa sa event ng partido reporma sa Tagum City, Davao Del Norte upang pangunahan ang panunumpa ng suporta at pagiging miyembro ng mahigit 200 katao.

Iginiit ni Acedillo na inaasahan na nila ang mga desperadong hakbang ng mga kalaban upang siraan sina Lacson at Sotto habang papalapit na ang paghahain ng Certificate Of Candidacy. —sa panulat ni Drew Nacino

Umaapela sa National Bureau of Investigation ang ina ng nasawing artist na si Bree Jonson na maglunsad ng parallel investigation sa pagkamatay ng kanyang anak.

Ito’y dahil hindi umano kumbinsido si Sally Jonson sa takbo ng imbestigasyon ng Philippine National Police.

Magugunitang natagpuan ang wala nang buhay na si bree sa isang resort sa la union noong Setyembre 18.

Iginiit ni sally na hindi sapat na basehan ang CCTV video sa naging konklusyon ng PNP na iba ang dahilan ng pagkamatay ng kanyang anak at hindi dahil sa pananakit ni Julian Ongpin.

Imposible rin anyang ‘nagpakamatay’ ang trenta anyos na pintor dahil marami pa itong plano sa buhay lalo na sa career nito.—sa panulat ni Drew Nacino

Iniuwi na sa Davao City ang labi ng artist na si Bree Jonson.

Kasalukuyang nakalagak sa isang punerarya ang labi ng pintor kung saan inalayan ito ng novena at misa ng kanyang pamilya at mga kaibigan.

Ayon kay Sally Jonson, nakatakdang ilibing ang kanyang anak bukas, Setyembre 28.

Aminado naman si Jonson na hindi pa rin bumibisita si Julian Ongpin, na nobyo at pangunahing suspek sa pagkamatay ng kanyang anak.

Maigi anyang magpakita si Ongpin at bumisita sa lamay kung wala itong kinalaman sa pagkamatay ni Bree.—sa panulat ni Drew Nacino

Aabot sa 30% ng mga backyard hog raiser ang titigil na sa kanilang operasyon dahil sa luging dala ng muling pagtaas ng imported pork products.

Ayon kay Pork Producers Federation of the Philippines Chairman Nicanor Briones, bumagsak na sa P150 kada kilo ang farm-gate price ng local pork products dahil sa mga imported na karneng baboy.

Ang hakbang na taasan ang importasyon at ibaba ang taripa ay bunsod ng epekto ng African Swine Fever sa bansa upang mapanatili ang suplay ng karne sa merkado.

Bumabaha anya ng napakamura at walang taripang imported meat kaya’t bumagsak ang kabuhayan ng lokal na magbababoy sa buong bansa.

Nito lamang Abril nang lagdaan ni Pangulong Rodrigo Duterte ang Executive Order 134 para sa tarrif adjustment ng imported pork products.—sa panulat ni Drew Nacino

Kumpiyansa ang pamahalaan na mababakunahan kontra COVID-19 ang lahat ng manggagawa sa sektor ng turismo bago matapos ang taon.

Ayon kay Secretary Carlito Galvez Junior, Chief Implementer ng national task force against COVID-19, kritikal ang epekto ng turismo upang buhayin ang ekonomiya.

isa anya ang turismo sa mga matinding naapektuhan ng pandemya kaya’t ang pagbabakuna ang isa sa pinaka-mahalaga upang makabalik sa pagtatrabaho ang mga manggagawa sa naturang sektor.

nasa limang milyon manggagawa sa tourism industry na kinabibilangan ng mga nagtatrabaho sa mga hotel at resorts.

umaasa naman ang Department Of Tourism na bago mag-pasko o bagong taon ay mabakunahan na ang lahat ng mga nasa industriya.—sa panulat ni Drew Nacino

 Pinaiimbestigahan na ng Department of Labor and Employment (DOLE) ang full investigation at tracking monitoring sa mga sangkot sa kumakalat na fake and for sale SSS documents.

Ayon kay Labor Secretary, Silvestre H. Bello III, irerekomenda ng kanilang ahensya ang mahigpit na imbestigasyon sa paglaganap ng mga pekeng Certificates of Involuntary Separation gamit ang template form ng dole national capital region at ang pirma ni DOLE-NCR Regional Director Atty. Sarah Buena Mirasol at ng iba pang opisyal.

Dagdag pa ng ahensya, ang hard copies ng mga certificate ay makukuha lamang sa DOLE field office na may hurisdiksyon sa lugar ng trabaho ng mga empleyado.

Maaari ding ma-access ng mga manggagawa ang DOLE-NCR’s e-filing services na ncr.dole.gov.ph

Dahil dito, gagawa na ng kasunduan ang DOLE kasama ang SSS para sa naturang usapin.—sa panulat ni Angelica Doctolero

Hinuli ng mga otoridad ang isang lalaki matapos mameke ng dalawang bungkos o bundle ng pera sa Nueva Ecija.

Kinilala ang suspek na si Teodoro Nepomuceno Carlos, 58-anyos na nahuli sa ikinasang entrapment operation ng pinagsanib puwersa ng mga tauhan ng intelligence section ng Jaen Police Station at Intel Unit ng Nueva Ecija Police Provincial Office o.

Sa imbestigasyon, isang under cover Police ang bumili ng dalawang bungkos ng pera mula sa Iraq at Zimbabwe kapalit ng tunay na 1,500 pesos.

Nang magkapalitan na ang suspek at nagpanggap na buyer ay dito na inaresto si Carlos ng mga otoridad.

Nakuha pa sa suspek ang walo pang bungkos ng pekeng pera mula sa Iraq.

Kasong paglabag sa forgeries article 168 o illegal possession and Use of  False Treasury or bank notes ang kasong kakaharapin ng suspek na si Carlos.—sa panulat ni Angelica Doctolero