HEADLINES

Bumaba ang bilang ng mga aktibong kaso ng COVID-19 sa lalawigan ng Davao Oriental.

Batay sa datos ng Department Of Health-Davao Region o DOH-Davao noong Sabado, mayroong 623 active cases sa Davao Oriental kung saan ito ang may pinakamababang naitalang active cases sa anim na probinsya.

Ayon sa provincial government, ito ay dahil sa implementasyon ng pinaigting na mga  hakbang upang mapigilan ang pagkalat ng virus.

Nakita ang pagbaba ng mga kaso noong Setyembre 21 kung saan bumulusok ito sa 727 mula sa 820 noong Setyembre 20.

Simula nang isinailalim ang Davao Oriental sa General Community Quarantine with heightened restrictions noong Setyembre 8, ay nakitaan ito ng 40% na pagbaba sa active COVID-19 cases.

Tatagal ang nasabing quarantine classification sa lalawigan hanggang Setyembre 30.—sa panulat ni Hyacinth Ludivico

Unti-unting isasama sa COVID-19 cases daily tally ng Department Of Health ang positive antigen test results simula ngayong linggo.

Sinabi ni Health Undersecretary Maria Rosario Vergeire na  isasama lamang ang antigen test results sa official tally, matapos maisailalim ang mga ito sa validation.

Nakikipag-ugnayan na rin aniya ang DOH sa iba pang mga ahensiya gaya ng Metro Manila Development Authority at National Task Force against COVID-19 para sa pagbuo ng registration at reporting system para sa antigen test.

Habang ang mga resulta ay manggagaling naman sa mga clinics o local government units.

Magkakaroon din ang DOH ng qualifier kung ilang RT-PCR at ilang antigen test ang irereport sa publiko.—sa panulat ni Hyacinth Ludivico

Magpapatupad ng bigtime oil price hike ang ilang kumpanya ng langis ngayong linggo.

Sa fuel forecast ng Unioil, maaaring tumaas ng P0.80 hanggang P1.00 ang presyo ng kada litro ng diesel.

Habang aabot naman sa P0.60 hanggang P.070 ang dagdag na presyo sa bawat litro ng gasolina.

Noong nakaraang linggo nang magpatupad ng P0.80 umento sa kada litro sa gasolina at diesel ang mga kumpanya ng langis.—sa panulat ni Hyacinth Ludivico

Idineklara ng Bureau of Fisheries and Aquatic Resources o BFAR  na ligtas sa red tide toxins ang tubig sa baybayin ng milagros sa Masbate, Carigara bay sa Leyte at Murcielagos bay sa Zamboanga Del Norte.

Ayon kay BFAR Director Eduardo Gongona, wala ng peligro ang pagkain ng mga shellfish na nakukuha sa mga nasabing karagatan.

Gayunman, may ilang coastal waters na nanananatili pa ring positibo sa paralytic shellfish poison.

Ito ay ang mga baybaying-dagat ng Dauis at Tagbilaran City sa Bohol, Dumanquillas bay sa Zamboanga Del Sur at Lianga bay sa Surigao Del Sur.—sa panulat ni Hyacinth Ludivico

Maaari ng bakunahan kontra COVID-19 ang mga edad 12 hanggang 17 kung makakamit ang 50% population protection treshold.

Ito ang nilinaw ni Vaccine Czar, Secretary Carlito Galvez makaraang dumating sa bansa ang nasa tatlong milyong doses ng biniling Sinovac vaccines ng gobyerno mula China.

Ayon kay Galvez, ipipresenta nila sa Inter-Agency Task Force kung paano ang magiging sistema ng posibleng pagbabakuna sa mga menor de edad sa oras na maabot ang target na 50% ng populasyon.

Una nang inirekomenda ng opisyal na bakunahan sa kalagitnaan ng Oktubre ang mga menor de edad na mayroong comorbidities at anak ng mga health care workers bilang prayoridad.

Aabot sa 12 milyong minors ang inaasahang mababakunahan sa pagdating ng 20 milyong bakuna sa unang linggo ng Oktubre. —sa panulat ni Drew Nacino

Pinaalalahanan ng Department Of Health (DOH) ang ilang opisyal ng gobyerno maging ang publiko na maging maingat sa pagkakaroon ng interpretasyon na bumababa na ang kaso ng COVID-19 lalo sa Metro Manila

Ito’y matapos ipahiwatig ni MMDA Chairman Benjur Abalos ang posibilidad na ibaba na sa level 3 ang alert status sa Metro Manila dahil sa bumabagal na hawaan at bumababang kaso ng COVID-19.

Gayunman, nilinaw ni DOH  Spokesperson, Undersecretary Rosario Vergeire na maaaring dahilan ng pagbaba ng kaso ng COVID ay dahil bumaba rin ang testing ng ibang laboratoryo.

Bukod pa anya ito sa maling paggamit ng iba sa antigen test kaya’t hindi nila ito isinama sa bilangan ng daily cases.

Sa mga susunod na araw pa inaasahang idaragdag ng kagawaran ang mga positive result mula sa antigen test at tutukuyin sa mga ito ang may positibong resulta.—sa panulat ni Angelica Doctolero

Kasabay ng ika-9 na National Convention at ika-22 Anibersaryo ay pormal nang inilabas kahapon ng Bayan Muna Party-list ang listahan ng mga nominado para sa 2022 national election.

Kabilang sa mga pangalang nasa listahan ay sina, former Bayan Muna Party-List Representative, Teodoro ‘Teddy’ Casiño; Incumbent Bayan Muna Party-List Representative, Ferdinand Gaite; Secretary General of the Moro-Christian People’s Alliance, Amirah Lidasan; UP Diliman University Student Council, Councilor Atty. Kristina ‘Krissy’ Conti; Former Chairperson of Visayas-Inter Regional Ecumenical Fellowship at Western Visayas Ecumenical Council, Pepito Pico; Former President of the  Municipal Sangguniang Kabataan Federation, Former Secretary General of Bayan-Bohol and Currently Regional Coordinator of Bayan Muna Central Visayas, John Ruiz at ang Chairman ng Bayan-Central Luzon na si Roman Polintan

Samantala, inihalal din ng bayan muna ang mga bagong opisyal kabilang na dito sina, Satur Ocampo bilang President; Rep. Carlos Isagani Zarate bilang Executive Vice President; Neri Colmenares bilang Chairman Emeritus; Teddy Casiño bilang Vice Chairman; Raymond Palatino, Siegfred Deduro at Rep. Eufemia Cullamat, bilang Bise Presidente sa Luzon, Visayas at Mindanao; Nathanael Santiago bilang Secretary General; Natalie Pulvinar bilang deputy Secretary General; Imelda Luna bilang Treasurer at Atty. Cristina Yambot bilang General Counsel.

Samantala, inihayag din ng naturang party-list na kanilang susuportahan ang planong pagtakbo ni Neri Colmenares sa 2022 senatorial race.—sa panulat ni Angelica Doctolero

Arestado ng mga tauhan ng Caloocan City Police Station ang dalawang suspek sa iligal na droga na kinilalang sina Richard Cenon Alyas “Empoy”, 46-anyos at Emar Villanueva, 44-anyos.

Ayon kay Caloocan City Police Chief Samuel Mina Jr., inaresto ang mga suspek matapos maaktuhang walang suot na facemask sa lungsod na tinangka pang tumakas pero mabilis na nakorner ng mga pulis.

Dito na kinapkapan ang mga suspek at nakuha ang anim na heat sealed transparent plastic sachet na naglalaman ng mahigit labing walong gramo ng shabuat nagkakahalaga ng mahigit isang milyong halaga ng shabu.

Paglabag sa Article 151 of RPC o Resistance and Disobedience to a Person in Authority at RA 9165 o Comprehensive Dangerous Drugs Act of 2002 ang kasong kakaharapin ng mga inarestong suspek.—sa panulat ni Angelica Doctolero

Kulong ang tatlong lalaki matapos tangkaing nakawin ang isang mountain bike sa Navotas City.

Kinilala ang mga suspek na sina James Catchuela, 18-anyos; Daniel Catchuela, 23-anyos at; Jayson Cruz, 24-anyos na parehong mga residente ng Tondo, Maynila.

Sa imbestigasyon ng mga otoridad, nabulabog ang mga residente sa bahagi ng phase 1-a, B36, L18, Barangay North Bay Boulevard South Kaunlaran, Navotas City dahil sa tahol ng aso matapos makita ang mga suspek.

Dito na lumabas ang may-ari ng mountain bike pero agad na tumakbo ang mga nakitang magnanakaw sakay ng naturang bisikleta.

Swerte namang may mga nagpapatrolya sa lugar kaya agad itong nadakma ng mga otoridad at naibalik ang nanakaw sa biktima.—sa panulat ni Angelica Doctolero