Kinumpirma ng Bureau of Immigration na naaresto sa Makati City ang car importer ng mag-asawang kontratista na sina Pacifico “Curlee” at Cezarah “Sarah” Discaya.
Ayon kay BI Deputy Spokesman Melvin Mabulac, nakilala ang car importer bilang si Cao Cheng, kuwarenta’y-uno anyos, isang Chinese national, na pansamantalang naka-detine sa Camp Crame Detention Facility.
Ipinaliwanag ni Immigration Commissioner Joel Anthony Viado na, sa kasalukuyan, ay ikinákasa na nila ang paghain ng deportation case.
Inaasahan naman na ililipat si Cao sa Immigration Detention Facility sa Taguig City pagkatapos isailalim sa inquest proceeding at iba pang proseso.
Nabatid na inaresto si Cao, na gumagamit ng alyas na “Martin Zhao,” dahil sa obstruction of apprehension, illegal use of alias, false representation, at willful representation.
