Ibinunyag ng Commission on Population and Development na patuloy na bumababa ang bilang ng nagpapakasal sa bansa at maraming Pinoy ang mas pinipiling mag-live in.
Ito’y matapos maitala ng Philippine Statistics Authority ang 10.2-percent na pagbaba ng mga rehistradong kasal noong 2024.
Ayon kay CPD Information Management and Communications Division Chief Mylin Mirasol Quiray, mas inuuna ng maraming Pilipino ang kanilang economic well-being bago pumasok sa kasal.
Batay anya sa pag-aaral ng CPD, mas marami ang pinipiling magsama nang hindi kasal dahil nakikita nila ito bilang praktikal na hakbang, lalo na kung may anak na o buntis ang babae.
Iginiit ni Quiray na nakaaapekto ang social media kung saan madalas makita ang mga kuwentong hiwalayan na nagiging dahilan para panghinaan ng loob ang mga kabataan na magpakasal.
