Itinaas sa Alert Level 3 o magmatic unrest mula sa Alert Level 2 o increasing unrest ang Bulkang Taal ngayong araw, Marso 26.
Batay sa 8:00 a.m bulletin ng Philippine Institute of Volcanology and Seismology (PHIVOLCS), nagkaroon ng short-lived phreatomagmatic burst ang bungnga ng nasabing bulkan.
Anila, sinundan din nitong sunod-sunod na phreatomagmatic activity na nagpalabas ng plumes na may taas na 1500 metro na may kasamang volcanic earthquake at infrasound signals.
Sa ilalim ng Alert Level 3, mahigpit nang inirerekomenda ang paglikas ng mga residente sa Taal Volcano Island at mga nakatira sa mga Barangay ng Bilibinwang at Banyaga sa Agoncillo at sa mga Barangay Boso-boso, Gulod, at eastern Bugaan East sa Laurel.
Paliwanag ng Philvolcs, bunsod ito ng panganib ng dala ng posibleng pyroclastic density currents at volcanic tsunami.
Mahigpit din munang ipinagbabawal ang anumang klase ng aktibidad sa Taal Lake at pinayuhan ang mga residente sa mga airborne ash at volcanic fog o mas kilala sa tawag na vog.
Dapat ding abisuhan na ng Civil Aviation authorities ang mga piloto na lumipad malapit sa paligid ng Taal Volcano. – sa panulat ni Abie Aliño-Angeles
