Iginiit ng Malakanyang na ligtas ang isla ng Boracay para sa mga nais bumisita doon.
Ito ang naging pahayag ni Presidential Spokesperson Harry Roque kasabay ng panghihikayat sa publiko na magtungo sa isla para sa unti-unting pagbubukas ng ekonomiya ng bansa.
Ayon kay Roque nananatiling COVID-free ang Boracay kaya walang dapat ipangamba ang mga nagnanais bumisita doon.
Patuloy aniyang tinututukan ng pamahalaan na mapigilan ang pagpasok ng nakahahawang sakit sa isla.
Ito umano ang dahilan kung bakit required ang pagsasailalim muna sa RT-PCR test ng lahat ng bi-biyahe patungong isla upang matiyak na walang COVID-19 carrier ang makakarating sa Boracay.
