Masayang inanunsyo ng provincial government ng Batanes na muli nang COVID-19 free ang kanilang lugar.
Sa post online ng provincial government ng Batanes, inihayag nito na ang naging susi sa muling paglaya ng kanilang lugar sa virus ay ang mahigpit na pagpapatupad ng health at quarantine protocols.
Kung kaya’t inihayag ng kanilang provincial government na saludo ito sa mga frontliners na patuloy na lumaban kontra COVID-19.
Magugunitang noong Setyembre 2020 ay naitala ang kauna-unahang kaso ng COVID-19 sa Batanes habang naitala naman ang ika-10 kaso nito noong abril 2021, sa kabila ng napakahigpit nilang pagpapatupad ng health protocols laban sa virus.
