Tiniyak ni bagong talagang Task Force Bangon Marawi Chief Retired General Eduardo Del Rosario na hindi lamang sila nakatuon sa muling pagpapatayo ng mga nasirang bahay at gusali sa lungsod.
Sa ipinalabas nitong pahayag, sinabi ni Del Rosario na maliban na pagsigurong may matutuluyan ang Internally Displaced Persons o IDP’s na naipit sa giyera, kanila ding tinitiyak kung available ang basic services tulad ng pagkain tubig kuryente at iba pa para sa IDP’s.
Giit ni Del Rosario, hindi lamang ang mga nasirang istraktura sa Marawi City ang muling itatayo ng task force kundi maging ang pangarap na magandang kinabukasan ng mga taga – Marawi para sa kanilang mga anak.
Matatandaang inamyendahan ng Malakanyang ang Administrative Order No. 3 na nagtatatag ng Task Force Bangon Marawi.
Sa ilalim ng inilabas na Administrative Order No. 9, inililipat na sa Housing Urban Development Coordinating Council o HUDCC, sa pamumuno ni Retired General Eduardo Del Rosario ang pamumuno sa bagong inter agency task force mula sa Department of National Defense o DND.
Si Del Rosario ang nabigyan ng responsibilidad sa operation at supervision ng mga proyekto ng pamahalaan para sa pag-bangon ng Marawi City.
