Pinagagawa ng Malakaniyang ang kongreso ng bagong batas para palawigin pa ang prangkisa ng ABS-CBN na mamapaso na sa susunod na buwan.
Ito ayon kay Presidential Spokesman Salvador Panelo ay dahil magkakasalungat ang opinyon ng mga mambabatas kung uubra ba o hindi na maipagpatuloy ang operasyon ng ABS-CBN kahit mapaso na ang prangkisa nito.
Ipinabatid ni Panelo na maaaring magpasa ng bagong batas ang kongreso na nagsasabing may pending na batas para sa franchise renewal.
Hindi aniya dapat matakot ang mga mambabatas sa pagbalangkas ng bagong batas dahil kailanman ay hindi nakialam ang Pangulong Rodrigo Duterte.
Sinabi ni Panelo na kahit pa i-veto ng Pangulo ang bagong batas may kapangyarihan pa rin ang kongreso na i-over ride sa pamamagitan ng two thirds na boto.
