Krystine Belen

Kinaaaliwan ng mga netizen ang kwento tungkol sa isang lalaki na nag-resign sa kanyang trabaho bilang service crew.

Ang dahilan? Wala na raw siyang oras sa kanyang jowa!

Ayon sa ulat, laging inaaya ang lalaki ng kanyang girlfriend na makipag-date sa kanya tuwing Biyernes at Sabado. Ngunit dahil may pasok siya sa mga araw na iyon, hindi niya napagbibigyan ang request ng kanyang jowa.

Sinabihan siya ng kanyang girlfriend na puro na lamang dahilan. May pasok kasi ang lalaki mula Lunes hanggang Sabado, at tuwing Linggo naman, hindi pa rin sila makalabas dahil kailangan niyang maglaba, magsimba, at magpahinga.

Dahil ayaw ng lalaki na hiwalayan siya ng kanyang jowa, napagdesisyunan niya na lamang umalis na sa kanyang trabaho.

Hiling niya sa kanyang boss, sana maintindihan nito ang kanyang desisyon.

Sari-sari naman ang reaksyon ng mga netizen na karamihan ay natawa sa pangyayari.

Komento ng isang netizen, may oras na nga silang mag-date, pero wala naman na silang panggastos sa date.

Biro pa ng isa, “Sana all kayang i-give up ang pera para sa jowa.”

Seryoso naman ang ilang netizen at sinabihan ang lalaki na dapat huwag pabayaan ang trabaho dahil mahirap mawalan nito sa panahon ngayon. Payo ng iba, time management lamang ang kailangan.

Sa halip na estudyante, isang itim na oso ang pumasok sa isang silid-aralan ng gurong si Elaine Salmon mula sa California.

Ayon sa ulat, umalis muna ang guro sa kanyang silid-aralan; ngunit nang bumalik siya rito, nakita niya ang itim na oso na kinakain ang granola bars mula sa emergency earthquake kit ng kanyang klase.

Agad na isinara ni Elaine ang kanyang classroom upang ikulong ang oso, subalit naiwan niya sa loob ang kanyang cellphone.

Nagtungo ang guro sa main office ng paaralan upang tawagan ang kanyang asawang si Ian Sawrey na nagkataong eksperto sa mga oso.

Mabilis na rumesponde si Ian na nagpalabas sa oso. Ligtas naman ang oso at ang mga tao sa paligid. Wala ring nasirang kagamitan sa loob ng silid-aralan, bukod sa earthquake kit na may lamang pagkain.

Hindi na bago sa California at sa ibang bahagi ng mundo ang mga oso at ibang hayop na nanghihimasok sa mga bahay, paaralan, at iba pang establisyemento. Dahil ito sa patuloy na pagwasak ng mga tao sa kanilang natural habitat.

Sa halip na gambalain at sirain ang likas na tirahan ng mga mababangis na hayop, mas mabuting igalang natin ang kanilang teritoryo upang mapanatili ang balanse ng kalikasan at matiyak na rin ang ating kaligtasan.

Bumuhos ang mga papuri at positibong komento para sa rider ng isang ride-hailing service na si Jester Carillo.

Hindi niya kasi sinisingil ng pamasahe ang kanyang mga pasaherong estudyante!

Ito ang ibinahagi sa social media ng isang college student na nakaranas sa kabutihan ng rider.

Ayon kay Aira Artugue na noo’y freshman student, hindi tinanggap ni Jester ang kanyang bayad na P91 para sa kanyang biyahe patungo sa kanyang paaralan sa Centro Escolar University sa Legazpi Village, Makati.

Pinilit ni Aira na iabot ang kanyang pamasahe at sa halip na kunin ito, humingi pa ng tawad ang rider dahil hindi talaga siya tumatanggap ng bayad mula sa mga estudyante.

Mas naantig pa si Aira at ang mga netizen sa iniwang mensahe ni Jester na nagsabing, “Mag-aral po kayo mabuti at sa ibang tao niyo na lang po ibalik ang kabutihan na naranasan ninyo sa akin. God bless you.”

Dahil sa kagandahang-loob at pagmamalasakit ng rider, maraming netizen ang patuloy na humahanga sa kanya. Marami rin ang nagsabing hindi man siya Olympic athlete, ngunit ang puso niya ay tunay na ginto.

Para naman kay Aira, dapat gawing inspirasyon ang mga katulad ni Jester upang maging isang marangal at mabuting tao.