Krystine Belen

Kapag nasa restaurant, kadalasang may ibinibigay sa ating libreng tinapay bago dumating ang inorder nating pagkain.

Masaya natin itong tinatanggap dahil wala na ngang bayad, nakakakain pa tayo habang naghihintay. Ngunit alam mo bang may malalim palang dahilan sa likod nito?

Nagdudulot ng pagtaas ng blood sugar level ang carbohydrates na matatagpuan sa tinapay. Upang bumalik sa normal ang blood sugar, naglalabas ang pancreas ng insulin na nagiging dahilan naman ng hunger o pagkagutom.

Ayon kay Dr. David Ludwig, isang endocrinologist at nutrition professor sa Harvard University, “foolproof way” para sa mga restaurant ang pagbibigay ng tinapay sa kanilang customers upang mas ganahan silang kumain at mas marami silang i-order.

Dagdag pa niya, maging ang fast-digesting tropical fruits katulad ng saging ay may kaparehong epekto.

Kahit na nagmumukhang mapagbigay ang mga restaurant, estratehiya nila ito upang mas lumaki ang kanilang kita. Kaya sa susunod na bigyan ka ng libreng tinapay, tandaan mo ang impormasyong ito at kumain lamang nang tama at sapat para sa iyong katawan.

Hanggang saan ka kayang dalhin ng pag-ibig?

Ang isang lalaking ito sa India, nadala ng pag-ibig sa examination room ng kanyang kasintahan!

Suot ang ilang accessories at makapal na lipstick, nagpanggap bilang babae si Angrez Singh upang kumuha ng Multipurpose Health Workers Exam ng kanyang girlfriend.

Ngunit mabilis na nabisto ang disguise ni Singh dahil hindi nag-match ang kanyang fingerprint sa biometric device ng Baba Farid University of Health Sciences. Dito na rin natuklasan ang mga gamit niyang pekeng ID.

Agad na tumawag sa mga awtoridad ang exam proctors upang ipaaresto ang lalaki.

Ni-reject din ang test application ng kanyang kasintahan at maaaring hindi na pahintulutan pang kumuha ng health worker’s exam sa hinaharap.

Gaya ng inaasahan, napukaw ng insidenteng ito ang atensyon ng mga netizen na pabirong nagsabing relationship goals ang dalawa.

Amusing man para sa netizens, isang paalala ang pangyayaring ito na hindi kailanman dapat gawing rason ang pag-ibig upang sumuway sa batas.

Kilala ang mga Japanese sa pagiging disiplinado at magalang. Sa katunayan, itinuturing sila bilang standard pagdating sa mga katangiang ito.

Ito ay dahil bata pa lamang, itinuturo na sa kanila ang tamang asal.

Patunay rito ang isang batang Japanese na nagpakita ng ligtas at tamang paraan ng pagtawid sa kalsada sa isang viral video.

Upang tumawid, kailangan munang tumayo ng bata sa stop road marking malapit sa pedestrian lane at maghintay.

Kapag huminto na ang mga sasakyan, tatawid na ang bata habang nakataas ang kamay, isang signal na nagsasabing, “Please stop.”

At kapag ligtas nang nakarating sa kabilang bahagi ng kalsada, magpapasalamat ang bata sa driver sa pamamagitan ng pag-bow o pagyuko.

Hinangaan naman ito ng mga netizen. Karamihan sa kanila, natuwa sa disiplinang ipinakita ng mga batang Japanese.

Pinuri rin nila ang pagsunod ng mga residente sa mga patakaran at regulasyon sa kalsada.

Isang Pinoy netizen naman ang ikinumpara ito sa Pilipinas at nagsabing binubusinahan pa ng mga driver ang mga tumatawid, kahit nasa pedestrian lane naman. Ang iba pa nga, binibilisan lalo ang pagmamaneho kapag dumadaan dito upang hindi na huminto at maabutan ang mga tumatawid.

Kaya kung ikaw ang tatanungin, dapat bang tularan sa Pilipinas ang ganitong paraan ng pagtawid ng mga Japanese?

Minsan, nararanasan nating ma-conscious bigla dahil akala natin, nangangamoy na tayo. Ngunit alam mo ba na para sa ibang tao, seryosong problema ito?

Ito ay dahil mayroon silang sakit na tinatawag na olfactory reference syndrome.

Ang olfactory reference syndrome ay halimbawa ng obsessive-compulsive and related disorder. Psychiatric condition ito kung saan naniniwala ang isang tao na mayroon siyang mabahong hininga, kili-kili, o utot—kahit wala naman talaga.

Nagdudulot ang olfactory reference syndrome ng extreme social anxiety, paranoia, at isolation. Kadalasang iniiwasan ng mga apektado nito ang pumunta sa social events, maging sa trabaho, dahil nahihiya sila sa kanilang amoy. Kahit sabihan silang wala naman silang amoy, hindi sila naniniwala.

Napagkakamalan din nilang ang mga aksyon ng iba gaya pagsinghot, pagtakip sa ilong, o pagbubukas ng bintana ay dahil sa amoy nila.

Mahalagang mabigyan ng tamang atensyon at pangangalaga ang mga taong may obsessive-compulsive and related disorders.

Sa pamamagitan ng maayos na edukasyon at suporta mula sa mga mahal sa buhay at propesyonal, posibleng malabanan ang mga hamon na dulot ng ganitong mental health illness.