Krystine Belen

Bakas sa mukha ng isang batang lalaki ang pagkalito nang marinig ang salitang Tagalog na ‘kanin.’

Kailangan niya kasi itong i-spell sa finals ng Scripps National Spelling Bee, ang taunang competition sa Amerika.

Mula sa San Bernardino, California ang 12-anyos na si Shrey Parikh. Siya ang pinakabatang finalist sa prestihiyosong national spelling bee.

Nang marinig niya ang salitang kanin, higit sa isang minuto niya ito pinag-isipan.

Sa kasamaang-palad, ini-spell niya ito bilang “kanan” at natanggal sa finals.

Dahil dito, nakamit niya ang ikatlong pwesto.

Gayunman, hindi rito natatapos ang kanyang paglalakbay. Ayon nga sa head judge ng national spelling bee na si Mary Brooks, mayroong self-drive o sariling determinasyon na magtagumpay si Shrey na makatutulong sa kanya sa mga paparating na taon sa kanyang buhay.

Ang graduation ng sariling anak ang isa sa mga pinakahihintay na pagdiriwang ng isang magulang. Kaya kadalasan, inaalay ng mga anak ang kanilang graduation song sa mga proud na magulang bilang pasasalamat sa kanilang naging sakripisyo.

Ganito mismo ang ginawa ng isang paaralan sa Bohol para sa kanilang moving up ceremony.

Ngunit nang lumapit ang mga estudyante sa kanilang mga magulang upang yumakap at magpasalamat, mag-isang naiwan sa kanyang kinatatayuan ang 16-anyos na si Carl Dionne.

Dahil wala siyang kasama sa seremonya, tahimik na lamang siyang napaluha.

Laking gulat niya nang mayroong isang guro na yumakap sa kanya.

Ilang saglit lang, dinamayan siya ng iba pang mga guro.

Mas naging emosyonal ang binatilyo nang lapitan siya ng kanyang mga kaklase upang makisimpatya.

Isang araw bago ang moving up ceremony, isinugod sa ospital ang bunsong kapatid ni Carl.

Pupunta naman sana ang kanyang tiyahin at lola, ngunit sa kasamaang-palad, lumakas ang ulan at na-flat ang gulong ng kanilang sinasakyang motorsiklo.

Ang mga ito ang dahilan kung bakit walang kasama si Carl.

Nang mapanood ang video ng umiiyak na anak, napaluha na lang din ang kanyang ina. Naawa siya sa anak at nadurog ang kanyang puso dahil matagal niya iyong hinintay.

Naintindihan naman ni Carl ang sitwasyon dahil alam niyang mahalaga ang kanyang bunsong kapatid at mahal na mahal niya ang kanyang ina.

Wala man siyang nakasama sa kanyang graduation, naiparamdam naman ng mga nagmamahal sa kanya na hindi siya nag-iisa.

Para sa karamihan, isang pangarap na mahirap abutin ang pagiging isang milyonaryo. Ngunit ang isang baboy na ito mula sa South Africa, nakamit ang kanyang millionaire status sa pamamagitan ng pagpipinta.

Siya si Pigcasso the Painting Pig, isang world-renowned artist.

Iniligtas ni Joanne Lefson, isang animal rights activist, si Pigcasso mula sa katayan noong 2016. Mula noon, mapayapang nanirahan sa isang animal sanctuary ang baboy.

Unang napansin ni Lefson ang pagkahilig ni Pigcasso sa pagpipinta nang makitang sinisira nito ang lahat ng kagamitan sa kanyang kulungan, maliban sa paintbrush na iniingatan niya.

Gamit ang kanyang bibig, ipinipinta ng baboy ang kanyang napupusuan. At kapag tapos na ang kanyang masterpiece, tinatatakan niya ito ng kanyang snout o nguso.

Tinatayang 500 paintings ang nagawa ni Pigcasso. Ang isa niyang likha, naibenta pa sa halagang $26,500 o tumataginting na P1.5 million!

Dahil high-demand si Pigcasso, pumalo sa higit $1 million o P57 million ang kanyang naging kita mula sa pagpipinta. Napupunta ang perang ito sa food supplies, veterinary bills, at sa iba pang pangangailangan ng animal sanctuary.

Sa kasamaang-palad, nitong March 2024 pumanaw si Pigcasso sa edad na walong taong gulang dahil sa sakit na chronic rheumatoid arthritis.

Gayunman, sa kanyang maikling buhay, naipakita niyang tunay at likas na matalino at malikhain ang mga hayop na dapat nating alagaan at irespeto.

Nanawagan sa publiko ang mga netizen na huwag kalimutang isauli ang coaster buzzer na nagbibigay abiso sa mga customer ng fast-food chains na handa na ang kanilang inorder na pagkain.

Ang coaster buzzer ay isang paging system na ginagamit ngayon sa food establishments.

Sa pamamagitan ng pag-flash at vibrate, malalaman ng customers na handa na ang kanilang order at maaari na itong kunin sa counter.

Ngunit imbes na ibalik ang ipinahiram na coaster buzzer, inuuwi umano ito ng ibang customers.

Katulad na lamang ng isang vlogger na ipinost pa ang larawan ng naiuwing buzzer.

Isang netizen ang nagsabing sa store nila galing ang nakuhang buzzer at siningil umano ng P500 ang kanilang ka-crew upang mapalitan ito. At dahil naawa sila sa kasamahan, naghati-hati sila rito para mabayaran.

Kaugnay nito, may isang tauhan din ng fast-food chain na naglabas ng sama ng loob dahil sa inuuwing buzzer.

Saad niya sa kanyang post, “Hindi niyo naman po mapapakinabangan yan. Kung sa tingin niyo katuwaan lang sa inyo ang pag uwi ng gamit, sa amin po hindi, kasi kinakaltas po sa sahod namin. P500 po ang isa niyan. Hindi po biro ang binabawas sa sahod namin.”

Kaya panawagan ng mga netizen, maging responsableng customer at magkaroon ng simpatya sa crew na nagtratrabaho lamang nang patas para sa kanilang pamilya.

Sa edad na 78, natupad ni lola Salvacion Jurinario mula sa Jaro, Iloilo City, ang kanyang pangarap na makakuha ng high school diploma.

Isa kasi siya sa 45 passers ng Alternative Learning System (ALS) sa Buntatala National High School.

Tubong Himamaylan sa lalawigan ng Negros Occidental ang pamilya ni lola Salvacion. Pang-anim siya sa siyam na magkakapatid.

Dahil sa hirap ng buhay simula pa noong bata siya, isinantabi niya muna ang kanyang pag-aaral.

Ngunit hindi ito naging hadlang para kay lola Salvacion na tuparin ang kanyang pangarap na makapagtapos.

At nitong May 30, 2024, naranasan na niya sa wakas ang pakiramdam ng pagmamartsa sa entablado sa kanyang graduation ceremony.

Para kay lola Salvacion, “anghel” ang kanyang naging teacher na si Rossniño Pasaporte na gumabay sa kanyang paglalakbay bilang estudyante.

Higit sa lahat, labis ang pasasalamat niya sa Panginoon dahil sa pagdating ng mahalagang tagumpay na ito sa kanyang buhay.

Sa kabila ng paglipas ng panahon at mga pagsubok na kanyang hinarap, ipinakita ni lola Salvacion na posible pa ring makamit ang ating mga pangarap, basta’t mayroon tayong determinasyon at pananalig.