Krystine Belen

Hindi maikakailang matibay ang ugnayan sa pagitan ng mga alagang hayop at kanilang amo.

Sa isang viral video, makikita ang isang magsasaka na nakatungo at tila nababalot ng kalungkutan.

Nilapitan siya ng kanyang dalawang aso at sinubukan siyang pasayahin, subalit hindi man lang kumibo ang lalaki.

Dahil bigo sa kanilang misyon, umalis ang mga aso. Ilang sandali lamang, isang kakaibang pangyayari ang nakunan ng video.

Bumalik din ang mga aso sa kinauupuan ng magsasaka, ngunit sa pagkakataong ito, may kasama na silang isang baka.

Lumapit ang baka at isinandal ang kanyang ulo sa lalaki upang damayan ito.

Maya’t maya pa, may dumating pang apat na baka na tila tinawag din ng mga aso.

Sa kanilang munting paraan, sinubukan ng bawat hayop na pagaanin ang loob ng lalaking nag-aalaga sa kanila.

Patunay ang video na ito na totoong may malasakit ang mga hayop sa mga tao. Kaya’t nararapat lang ding suklian natin ang pagmamalasakit na ito sa pamamagitan ng wastong pag-aalaga at pagbibigay ng buong pagmamahal sa kanila.

Sa kanyang paglaki, nais ng anim na taong gulang na si Aries na maging isang jeepney driver.

Paborito niya kasing sumakay sa Blue 10F jeep, isang pampasaherong jeep na bumabiyahe sa Cebu City.

Ngunit sa kasamaang-palad, maagang natuldukan ang mga pangarap ng bata nang pumanaw siya dahil sa severe sepsis.

Bilang regalo sa kanyang kaisa-isang anak, pininturahan ng inang si Nida Villarte ang puntod ni Aries upang magmukhang asul na pampasaherong jeep.

Noong nakaraang Mayo, nagkasakit si Aries. Nagsimula ito sa UTI na nasundan ng tonsilitis.

Hindi masyadong nag-alala si Nida dahil hindi naman mataas ang lagnat ng anak.

Subalit isang araw, nag-umpisang mag-hallucinate si Aries at pag-aakala niya, nakasakay sila sa jeep. Tinanong niya pa ang kanyang ina kung magbabayad na sila ng pamasahe.

May pagkakataon ding masayang-masaya si Aries at sinasabing parating na ang Blue 10F jeep, kahit nasa kwarto lang naman ang bata.

Idinala sa ospital si Aries, ngunit binawian din ng buhay noong nakaraang Hunyo.

Upang maibsan ang pangungulila ni Nida sa anak, pinagmukha niyang jeep ang puntod ni Aries para matupad ang pangarap nitong maging driver—kahit man lang sa kabilang buhay.

Upang tugunan ang problema sa mga hayop na pagala-gala sa mga kalsada, ipinatutupad ng North Luzon Expressway (NLEX) Corporation ang programang “I Care for Strays”.

Layon ng nasabing programa na iwasan ang aksidenteng kinasasangkutan ng mga hayop sa loob ng expressway at sa kahabaan ng mga lokal na kalsada.

Inilunsad ang I Care for Strays sa Barangay Patubig, Marilao, Bulacan bilang bahagi ng Mission Road Safety campaign ng NLEX.

Sa paglulunsad ng programa, isang oryentasyon tungkol sa animal welfare laws, responsible pet ownership, at pagkontrol sa populasyon ng mga ligaw na hayop ang isinagawa para sa mga nag-aalaga ng hayop sa Marilao at sa mga kalapit na bayan.

Sa nasabing event, higit sa 300 aso at pusa ang nakinabang sa libreng kapon, deworming, at anti-rabies vaccinations.

Ayon kay NLEX vice president for communication and stakeholder management division Donna Marcelo, paraan nila ang I Care for Strays program upang itaguyod at protektahan ang kapakanan ng mga hayop, kasabay sa pagtitiyak sa kaligtasan ng mga motorista at residente.

Pinuri naman ni Bulacan Gov. Daniel Fernando ang adbokasiya ng NLEX at binigyang-diin na mahalagang hakbang tungo sa mas ligtas at mas maayos na kalsada ang pagmamalasakit sa kapakanan ng mga hayop.

Kapag may pagala-galang hayop sa gitna ng kalsada, hindi lamang buhay nila ang nanganganib, kundi pati na rin ang buhay ng mga motorista, dahil maaaring magdulot ng aksidente ang biglaang pag-iwas o pagpreno sa sasakyan.

Sa pamamagitan ng masusi at wastong pangangalaga sa mga hayop, partikular na sa mga walang tirahan, matitiyak nating mas magiging ligtas ang ating mga kalsada.